Matiyu 15
15
Moetum a chu mò e bwe tsuruku no didi ángá
(Marku 7:1-13)
1Be Farisi ya ehwyà ngge be etumo mo edon ya ehwyà è vǝ a Urishelima bwa a zǝn Yeso, nè ká ye eka jan, 2“Bwe engǝ be etsonchi mbo dipin be mò a be ebǝ ata mo je è tú je ángá? Be na be be bu mo be anga sangǝ́ be e chà e de mode, abu be ebǝ ata mo je è tú je ángá ra.”
3Gè janfwe be, “A nye wá! Bwe engǝ nye dipin be edon mo Ehwya a chu be moefì mo nye anga? 4Adia Ehwya jan, ‘Nobǝ e di e gǝ̀n ate ye ngge ayi ye,’ ngge ‘Ende e jan fwa edingga a chu ate ye eno e ra ayi ye, ge no kenm ba gu ye.’ 5Tea nye tú be jan, ano ende akan no ngge mò a ge é kpu e no ate ye ngge ayi ye, tea ge jan, ‘Binbin mo be mò nyà a ben a zǝn m ángá, m kpu no ara Ehwya,’ 6Enona, nye tú ende hon anga ge e di e gǝ̀n ye be ya è mbwa ye ángá ra. Nye twagwa ara be fwa mo Ehwya a chu be moefì mo nye. 7A nye be ya ayibangǝ̀. Fwa a efojan Eshaya è jan a chu nye ángá no ebi, gè jan,
8“ ‘Be nobǝ ena fen m anga ngge abevǝ mo be,
tea tsuruku mo be dgyen ara zǝn ngge me.
9Be fen m anga kukwa.
Be mò a be
tú be nobǝ anga,
a be edon mo
nobǝ kpwà ara.’ ”
10Yeso è fǝ́ be ya è fǝn ngàhwya ye ángá dwa bwa a zǝn ye nè jan, “Nye buton nye e fo e yi. 11Fwa ye mò e kwashi anga chá kpevǝ mo nobǝ nwone e bwe ye no didi a chafya mo Ehwya anga ra, tea mò gwa bwi anga a je chá kpevǝ hon ángá bwe ye no didi chafya mo Ehwya anga a ge.”
12Kǝnggwa be etsonchi mbwe è bwa a zǝn ye nè jan, “O yi jan be Farisi é fku ara tsuruku atan a bé fo fwa a ó jan ángá?”
13Gè janfwe be, “Egwa egwa mo tumo a Àtà m e no anga a kpe, shin ye nó a ge ra, ba vǝ a kpú nó ngge kpwà. 14Kwaju ngge be, ba be ya fǝzǝn ebwibwi ya e fu ya fǝzǝn ebwibwi etsǝ́n anga. Ano ya fǝzǝn ebwibwi vǝ ya fǝzǝn ebwibwi efki etsǝ́n, a be fà hon be kpo a shi a tswa ahwya.”
15Bitru è jan ye jan, “Jan je engà mo hufwa ena.”
16Yeso è ká be eka jan, “Tì bwa anga na, nye chà hwayi nye ye ra?” 17Nye yi nye jan, mò a nobǝ de kwashi anga a dgyèn mbwe, gwa anga a je mo ju ye ra? 18Tea be mò e gwa anga a je chá kpevǝ ángá, vǝ a tswa tsuruku n chà gwa a je, a be mò e bwe nobǝ no didi a chafya mo Ehwya anga. 19Adia be mofǝ̀ e no a tsuruku mo nobǝ ángá, a be mò hon e bwe nobǝ ka tashwa a chu be mò esera, abu: nobǝ egum, sen-eten, zǝndwa ekacha, jú, fwa amme, ejanbwe ngge ejanpin, gwa anga a je chá kpevǝ. 20“Binbin mo be mò ena, a be mò ya e bwe nobǝ no didi chafya mo Ehwya ángá, tea mò edem ngge bu di bwe ye nobǝ ge e no didi chafya mo Ehwya ra.”
Chaebi mo ndegwa éè fwa ye ya a Esǝrela ra ángá
(Marku 7:24-30)
21Kǝnggwa Yeso è nyagwa zǝn hon nè ken chá efa mo Taya ngge Sidon. 22Ndegwa akan ya Ka-ana è bwa a zǝn ye nè no bgó ye anga ngge dwavǝ ezam jan, “Etsodwe, Nwen mo Dawuda, di ashi mam. Nwen m ndegwa no ngge engǝ́ esera a ju ye, ge ngǝ ekan anga àywá.”
23Tea Yeso è jan didi ye ye a vǝ ra. Enona, be etsonchi mbwe è bwa a zǝn ye nè bgó ye jan, “Du ndegwa ena ge e nya, adia ge no kpwà adi dwa etànm chashin mo je.”
24Ge janfwe ndegwa hon, “Bè tson m bwa kpwà a zǝn be nobǝ a Esǝrela ya e no abu be son è tku da ara ángá.”
25Tea ndegwa hon è bwa nggwa ekpanvǝ mbwe a sen chafya mbwe nè jan, “Etsodwe bwejwa m.”
26Yeso è janfwe ye, “Ge se me e ti mode e no ḿ mo mbǝgya, ti e nggwa e no be bge?”
27Ndegwa hon è jan, “Eshwen, Etsodwe, ge se ye ra, bi adi enò, be bge hon ben de anga adi mode nwofyan e bwì nggwashwa anga a sen chá bu mo yagwamo mu mo be ángá.”
28Kǝnggwa Yeso è janfwe ye jan, “Ndegwa, chaebi mbo a chu m no àywá. Ge e no o abu o dgyan anga.” Engǝ́ esera hon è twagwa ten nwen hon, atan enó.
Yeso matswa be nobǝ embo
29Atan a Yeso è gwa ara zǝn hon ángá, gè ba chá tón mo edan a Galili. Gè ken tonvǝ́ a hwì, nè vǝ́ chu a sen a zǝn. 30Be nobǝ embo embo è bwa a zǝn ye. Bè kpu be ya è mbe anga embem, be ya fǝzǝn ebwibwi, be engǝfǝju, be hwen ngge be ya modwa embo efki bwa twà a ta fù mbwe, gè matswa be. 31Be nobǝ ya è fǝn ngàhwya Yeso ángá, è tàn ebwikpe àywá abu bè di be hwen è no jan fwa anga, be engǝfǝju è ben echakpo, be ya è mbe ángá embem è no kenkèn anga ngge be ya fǝzǝn ebwibwi è no di zǝn anga. Bè tàn Ehwya mo ya a Esǝrela.
Yeso fi be nobǝ echo ndwe
(Marku 8:1-10)
32Yeso è fǝ́ be etsonchi mbwe dwa nè jan be jan, “M di ashi mo be nobǝ ena, bè no ara ngge me mo be tsǝnò ta n de be mode ra. M dgyan m me e du be e nya ngge mbe ra, efki ra, be ya ehwyà a kpokǝn efǝ.”
33Be etsonchi mbwe è janfwe ye, “Zǝn a ja ben borodi a tswavǝ́n ana nwone a kǝn be nobǝ embo ena no a che?”
34Yeso è ká be eka jan, “Nye no ngge bi borodi mbwe a zǝn nye?”
Bè janfwe ye, “Chwen a fà ngge be gwejo e fí be ra.”
35Gè jan be nobǝ hon be e chu a sǝnsen. 36Gè kpu bi borodi chwen a fà ngge be gwejo hon nè chwano Ehwya. Gè bwìkwa be kpu no etsonchi, be etsonchi hon è kpu be no be nobǝ hon. 37Binbin mo be nobǝ hon è de mbo tén a be. Kǝnggwa be etsonchi è tefǝn be ebwibwi mo borodi ngge gwejo è dan ángá, mbo esha chwen a fà. 38Efim mo be ndedon ya è de mode a zǝn ángá è no echo ndwe (4,000). Tea bè ká be be ndegwa ngge mbǝgya ra. 39Chashin a gè du ara be nobǝ hon efǝ ángá, gè kwa ngga nè ken chá efa mo Magadan.
انتخاب شده:
Matiyu 15: ICH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 Luke Initiative for Scripture Translation
