Matiyu 16
16
Be Farisi ngge Sadosi nda anga be e di echi
(Marku 8:11-13; Luka 12:54-56)
1Nò kè akan, be Farisi ngge be Sadosi è bwa a zǝn Yeso evǝa be e mbwà e di ye. Bè jan ye jan ne, ge e tú be echi nwone a tú jan ebi gè vǝ chá kpe shwa ángá.
2Gè janfwe be, “Atan a nodgó mbwà ara ngge nye di zǝkpe no ebenben, nye jan, ‘Takpe a no esese.’ 3Anofon, ano nye di zǝkpe no ebenben n twafǝ, nye jan, ‘Chù a bwa nòmo.’ Ano nye yi abu nye janfwe a yi engà mo takpe atan a nye di ye anga, ano bwe a ge nye janfwe a yi nye engà mo be echi mo be ekpengga ena ra? 4A nye be nobǝ mofǝ̀ mo ekǝn ena ya e yi be Ehwya ra, nye ká eka mo echi mò moeditanm anga. Ma tú m nye echi efki ra, kpwà tén echi a bè tú a chu efojan Yunana ángá.” Kǝnggwa Yeso è gwa be, nè nya m̀ mbwe.
Yisti mo be Farisi ngge Sadosi
(Marku 8:14-21)
5Chashin a bè vǝ́ ara jengǝ̀ mo edan hon ángá, be etsonchi è kaben ara jan be mngoda ara jan bè kpwá be borodi ra. 6Yeso è jan be jan, “Di, nye bgeshi fǝzǝn a chu yisti mo be Farisi ngge be Sadosi.”
7A chu fwa ena, bè kwa ara ejanm e sojube jan, “Ge jan anga adia je kpwá je borodi ra ángá.”
8Adia Yeso è yi ara mò a bè jan fwa anga a chu mo nó ángá, gè jan, “A nye ya chaebi nwofyan, ano bwe a ge nye no jan anga e sojunye jan nyè kpwá nye borodi ra? 9Bwatwa anga na, nye chà hwayi nye ra? Nye kaben nye atan a m̀ ti bi borodi chwen ti fi be nobǝ echo chwen (5,000) ángá, a be esha mbwe éè mbo ngge be ebwíbwí mo be a nyè tefǝn? 10Eno e ra, atan a m̀ fi be nobǝ echo ndwe (4,000) ngge bi borodi chwen a fà ángá, a be esha mbwe éè mbo ngge be ebwíbwí mo be a nyè tefǝn? 11Bwe engǝ nye hwayi nye jan, fwa a ḿ jan ángá, é fwa ye a chu borodi ra ra? Tea nye e dgon e seshi chu nye a chu yisti mo be Farisi ngge ḿ mo be Sadosi.” 12Kǝnggwa bè chà hwayi jan gé jan ye be ángá jan ne, be e dgon chu be a chu yisti a be ti bwe borodi anga ra, tea a chu moetum mo be Farisi ngge be Sadosi.
Fwa a Bitru jan a chu Yeso ángá
(Marku 8:27-30; Luka 9:18-21)
13Atan a Yeso è bwa ara a efa mo Kesariya Filibi ángá, gè ká be etsonchi mbwe eka jan, “Ara a be nobǝ jan a me Nwen Nobǝ, m no ángá?”
14Bè janfwe ye jan, “Ya ehwyà jan wa Yohana ya Batisǝma, ehwyà jan wa Eliya, ehwyà efwe jan wa Eremiya eno e ra akan mo be efojan efki.”
15Gè ká be eka jan, “Tea ḿ mo nye wá? Nye jan, a me ma ara?”
16Sima Bitru è janfwe ye, “A bo wa Kristi hon, Nwen mo Ehwya e no angǝ ángá.”
17Yeso è janfwe ye, “Esese a a bo, Sima nwen mo Yunana, adia fwa ye nobǝ akan fijan o nó a ge ra, tea Àtà m e no a kpe ángá. 18Asuswana m jan o anga, a bo wa Bitru, (tú anga wa ten). A chu ten ena ma mbwe be nobǝ mam, be ya a tsǝ́ekǝ̀n a chu m ángá. Echakpo mo fǝ a bwe a ti ye nó mò akan ra. 19Ma no o mofkimo mo zǝnotì a kpe. Egwa egwa mo mò a o tèfǝn ara a tswa zǝnchaje ena, a no etèfǝnm a kpe, ngge mò a o fken ara a tswa zǝnchaje a no efkenm a kpe.” 20Kǝnggwa gè twa be etsonchi mbwe echa echakpokpo jan ne, be e jan e tú be ende akan jan ga Kristi hon ra.
Yeso fijan yishwa fǝ a ga fǝ ángá
(Marku 8:31—9:1; Luka 9:22-27)
21Tke nò eni, Yeso è kwa ara be etsonchi mbwe fwa ejansem a chu ye jan ne, ge no kenm ga ken a Urishelima ngge ga ngǝ ekan àywá a bu mo be nobǝ echa, be Ekǝ́n echa ngge be etumo mo edon, ngge ba gu ye. Tea tsǝnò a di e ta Ehwya a ti ye a nyi etkyen a dì angǝ.
22Bitru è fǝ́ ye dwa ken a buetkwa nè tkyá ye etkya. Gè jan, “Ehwya e pe efǝ, Etsodwe. Mò ena a bwe a didi ye e bo ra.”
23Yeso è twanga jan Bitru jan, “Bwa vǝ́ chashin mam. A bo Shetan, a bo wa mo tswafù chafya mam, o ka mbo shwa anga a chu be mò a Ehwya ka fwa anga a chu be ángá ra, tea be mò a be nobǝ ka anga.”
24Kǝnggwa Yeso jan be etsonchi mbwe binbin jan, “Ano ende akan nda anga ge e ba m, ge no kenm ga se chu ye, na dgyan ge e ngǝ ekan, ge e ba m. 25Adia ende e dgyan ge e dgon nya mbwe, a ben ye nó ra, tea ende e ti nya mbwe no adi edgyan mbwe a chu m, a dgon nó. 26Esese hon a nobǝ a ben ángá a ano, ano ge ben gu be mò a tswa zǝnchaje ena, n ben ye nya mbwe ra? Eno e ra mò a nobǝ ti a no efwe a chu nya mbwe anga a ano? 27Adia Nwen Nobǝ a bwa ngge be maleka mbwe adi egǝ̀n mo Ate ye, kǝnggwa ga kpwa egwa egwa a ken abu mò a nobǝ hon è bwe ángá. 28M jan nye ebi anga, a engga mo be ya e ywano ana, be ya ehwyà a fǝ be ra, kpwà tén ano be di ara Nwen Nobǝ nyabwa abu tì.”
انتخاب شده:
Matiyu 16: ICH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 Luke Initiative for Scripture Translation
