Matiu 14

E Jon a Tsonun Baptais e mate hakapa

(Mak 6:14-29, Luk 9:7-9)

1Tara pöata teka e Herot a King e hengoen a man raranga hatei tara manka te katoe e Iesu. 2Ba nonei e poeiena turu katunun kui i tanen, “Nonei lasi e Jon a Tsonun Baptais te takei poutsia tara tou mate. Nonei te ka beneien a nitagala te kato meneien a man mirakol.”

3I mam nen e Herot e pile kapiin e Jon, be kitsenen bena hakenen tara karabus. Nonei e kato mei a ka teka a ngilina e Herodias a tahol tere Pilip, e toulanen. 4Taraha e Jon e ranga mei e Herot me poeiena, “E ma niga koru nei tego tölo menai lö e Herodias!” 5Be Herot e katsin atung hamatie nen, kaba nonei e matoutir u Jiu. Taraha, nori i pei e Jon a töa propet.

6-7Na turu lan ti hatöatongeia u lan ti poseia e Herot ba nori e katoeier a kannou pan na u hirata, ba pien tahol a kukubei tere Herodias e sanina i matar u katuun hoboto ti kaia tara kannou. Be Herot e haniga korueiena te sani uen, me ranga hamana koru menen turu ranga te mana uana iasa me poeiena, “Ta saha ta ka te ngile moa lö i tar, alia e hale goien lö!” 8Be Herodias e ranga meiena a pien tahol i tanen, “Alö ena mar ranga uamou teka tere Herot, ‘Hakema a bakuna e Jon a Tsonun Baptais tara pelete ba lö temi hala mien lia.’” Ba pien tahol ena mar ranga has uana teka. 9E Herot e tori tiama koru, kaba nonei e kato hakapa talei u ranga u mana i matar u katuun ti nou gono meien, ba nonei e hatangana tala nena u raranga tara tahol. 10Ba nonei e tahulena a töa tsonun taratarakap egona söatema a bakuna e Jon. Ba tsonun taratarakap ena ngats kotsena a bakuna e Jon. 11Ba u baku e hake rima tara pelete me haleri a pien tahol, ba nonei ena hale neien e tsinanen. 12Ba u katunun tsitsilo tere Jon e la rima, me luer a tuenreinen mena kaho naren. Ba nori ena hateier e Iesu.

E Iesu e hanouri a 5,000 tara katuun

(Mak 6:30-44, Luk 9:10-17, Jon 6:1-14)

13Pöata te hengo naia e Iesu e Jon e mate, ba nonei mera u katunun tsitsilo i tanen e la ba ner a han teka, me osa ria tara tolaala me la uar tara töa han tema kame ii ta katuun. Ba u katuun u parpara koru e hengoner te la ba meien a taun ba nori e kukute sila nalila e Iesu i maroro. 14Be Iesu ena hasunguna me koul ba nena a tolaala. Ba pöata te tara raien u katuun u parpara koru, ba torinen e taatagi koru ranen, ba nonei e kato haniga pouts rena u katuun ti kamei a siki.

15Ba tara pöata te lahi hamanasama ka ba u katunun tsitsilo i tanen e la uarima i tanen memi poeier, “A ka e lahibong hakapa tala, na e möa ta han tara makum teka. Hala mera lei u katuun tara matsi han te sukusukur batena hol peiseier ta kannou i taren.” 16Be Iesu e poeiena, “Nori ema antunan lari. Alimiou go hala ramien ta ka tegi nouen.” 17Ba nori e poeier, “Alam e ka puku meiem a tolima a beret na huol a iena.”

18Be Iesu e poeiena, “Lu mena mumei i tar.” 19Ba nonei e ranga merena u katuun egi gum ia turu garas. Ba nonei e luena a tolima beret na huol a iena, me tara sei uana i Kolö, me haniga uana tere Sunahan. Ba nonei e posepose iena a beret me hala raneien u katunun tsitsilo, ba nori e molamola rarien u katuun. 20Ba nori hoboto e nour me masulur. Ba u katunun tsitsilo e luer a maloto na huol a kalobaka a saputu tara man kannou ti nouba naien. 21U hihase turu katuun ti nou e sukusukuia turu 5,000 tara pal tson peisa, kaba a touhaliou na galapien ima ase raien.

E Iesu e tataalaia i ieluna u ramun

(Mak 6:45-52, Jon 6:15-21)

22Be Iesu e ranga merena u katunun tsitsilo egi osaia tara tolaala, bate la mam uar i hapalana ramun a perperere, ba nonei te töan hala kalakala rena u katuun. 23I murina te hala kalakala raien u katuun, ba nonei e la sei pepeisa uana turu pokus tena singo uaien. Ba pöata te lahima a ka, ba nonei e ka pepeisana turu pokus. 24Tara pöata teka a tolaala e la halehana ba hakapein a mounsingmou, ba lomolomo e la uanama i matana a tolaala ba u keikei e kato hagigere iena a tolaala. 25Ba tara sukusukuna lunlan, be Iesu e la uanama i taren me tataala silanama ioluna u ramun. 26Ba pöata ti tareia u katunun tsitsilo te tataala uama e Iesu ioluna u ramun, ba nori e toltololo koru mer a nimatout. Nori i ku hohomi koru me poeier, “A liliahanei!”

27Be Iesu e ranga boroboro uana i taren me poeiena, “Alia ba. Möa tu matout iam!” 28Be Pita e ranga palisenen, “O Tsunono, tego Iesu hamana koru u lö, ranga memoulia balia te tataala sila goa ioluna u ramun bate la uagou i tamölö.” 29Be Iesu e poeiena, “Lama!” Be Pita e koulna tara tolaala me tataala lala ioluna u ramun me lauana tere Iesu. 30Kaba pöata te tareien a lomolomo ba nonei e matout koruna, me tanian rukuna. Ba nonei e ku uana tere Iesu me poeiena, “O Tsunono, taguhe moulia!”

31Be Iesu e hasöa boroboro nena a limanen me pile nanen me poeiena, “Alö e kamem u nihamana u tetenei koru! Aha tsiponi te hula hakats memulalö?” 32Ba pöata ti osaien tara tolaala, ba lomolomo e seloho poutsuna. 33Ba u katunun tsitsilo ti kaia tara tolaala e hatsunoner e Iesu me poeier, “U mana koru, alö a Pien Tson tere Sunahan!”

E Iesu e kato haniga poutsir u katunura i Genesaret

(Mak 6:53-56)

34-35Ba nori e aroher a ramun mena sung ria tara han i Genesaret, ba u katunura i Genesaret e mareier e Iesu. Ba nori e hangö rer u katuun hoboto ti kamei a siki tara mamana han hoboto memi piou rarien tere Iesu. 36Ba nori i ranga hatagala hoboto siler tegi hapile tuun meraien u katuun ti kamei a siki i runguna u hasobö tere Iesu. Ba u katuun hoboto ti sebeleia turu hasobö i tanen e niga poutsur.

انتخاب شده:

Matiu 14: HLA 2020

های‌لایت

به اشتراک گذاشتن

کپی