San Mateo 15
15
Ttü̧ja̧sa̧rü̧ surojuoepü wȩnȩ
(Mc 7.1-23)
1Ja̧'wa̧nü̧ ja̧'a̧ Jerusarȩ́-ra̧'a̧ttü̧ ichi'äjä'kotü fariseo wotüttü'i̧nä̧, weäwä wȩnȩ wo̧juȩtä̧tü̧ttü̧'i̧nä̧, yotüte Jesú-ru jä'epü ä̧ju̧kui̧nä̧tü̧:
2—¿Tta̧'a̧nü̧ pä'ü ku̧wo̧juȩtä̧u̧mä̧ tü̧tä̧mü̧ mi̧nä̧ wettinü̧ ukuotokotüjä̧ttü̧? ¿Tta̧'a̧nü̧ pä'ü ttu̧mü̧ tükäwokotüjä̧ttü̧ ttu̧kuȩ ttukuäkua'a ä'kanä̧mä̧?
3Ja̧'wa̧nü̧ pättäku Jesú-mä̧ jä'epü ä̧ju̧kui̧nä̧u̧:
—¿Tta̧'a̧nü̧ pä'ü ukutu'i̧nä̧ ku̧tä̧mü̧ mi̧nä̧ wettinü̧tä̧ ukuotü Dio weümä̧ ukuotokotüjä̧ttü̧? 4Isopäi'ünä̧ Dio-mä̧ pä'inü̧: «Kuä'orü'i̧nä̧, kua̧ju̧ru̧'i̧nä̧ ukuoti, ja̧'wa̧nü̧ ja̧'a̧nä̧ jä'orü'i̧nä̧, ja̧ju̧ru̧'i̧nä̧ suronä̧ pä'ürümä̧, wa'ü ikua pä'ütä jä̧kua̧'a̧.» 5Ja̧'wa̧nü̧ ja̧'a̧nä̧ ukutumä̧ pä'ätüjä̧, ya̧tȩmä̧ jä'orü'i̧nä̧, ja̧ju̧ru̧'i̧nä̧ päü'anü̧ ja̧'a̧: Ukurumä̧ ppädädü juiyünä̧ jä̧ku̧sä̧, chu̧ju̧nä̧rü̧mä̧ o'kajuiyünä̧tä̧ Dio-rü ofrenda jü̧nä̧ chiyäkua'attü. 6Ja̧'wa̧nü̧ pä'ü täkü, jä'orü'i̧nä̧, ja̧ju̧ru̧'i̧nä̧ ppäda pä'okü. Ja̧'wa̧nü̧ pärokuä ku̧tä̧mü̧tu̧ku̧ jäwätä ukuotü, Dio weümä̧ mikuäu juiyünä̧tä̧ juo'epinä̧tü̧jä̧. 7¡Ä'koyättütä esetätüjä̧! Isopäi'ünä̧tä̧ kutü'kütuku, profeta Isaía-mä̧ pä'inü̧:
8Pitü ttü̧ja̧mä̧ ttänä̧tä̧ ukuotü ttesewäkusä,
tta̧mi̧ iso'kimä̧ otó wotü ja̧'a̧nä̧.
9Mikuäwoka'atä eseu jȩttä̧ku̧sä̧;
Ttü̧ja̧ weäwätä kkä̧kuä̧wä̧ wȩnȩ 'kua̧rü̧nä̧ ttu̧wo̧juȩta̧'a̧ttü̧.
10Jua̧u̧nü̧ o'ka'a Jesú-mä̧ ttü̧ja̧rü̧ wopo'ü pä'inü̧:
—Adiu, ä̧ju̧kuä̧tu̧kui̧: 11Ttänä̧ doächümä̧ ttü̧ja̧rü̧ surojuepokü ja̧'wa̧nü̧ ja̧'a̧nä̧ ttänä̧ räopütä ja̧'a̧ ttü̧ja̧rü̧ surojuoepümä̧.
12Ja̧'wa̧nü̧ ja̧'a̧ u̧wo̧juȩtä̧u̧ ichi'opo'ü pättinä̧ku̧:
—Fariseo wotümä̧ päkuäji ä̧ju̧ku̧ ra̧wä̧ri̧pä̧jä̧tü̧
13Pättäku ädätinä̧u̧:
—O'kajuiyünä̧tä̧ Chä'o mo̧ro̧jä̧ ru̧wa̧ u̧ju̧no̧kü̧ oi ji̧nü̧mä̧, ujukäkättü kkä̧mä̧dü̧ ke'opü i̧kuä̧wä̧kuȩ. 14Ja̧'a̧tä̧ topätukuitü, jitütä'i̧nä̧ tä̧to̧ka̧'a̧nä̧ kkorotü ä̧to̧kä̧tü̧rü̧ oikuä isotü. Ja̧'wa̧nü̧ ja̧'a̧ttü̧ ya̧tȩ ä̧to̧ka̧ kka̧ra̧rü̧ oipüttümä̧ ta̧ju̧kuäyotü rejunä̧ ma̧ttä̧chä̧kuo̧tü̧.
15Ja̧'wa̧nü̧ ja̧'a̧ Peduru-mä̧ Jesú-ru pä'inü̧:
—Wȩnȩtü̧ jikuäwäji jä̧ji̧ ji'äwitü. 16Jesú-mä̧ ädätinä̧ku̧:
—¿Ukutu'i̧nä̧ ji̧nä̧ wo̧jui̧'o̧ko̧tü̧jä̧ tä̧jí̧? 17¿O'kajuiyünä̧ ttänä̧ doächümä̧, ttü'käbiyunä̧ ȩki̧pü̧ o'ka'a ttité rejura̧'a̧ku̧ räopächü pä'ümä̧ wo̧jui̧'o̧ko̧tü̧jä̧ tä̧jí̧? 18Ja̧'wa̧nü̧ ja̧'a̧nä̧, ttänä̧ räopümä̧ tta̧mi̧so'kittü räopü; ja̧'wa̧nü̧ ja̧'a̧ttü̧ jua̧u̧tä̧tä̧ ja̧'a̧ ttü̧ja̧rü̧ surojuoepümä̧. 19Isopäi'ünä̧ tta̧mi̧so'kittütä räopa'a suronä̧ tta̧mü̧kuädümä̧, kuä'ü ikuäwämä̧, kkorotü ttü'käwinä̧u̧ku̧ jȩttä̧'chä̧kuä̧u̧mä̧, ttü'käwoko̧u̧ku̧ jȩttä̧'chä̧kuäu̧mä̧, ttünä̧u̧kuä̧rü̧mä̧, ttüyapareumä̧ ja̧'wa̧ta̧nü̧ ttürowäumä̧. 20Jua̧u̧ ja̧'a̧ ttü̧ja̧rü̧ surojuoepümä̧; ja̧'wa̧nü̧ ja̧'a̧nä̧ ttu̧mü̧ ttütükäwoka'a ttu̧kuȩ kuäkuäwämä̧ surojuoepokü.
Judío wokoju kka̧'kua̧ kku̧wȩnä̧ri̧nü̧ wȩnȩ
(Mc 7.24-30)
21Jesú-mä̧ juorü rä'opächü Tiro rȩjȩra̧'a̧ku̧, Sidón rȩjȩra̧'a̧ku̧ 'chi̧nü̧. 22Ja̧'wa̧nü̧ ja̧'a̧ juä̧jä̧ rȩjȩttü̧ canaá̧ ttü̧ja̧saju ü̧jo̧mȩku̧ ichi'ü wojinä̧ku̧:
—¡Dawi I̧tti̧, Chu̧ru̧wa̧ rȩrü̧jü̧ topittü! ¡epíritu su̧ro̧pa̧ chittijünä̧ ü̧ja̧'a̧ rü̧ȩnä̧ usurä kkȩmä̧u̧nä̧ jȩi̧yä̧kua̧sä̧!
23Ja̧'wa̧nü̧ woja'anä̧ Jesú-mä̧ ädätokokua pinä̧ju̧. Ja̧'wa̧nü̧ ji̧yä̧u̧ u̧wo̧juȩtä̧u̧mä̧ ü̧jo̧mȩku̧ 'chä̧wi̧'ü̧ jä'epü pättinä̧ku̧:
—Kki̧wa̧ we'ü ikuiju to'ka'anä̧ ru̧'ä̧rü̧ wopäju.
24Pättäku Jesú-mä̧ pä'inü̧.
—Dio-mä̧ juätürümä̧ weäwiokoku pinü̧sä̧, Irae ttü̧ja̧ oweja-tü̧ re'tewächinä̧tü̧rü̧tä̧ ja̧'a̧tȩ'ü̧ weinä̧ku̧sä̧. 25Ja̧'wa̧nü̧ ja̧'a̧nä̧ ä'ka jo̧mȩ 'chä̧wi̧'ü̧ kkiwe'kiyunä̧ pä̧mä̧dü̧ pä'inä̧ju̧:
—¡Chu̧ru̧wa̧, ppä'ädittü!
26Päjomȩnä̧ ädätinä̧kua̧: —adiwoka'a tti̧tti̧mü̧ ttu̧kuȩ jä̧ji̧, ä̧wi̧ri̧tü̧rü̧ iyäwänä̧mä̧.
27Päomȩnä̧ kkädätinä̧ku̧:
—Isopäi'ünä̧tä̧ ja̧'a̧ Chu̧ru̧wa̧; ja̧'wa̧nü̧ ja̧'a̧nä̧ ä̧wi̧ri̧tü̧'i̧nä̧ tturuwotü ttukuomenä̧ mesa isodättü ttawäu kuätü.
28Ja̧'wa̧nü̧ ja̧'a̧ Jesú-mä̧ päinä̧kua̧:
—¡Isoo tta̧'kua̧ wȩnä̧rä̧kuä̧wä̧ rü̧ȩnä̧ kku̧nä̧rä̧ju̧jä̧ttü̧! jua̧u̧nu̧mä̧ kuju'komȩnä̧ 'kuäopä̧kua̧jä̧.
Päomȩnä̧, kkittijumä̧ jua̧u̧tä̧ hora-nä̧ na̧jä̧chä̧ji̧ttü̧mä̧ pi̧'i̧nä̧ju̧.
Na̧'ä̧chä̧tü̧ rekuätürü Jesú-mä̧ aditü ikuinü̧
(Mc 8.1-10)
29Jesú-mä̧ juorü rä'opächäji̧'ka̧, Galirea rü̧ä̧ dubora jäyora ichi'inü̧; ichi'äji̧'ka̧ mü̧ä̧'kara̧'a̧ 'cha'achäji'ka̧ ü̧'a̧'a̧. 30Ttü̧ja̧ rekuätü ka̧ka̧kui̧nä̧tü̧, tti̧'chü̧ juiyünä̧ wotürü'i̧nä̧, ä̧tokä̧tü̧rü̧'i̧nä̧, kuächo̧kä̧u̧ru̧'i̧nä̧, ukuokuokotürü i'chächinä̧tü̧ ja̧'wa̧ta̧nü̧ kkorotü rekuätü na̧nȩpä̧tü̧rü̧ i'chächü Jesú ü̧jä̧pü̧ kkada'ka ttü̧tä̧u̧rü̧mä̧ aditü ikuini̧yä̧u̧. 31Ttü̧ja̧mä̧ to̧o̧ to̧ttä̧rü̧nä̧tä̧ päi'ünä̧ ukuokuokotü päjätümä̧ ukuokuinä̧tü̧, ttidepättü ji̧yȩtȩ jui'ätü'i̧nä̧ adiwächinä̧tü̧, ppi̧sä̧ ppi̧sä̧ 'chä̧jä̧tü̧'i̧nä̧ adiu kue'ächinä̧tü̧ ja̧'wa̧ta̧nü̧ ä̧to̧kä̧jä̧tü̧'i̧nä̧ topinä̧tü̧. Ja̧'wa̧nü̧ ji̧yä̧u̧ Irae ttü̧ja̧ ttü̧ä̧nä̧wa̧ Dio-rütä esewinä̧tü̧.
Jesú ttü̧ja̧ rekuätürü ttu̧kuȩ iyinü̧ wȩnȩ
(Mc 8.1-10)
32Jesú-mä̧ u̧wo̧juȩtä̧u̧rü wopo'ü pä'inü̧:
—Täkü wäbodäkuä mo̧ro̧ päi'ünä̧ ttüku ttü̧jä̧ja̧'a̧, ttu̧kuȩ juiya'a topü pitü ttü̧ja̧rü̧ rȩrü̧jü̧ topüsä. Ttukua ppäinä̧mä̧ ttojusodera̧'a̧ tti̧wa̧ pä'ümä̧ wedü juiyü'anü̧ jä̧ku̧sä̧ ja̧'wa̧nü̧ wedüttümä̧ mä̧nä̧ttü̧ ttidiyawächi'ü 'kua̧ra̧'a̧.
33U̧wo̧juȩtä̧u̧mä̧ pättinä̧ku̧:
—Jua̧u̧nu̧mä̧, ¿torü tü̧'o̧kui̧'ä̧kua̧'a̧jä̧ttü̧, pa̧'a̧nü̧ ttü̧ja̧ rekuätü ttukua pä'ümä̧, ttü̧ja̧'i̧nä̧ toächomȩ ja̧'a̧mä̧?
34Pättäku, Jesú-mä̧ päinä̧u̧:
—¿Tta̧'a̧nü̧ rü̧ȩnä̧tä̧ ku̧ju̧nä̧rä̧tu̧kuä̧ttü̧ trigo ire o̧si̧mä̧?
—Sietenü̧tä̧ ja̧'wa̧ta̧nü̧ po̧i̧'i̧nä̧ a̧'u̧ku̧nä̧tä̧ —pä'ü ttädätinä̧ku̧.
35Ja̧'wa̧nü̧ ja̧'a̧ ttü̧ja̧rü̧mä̧ rȩjȩ ttu̧'ȩjä̧ma̧ pä'ü we'inü̧. 36Sietenü̧ trigo ire o̧si̧'i̧nä̧, po̧i̧rü̧'i̧nä̧ 'chu'ädo'ü Dio-rü eseunu̧ ukuokuäji̧'ka̧, 'to'opü i̧yä̧u̧ u̧wo̧juȩtä̧u̧mä̧ jua'a yabo ttü̧ja̧rü̧ iyä'chinä̧tü̧. 37Isopäi'ünä̧ suttädi'omȩbü kuinä̧tü̧, ttukuäji o'ka'a kka̧kui̧pä̧ji̧, püttäwä o'tamä̧ sietenü̧ jo̧mȩnä̧ su̧'pȩ päi'ünä̧ ka̧ka̧ti̧nä̧tü̧. 38Jua̧u̧ kuinä̧tü̧ u̧mä̧tü̧tä̧mä̧ cuatro mil-nü̧ jo̧mȩnä̧ ji̧na̧'a̧, suro nä̧tü̧rü̧'i̧nä̧, ppo̧'ä̧tü̧rü̧'i̧nä̧ ttü̧'a̧to̧ka̧'a̧tä̧mä̧. 39Jua̧u̧nü̧ o'ka'a Jesú-mä̧ ttü̧ja̧rü̧ we'ü ikuipütä woi'kanä̧ pä̧mä̧dü̧ Madara rȩjȩra̧'a̧ku̧ 'chi̧nü̧.
اکنون انتخاب شده:
San Mateo 15: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
