San Mateo 13
13
Kku̧nä̧wä̧ i̧sa̧ u̧ju̧ni̧nü̧ wȩnȩtü̧ ji'äwinü̧
(Mc 4.1-9; Lc 8.4-8)
1Ji̧yȩnü̧ mo̧ro̧ isode ü̧jo̧dettü rä'opächäji̧'ka̧, Jesú-mä̧ rü̧ä̧ dubora jäyora pä̧mä̧dü̧ wo̧juȩti̧nü̧. 2Ja̧'wa̧nü̧ ja̧'a̧, ttü̧ja̧ rekuätü ttü̧ka̧ka̧kuä̧ji̧yä̧ku̧, Jesú-mä̧ woi'kanä̧ 'cha'ächi'ü pä̧mä̧di̧nü̧ juorü u̧wo̧juȩta̧ pä'ü, ttü̧ja̧mä̧ rȩba̧nä̧ ttü̧ja̧kua̧'a̧nä̧. 3Ja̧'wa̧nü̧ ja̧'a̧, rü̧ȩnä̧ wȩnȩtä̧rü̧ jiäwinä̧u̧, päinä̧u̧: Ya̧tȩ kuäwä kku̧nä̧wä̧ i̧sa̧ kku̧nu̧ 'chä̧nü̧ rä'opinü̧. 4Ja̧'wa̧nü̧ ja̧'a̧ u̧ju̧no̧mȩnä̧, u̧wä̧ju̧ ji̧yȩtȩ mä̧nä̧nä̧ ma̧ä̧chä̧ja̧'a̧ ppi̧yu̧ ichi'ü kui'inä̧tü̧. 5Kkoro u̧wä̧ju̧mä̧ inä̧du 'kä̧tȩ jo̧mȩ ma̧ä̧chi̧na̧'a̧, rȩjȩ a̧'u̧ku̧nä̧tä̧ jo̧mȩ; jua̧u̧mä̧ jurunä̧nü̧ bawi'ina̧'a̧, rȩjȩ a̧'u̧ku̧nä̧tä̧ jo̧mȩttü̧. 6Ja̧'wa̧nü̧ ja̧'a̧nä̧ kkä̧wa̧ räo'a'a du'i'omȩnä̧ joi'inü̧, jua'amä̧ ujupo'tiyä adinä̧ juiya'attü̧. 7Kkoro u̧wä̧ju̧mä̧ so̧ä̧'kua 'kä̧tȩ jo̧mȩ ma̧ä̧chi̧na̧'a̧, jua̧u̧mä̧ so̧ä̧'kua büó juomȩnä̧ a̧ttä̧di̧'i̧nü̧. 8Ja̧'wa̧nü̧ ja̧'a̧nä̧ kkoro ppächämä̧, rȩjȩ adiwomȩ ma̧ä̧chi̧nü̧tä̧ ji̧na̧'a̧ u̧wä̧ju̧ adiu wȩji̧nü̧mä̧. Ji̧yȩtȩnä̧mä̧ ciȩnü̧ pünä̧, kkoronä̧mä̧ sesenta-nü̧ pünä̧, kkoronä̧tä̧ treinta-nü̧ pünä̧, jü̧nä̧. 9Ä̧ju̧ku̧nä̧ wa̧mä̧ ä̧ju̧kui̧.
¿Tta̧'a̧nü̧ pä'ü wȩnȩtä̧rü̧ jiäwina̧'a̧jä̧ttü̧?
(Mc 4.10-12; Lc 8.9-10)
10Ja̧'wa̧nü̧ ja̧'a̧ Jesú u̧wo̧juȩtä̧u̧mä̧ ü̧jo̧mȩku̧ ichi'opo'ü, jä'epü ttä̧ju̧kui̧nä̧ku̧: ¿Tta̧'a̧nü̧ pä'ü wȩnȩtä̧rü̧tä̧ ku̧kuo̧kuä̧u̧jä̧ttü̧? 11Pättäku ädätinä̧u̧: Ukuturumä̧ i̧yä̧wi̧'i̧nä̧u̧jä̧ mo̧ro̧jä̧ ru̧wa̧ weü wo̧juä̧wo̧kü̧ ku̧wo̧juä̧tu̧kua̧ pä'ü; ja̧'wa̧nü̧ ja̧'a̧nä̧ jitüjarümä̧ i̧yä̧wi̧'o̧ko̧u̧ pinä̧tü̧. 12Ja̧'wa̧nü̧ ja̧'a̧ttü̧ kku̧nä̧rü̧rü̧mä̧, yabonü̧ iyäwäkua'a; rü̧ȩnä̧ u̧ju̧nä̧rü̧nä̧, ja̧'wa̧nü̧ ja̧'a̧nä̧ jui̧'a̧rü̧mä̧, a̧'u̧ku̧nä̧tä̧ u̧ju̧nä̧rü̧'i̧nä̧ 'choikuäkua'a. 13Ja̧'wa̧nü̧ ja̧'a̧ttü̧ wȩnȩtä̧rü̧tä̧ jidäwä̧u̧; totta'anä̧'i̧nä̧ topokotü wotü, ttä̧ju̧kua̧'a̧nä̧'i̧nä̧ ä̧ju̧kuo̧ko̧tü̧ wotü tiyäku, wo̧jui̧'ü̧'i̧nä̧ wo̧jui̧'o̧ko̧tü̧. 14Ja̧'wa̧nü̧ ja̧'a̧ttü̧, profeta Isaía pa̧'a̧nü̧ ukuokuinü̧tä̧ 'kuäopa'a:
Ä̧ju̧ku̧'i̧nä̧, ttä̧ju̧kua̧'a̧nä̧, wo̧jui̧'o̧ko̧tü̧ ttäkuotü,
Topü'i̧nä̧ totta'anä̧, tottoka'a 'kua̧rü̧nä̧ ttäkuotü,
15Isopäi'ünä̧ pitü ttü̧ja̧mä̧ tta̧mi̧ 'ki'ächächinä̧tü̧,
ttä̧ja̧wi̧yä̧nä̧'i̧nä̧ tä̧ju̧kua̧ pä'okotü,
ja̧'wa̧ta̧nü̧ tti'äriyä'i̧nä̧ mu̧chä̧wä̧chi̧nä̧u̧;
tottü juiya pä'ü, ä̧ju̧ku̧'i̧nä̧ ttä̧ju̧ku̧ juiya pä'ü,
tta̧mi̧so'kinä̧ ttu̧wo̧jui̧pü̧ juiyünä̧nä̧tä̧, ttu̧wo̧jui̧pü̧ttü̧mä̧ ttü'ärowächomȩnä̧ aditü chiku juiyatü pä'ü.
16Ja̧'wa̧nü̧ ja̧'a̧nä̧, ukuturumä̧ juiyo adiu eseäkuäwä kka̧'a̧, topü'i̧nä̧ to'kuätukua'attü, ä̧ju̧ku̧'i̧nä̧ kuä̧ju̧kuä̧tu̧kua̧'a̧ttü̧. 17Isopäi'ünä̧ ukuturu pä'üsä: Profeta winä̧tü̧'i̧nä̧, adiwäjueinä̧ kka̧kui̧nä̧tü̧'i̧nä̧ ukutu to'kuätuku, totta pätta'anä̧, topokotü pinä̧tü̧ ja̧'wa̧ta̧nü̧ kuäju̧kuä̧tu̧ku̧'i̧nä̧, ttä̧ju̧kua̧ pätta'anä̧ ä̧ju̧kuo̧ko̧tü̧ pinä̧tü̧.
Wȩnȩtü̧ jiäwäji, Jesú-mä̧ rä'epü iku ji'äwinü̧
(Mc 4.13-20; Lc 8.11-15)
18Ja̧'wa̧nü̧ ja̧'a̧ttü̧ kku̧nä̧wä̧ i̧sa̧nä̧ wȩnȩkuä̧chä̧ji̧ jä̧ji̧ ä̧ju̧kuä̧tu̧kui̧: 19Mä̧nä̧nä̧ ma̧ä̧chi̧nü̧ u̧wä̧ju̧ jä̧ji̧mä̧, ru̧wa̧ Dio i̧wȩnȩ ttä̧ju̧kua̧'a̧nä̧, ttu̧wo̧jui̧pü̧juiyünä̧ wotürü wȩnȩkuä̧cha̧'a̧; tta̧mi̧so'kinä̧ kku̧nä̧wi̧'ä̧ji̧mä̧ su̧ro̧pa̧ ichi'ü 'choipä̧u̧ru̧. 20Inä̧du 'kä̧tȩ jo̧mȩ ma̧ä̧chi̧nü̧ u̧wä̧ju̧ jä̧ji̧mä̧, Dio i̧wȩnȩ yotäkutä eseunu̧ ä̧ju̧ku̧ esetätürü wȩnȩkuä̧cha̧'a̧, 21kkada'ka 'chu̧ä̧ro̧mȩ juitta'a, 'kiyünä̧ kko̧ko̧tü̧rü̧; Dio i̧wȩnȩ jäwänä̧ surojü rȩbȩä̧kuä̧wo̧mȩnä̧, ma̧'ä̧chä̧tü̧rü̧. 22Ja̧'wa̧ta̧nü̧ so̧ä̧'kua 'kä̧tȩ jo̧mȩ ma̧ä̧chi̧nü̧ u̧wä̧ju̧ jä̧ji̧mä̧, Dio i̧wȩnȩ ttä̧ju̧kua̧'a̧nä̧, pi̧jä̧ jäwänä̧tä̧, pärätä ruwonä̧tä̧ tta̧'kua̧ ro'ekuätürü wȩnȩkuä̧cha̧'a̧; ttä̧ju̧kuä̧ji̧mä̧ a̧ttä̧di̧'ä̧u̧ u̧wä̧ju̧ iyü juiyünä̧ wotürü. 23Ja̧'wa̧nü̧ ja̧'a̧nä̧, rȩjȩ adiwomȩ ma̧ä̧chi̧nü̧ jä̧ji̧mä̧ wȩnȩkuä̧cha̧'a̧, Dio i̧wȩnȩ ttä̧ju̧kuo̧mȩnä̧ adiu wo̧jui̧'ä̧tü̧rü̧ ja̧'wa̧nü̧ ja̧'a̧ jo̧mȩnü̧ u̧wä̧ju̧ wȩjä̧u̧ru̧, yotütenä̧mä̧ ciȩnü̧ pünä̧, kkorotünä̧mä̧ sesenta-nü̧ pünä̧, kkorotünä̧tä̧ treinta-nü̧ pünä̧, yotüku pünä̧mä̧.
Trigo 'kä̧tȩnä̧ surojü bawa'a wȩnȩtü̧ ji'äwinü̧
24Jesú-mä̧ kkoronä̧ wȩnȩtü̧ ji̧ä̧wi̧nä̧u̧: Mo̧ro̧jä̧ ru̧wa̧ weümä̧, ya̧tȩ ü'ättanä̧ adiwäjuei u̧wä̧ju̧ u̧ju̧ni̧nü̧'a̧nü̧ jü̧nä̧ wȩnȩkuä̧cha̧'a̧; 25Ja̧'wa̧nü̧ ja̧'a̧nä̧, ttü̧ja̧ ttä'ekua'anä̧, tta̧bo̧i̧ya̧ ichi'ü trigo 'kä̧tȩ jo̧mȩ suräjuei adiyä kku̧nä̧ji̧'ka̧ i̧wi̧'i̧nü̧. 26Ja̧'wa̧nü̧ ji̧na̧'a̧, Trigo ba'ipü büó juoinü̧ o'ka'a u̧wä̧ju̧ wȩjo̧mȩnä̧, suräjuei isä'kua'i̧nä̧ räopina̧'a̧. 27Ja̧'wa̧nü̧ ja̧'a̧ topü, adikuä isotümä̧ pätta u̧ru̧wa̧rü̧ 'chä̧'wi̧'ü̧ pä'inä̧tü̧: Chu̧ru̧wa̧, kui'ättanä̧mä̧ adiwäjuei u̧wä̧ju̧tä̧ kku̧ju̧ni̧na̧'a̧mä̧, ¿torü räopäja'ajä̧ttü̧, surojuoepü adiyämä̧? 28Pättäku ädätinä̧u̧: Jua'amä̧ ya̧tȩ ta̧bo̧i̧ya̧ jȩä̧ja̧'a̧. Pä̧i̧yä̧u̧ umüwäyotümä̧ pättinä̧ku̧: ¿Jua̧u̧nu̧mä̧ surojuoepü adiyä ke'ü tikuäja pä'üjä̧? 29Isokü̧: Surojuoepü adiyä ke'ü kuikuätukuomȩnä̧, trigo'i̧nä̧ ppächünä̧ ke'opü kuikuätuku 'kua̧ra̧'a̧. 30Ja̧'a̧tä̧ topätukui yoräteunä̧ büó juoa'anä̧, u̧wä̧ju̧ jo̧mȩnü̧ päi'omȩbü päi'ünä̧; jua̧u̧ ttü̧ka̧ka̧tü̧ mo̧ro̧ päi'omȩnä̧, ka̧ka̧tä̧tü̧rü̧ wȩdä̧kua̧sä̧: Ä̧kuo̧mȩnä̧mä̧ surojü adiyä ka̧ka̧tü̧, obanä̧ juä'ü ttu̧ju̧na̧ pä'ü, kkuwü ikuäwäkuomȩtä̧ päi'ünä̧. Jua̧u̧nü̧ o'ka'a trigo-mä̧ ka̧ka̧kuo̧ka̧nä̧ ka̧ka̧tü̧ tu̧ju̧na̧ pä'ü.
Mostaza pättü u̧wä̧ju̧nä̧ wȩnȩtü̧ ji'äwinü̧
(Mc 4.30-32; Lc 13.18-19)
31Kkoronä̧ wȩnȩtü̧ ji̧ä̧wi̧nä̧u̧: Mo̧ro̧jä̧ ru̧wa̧ weümä̧, ya̧tȩ ü'ättanä̧ mostaza pä'ü miku u̧wä̧ju̧ u̧ju̧ni̧nü̧ ji̧nü̧'a̧nü̧ ja̧'a̧. 32Isopäi'ünä̧ jua̧u̧ u̧wä̧ju̧mä̧, kkoro u̧wä̧ju̧ttu̧'i̧nä̧ i̧dȩa̧'a̧nä̧ a̧'u̧ku̧ ja̧'a̧nä̧; büó juomȩnä̧mä̧, kkoro oittü'i̧nä̧ u̧wä̧mȩnä̧ päi'ünä̧ büó juoü, ppi̧yu̧'i̧nä̧ ichü ä̧na̧jui̧yä̧nä̧ ttä̧'ti̧yu̧ ttu̧wȩnü̧nä̧ päi'ünä̧.
Levadura pättünä̧ wȩnȩtü̧ ji'äwinü̧
(Lc 13.20-21)
33Ja̧'wa̧ta̧nü̧ kkoronä̧'i̧nä̧ wȩnȩtü̧ jiäwinä̧u̧: Mo̧ro̧jä̧ ru̧wa̧ weümä̧ levadura pättü, yajute isaju trigo i̧sa̧ppȩnä̧, wä̧bo̧'ta̧kuä̧ jo̧mȩnä̧ pa̧ja̧tü̧ kkȩno̧mȩnä̧ jättäyäwa ppü̧ä̧mi̧'a̧'a̧ jä̧'i̧nü̧'a̧nü̧ ja̧'a̧, pä'ü.
Profeta päinü̧ta'anü̧ wȩnȩtä̧rü̧ ji'äwinü̧
(Mc 4.33-34)
34Ttü̧ja̧rü̧mä̧ pi̧yȩ o'kajuiyünä̧, Jesú-mä̧ wȩnȩtä̧rü̧tä̧ ji'äwinü̧, ji̧yȩtȩ'i̧nä̧ u̧wȩnȩto̧ka̧'a̧mä̧ ji̧ä̧wo̧ko̧u̧ pinä̧tü̧. 35Pi̧yȩmä̧ profeta, pa̧'a̧nü̧ ukuokuinü̧ta'anü̧ 'kuäopina̧'a̧:
«Chänä̧mä̧ wȩnȩtä̧rü̧tä̧ chu̧kuo̧kuä̧kua̧sä̧;
Dio pi̧jä̧ uwäbe'inomȩttü̧ päi'ünä̧,
yä̧wä̧i̧nä̧ jä̧'i̧jü̧mä̧ ttu̧wo̧jui̧pü̧nä̧ ji̧dä̧wä̧kua̧sä̧.»
Surojünä̧ u̧wȩnȩtä̧ji̧, Jesú-mä̧ rä'epü iku ji'äwinü̧
36Ja̧'wa̧nü̧ ja̧'a̧ Jesú-mä̧, ttü̧ja̧rü̧ tti̧wa̧ pä'ü we'ü ikuäji̧'ka̧ isodenä̧ ichi'äja'a u̧wo̧juȩtä̧u̧mä̧ ichi'ü jä'epü ttä̧ju̧kui̧nä̧ku̧: Pättanä̧ surojuoepü bawina̧'a̧ wȩnȩkuä̧chä̧ji̧ jä̧ji̧ rä'epü iku ji'äwitü. 37Jättepäku ädätinä̧u̧: Adiwäjuei u̧wä̧ju̧ kku̧ni̧nü̧ päjimä̧, Ubó I̧tti̧ ja̧'a̧, 38pätta jä̧ji̧mä̧ pi̧jä̧ rȩjȩ ja̧'a̧. Adiwäjuei u̧wä̧ju̧ trigo jä̧ji̧mä̧ ru̧wa̧ Dio weünä̧ kka̧kuä̧tü̧ ja̧'a̧ ja̧'wa̧ta̧nü̧ surojü adiyä jä̧ji̧mä̧ su̧ro̧pa̧ i̧tti̧mü̧ ja̧'a̧. 39A̧bo̧i̧ya̧ surojü adiyä kku̧ni̧nü̧ päjimä̧, äwettä ja̧'a̧. U̧wä̧ju̧ 'kiyächomȩnä̧ ttü̧ka̧ka̧ti̧na̧'a̧ jä̧ji̧mä̧, rüjí mo̧ro̧ ü'ojo'äkuomȩ jä̧kua̧'a̧ ja̧'wa̧ta̧nü̧ u̧wä̧ju̧ ka̧ka̧ti̧nä̧tü̧ päjätümä̧ á̧gȩrȩ ja̧'a̧. 40Ja̧'wa̧nü̧ ja̧'a̧ttü̧, surojuoepü adiyä ke'opü iku okuränä̧ kkuwü ttikua'a jä̧'i̧nü̧ta̧'a̧nü̧, jä̧kua̧'a̧ pi̧jä̧ beipächü mo̧ro̧mä̧. 41Ubó I̧tti̧mä̧ umüwäyotü á̧gȩrȩ-rü wȩä̧kua̧, chutä ru̧wa̧ jü̧nä̧ weomȩttü̧ kkorotürü ma̧ttä̧chü̧nä̧ jȩpi̧nä̧tü̧rü̧'i̧nä̧, suronä̧ jȩpä̧tü̧rü̧'i̧nä̧ o'katoi'ünä̧rü̧ ttü̧ka̧ka̧ta̧ pä'ü. 42Juätürümä̧ okurä beipokaränä̧ kki'ope'ü ttikuäkuä̧u̧; jua'attümä̧ ttaku norü ttajuäkuäwäkuotü. 43Ja̧'wa̧nü̧ ja̧'a̧nä̧, Dio-rü ukuotätümä̧ Jä'o weomȩttü̧mä̧, kkä̧wa̧ kkȩdȩpa̧'a̧ jä̧'i̧nü̧'a̧nü̧ ti̧tȩya̧u̧nä̧ ttäkuotü. Ä̧ju̧ku̧ kku̧nä̧rü̧mä̧ ä̧ju̧kui̧.
Rü̧ȩnä̧ mikuäu dajü rütäwänä̧ wȩnȩtü̧ ji'äwinü̧
44Ja̧'wa̧ta̧nü̧ mo̧ro̧jä̧ ru̧wa̧ weümä̧, pättanä̧ rȩjȩ dajü rütäwä pärätä jä̧'i̧nü̧'a̧nü̧ ja̧'a̧. Jua̧u̧ pärätä po̧kui̧pi̧'ü̧'ka̧, pä'äjita'anü̧ juȩnȩtä̧ dajü rütipü; rü̧ȩnä̧ eseunu̧ i̧wi̧'ü̧ u̧ju̧nä̧rü̧mä̧ o'kajuiyünä̧ mikuänä̧ iyä'chü ikuipü, juȩnȩ rȩjȩmä̧ ȩma̧'a̧ jä̧'i̧nü̧'a̧nü̧ ja̧'a̧.
Adiwäjuei perlas pä'ü mikunä̧ wȩnȩtü̧ ji'äwinü̧
45Ja̧'wa̧ta̧nü̧ mo̧ro̧jä̧ ru̧wa̧ weümä̧, ya̧tȩ järe iyäwä i̧sa̧ adiwäjuei i̧nä̧ perlas pättü usinü̧'a̧nü̧ ja̧'a̧; 46Jua̧u̧ i̧nä̧ rü̧ȩnä̧ mikuäuttü yo'kite po̧kui̧pä̧ji̧'ka̧, chutä iäre u̧ju̧nä̧rü̧mä̧ o'kajuiyünä̧ mikuänä̧ iyä'chü ikuäji̧'ka̧; ji̧yȩnä̧tä̧ mitäu ȩmi̧na̧'a̧ jä̧'i̧nü̧'a̧nü̧ ja̧'a̧.
Po̧i̧ wo̧ä̧wä̧sa̧nä̧ wȩnȩtü̧ ji'äwinü̧
47Ja̧'wa̧ta̧nü̧ mo̧ro̧jä̧ ru̧wa̧ weümä̧ po̧i̧ wo̧ä̧wä̧sa̧ rü̧ä̧ duboranä̧ ttikuomȩnä̧ kkorojuo'otü po̧i̧'i̧nä̧ o'katoi'ünä̧ wottokuächa'a jä̧'i̧nü̧'a̧nü̧ ja̧'a̧. 48Juä̧sa̧ suwädi'omȩnä̧, po̧i̧ woäwä isotümä̧ rȩba̧ra̧'a̧ku̧ ȩmi̧pü̧ pȩjä̧mü̧; adiwätürütä püttäwäkänä̧ ȩno̧pä̧rü̧ suropätürümä̧ do'opä̧rü̧ iku ttü'oja'a jä̧'i̧nü̧'a̧nü̧ ja̧'a̧. 49Ja̧'wa̧nü̧ jü̧ta̧'a̧nü̧ jä̧kua̧'a̧ pi̧jä̧ rȩjȩ beipächü mo̧ro̧ päi'omȩnä̧mä̧: A̧gȩrȩ-mä̧ ichi'ü Dio-rü ukuotätü ttü̧'kä̧tȩttü̧ suropätürümä̧ 'kȩ'ȩpȩ'ü̧ ttikuäkuotü, 50Juätürümä̧ okurä beipokaränä̧ kki'ope'ü ttikuäkuä̧u̧; jua'attümä̧ ttaku norü ttajuäkuäwäkuotü.
Jareünä̧ jü̧'i̧nä̧, täbo jäwä'i̧nä̧ ji'äwinü̧
51Jesú juätürü jä'epü ä̧ju̧kui̧nü̧:
—¿Pi̧yȩmä̧, o'kajuiyünä̧tä̧ wo̧jui̧'ä̧tü̧jä̧?
—Päomȩnä̧
—A̧'a̧, pä'ü ttädätinä̧ku̧.
52Jesú-mä̧ päinä̧u̧:
—Ja̧'wa̧nü̧ jü̧ta̧'a̧nü̧, weäwä wȩnȩ wo̧juȩkuä̧ isotü o'katoi'ünä̧ mo̧ro̧jä̧ ru̧wa̧ weü wo̧jui̧pi̧nä̧tü̧mä̧, ya̧tȩ isode u̧ru̧wa̧ iäre pärätättü, täbo jäwä'i̧nä̧, jareü'i̧nä̧ pojopü ȩmü̧ jä̧'i̧nü̧'a̧nü̧ wa̧.
Jesú Nazare-nä̧ ü̧ji̧nü̧ wȩnȩ
(Mc 6.1-6; Lc 4.16-30)
53Wȩnȩtä̧rü̧ ji'äwäji̧'ka̧ kä'ädi'ipü, Jesú-mä̧ juorü i̧wi̧'i̧nü̧. 54I̧rȩjä̧ra̧'a̧ rȩbȩwi̧pä̧ji̧'ka̧ ttiäre sinagoga isodettü kkä̧mä̧dü̧ u̧wo̧juȩti̧nä̧u̧ ja̧'wa̧nü̧ ja̧'a̧ rü̧ȩnä̧ amükuädü pä'inä̧tü̧:
—¿Pi̧yȩ u̧wo̧juö̧ o'kajuiyünä̧mä̧ torü u̧wo̧jui̧'i̧nü̧jä̧ttü̧? ¿Jȩtto̧kü̧ jueimä̧ toku jȩpü̧ jȩü̧ttü̧? 55¿Pidemä̧, dau odiyä adikuä i̧sa̧ i̧tti̧ pä'ijü i̧tti̧mä̧kü̧?, ¿ja̧ju̧mä̧ María pä'ijäjumä̧kü̧, Sa̧ti̧a̧ku̧'i̧nä̧, José'i̧nä̧, Simón'i̧nä̧, Juda'i̧nä̧ ttubüo pä'ijümä̧kü̧?, 56ja̧'wa̧ta̧nü̧ i̧jä̧wa̧jü̧tü̧ nä̧tü̧mä̧ ujututäku kka̧kuä̧'i̧jä̧tümä̧kü̧ ¿Torü u̧wo̧jui̧'i̧nü̧jä̧ttü̧ jua̧u̧ o'kajuiyünä̧mä̧?
57Ja̧'wa̧nü̧ pä'ü, rü̧ȩnä̧ juo'ekuinä̧tü̧, jua̧u̧ ütü'kümä̧. Ja̧'wa̧nü̧ ji̧yä̧ku̧ Jesú-mä̧ päinä̧u̧:
—Kkara'a ütawiyättümä̧ profeta-rümä̧ eseu ttukuota'anä̧, idepiyuttümä̧, awaruwämä̧ ttukuotokoku.
58Ja̧'wa̧nü̧ ja̧'a̧ttü̧, juorümä̧, jȩtto̧kü̧ jueimä̧ rü̧ȩnä̧mä̧ jȩpo̧kü̧ pinü̧, ttesetoka'attü̧.
اکنون انتخاب شده:
San Mateo 13: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
