Matiu 13

U haharuei tara katuun te tsihasein a man ngal

(Mak 4:1-9, Luk 8:4-8)

1Nonei noahas turu lan be Iesu e la ba nena a luma mena gumna i rehina Ramun a Perperere i Galili, me hihatutsina. 2A katuun a parpara koru te gono hahiseien, ba nonei ena töa osana tara tolaala me gumna, ba u katuun te tuolria i kotolana.

3Ba nonei e hatei raneien a parpara koru a ka turu haharuei me poeiena, “Hahengoiam. A töa katuun ena tsihasein a man ngalin kannou. 4Ba tara pöata te tsihasa naien a man ngal tara kui, ba palaina a man ngal e pururuku ria i maroro, ba u apena e la rima memi nou hakape ren. 5Na palaina a man ngal i pururukuia turu tsiktsiki te kamei u lapo, ba man ngal e pusuku boroboro tunur, taraha u tsiktsiki ema pongotoi. 6Ba pöata te la seima a pitala me piri halangoe nen, taraha nori ima kanoa mei ta poloso. 7Na palair a man ngal i pururukuia i gusuna u kolits u hihitoka, ba u kolits e panir me kato homier a man kaan leba teka. 8Ba palair a man ngal e pururuku ria turu tsiktsiki u niga, me panir me huar. A palai i ka mei a hua a parpara koru, na palai i ka mei a hua te gamon para, na palai i kamei a hua tema para balai.”

9Be Iesu e poeiena, “Esi te kamena u talinga ega hengo.”

A ka te haharuei sil e Iesu

(Mak 4:10-12, Luk 8:9-10)

10Ba u katunun tsitsilo e la uarima tere Iesu me rangate ren, “E hana ba lö te ranga meramen turu haharuei?”

11Be Iesu e ranga palis ranen, “Alimiou e atei silemiou u ranga momous tara nipepeito kapanina i Kolö. Kaba nori ema ateiri.

12“A katuun te ateina, e Sunahan e hala lele noien a niatei a para. Kaba a katuun tema ateinei, e Sunahan e luba nanou a tsitabubun niatei te ka menen. 13Nonei koru a ka te ranga sila meragien lia turu haharuei, taraha nori e tarar kaba ema tarari, na nori e hahengor kaba ema hengori na ema atei has ri. 14Na u raranga tere propet Aisaia e butu hamana koru talana te poeiena,

‘Alimiou e hahengo mou kaba ema atei sile moi a ka te hengoe milimiou.

Na limiou e tara mou, kaba limiou ema tara marei moi aha te tare milimiou.

15Be Sunahan e poeiena, U katuun teka a man tui i taren e tupu hakapa.

Na man talinga i taren ema antunan hengo korunei, na nori e hasoheier a mataren.

Taraha, a mataren e namots tarana,

na talingaren e namots hengona,

ne na mots ateir.

Nori ena mots habirits uarima i tar

balia te kato haniga ragen.’

16“Kaba limiou e tatei sasaalamiou. Taraha, a mata milimiou e tarana, na talinga milimiou e hengona. 17Na lia e hatei hamana ragou limiou! U propet u para na u katuun u matsköra i manasa i ngilin tara korui a manka te tare milimiou, kaba nori ima antunan tareien. Na nori i ngilin hengo korui a manka te hengoe milimiou, kaba nori ima antunan hengoeien.”

E Iesu e ranga hatararein u haharuei

(Mak 4:13-20, Luk 8:11-15)

18Be Iesu e poeiena, “Hengo tala iam, u haharuei tara katuun te tsihasein a man ngal. 19U katuun te hengoer u raranga tara nipepeito kap ba tema atei silerien, e Satan ena la nama romana bate lubanena a tsi niatei te kana i tori milimiou. E herenei a man ngal ti tsihasa naia i maroro. 20Na man ngal ti tsihasa naia turu tsiktsiki te ka mena u lapo e here nei u katuun te hengoer u raranga bate toul boroboro merien a nisasaala. 21Kaba nori ema lu hongo menari u raranga tere Sunahan i taren, ba nori te ka taleier a tsitabubun pöata puku. Ba pöata te omi mera rien u katuun te hamana mena rien u raranga tere Sunahan bate kato hatiamer u hakhakats i taren, ba nori te tori polasa boroboro tuneren.

22“Na man ngal ti tsihasa naia tara kolits a hihitoka e here nei u katuun te hengoer u raranga, kaba nori e ka mer u hakhakats pan tara nitöatöana i puta, bate ngileier tegi lu menai ta moni ta parpara. Na manka teka e here nei e pil kakap nena u raranga tere Sunahan batema habute nei ta markato ta niga turu katuun teka. 23Kaba a man ngal ti tsihasa naia turu tsiktsiki u niga e here nei u katuun te hengoer u raranga bate atei sile ren. Ba u raranga te kato hanige iena a markato turu katuun teka: a palai e niga korur, na palai e gamon nigar na palai e niga hatsitabubu tunur.”

U haharuei turu pulung u omi te butuna tara kui

24Be Iesu e ranga mera nei u katuun u taina u haharuei me poeiena, “A Nipepeito tere Sunahan ega herei a katuun te tsihasein a ngalin wit a niga tara kui i tanen. 25Kaba tara pöata ti soho hakapaia u katuun ba pakö i tanen e la nama memi tsihasa nena a huana u pulung u omi i gusuna a kuin wit, me lana. 26Ba pöata te pusukuema a man ngalin wit be huana, ba u parpara u pulung u omi e butu hasina.

27“Ba u katunun kui tere tamana kui e la rima memi poeier, ‘O tsunono, alö u tsihasein a man ngalin wit a man niga tara kui i tamölö, kaba ime temar butu uu parpara u pulung u omi?’ 28Ba nonei e poeiena, ‘A katuun a omi te kati a ka teka.’ Ba nori e rangate ren, ‘Galö e ngilem alam gona pate ban u pulung?’

29“Ba nonei e poeiena, ‘E möa. Alimiou ena mots pate ba has namiou u wit te sohalana turu pulung tegona pate ba mena milimiou u pulung u omi. 30Hakeiam u wit na u pulung u omi egi pan hoboto antunana tena tangoho noa u wit. Ba lia te ranga meragou u katuun tena gone riou a kannou a tangoho, pate mam meiam u pulung u omi bate kits ramen batena lapo ramen turu tula. Ba limiou te töan gone miou u wit batena haka ramen tara luman haputu kannou i tar.’”

U haharuei turu ngalin mastet

(Mak 4:30-32, Luk 13:18-19)

31-32Be Iesu e hatei raneien u taina u haharuei me poeiena, “A Nipepeito tere Sunahan e here nei u ngalin mastet, te tetenei koruna. Ba katuun e lue nen bena tsihasa nanen tara kui i tanen. Ba tara pöata te pan ien, e pan bala koru lenin a man kaan leba hoboto, bate butu here nei u ruei. Ba u apena te la rima batemi katoeria a man suhana tara man kalan ruei i tanen. Na Nipepeito tere Sunahan e tania hatetenei hasina batena töan pan susuluna.”

U haharuei turu is

(Luk 13:20-21)

33Be Iesu e ranga mera neien u taina u haharuei me poeiena, “A Nipepeito tere Sunahan e here nei u is te luena a tahol bate sohale neien a töa taram palaua, ba i murinen ba palaua hoboto te la seina.”

A man haharuei tere Iesu

(Mak 4:33-34)

34A mamanaka hoboto teka e Iesu e hatuts raien u katuun turu haharuei. Nonei ema tatei ranga hamatskö nai ta ka i taren, e subun hihatuts lasia i taren turu haharuei. 35A ka teka e kato hantoeiena u raranga te rangein a propet,

“Alia e ranga goua turu haharuei tego ranga uu lia i taren.

Alia e ranga mera gouien a manka tima atei sileien i manasa koru batemi antunana i romana.”

E Iesu e ranga hatararein u haharuei turu pulung u omi

36Be Iesu e la ba rena u katuun me tasuna tara luma. Ba u katunun tsitsilo i tanen e la uarima i tanen ba töa i taren e poeiena, “Hatei ramei lam aha te poeiena u haharuei turu pulung te kana tara kui.”

37Be Iesu e ranga palis ranen me poeiena, “A katuun te tsihasein a man ngal a man niga e here nei Alia tu butun Katunuma. 38Na kui e here nei u han hoboto i puta. Na man ngal a man niga e here nei u katunura tara Nipepeito tere Sunahan. Na u pulung u omi e here nei u katuun tere Satan. 39Na katuun a omi te tsihasein u pulung tara kui, nonei e Satan. Na pöata te gone ria a kannou a tangoho e here nei a kapakapana pöata turu han i puta. Na u katuun te goner a kannou a tangoho tara kui, nori u angelo. 40Na te gono menari u pulung bate haatse ria turu tula, nonei te kato uanen romana tara pöata te kapana romana a han. 41Alia tu butun Katunuma e hala raguma romana u angelo i tar, ba nori temi luer romana a mamana katuun te roron kato homir na u katuun has te tuke rer a palai bate kato homir, bate luba raria romana tara Nipepeito i tar. 42Ba nori te lapo merari romana turu pannen u tula. Ba nori te tabe hohomi ria romana turu tula teka bate har hasir. 43Ba u katuun u matskö te alesala hereri romana a pitala tara Nipepeito tere Tamaren. Na lö a katuun te ka mem u talinga alö go hengo haniga!”

U haharuei tara moni

44Be Iesu e poeiena, “A Nipepeito tere Sunahan e here nei a bokis moni pan te hamouse ria tara kui. Ba töa katuun temi sabe nen bate hamous lele nen. Ba nonei te sasaala koruna, batena hahol nena a mamanaka hoboto i tanen, batemi töan holena nonei a kui.”

U haharuei turu kabono te ka mena a hol pan

45Be Iesu e ranga lenina me poeiena, “Na Nipepeito tere Sunahan e here nei a katunun hahol te sake la nena tu kabono tu niga koru. 46Ba tara pöata te sabe nen u töa u kabono u niga koru, a hihol i tanen e la sei koruna, ba nonei te töan hahol hakapan töa nena a mamanaka hoboto te ka menen, batena töan holena nonei u kabono.”

U haharuei tara abe

47E Iesu e ranga lel me poeiena, “Na Nipepeito tere Sunahan e here nei a abe te lapo naria i tasi bate soohena a mamana mar iena. 48Pöata te saputu nen, ba u katuun te hagalar te las menari a abe i mounsingmou bate hagum mer te arena menarien u iena u niga, bate honge rien turu bona i taren, bate baner a pala te omina. 49-50Te markato has uaren romana tara pöata te kapana romana a han. U angelo e la rima romana batemi arena rariou u katuun u omi na u katuun u niga, bate lapo ba raria romana u katuun u omi turu pannen u tula. Ba nori te tabe hohomi ria romana turu tula bate har hasir.”

U raranga u tsimus na u rangana i manasa

51Be Iesu e rangana turu katuun ti hahengoia i tanen me poeiena, “Alimiou e atei sile miou a man raranga te katoe gula lia?”

Ba nori i poeier, “Aa.”

52Ba nonei e poeiena i taren, “U tson hihatuts hoboto tara Lo, na limiou u katunun tsitsilo has i tar tara Nipepeito tere Sunahan, alimiou e heremi a katuun terena luma te lue nama a manka a man tsimus na manka man toutounei tara makumun haputu i tanen.”

U katunur i Nasaret i tori tsugani e Iesu

(Mak 6:1-6, Luk 4:16-30)

53E Iesu e ranga hakapein a man haharuei teka, me la ba nena nonei a han. 54Ba nonei e la pouts uana tara han i tanen i Nasaret. Ba nonei e tanian hihatutsna tara luman lotu turu Jiu. Ba u katuun ti hengoeien e asingoto korur me poeier, “Ime te luema a katuun teka a mar niatei na mar nitagala temar kato uana teka? 55Nonei toum banei a pien tere Josep a kapenta na e tsinanen toum te ngöeri e Maria na u toulanen toum ere Jemis mere Josep na e Saimon na e Judas? 56Na u hahinanen toum hoboto e ka gono has merariora? Gime te lue men a mar nitsunono teka?” 57Ba nori e raharahe ren.

Be Iesu e poeiena i taren, “A propet tere Sunahan e ka mena a solo turu han hoboto. Kaba u katunura i han pouts i tanen na i luma has i tanen nori ema hatsitsie rien nema hatsunone rien.” 58Na nonei ema katoei tu mirakol tu parpara i han i tanen, taraha u katuun i tanen e hahamana naren.

انتخاب شده:

Matiu 13: HLA 2020

های‌لایت

به اشتراک گذاشتن

کپی