San Mateo 5
5
1Jesú-mä̧, ttü̧ja̧ rekuätürü topü müä'kara̧'a̧ku̧ 'cha'achäji'ka̧ ü̧'ä̧mä̧da̧'a̧ u̧wo̧juȩtä̧u̧mä̧ ichi'inä̧tü̧, 2Ja̧'wa̧nü̧ ja̧'a̧ juätürü kkä̧mä̧dü̧ wo̧juȩti̧nü̧:
3Eseäkuäwä kka̧'a̧, tta̧'kua̧rü̧ rekuä rü̧jä̧u̧ru̧,
jua'amä̧ mo̧ro̧jä̧ jäwä weümä̧ juätürütä ja̧'a̧tȩ'ü̧ ja̧'a̧ttü̧.
4Eseäkuäwä kka̧'a̧ usurä ȩmä̧wä̧tü̧rü̧,
jua'amä̧ a̧'u̧ ttu'ä'ijätürü ppädäkuäwäkua'attü̧,
5Eseäkuäwä kka̧'a̧ ukuo te'äkuäwokotürü,
jua'amä̧ pi̧jä̧ rȩjȩ tti̧rȩjä̧ pätti'äkua'attü̧.
6Eseäkuäwä kka̧'a̧ adiwomȩnä̧ jȩä̧kuä̧wä̧ rekuä rü̧jä̧u̧ru̧,
jua'amä̧ jo̧mȩnü̧tä̧ ttü̧'o̧kui̧'ä̧kua̧'a̧ttü̧.
7Eseäkuäwä kka̧'a̧ rȩrü̧jü̧ topätürü,
jua'amä̧ Dio juätürü rȩrü̧jü̧ toäkua'attü̧.
8Eseäkuäwä kka̧'a̧ tta̧mi̧ iso'kinä̧ surojü jui'ätürü,
jua'amä̧ Dio-rü tottäkuotümä̧ juätütä ja̧'a̧ttü̧.
9«Eseäkuäwä kka̧'a̧ rowäwäkuäwä juiyünä̧ aditätürü,
jua'amä̧ Dio i̧tti̧mü̧ pä'ü ottäkuä̧u̧ ja̧'a̧ttü̧.»
10Eseäkuäwä kka̧'a̧ adiu jȩtti̧yä̧u̧ suronä̧ jȩtta̧ pä'ü ttu̧sä̧rä̧u̧ru̧,
jua'amä̧ mo̧ro̧jä̧ttü̧ weümä̧ juätütä ttȩmä̧kuȩ ja̧'a̧ttü̧.
11Eseäkuäwä kka̧'a̧ ttü chi̧mi̧ jäwänä̧, o'kajuiyünä̧ yapareu kkä̧nü̧, ukuturu suronä̧ wopü kuä'äu ttikua pä'ü ttusomȩnä̧ 12Eseutä eseäkuäwätukui, jua'amä̧ mo̧ro̧jä̧ra̧'a̧ttü̧ rü̧ȩnä̧ jü̧ premio pättü kuȩmä̧tü̧kuä̧kua̧'a̧ttü̧; ja̧'wa̧ta̧nü̧ ukuturu jü̧ta̧'a̧nü̧ usinä̧tü̧ suronä̧ jȩtta̧ pä'ümä̧, kuä'kojituku kka̧kui̧nä̧tü̧ profeta-rü'i̧nä̧.
'Käruwäbü'i̧nä̧, tȩya̧u̧'i̧nä̧ wotüjä̧
(Mc 9.50; Lc 14.34-35)
13Ukutumä̧ pi̧jä̧nä̧ttü̧ 'käruwäbü wotüjä̧. Ja̧'wa̧nü̧ ja̧'a̧nä̧ 'käruwäbü ü̧sa̧di̧ toepächomȩnä̧mä̧ ¿Tta̧'a̧nü̧ jȩpü̧tä̧ ü̧nü̧ä̧mä̧ ppa̧kuä̧dä̧kua̧'a̧ttü̧? Täkü jȩä̧kuä̧wä̧mä̧ juiyü ja̧'wa̧nü̧ ja̧'a̧ttü̧ mä̧nä̧ra̧'a̧tä̧ do'opü ttikuomȩnä̧ ttü̧ja̧ 'kuȩ'ku̧tä̧ ttiku.
14Ukutumä̧ pi̧jä̧nä̧ttü̧ tȩya̧u̧ wotüjä̧. Mü̧ä̧'ka wä̧mȩ wȩjü̧ ütawiyämä̧ dajäwomȩ juiyü. 15Ra̧pa̧ra̧ rȩdȩti̧'ü̧'kotümä̧ i̧so̧ka̧ dȩa̧'a̧mä̧ kku̧nä̧wo̧kü̧; pärokua'aku ju'tojutä kku̧nä̧wä̧ isodenä̧ kka̧kuä̧tü̧ ttü̧ja̧ o'katoi'ünä̧rü̧ kkä̧dȩpa̧ pä'ü. 16Ja̧'wa̧nü̧ jü̧ta̧'a̧nü̧, ukutu'i̧nä̧ kui̧tȩya̧u̧tu̧ku̧mä̧ ttü̧ja̧ ttä'ka jo̧mȩ kkä̧dȩpü̧nä̧ kka̧kuä̧tu̧kui̧, adiu jȩ'kuä̧tu̧ku̧ topü, o'katoi'ünä̧ Kuä'otuku mo̧ro̧jä̧nä̧ kkü̧rü̧ ttesewäkua'anü̧.
Jesú-mä̧ weäwä wȩnȩ wo̧juȩti̧nü̧
17Weäwä wȩnȩ'i̧nä̧, profetas jittäwi̧nü̧'i̧nä̧ si'epü iku ichinü̧ pä'ümä̧ kuamükuädätukuättü̧, pärokua'aku jo̧mȩnü̧ mikuäwächünä̧tä̧ ji'äu ichinü̧sä̧. 18Isopäi'ünä̧ pädäu̧jä̧, pi̧jä̧'i̧nä̧, mo̧ro̧jä̧'i̧nä̧, beipächü juiyäimä̧, weäwä wȩnȩttü̧mä̧ juiyo a̧'u̧ku̧ ja̧ pä'ü'i̧nä̧ ȩmü̧mä̧ ikuäwokü jä̧kuȩ, pä'ijümä̧ o'kajuiyünä̧ jo̧mȩnü̧ pa̧ja̧kuä̧chü̧nä̧ päi'omȩbü päi'ünä̧. 19Ja̧'wa̧nü̧ ja̧'a̧ttü̧, ji̧yȩtȩ weäwä wȩnȩttü̧ ppo̧ü̧ ja̧ pä'ü'i̧nä̧ ukuotokümä̧, jua̧u̧ pä'aku ttukuotünä̧ wo̧juȩto̧kü̧mä̧, mo̧ro̧jä̧ jäwä weomȩttü̧mä̧ a̧'u̧kua̧ jü̧nä̧ pä̧wi̧'ä̧kua̧. Ja̧'wa̧nü̧ ja̧'a̧nä̧ jua̧u̧ wȩnȩ jȩpü̧ kkä̧nü̧ wo̧juȩtü̧ru̧mä̧, mo̧ro̧jä̧ jäwä weomȩttü̧mä̧ ttu̧wä̧mȩnä̧ wa̧ pä̧ttä̧kua̧.
20Ja̧'wa̧ta̧nü̧ isopäi'ünä̧ pädäu̧jä̧ weäwä wȩnȩ wo̧juȩtä̧tü̧'i̧nä̧, fariseo wotü'i̧nä̧ adiwäjuei jȩttä̧'i̧jü̧ u̧wä̧mȩnä̧ jȩ'kuä̧tu̧ku̧ juiyüttümä̧, mo̧ro̧jä̧ ru̧wa̧ weomȩmä̧ do'ächokotü kuäkuotüjä̧.
Ttü̧ja̧rü̧ kuäwokü wȩnȩ
(Lc 12.57-59)
21Ku̧tä̧mü̧tu̧ku̧ mi̧nä̧rü̧ pa̧'a̧nü̧ päwi'inü ä̧ju̧kui̧nä̧tü̧jä̧: Ttü̧ja̧sa̧rü̧ kuä'ü kuikuä, kuä'ü kuikuttümä̧ weäwä wȩnȩnä̧tä̧ ro̧ȩkui̧'ä̧kua̧jä̧. 22Ja̧'wa̧nü̧ ji̧na̧'a̧nä̧ ttümä̧ ukuturu pä'üsä, ya̧tȩ ü̧jä̧wa̧rü̧ ü̧ra̧wä̧rü̧ttü̧mä̧, weäwä wȩnȩnä̧tä̧ ro̧ȩkui̧'ä̧kua̧, jü̧nä̧. Ja̧'wa̧ta̧nü̧ ü̧jä̧wa̧rü̧ ttu̧'ȩpä̧ro̧kü̧jä̧ päüttümä̧ ukuo isotü ttä'ka jo̧mȩ ȩkuä̧kua̧ tä̧bo̧kui̧'a̧rü̧ pä'ü; ja̧'wa̧ta̧nü̧ ü̧jä̧wa̧rü̧ «Kuamükuädü jui̧'a̧jä̧» päüttümä̧ okurä na̧wi̧po̧karänä̧ usurä ȩmä̧wa̧ pä'ütä, pä̧wi̧'ä̧kua̧.
23Ja̧'wa̧nü̧ ja̧'a̧ttü̧, kuiäre ofrenda, Altar pä'ü mikunä̧, kuta pä'ü kuȩpo̧mȩnä̧, kui̧jä̧wa̧ ukuru kkorojuei üjü'koka'a, juorütä kuamükuädi'üttümä̧, 24juȩnȩtä̧, altar ä'ka jo̧mȩ kuiäre ofrenda rütipü, ä'kanä̧mä̧ kui̧jä̧wa̧rü̧ eseku ikuäji, ja̧'wa̧nü̧ jü̧ o'ka'atä ichi'ü kuiäre ofrenda-mä̧ rüti.
25Täbokuä we'ü ä'ka jo̧mȩ, ukuru ya̧tȩ ȩpü̧ttü̧mä̧, ji̧nä̧ Juez pättäku ä'ka jo̧mȩku̧ ȩpü̧ juiyäi jua̧u̧ku̧ eseku ikui, jua̧u̧ juez-rü iyü iku juiyaku pä'ümä̧; ja̧'wa̧nü̧ jü̧ juiyüttümä̧ kua̧bo̧'cha̧ päjimä̧ juez-rü iyü iku o'ka'a, jua̧u̧mä̧ su̧ro̧do̧u̧ru̧ iyü ikuomȩnä̧, juätümä̧ kärenä̧ra̧'a̧ rütü ttikuä̧kua̧jä̧. 26Isopäi'ünä̧ pädäkujä̧, juorümä̧ o'kajuiyünä̧ kuimitäwomȩbü päi'ünä̧ rä'opokü kuä̧kua̧jä̧.
Ttȩmä̧kuä̧wo̧ko̧u̧ku̧ jȩä̧'chä̧kuä̧wä̧ wȩnȩ
27Ukutumä̧ ä̧ju̧kui̧nä̧tü̧jä̧: «Kuirekua pokajukumä̧, pokükumä̧ jȩ'kuä̧'chä̧,» pä'a. 28Ja̧'wa̧nü̧ ja̧'a̧nä̧ Ttümä̧ ukuturu pä'üsä: Ya̧tȩ isajuru jȩa̧ pä'ü kkü'künä̧ toüttümä̧, täkü a̧mi̧so'kinä̧mä̧ juäjuru ä'äjitä wa̧.
29Ja̧'wa̧nü̧ ja̧'a̧ttü̧ ku̧wo̧jua̧'a̧ku̧nä̧ kui'äre, surojünä̧ ma̧kuä̧chü̧nä̧ jȩü̧ttü̧mä̧ baroku iku, ukuttütä otó do'opü ikui. Kuidepättü ji̧yȩtȩ toe'omȩnä̧mä̧ adiwa'a ja̧'wa̧nü̧ jo̧ka̧'a̧, kuidepä jättäji okurära̧'a̧ do'opü ikuäwi'üttütä, juiyo surojü'anü̧ ja̧'a̧. 30Ja̧'wa̧ta̧nü̧ ku̧wo̧jua̧'a̧ku̧nä̧ ku̧mü̧ surojünä̧ ma̧kuä̧chü̧nä̧ jȩü̧ttü̧mä̧, 'kui'oku iku ukuttütä otó do'opü ikui; ja̧'wa̧nü̧ jo̧ka̧'a̧ jü̧ttü̧mä̧, kuidepä o'kajuiyünä̧ okurära̧'a̧ do'opü ikuäwi'äkua̧jä̧.
Ttirekuarü ikuikuokü wȩnȩ
(Mt 19.9; Mc 10.11-12; Lc 16.18)
31Ja̧'wa̧ta̧nü̧ päwina̧'a̧: Ya̧tȩ irekuarü jaropi'ümä̧ divorcio pättojä wȩyu̧tu̧ iyi. 32Ja̧'wa̧nü̧ ja̧'a̧nä̧ ttümä̧ ukuturu pä'üsä: Ya̧tȩ irekuarü, kka̧ra̧ku̧mä̧ jȩjo̧ka̧'a̧nä̧ divorcio pättü jȩpü̧ jaroi'üttümä̧, irekuarü adulterio#5.32 Adulterio pä'inä̧tü̧ kkirekuo poküku ja̧'wa̧ta̧nü̧ irekua pokajuku ttü̧jä̧'chä̧kuä̧wo̧mȩnä̧. pättünä̧ kka̧ra̧ku̧ suronä̧ jȩja̧ pä'ü jȩpü̧. Ja̧'wa̧nü̧ ja̧'a̧ttü̧ jaroi'äkuarü ȩmü̧mä̧, adulterio pättünä̧ irekua pokojuru kkü̧.
Juramento pättünä̧, jȩchä̧kua̧sä̧ päwä
33Ja̧'wa̧ta̧nü̧ ku̧tä̧mü̧ mi̧nä̧rü̧ pa̧'a̧nü̧ päü ä̧ju̧kui̧nä̧tü̧jä̧: Juramento pättünä̧ jȩpü̧, ku̧ru̧wa̧rü̧ jȩchä̧kua̧sä̧ päkuinü̧mä̧ kuyaparewoka'a jȩpi̧. 34Ja̧'wa̧nü̧ ja̧'a̧nä̧ ukuturumä̧ pä'üsä: Yorisotä, juramento pättünä̧mä̧ jȩ'kuä̧'chä̧tu̧kuä̧. Mo̧ro̧jä̧ i̧mi̧nä̧'i̧nä̧, jua'amä̧ Dio i̧dȩä̧kä̧ ja̧'a̧ttü̧; 35Rȩjȩ i̧mi̧nä̧'i̧nä̧, juȩnȩmä̧ ü̧jä̧pi̧yä̧nä̧ ü̧jä̧do̧mȩ ja̧'a̧ttü̧; Jerusarȩ́ i̧mi̧nä̧'i̧nä̧ juȩnȩmä̧ Ru̧wa̧ rey idepiyu ja̧'a̧ttü̧. 36Ja̧'wa̧ta̧nü̧ kuyuyu i̧mi̧nä̧'i̧nä̧ wȩnȩtü̧mä̧ jȩ'kuä̧tu̧kuä̧, jua'amä̧ kuwokoimä̧ teunä'i̧nä̧, idikunä'i̧nä̧ jo̧ka̧'a̧ttü̧. 37Ja̧'wa̧nü̧ ja̧'a̧ttü̧ jȩ'kuä̧tu̧ku̧'a̧nü̧ jü̧ttü̧mä̧ jueünä̧tä̧ «A̧» pä'ätukui ja̧'wa̧ta̧nü̧ jȩ'kuä̧tu̧ku̧juiyü'anü̧ jü̧ttü̧'i̧nä̧ «jȩpo̧ko̧tü̧jä̧» pä'ätukui ja̧'wa̧nü̧ ja̧'a̧ttü̧ pi̧yȩttü̧ yaboku jȩpü̧mä̧ surojünä̧tä̧ jȩpü̧.
Mikuä päwä wȩnȩ
(Lc 6.29-30)
38Ukutumä̧ pa̧'a̧nü̧ pä'a ä̧ju̧kui̧nä̧tü̧jä̧: Ya̧tȩ kka̧ra̧rü̧ i'äre ubaro'üttümä̧, pärokua'aku'i̧nä̧ mikuä churutä i'äre baropü ikuirü; ja̧'wa̧ta̧nü̧ ya̧tȩ kka̧ra̧rü̧ aku 'cho'ü ikuttümä̧, pärokua'aku mikuä churutä 'cho'ü ikuirü, jü̧nä̧. 39Ja̧'wa̧nü̧ ja̧'a̧nä̧ ukuturu pä'üsä: Ukuru suronä̧ jȩü̧ttü̧mä̧, mikuämä̧ jȩ'kuä̧rü̧; ja̧'wa̧nü̧ ja̧jü̧ jueimä̧ kui'ebaba ku̧wo̧jua̧'a̧ku̧nä̧ 'tauttümä̧, pätekua'anä̧ iyäwirü. 40Ja̧'wa̧ta̧nü̧ ukuru, ya̧tȩ ku̧'ka̧tä̧wä̧ta̧ jakuä i̧sä̧ta̧ 'choipa pä'ü ürowäwawuttümä̧ wä̧mȩ i̧sä̧ta̧'i̧nä̧ iyipirü. 41Ja̧'wa̧ta̧nü̧ ya̧tȩ ya'ute kilómetro jo̧mȩnä̧ a̧mä̧kü̧ kuȩpü̧nä̧ weüttümä̧, todäre kilómetro jo̧mȩnä̧ ȩpi̧yi̧rü̧. 42Kkorojuei, ya̧tȩ ukuru jäepüttümä̧ iyirü; ja̧'wa̧ta̧nü̧ ü'ärowüttümä̧ pärowirü.
Ttaboiyotürü eseäkuäwä
(Lc 6.27-28,32-36)
43Ja̧'wa̧ta̧nü̧ pä'a ä̧ju̧kui̧nä̧tü̧jä̧: Kua̧wa̧ru̧wa̧rü̧tä̧ re ku̧ja̧'a̧nä̧, kua̧bo̧i̧ya̧rü̧mä̧ kuamisurunä̧ topi. 44Ja̧'wa̧nü̧ ja̧'a̧nä̧ ukuturumä̧ pä'üsä: Kuaboiyotürümä̧ re kka̧kuä̧tu̧kui̧ ja̧'wa̧ta̧nü̧ ukuturu suronä̧ jȩtta̧ pä'ü usätürü, Dio-rü ukuokuätukui. 45Ja̧'wa̧nü̧ jȩ'kuä̧tu̧kuo̧mȩnä̧tä̧ Kuä'otuku mo̧ro̧jä̧nä̧ kkü̧ i̧tti̧mü̧ kuäkuotüjä̧; jua̧u̧mä̧ adiwä isotürü'i̧nä̧, suropätü isotürü'i̧nä̧, aditinä̧ku̧ kkä̧wa̧rü̧mä̧ räopünä̧ jȩä̧u̧ ja̧'wa̧ta̧nü̧ adiu jȩpä̧tü̧rü̧'i̧nä̧, surojü jȩpä̧tü̧rü̧'i̧nä̧ ajiya icha pä'ü wȩä̧u̧. 46Isopäi'ünä̧ ukuturu adiu jȩpä̧tü̧rü̧tä̧ re kkä̧nü̧ kuesewätukuttümä̧, ¿Däje premio kuemä̧tu̧kuä̧kua̧'a̧jä̧ttü̧? jua̧u̧mä̧ jȩttä̧'i̧jü̧, Roma-ra̧'a̧ iyäwä pärätä ka̧ka̧tä̧tü̧'i̧nä̧. 47Ja̧'wa̧ta̧nü̧ kui̧jä̧wa̧tu̧ku̧ päi'ünä̧ wotürütä tekuäwätukuttümä̧, ¿Däjejä̧ttü̧ jua'a yabonä̧nü̧ jȩ'kuä̧tu̧ku̧mä̧? jua̧u̧mä̧ judío pokotü'i̧nä̧ jȩttä̧'i̧jü̧tä̧ ja̧'a̧. 48Ja̧'wa̧nü̧ ja̧'a̧ttü̧ Kuä'otuku mo̧ro̧jä̧nä̧ kkü̧ surojü jui̧'a̧ jü̧ta̧'a̧nü̧ ukutu'i̧nä̧ surojü juiyünä̧ jȩpä̧tu̧kui̧.
اکنون انتخاب شده:
San Mateo 5: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
