प्रेरितहोन 2
2
पवित्र आत्मा को उतरनो
1जब पिन्तुकुस्त को दिन आयो, मंनजे ते वे सब एक जगा जमा था. 2अचानक बद्दल से बडी आधी को जसी संनसनाहट को बोल हुयो, अरु ओका से पूरो घर जहा वे बठ्या था गुजी गयो. 3अरु उनने अंगार की सी जीभ फुटती हुइ दिखइ दि अरु उनमे से हर एक पर अय ठैरी. 4वे सब पवित्र आत्मा से भरी गया, अरु जो प्रकार आत्मा ने उनने खे बोलन की सामर्थ्य दी, वे अलग अलग भाषा बोलन लग्या.
5बद्दल का नीचे की हर एक जात मे से भक्त यहूदीया यरुशलेम मे र्हि रा था. 6जब यो अवाज हुयो ते गर्दी हुय गइ अरु इन्सानहोन चकित हुइ गया क्युकि हर एक खे योइ सुनइ देतो थो कि ये मरा भाषा मे बोली र्हा हइ. 7वे सब चकित अरु अचम्भित हुइ खे बोलन लग्या, देखनु, ये जो बोली र्हा हइ सब गलीली नी. 8ते फिर क्यु हम से हर एक अपनी अपनी जन्म भूय कि भाषा मे उनकी सुनस हइ. 9हम जो अरु मेदी अरु एलामी अरु मेसोपोटामीया अरु यहूदीया अरु कप्पदुकिया अरु पुन्तुस अरु आसिया, 10अरु फ्रुगिया अरु पंफूलिया अरु मीस्र अरु लीबिया देश जो कुरेने का आस पास हइ, या सब देशहोन का र्हेनआला अरु रोमी प्रवासी. 11मंनजे यहूदीया अरु यहूदीया मत धारण करणआला, क्रेती अरु भी हइ, पन अपनी अपनी भाषा मे उनसे परमेश्वर का बडा बडा काम होन की चर्चा सुनास हइ. 12अरु वे सब चकित हुया अरु घबर्ये का एक दूसरा से बोलन लग्या, “यो का हुइ र्हो हइ?”
13पन दूसराहोन ने मजाक करी खे बोल्यो, वे तो पीखे नशा मे चूर हइ.
पतरस
14जब पतरस वे ग्यारा का साथ खडो हुयो अरु उचा अवाज से बोलन लग्यो, हे यहूदीयाहोन अरु हे यरुशलेम का सब र्हेनआलाहोन, यो जानी लेकी अरु न लगैइ मरी बातहोन सुननु. 15जसो तुम समझी र्हा हइ, ये दुन्या नशा मे नी हइ, क्युकि अभी तो दुपार ही दिन चड्यो हइ. 16पन या वा बात हइ, जो योएल भविष्यव्दक्ता का वजेसे बोली गइ हइ.
17परमेश्वर बोलस हइ, कि आखरी का दिनहोन मे असो हुये
कि मी अपनी आत्मा सब इन्सानहोन पर दिह्यु
अरु तुम्हारो बेटो अरु तुम्हारी बेटीहोन भविष्यव्दाणी कर्ये
अरु तुम्हारा जवान दर्शन देख्ये
अरु तुम्हारा बापदादा दृष्टान्त देख्ये.
18क्युकी मी अपना दासहोन अरु अपनी दासीहोन पर भी उन दिनहोन
मे अपना आत्मा मे से दिह्यु अरु वे भविष्यव्दाणी कर्ये.
19अरु मी उपर बद्दल मे अदभुत काम
अरु नीचे धरती पर चिन्ह मंनजे खुन अरु आंग
अरु धुवा को बद्दल दिखायु.
20प्रभु को महान अरु तेजस्वी दिन का आना से पैयले सुरज अधारो
अरु चाद खुन सो हुइ जाये.
21अरु जो कोय प्रभु का नाम लिये उ उध्दार पाये.
22हे इस्त्राएलिहोन, या बातहोन सुननु यीशु नासरी एक इन्सान थो जोको परमेश्वर का तरफ से होन को प्रमान उन सामर्थ काम होन अरु आश्चर्य का काम होन अरु चिन्ह से प्रगट हइ, जो परमेश्वर ने तुम्हारा बीच ओका वजेसे कर दिखायो जेखे तुम खुद ही जानस हइ. 23उ यीशु खे जो परमेश्वर की ठैर्यइ हुइ योझना अरु पूर्व ज्ञान का जसो पकड्यो गयो, तुम ने अधर्मी होन का हाथ से क्रुस पर चड्यै खे मारी डाल्यो. 24पन ओका परमेश्वर ने मरना को बन्धनहोन से छुड्यखे जिन्दो क्युकि यो अनहोनो थो कि उ ओका कब्जा मे र्हेस. 25क्युकि
दाउद ओका बारे मे बोलस हइ मी प्रभु,
सर्वदा अपना सामने देखतो र्हियो क्युकि उ मरा जवना तरफ हइ, ताकि मी डगमग नी होयु.
26यो करण मरो मन आनन्दित हुयो,
अरु मरी जीभ मगन हुइ क्युकी मरो आंग भी आस मे बन्यो र्हिये.
27क्युकि तू मरो जानहोन खे अधोलोक मे नी छोड्यु
अरु नी अपना पवित्र झन, सडन ही दिये.
28तो ने मेखे जिवन को मार्ग बतायो हइ
तु मेखे अपनो दर्शन का वजेसे आनन्द से भर दिये.
29हे भैइहोन, मी हमारा पृर्वज दाउद का बारे मे तुम से हिम्मत का साथ बोली सकुस हइ कि उ तो मरी गयो अरु गाड्यो भी गयो अरु ओकी मरगट आज तक हमारो विध्दमान हइ. 30उ भविष्यव्दक्ता थो, उ जानतो थो कि परमेश्वर ने मरा से कसम खैइ हइ कि मी तरा बश मे से एक इन्सान का जसी राजगद्दी पर बठाड्यु. 31ओने होन आली बात खे पैयले ही से देखी खे मसीह का जिन्दो उठना का
बारे मे भविष्यव्दाणी करी कि नी ते ओको जान अधोलोक
मे छोड्यो गयो अरु नी ओको आंग पायो. 32यो यीशु, परमेश्वर ने जिन्दो, जेको हम सब गवा हइ. 33यो प्रकार परमेश्वर का जवना हाथ से अच्छो पद परइ खे अरु बाप से उ पवित्र आत्मा मील्हे करी जोकी प्रतीज्ञा करी गइ थी कि ओने यो पलटय दियो हइ जो तुम देखस अरु सुनस हइ. 34क्युकि दाउद स्वर्ग पर नी चड्यो; पन उ खुद बोलस हइ,
प्रभु ने मरा प्रभु से बोल्यो,
मरा जवना बठ.
35जब तक कि मी तरा दुशमन होन खे तरा पाय नीचे की चौकी नी कर दियु.
36आखरी अब इस्राएल का पुरा घराना नीश्चित रुप से जानी ले कि परमेश्वर ने उ यीशु खे जेखे तुम ने क्रुस पर चडायो प्रभु भी ठैरायो अरु मसीह भी. 37तब सुननआला का दिल मे छेद हुइ गोका अरु वे पतरस अरु कुछ प्रेरितहोन से पुछन लग्या, “हे भैइहोन अरु बहीनहोन हम का करणु?” 38पतरस ने उनसे बोल्यो मन फिरानु, अरु तुम मे से हर एक अपना अपना पापहोन कि माफ का लिये यीशु मसीह का नाम से बपतिस्मा लेनु; ते तुम पवित्र आत्मा को दान पाये. 39क्युकि यो प्रतीज्ञा तुम, अरु तुम्हारी सन्तानहोन, अरु उन सब दूर का दुन्याहोन का लिये भी हइ जिनको प्रभु हमारो परमेश्वर अपना पास बुलाये.
40पतरस ने भोत अरु बातहोन से भी गवइ दि दिखे समझायो कि अपना खुद खे या तेडी जात से बचानु. 41आखरी जेने ओको वचन ग्रहन कर्यो उनने मन से बपतिस्मा लियो. अरु उ दिन तीन हजार इन्सानहोन का नजीकपास उनमे मीली गया. 42अरु वे प्रेरितहोन से शिक्षा पान अरु संगत रखन को अरु रोटी तोडनो अरु प्रार्थना करणा मे लौलीन र्हिया.
विश्वासीहोन को सगत
43अरु सब दुन्या का मन पर डर छय गयो, अरु खुब अदभुत काम अरु चिन्ह प्रेरितहोन का वजेसे प्रगट होता था. 44अरु सब विश्वास करणआला जमा र्हेता था, अरु उनकी सब चिजहोन हिस्सा मे थी. 45वे अपनी अपनी सम्पत्ति अरु सामन बेची खे जसी जोकी जरुरत होती थी बाट दिया करता था. 46वे हरदिन एक मन हुइखे मन्दिर मे जमा होता था, अरु घर घर मे रोटी तोडता हुया आनन्द अरु मन की सीधाइ से भोजन कर्या करता था. 47अरु परमेश्वर की स्तुती करता था, अरु सब दुन्या उनसे खुश था अरु जो उध्दार पाता था.उनको प्रभु हरदिन उनमे मुल्य देतो थो.
انتخاب شده:
प्रेरितहोन 2: NTGnn24
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Gowlan Language ©The Word for the World International and Gawlan Translation Samiti, Telkhar, Maharashtra, India, 2024.
