San Mateo 16
16
Jȩtto̧kü̧ juei jȩa̧'a̧ totta pä'ü jä'epinä̧tü̧
(Mc 8.11-13; Lc 12.54-56)
1Fariseo wotü'i̧nä̧, saduceo wotü'i̧nä̧ Jesú ü̧jo̧mȩku̧ 'chä̧wi̧'ü̧, ji̧nä̧ ttiweyettü jȩtto̧kü̧ juei mo̧ro̧jä̧ jäwä i̧jȩpa̧tü̧ pä'ü jättepinä̧ku̧.
2Jesú-mä̧ ädätinä̧u̧: Ni̧pä̧ro̧mȩku̧ mo̧ro̧jä̧ tuwa'a topümä̧, adiunä̧ ni̧pa̧'a̧kuä̧ pä'ätüjä̧; 3Ja̧'wa̧ta̧nü̧ yo̧ȩi̧ ja̧'a̧ku̧, mo̧ro̧jä̧ tuwa'a, ajiya isoppa'i̧nä̧ ra̧'a̧ topümä̧ pä'ätüjä̧, jitä mo̧ro̧mä̧ kkä̧rü̧'ko̧wä̧kua̧'a̧, jü̧nä̧. ¡Ä'koyättütä esetäkuäwä isotüjä̧! mo̧ro̧jä̧ jäwämä̧ adiu ku̧wo̧juä̧tu̧kua̧'a̧nä̧ ¿Tta̧'a̧nü̧ pä'ü jitä mo̧ro̧ 'kuäopümä̧ jerupätüjä̧ttü̧? 4Surojü jȩpü̧ ukuotokotü ttü̧ja̧mä̧ jȩtto̧kü̧ jueitä jȩtta̧'a̧ totta pä'ätü; ja̧'wa̧nü̧ ja̧'a̧nä̧ jȩpä̧kuä̧wi̧yo̧ko̧tü̧ ttäkuotü ja̧'wa̧nü̧ ja̧jü̧jueimä̧ Joná-rü̧ 'kuäopinü̧tä̧ jiäkuäwäkuotü.
Ja̧'wa̧nü̧ pä'ipütä i̧wi̧'i̧nü̧.
Fariseo wotü ttütü'kü u̧wo̧juȩti̧nü̧ wȩnȩ
(Mc 8.14-21)
5Jesú u̧wo̧juȩtä̧u̧mä̧ rü̧ä̧ dubora ji̧jä̧ku̧nä̧ tti̧rȩbȩwi̧'ä̧ja̧'a̧, trigo ire o̧si̧ u̧ni̧chi'ü ttȩpo̧ka̧'a̧ jä̧jo̧mȩtä̧mä̧, 6Jesú-mä̧ päinä̧u̧:
—Fariseo wotürü'i̧nä̧, saduceo wotürü'i̧nä̧ jȩttü̧ levadura pä'ü mikuttü ttu̧'ȩpä̧rä̧kuäu̧nu̧ tta̧'a̧rä̧kuä̧wä̧tu̧kui̧.
7Päomȩnä̧, u̧wo̧juȩtä̧u̧mä̧ pä'äkuäwinä̧tü̧:
—Trigo ire o̧si̧ ti'chächoka'a jä̧ji̧yä̧ku̧ pä'ü 'kua̧ra̧'a̧, jü̧nä̧. 8Ttukuokua'a wo̧jui̧'ü̧ Jesú-mä̧, päinä̧u̧: —¿Tta̧'a̧nü̧ pä'ü trigo ire o̧si̧ jui'ätüjä̧ pä'ü kukuokuätukua'ajä̧ttü̧, tta̧'kua̧ wȩnä̧ro̧ko̧tü̧ 'kua̧rü̧nä̧mä̧? 9¿Ji̧nä̧ wo̧jui̧'o̧ko̧tü̧jä̧ tä̧jí̧, ji̧mü̧tȩ jäwä trigo ire o̧si̧tä̧ jä̧ja̧'a̧ Cinco mil-nü̧ wotü ttukuinü̧mä̧? ¿ja̧'wa̧ta̧nü̧ kka̧kui̧pä̧ji̧ttü̧ rü̧ȩnä̧ o'ta jo̧mȩnä̧ ku̧ka̧ka̧ti̧nä̧tu̧ku̧mä̧? 10¿Ja̧'wa̧ta̧nü̧ trigo ire o̧si̧mä̧ sietenü̧tä̧ jä̧ja̧'a̧nä̧ Cuatro mil-nü̧ jo̧mȩnä̧ ttukuinü̧'i̧nä̧, juȩnȩ o'komȩnä̧ kka̧kui̧pä̧ji̧ttü̧ ku̧ka̧ka̧ti̧nä̧tü̧ku̧'i̧nä̧, ku̧ni̧chi'inä̧tukua'a? 11¿Tta̧'a̧nü̧ pä'ü trigo ire o̧si̧ tü'kü ukuokuokü pä'ümä̧, ku̧wo̧jui̧pä̧tu̧ku̧ juiyünä̧ wotüjä̧ttü̧? ¡fariseo wotürü'i̧nä̧, saduceo wotürü'i̧nä̧ ttu̧ju̧nä̧rü̧ levadura-ttümä̧ ttu̧'ȩpä̧rä̧kuä̧u̧ kka̧kuä̧tu̧kui̧ pä'ü pä'äjisä!
12Ja̧'wa̧nü̧ pä̧u̧tä̧, Jesú-mä̧ fariseo wotü'inä̧, saduceo wotü'i̧nä̧ wotü ttu̧wo̧juetü̧ttü̧ tta̧'a̧rä̧kuä̧wä̧tu̧kui̧ pä'ü pä'a, pä'ü wo̧jui̧'i̧nä̧tü̧, trigo ire o̧si̧ jäwä levadura tü'kümä̧ päoka'a jä̧ja̧'a̧dä̧ pä'ü.
Peduru-mä̧, Jesú-ru ukumä̧ Crito-jä̧ pä'inü̧
(Mc 8.27-30; Lc 9.18-21)
13Jesú-mä̧, Filipo rȩjȩnä̧, cesarea ütawiyänä̧ rȩbȩwi̧pä̧ji̧'ka̧ u̧wo̧juȩtä̧u̧rü jä'epü ä̧ju̧kui̧nü̧:
—¿Tta̧'a̧nü̧ pättä'ijä̧ttü̧ ttü̧ja̧mä̧, ttü ubo I̧tti̧ chütü'kümä̧?
14Päomȩnä̧ ttädätinä̧ku̧:
—Yotukupünä̧mä̧ Ju̧a̧ bautizo jȩä̧kuä̧wä̧ i̧sa̧jä̧do pä'ä'ijätü, kkorotümä̧ Elía-jä̧do, kkorotütä Jeremía-jä̧do, ja̧'wa̧nü̧ jü̧ juiyüttü'i̧nä̧ profeta winä̧tü̧ttü̧ ya̧tȩjä̧do pä'ä'ijätü.
15—Pättiyäku, jitürütä päinä̧u̧: Ja̧'wa̧nü̧ ja̧'a̧mä̧ ¿ukuturumä̧, dí cha'ajä̧ttü̧?
16Päomȩnä̧, Simón Peduru-mä̧ päinä̧ku̧:
—Ukumä̧, Crito-jä̧, a̧'kua̧rü̧ kkä̧ku̧ Dio weinä̧ku̧.
17Ädätäku Jesú-mä̧ päinä̧ku̧:
—Simón, Joná i̧tti̧ ukumä̧ rü̧ȩnä̧ eseäkuäwä po̧kui̧pü̧jä̧, pi̧yȩ ku̧wo̧juö̧mä̧ ukutä jäwämä̧kü̧ ja̧'a̧, Chä'o Dio mo̧ro̧jä̧nä̧ kkü̧tä̧ jiäwäkujä̧. 18Ukuru'i̧nä̧ pärokua'aku pä'üsä: Ukumä̧ Peduru-jä̧, jü̧nä̧, piwä i̧nä̧wänä̧ chiäre igresia-mä̧ cha̧di̧tä̧kua̧sä̧; ja̧'wa̧nü̧ ja̧'a̧ttü̧ wa'are äpatiyämä̧ kkȩdü̧ ikuokü jä̧kuȩ. 19Ukurumä̧ mo̧ro̧jä̧ ru̧wa̧ weü bawekuä llawi o̧kä̧ chi̧yä̧kua̧jä̧; pi̧jä̧nä̧ttü̧ uku ku̧nü̧'kümä̧ mo̧ro̧jä̧nä̧ttü̧'i̧nä̧ nü̧'kächi'äkua'a; ja̧'wa̧ta̧nü̧ pi̧jä̧nä̧ttü̧ kuejädümä̧, mo̧ro̧jä̧nä̧ttü̧'i̧nä̧ ejächi'äkua'a.
20Ja̧'wa̧nü̧ jä̧ji̧ o'ka'a Jesú-mä̧ u̧wo̧juȩtä̧u̧rümä̧ ya̧tȩrü̧'i̧nä̧ jittäu juiyünä̧tä̧ ro̧'ȩpi̧nü̧, jua̧u̧tä̧ jä̧ja̧'a̧ Crito-mä̧ pä'ümä̧.
Jesú-mä̧ to̧ȩ'ä̧chä̧kuȩ wȩnȩ ji'äwinü̧
(Mc 8.31—9.1; Lc 9.22-27)
21Jua̧u̧nu̧tä̧ kkä̧mä̧dü̧ Jesú-mä̧ u̧wo̧juȩtä̧u̧rü ji'äwinü̧ Jerusarȩ́-ra̧'a̧ i̧'cha̧ pä'ü rekuä rü̧jü̧mä̧, jua'attü judío-ttü a̧ci̧a̧nu̧ wotü'i̧nä̧, sacerdote-tü̧ tturuwotü'i̧nä̧ weäwänä̧ usurä ȩmä̧wi̧'ü̧'ka̧, kuä'ü ttiku o'ka'a wäbodäkuä mo̧ro̧ päi'omȩnä̧ ttoächä̧kuȩ wȩnȩmä̧. 22Ja̧'wa̧nü̧ jiäwäjiyäku Peduru-mä̧, kkoromȩku̧ o'ipächü i̧'chü̧ juiya pä'ü ukuokuinä̧ku̧:
—¡Chu̧ru̧wa̧, jua̧u̧ 'kuäopaku pä'ümä̧! ¡Dio-mä̧ pä̧wä̧juiyäkü!
23Ja̧'wa̧nü̧ päku, Jesú-mä̧ kkärächi'ü, Peduru-rü pä'inü̧:
—¡Ttüttümä̧ 'kȩ'i̧pä̧chi̧, ukumä̧ satanás-jä̧, ttürü tto̧'ȩpä̧rü̧jä̧! pi̧jä̧ ttü̧ja̧ jäwätä topüjä̧, Dio jäwämä̧ topoküjä̧.
24Jua̧u̧nü̧ o'ka'a, Jesú-mä̧ u̧wo̧juȩtä̧u̧rü pä'inü̧:
—Ya̧tȩ cho'ka'anä̧ icha pä'ümä̧, a̧mü̧nä̧ jäwämä̧ u̧ni̧chi'ü, ü̧jo̧kä̧jäi ȩmi̧pü̧tä̧, cho'ka'anä̧ ichi. 25Isopäi'ünä̧ ya̧tȩ a̧'kua̧rü̧ ü̧ji̧pa̧ pä'ümä̧, toe'ächä̧kua̧ ja̧'wa̧nü̧ ja̧'a̧nä̧ ttü jäwänä̧ a̧'kua̧rü̧ to'e'ächümä̧, a̧'kua̧rü̧ ü̧'o̧kui̧'ä̧kua̧. 26¿Däjé ȩmä̧kua̧'a̧jä̧ttü̧, ya̧tȩ pi̧jä̧ ruwäkuiyä o'kajuiyünä̧ ȩma̧ja̧ pä'üdä̧jä̧, a̧'kua̧rü̧ ȩmo̧ko̧mȩnä̧mä̧? ¿Ja̧'wa̧nü̧ jü̧ juiyüttü'i̧nä̧ däjenä̧ i̧mi̧tü'anü̧ttü̧, ttü̧ja̧sa̧ a̧'kua̧rü̧ mikuämä̧? 27Isopäi'ünä̧ ttü, ubo I̧tti̧mä̧ Chä'o uruwoku'i̧nä̧, á̧gȩrȩ-ku̧'i̧nä̧ chichomȩnä̧ yotukunä̧ jȩtti̧nü̧ mikuämä̧ chi̧yä̧kua̧sä̧, adiu jȩtti̧na̧ja̧ pä'ü'i̧nä̧, suronä̧ jȩtti̧na̧ja̧ pä'ü'i̧nä̧, jü̧nä̧. 28—Isopäi'ünä̧ pä'üsä ukuturu, pȩnȩ́ kka̧kuä̧tü̧ttü̧ yotütemä̧ ubo I̧tti̧ ruwo we'ü icha'a tottomȩbü päi'ünä̧ wa'ü ttikua pä'ü ttüjü'kokäkuotü.
اکنون انتخاب شده:
San Mateo 16: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
