MARKUS 13
13
Yesus Kiajar tentang Tanda-tanda Helnol Arik Kiamat
(Mat 24:1-44; Luk 21:5-36)
1Mase Yesus ru Ipengikot-pengikot naihol ju laman Deg Jenang, mong numom ju Ipengikot-pengikot kiurok nu Kek, “Guru, nengloh! Ihad bor Deg Jenang adeh ru ibatu-batu pen ihad entoi!”
2Yesus Kiberlag, “Engkeneng had ibernor Deg Jenang adeh tapi nuarik doh pek mong nanek batu pen de doh terwes besusot ku itempat ajeh. Dikdij ajeh doh biteh.”
3Telas ajeh Yesus ru Ipengikot-pengikot naiet nu Lod Zaiton. Mase Yesus Kigigei Kingerngar nu Deg Jenang, Petrus, Yakobus, Yohanes, ru Andreas naiterbuk nu Yesus naiha-belwal ru Kek. Ku mase ajeh, tiktok mai kilek. 4Naiurok nu Yesus, “Jen, pasalloh nu jik, bileka dikdij hal ajeh doh kitejadi? Juga, ma itanda-tanda bile hal-hal ajeh kaha-tejadi?”
5Yesus Kiurok nu enai, “Bejaga-jagaloh supaye engkek pek bilenglod. 6Mong jeoi mai doh naihol naiguna muh Eng ru naiurok liknailoh peselamat de bijanji ya Jenang! Enai doh nailenglod jeoi mai. 7Engkek doh engkecerngai sengyog perag de tengah belaku ru doh engkecerngai juga gah perag de kijadi ku tempat-tempat de nyak tapi agokloh sengoh. Dikdij hal ajeh mesti kitejadi tapi pek bereti kiamat ya kihol. 8Nanek bangse doh kiperag bangse de kilek. Nanek kerajaan doh kiserag kerajaan de kilek. Majeh-manen doh mong gempe bumi ru cengwag. Tapi dikdij ajeh had imula taleh, sama begei penghod imula de kirasa ya numom kerdor de kaha-perikyos.
9Tapi hodloh engkek bejaga-jaga! Engkek doh bicap ru bien nu mahkamah. Ru doh birempet ku deg sembahyang. Engkek juga doh bien nu ngar penguasa-penguasa ru nu ngar raja-raja kerana engkepecaya nu Eng, tapi hal ajeh doh kijadi peluang untok engkebesaksi tentang Eng nu enai. 10Gah Bor hod biperlei lebeh canuk nu dikdij bangse sebelom kiamat kitiba. 11Bile engkek bicap ru bien nu mahkamah, agok risau ma de engkeha-urok. Tapi berlagloh ma de Kelog Santen Kipasal nu engkek. Apeka liengkek de belwal doh tapi Kelog Santen engkek de doh Kibelwal melalui engkek.#Mat 10:19-20; Luk 12:11-12 12Mai de pek pecaya nu Eng doh naikianat tenek-menang ru kekenon enai de pecaya supaye biperdat. Menek juga kibeh begei ajeh nu ikekenon. Kekenon doh nailawan keneng-menek enai ru naiog ubai supaye biperdat. 13Dikdij mai doh naigetek ha engkek kerana engkepecaya nu Eng. Tapi bok imai de lekat kibetahan lei ipenyudah doh bipeselamat.”#Mat 10:22
14Yesus Kiurok nij, “Engkek doh engkeneng nanek bende niknej de ihad bigetek ya Jenang kijinjeg ku tempat de pek patot kijinjeg. Bende ajeh kibeh tempat ajeh kijadi haram. (Ceknot ju eng Markus ha mai de bebaca: Hodloh engkereti ma imaksod.) Ku mase ajeh doh, mai de mong ku lengrik Yudea hodloh naijar nu lod.#Dan 9:27; 11:31; 12:11 15Mai de ku kemil pelog, agokloh celeh ru muj nu kateh deg kaha-kot ha iharta. 16Mai de ku selai, wesloh agok jog nu madeg kaha-kot ha iabat-baju.#Luk 17:31 17Ku mase ajeh, ihad yayak kekerdor de makok ru de peremmem! 18Bedoaloh nu Jenang supaye hal-hal ajeh pek kitejadi ku musem sengij. 19Ngurok begei ajeh kerana ku mase ajeh, doh tejadi senusah de lebeh terok daripade ma-ma senusah de pernah tejadi ku bumi adeh, sejak bumi adeh bicipte lei hunen. Senusah de begei ajeh doh pek kitejadi nij. #Dan 12:1 20Pek mong numom pen doh de bipeselamat amen TUHAN pek Kipepatik mase senusah ajeh. Tapi Kek Kipepatik mase ajeh kerana Kihok sengoi-sengoi de Kipileh naijadi hak Ilei.
21Ku mase ajeh, amen mong numom kiurok nu engkek, ‘Neng, Peselamat de bijanji ya Jenang mong ku padeh!’ atao ‘Neng, Kek mong ku pajeh!’ agokloh pecaya iengrok ajeh 22kerana peselamat-peselamat palsu ru nabi-nabi palsu doh naihol. Enai doh naibeh tanda-tanda ajaib ru hal-hal de luar biasa naiha-perikroj ha mai kilek. Amen buleh, naiha-perikroj ha sengoi-sengoi de bipileh ya Jenang juga. 23Cerngailoh! Eng Ngpasal dikdij hal ajeh nu engkek sebelom hal-hal ajeh kitejadi.
24Telas mase senusah ajeh, mat arik doh kijadi guer ru gecek pek kibecahaya nij.#Yes 13:10; Yeh 32:7; Yl 2:10, 31; 3:15 25Perloi-perloi doh naijer ju langit ru dikdij kuasa de mong ku langit doh kiyahyoh.#Yes 34:4; Yl 2:10 26Telas ajeh sengoi doh naineng Eng Kenon Manusia de ihad bekuasa ru mulie Nghol bikelileg ya sagop.#Dan 7:13 27Eng juga doh Ngor malikat-malikat naikumpol sengoi-sengoi de Ngpileh ju jap-jap tempat, ju mol bumi nu mol langit.
28Kotloh cuntoh ju keneng are. Amen icag belaer ru selun mula kicuai, ru iselak pai pen ya mula hol juga, engkek engkepanei musem beked ya kaha-merek. 29Begei ajehloh juga, bile engkeneng hal-hal ajeh kitejadi, hodloh engkepanei tentang hal adeh: Imase Eng Kenon Manusia Ngha-los nij nu bumi ya kaha-merek. 30Cerngailoh abor! Dikdij pekare ajeh doh kitejadi sebelom dikdij mai ku jaman adeh dij naidat. 31Langit ru bumi doh nyep tapi engrok Eng doh pek nyep lei ditehjeh.
32Tapi pek mong numom pen de kipanei bile helnol Eng Kenon Manusia nij doh. Malikat-malikat ku serga pen pek naipanei. LiEng pen pek Ngpanei juga. Tapi had Menek Kihalei taleh de bepanei. 33Jadi, bejaga-jagaloh ru peratikloh kerana engkek pek engkepanei imase. 34Bejaga-jagaloh begei perumpamaan adeh: Mong numom kiet nu tempat de nyak. Bile kek kaha-cip, kior ihambe-hambe naijaga ideg ru kiog tugas nu enai memaseg. Nu mai de bejaga pintu, kek kibesat supaye kijaga abor-bor.#Luk 12:36-38
35Jadi, bejaga-jagaloh kerana pek engkepanei imase tuan deg ajeh doh kijog. Enggamak ku idui, enggamak ku ipadek kelem, enggamak ku ipepegelap, atao ku ipegelap. 36Amen tuan deg ajeh aleh-aleh kijog, agokloh kineng engkek tengah engkebukbet. 37Ma de Ngurok nu engkek, Ngurok juga nu dikdij sengoi: Bejaga-jagaloh!”
انتخاب شده:
MARKUS 13: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
