MARKUS 14

Nerancang ha Perdat Yesus

(Mat 26:1-5; Luk 22:1-2; Yoh 11:45-53)

1Nar arik nij mai Yahudi doh naisamut Paskah ru Arik Raya Ruti Pek Beragi.#14:1 Arik Raya Ruti Pek Beragi: Raya adeh bimula telas caknak Paskah kidij. Raya adeh kibelangsong selame tujoh arik. Ku mase raya adeh, mai Yahudi had naicak caknak de pek beragi. Neng Keluaran 12:15-20. Raknak-raknak imam agame Yahudi ru guru-guru Hukom Taurat naikek care naiha-cap Yesus serakngek ru naiha-perdat Kek.#Kel 12:1-27 2Tapi naibelwal ratak liknai, “Hik pek buleh hibeh hal ajeh ku mase arik raya kerana doh mai jengoi naimerusoh.”

Numom Kerdor Kikoh Minyak Wangi ku Yesus

(Mat 26:6-13; Yoh 12:1-8)

3Yesus ru Ipengikot-pengikot mong ku kampug Betania, ku deg Simon de entemjeh kinyik kuste. Mase Yesus tengah Kigei cerner ku mije Kaha-cakcak#14:3 Kigei cerner ku mije Kaha-cakcak: Begei adehloh icare mai Yahudi ku jaman ajeh naicakcak ku mije. ku pajeh, hol numom kerdor de kien nubutol marmar iisi minyak wangi de ihad mahal. Kerdor ajeh kicereh kui butol ajeh ru kikoh ku kemil kui Yesus.#Luk 7:37-38 4Memerip urag mai de mong ku pajeh naibelal ru naibelwal ratak liknai, “Kerdor ajeh pek patot kijendak iminyak wangi de mahal ajeh. 5Minyak ajeh buleh bijual ru iregak sama begei gaji nutahut mai kerakjak, ru iduet ajeh buleh biog nu mai hajap!” Jadi, ihad naibelal ha kerdor ajeh.

6Tapi Yesus Kiurok, “Wes agok kacau kek! Yama engkepesusah sengik kek? Ma de ya kibeh nu Eng adeh bor. 7Mai hajap selalo mong besama ru engkek. Amen engkeha-tulog enai, bile-bile pen buleh. Tapi Eng pek selalo mong besama ru engkek. 8Kerdor adeh kibeh ma de dapat kibeh. Kek ya kikoh minyak wangi ku Eng kaha-sedia berog Eng ha ceknop danan Eng doh. 9Cerngailoh abor! Ku belok taleh Gah Bor biperlei ku seluroh dunia, bahneh kerdor adeh doh bicerite juga supaye kek bikenang.”

Yudas Kikianat Yesus

(Mat 26:14-16; Luk 22:3-6)

10Telas ajeh, Yudas Iskariot de numom ju 12 pengikot Yesus kiet nu raknak-raknak imam agame Yahudi kaha-bincang ru enai begeiharok kaha-kianat Yesus. 11Enai ihad naikerakmik bile naicerngai engrok Yudas, lalu naijanji naiha-og duet nu kek. Yudas pen mula kikek mase de bor kaha-kianat Yesus.

Yesus Kicak Caknak Paskah ru Ipengikot-pengikot

(Mat 26:17-25; Luk 22:7-14, 21-23; Yoh 13:21-30)

12Ku arik petame Arik Raya Ruti Pek Beragi, ku arik mai naigoj dombe Paskah, pengikot-pengikot Yesus pen naitanya nu Kek, “Ku belokka de Jenhod jisedia caknak Paskah ha Jen?”

13Lalu Yesus Kior nar mom ju Ipengikot-pengikot, “Etloh nu kateh kote Yerusalem. Ku pajeh doh jerkebakek numom keral kigulap takar teu. Joiloh kek nu deg de kituju. 14Bile ya kimuj nu madeg, urokloh nu tuan deg ajeh, ‘Guru Kitanya begei adeh: “Ku belok bilek tetamu ha Eng ru pengikot-pengikot Eng jiha-cak caknak Paskah?” ’ 15Tuan deg ajeh doh kiternyol nanek bilek de entoi ku tingkat kemil deg ajeh. Arap ku bilek ajeh ya cengkuk. Sedialoh caknak Paskah ha lihik ku pajeh.”

16Jadi, nar urag pengikot ajeh pen baiet nu kote Yerusalem, ru tejadiloh dikdij hal begei de biurok ya Yesus nu ubai. Lalu ubai pen baisedia caknak Paskah ku pajeh.

17Bile iarik ya kelem, Yesus Kilei nu deg ajeh besama ru 12 urag Ipengikot. 18Mase enai tengah naigei cerner ku mije ru naicakcak, Yesus Kipasal, “Cerngailoh abor, numom ju engkek de cakcak besama ru Eng hunen doh kikianat Eng.”#Mzm 41:10

19Pengikot-pengikot Yesus ihad sedeh lei dikdij liknai naibetanya nu Kek, “Tentu pek eng de Jenmaksod ajeh?”

20Yesus Kiberlag, “Kek ajeh numom ju engkek de kicerlog iruti nu kateh mangkok besama ru Eng. 21Mimang Eng Kenon Manusia doh Ngdat begei de bicot ku kateh Alkitab. Tapi ihad celaka sengoi de bekianat ha Kenon Manusia! Lebeh bor amen sengoi ajeh pek pernah biperyos!”

Caknak Paskah

(Mat 26:26-30; Luk 22:14-20)

22Mase tengah naicakcak, Yesus Kikot ruti lalu Kiucap syukor nu Jenang. Telas ajeh Kiceh ru Kibahagi ruti ajeh. Kek Kiog ruti ajeh nu Ipengikot-pengikot ru Kiurok, “Adehloh berog Eng, kotloh.”

23Telas ajeh Kek Kikot cawan de biisi teu wain lalu Kiucap syukor nu Jenang ru Kiog nu Ipengikot-pengikot. Enai pen naingut ju cawan ajeh. 24Yesus Kiurok, “Adehloh behip Eng de kisahkan jenanji pai antare Jenang ru Isengoi-sengoi. Behip Eng ajeh bipesaruk ha jeoi sengoi.#Kel 24:8 25Cerngailoh abor, Eng doh pek Ngngut teu wain nij lei Eng Ngngut teu wain pai ku serga de biperintah ya Jenang sebegei Raja.”

26Telas naidindang nanek lagu pujian, enai pen naiet nu Lod Zaiton.

Yesus Kipasal Petrus doh Pek Kiaku Kikenal Ilei

(Mat 26:31-35; Luk 22:31-34; Yoh 13:36-38)

27Ku kateh ceknip enai, Yesus Kiurok nu Ipengikot-pengikot, “Ku kateh Alkitab mong bicot, ‘Eng doh Ngperdat gembale ajeh lalu kenawat dombe ajeh doh naiceraklah.’ Engrok ajeh doh kitejadi. Dikdij liengkek doh engkejar engkewes Eng.#Za 13:7 28Tapi telas Eng biberkos ju danan Eng, Eng doh Nget nu lengrik Galilea lebeh canuk daripade engkek.”#Mat 28:16

29Petrus kiberlag, “Hamapen dikdij mai kilek naiwes Jen, eng doh pek ngbeh begei ajeh!”

30Yesus Kiurok nu kek, “Petrus, cerngailoh abor. Sebelom pog kibetader nar kali kelem adeh, doh nik kali haurok pek hakenal Eng.”

31Tapi Petrus kiberlag, “Eng doh pek sekali-kali ngurok pek ngkenal Jen hamapen eng hod ngdat besama ru Jen!”

Dikdij Ipengikot-pengikot de kilek pen naiurok begei ajeh juga.

Yesus Kibedoa ku Getsemani

(Mat 26:36-46; Luk 22:39-46)

32Telas ajeh Yesus ru Ipengikot-pengikot nailei ku tempat de imuh Getsemani. Yesus Kiurok nu Ipengikot-pengikot, “Geiloh ku padeh. Eng Ngha-et Ngha-bedoa.”

33Lalu Yesus Kiajak Petrus, Yakobus, ru Yohanes naiet besama ru Kek. Kek mula Kijadi ihad susah Isengik. 34Kek Kiurok nu enai, “Sengik Eng ihad sedeh, Ngrasa begei Ngha-dat. Geiloh ku padeh. Jagaloh agok bukbet!”

35Lalu Yesus Kiet nyak gek ru Kikekkop ku patik Kaha-bedoa. Kek Kisemanj supaye amen buleh, Kek pek Kaha-tempeh seniksa. 36Kek Kiurok, “Menek! Enjen buleh Jenbeh ma-ma taleh. Pernyakloh cawan seniksa adeh ju Eng. Tapi agokloh joi heknod Eng, biarloh heknod Jen taleh de tejadi.”

37Telas ajeh Yesus Kilos nu nik mom Ipengikot ajeh ru Kineng enai naibukbet. Kek Kiurok nu Petrus, “Simon, habukbetka? Pek dapatka had nujam taleh habejaga?” 38Lalu Yesus Kiurok nu nik mom Ipengikot ajeh, “Bejaga-jagaloh ru bedoaloh supaye engkek pek bicuba. Mimang sengik engkek kaha-beh ma de bor tapi pek lalu engkeha-beh kerana berog engkek lemah.”

39Telas ajeh Yesus Kiet ju kenjeh ru Kibedoa nij doa de sama. 40Bile Kek Kilos nij nu Ipengikot-pengikot ru Kek Kineng enai lekat naibukbet kerana ihad naileoi. Bile Yesus Kiberyol enai, enai pek naipanei ma de naiha-urok nu Yesus.

41Lalu Kek Kiet ju kenjeh ru Kibedoa nij. Mase ku inik kali Yesus Kilos nu enai, Kek Kineng nik mom Ipengikot ajeh lekat naibukbet. Kek pen Kiurok nu enai, “Lekat engkebukbet ru engkeberihatka? Cukoploh! Nengloh, imase ya lei untok Eng Kenon Manusia baha-serah nu kuasa mai bedosa. 42Kosloh, bei hiet! Nengloh, sengoi de kikianat Eng ya kilei!”

Yesus Bicap

(Mat 26:47-56; Luk 22:47-53; Yoh 18:3-12)

43Mase Yesus lekat Kibelwal, leiloh Yudas. Kek ajeh numom ju 12 urag Ipengikot. Kek kilei besama ru mai jengoi de naien pedang ru jehuk peknet. Enai ajeh bingeng ya raknak-raknak imam agame Yahudi, guru-guru Hukom Taurat, ru raknak-raknak mai Yahudi. 44Sebelom ajeh Yudas ya kipasal canuk nu mai ajeh begei adeh: “Sengoi de ngnyui ajehloh Ilei. Caploh ru enloh Kek. Jagaloh Kek abor supaye pek Kitelas!”

45Bile Yudas kilei, kek deras kiperek nu Yesus ru kiurok, “Guru!” Lalu kek pen kinyui Yesus. 46Mai jengoi de besama ru Yudas ajeh pen naicap Yesus. 47Tapi mong numom ku pajeh kiperhol ipedang lalu kitas entag hambe Imam Agong agame Yahudi.

48Yesus Kiurok nu mai de cekcap Kek, “Eng adeh pemberontakka lei engkeen pedang ru jehuk peknet engkeha-cap ha Eng? 49Tiap arik Eng mong besama ru engkek Ngbeajar ku laman Deg Jenang tapi pek engkecap Eng ku pajeh. Tapi dikdij hal adeh kitejadi supaye ma de bicot ku kateh Alkitab kitejadi.”#Luk 19:47; 21:37 50Lalu dikdij Ipengikot-pengikot naijar naiwes Yesus.

51Ku mase ajeh, mong numom keral nyengnyam kijoi Yesus. Keral ajeh kipakei had nuhenglei abat linen kitutop iberog. Bile mai jengoi naicap keral ajeh, 52kek kiteg iabat lalu kijar beres.

Yesus ku Ngar Mahkamah Agame Yahudi

(Mat 26:57-68; Luk 22:54-55, 63-71; Yoh 18:13-14, 19-24)

53Telas ajeh naien Yesus nu deg Imam Agong agame Yahudi. Dikdij raknak imam agame Yahudi, raknak mai Yahudi, ru guru Hukom Taurat naibekumpol ku pajeh. 54Petrus kijoi Yesus ju kennyak lei nu laman deg Imam Agong agame Yahudi. Kek kigei ku pajeh besama ru pengawal-pengawal sambel kiberked iberog beg os. 55Ku mase ajeh, raknak-raknak imam agame Yahudi ru dikdij anggote Mahkamah Agame Yahudi#14:55 Mahkamah Agame Yahudi: Adeh pihak bekuasa tetinggi de mong kuasa ku kateh hal sinui ru agame mai Yahudi. Enai ajeh tediri ju imam-imam agame Yahudi, mai Farisi, guru-guru Hukom Taurat, ru lain-lain nij juga. naikerekwat naiha-kek bukti naiha-tudoh Yesus supaye buleh naihukom Kek dat. Tapi enai pek naikep nanek bukti pen 56hamapen jeoi sengoi naiog kesaksian palsu tentang Yesus. Mong mai de naibual begei adeh, ru mong mai de kilek nij naibual begei ajeh.

57Lalu memerip urag nij naijinjeg ru naiog kesaksian palsu tentang Yesus. 58Naiurok, “Jik mong jicerngai Yesus Kibelwal. Kek Kiurok Kek doh Kiteh Deg Jenang de bibeh ya manusia tapi ku kateh nik arik Kek doh Kibeh nij Deg Jenang de pek bibeh ya teg manusia.”#Yoh 2:19 59Tapi kesaksian enai ajeh saleng becanggah.

60Lalu Imam Agong agame Yahudi kijinjeg ku ngar enai ru kitanya nu Yesus, “Pek Haha-berlagka dikdij tenudoh mai nu Hek ajeh?”

61Tapi Yesus Kikerakdik serakngek ru pek Kiurok ma-ma pen. Imam Agong kitanya nij nu Kek, “Betolka Hek adeh Peselamat de bijanji ya Jenang, Kenon Ilei de Patot Bipateh?”

62Yesus Kiberlag, “Hooh, Engloh Ilei. Engkek doh engkeneng Eng Kenon Manusia Nggei ku kedudukan de tehormat ku englag kentop Jenang de Bekuasa. Ru engkek juga doh engkeneng Eng Nghol bikelileg ya sagop.”#Dan 7:13

63Bile Imam Agong kicerngai engrok Yesus ajeh, kek kiteg ileknog ru kiurok nu mai jengoi, “Hik pek hiperlu ha saksi kilek nij! 64Engkek ya engkecerngai Kek ya Kihina Jenang! Jadi, ma keputusan engkek?”

Dikdij enai naipersek Yesus ru naiurok, “Kek mesti bihukom dat!”#Im 24:16

65Memerip urag de mong ku pajeh mula naitoh Yesus. Naitutop Imat ya abat ru naitumbok Kek lalu naiurok, “Amen Hek numom nabi, pasalloh bok de pekpet Hek.” Pengawal-pengawal naien Kek ju kenjeh ru naitampar Kek.

Petrus Pek Kiaku Kikenal Yesus

(Mat 26:69-75; Luk 22:56-62; Yoh 18:15-18, 25-27)

66Ku mase Petrus lekat mong ku laman deg Imam Agong agame Yahudi, numom hambe kerdor deg ajeh kihol nu majeh. 67Bile kek kibakek Petrus kigigei beg os, kek kiperatik ha Petrus ru kiurok, “Hek mong besama ru Yesus Sengoi Nazaret ajeh!”

68Tapi Petrus pek kiaku. Kek kiurok, “Eng pek ngpanei ru pek ngreti ma de haurok ajeh.” Lalu kek kiet nu pintu laman deg ajeh. Ku mase ajeh, pog kibetader.#14:68 Ku mase ajeh, pog kibetader: Bahagian adeh pek mong ku kateh memerip salinan Alkitab manah.

69Kerdor ajeh kibakek Petrus nij ru kiurok nu mai jengoi de naijinjeg ku pajeh, “Sengoi adeh numom ju mai de jijoi Yesus!” 70Tapi Petrus pek kiaku nij.

Pek liu ju kenjeh, mai jengoi de naijinjeg ku pajeh naiurok nu Petrus, “Tentu hek adeh numom ju pengikot-pengikot Yesus kerana hek pen mai lengrik Galilea!”

71Petrus kibesumpah ru kiurok, “Biarloh Jenang Kipecelaka eng amen ngbelenglod! Eng pek ngkenal Sengoi de engkeurok ajeh!”

72Ku sarik jijeh juga pog pen kibetader ku inar kali. Petrus kiteingat ha bengwal Yesus nu kek begei adeh: “Sebelom pog kibetader nar kali, doh nik kali haurok pek hakenal Eng.” Petrus pen kipanjap.

انتخاب شده:

MARKUS 14: AEH

های‌لایت

به اشتراک گذاشتن

کپی