MARKUS 12
12
Perumpamaan tentang Mai Bepajak Selai Anggor
(Mat 21:33-46; Luk 20:9-19)
1Telas ajeh Yesus Kicerite nanek perumpamaan nu raknak-raknak imam agame Yahudi, guru-guru Hukom Taurat, ru raknak-raknak mai Yahudi Kaha-ajar enai. Icerite begei adeh: “Mong numom kibuka selai anggor. Kek kipasag pagar ku sekelileg selai ajeh, kicop lubang ha tempat reknit pelek anggor, ru kibeh menare jenaga iselai. Telas ajeh kek kipajak iselai anggor ajeh nu memerip urag mai, lalu kiet nu lengrik kilek.#Yes 5:1-2 2Bile musem anggor ya lei, tuan selai ajeh kingeng numom ihambe supaye kiterima pelek anggor. Pelek anggor ajeh engleg ju hasel selai de kijadi hak kek. 3Tapi naicap ru naipet hambe ajeh lalu naior kek jog ru mahentok de kien. 4Telas ajeh tuan selai ajeh kingeng nij ihambe de kilek tapi naipet hambe ajeh ku ikui ru naipeselsel kek. 5Lalu kek kingeng nij ihambe de kilek tapi naiperdat kek. Tuan selai ajeh kingeng jeoi hambe-hambe de kilek nij tapi mong de bipet ru mong de biperdat. 6Jadi, had mong numom taleh de dapat kingeng. Ilei ajeh ikenon de ihad kihok. Ipenyudah kek kingeng ikenon ajeh nu mai bepajak iselai anggor. Kek kiserngik, ‘Tentu enai doh naihormat ha kenon eng.’ 7Tapi bile mai de bepajak iselai ajeh naineng ha kenon tuan selai ajeh, naibelwal ratak liknai, ‘Adeh ilei wares tuan selai. Bei hiperdat kek supaye hikep iselai!’ 8Enai pen naicap ikenon ajeh lalu naiperdat ru naipej kek nu luar selai.”
9Telas Yesus Kicerite begei ajeh, Kek Kitanya, “Jadi, ma doh de kibeh ya tuan selai ajeh? Tentu kek doh kihol nu iselai ru kiperdat mai bepajak iselai ajeh lalu kipajak iselai anggor ajeh nu mai kilek. 10Tentu ya engkebaca engrok adeh ku kateh Alkitab:
‘Batu de bipej ya tukang deg
ya kijadi batu cenol.
11Hal ajeh kitejadi kijoi heknod TUHAN,
ru ma de Kibeh ajeh ihad bor!’ ”#Mzm 118:22-23
12Bile naicerngai Yesus Kicerite perumpamaan ajeh, guru-guru Hukom Taurat ru raknak-raknak mai Yahudi naipanei Yesus Kiurok tentang enai. Kerana ajeh, naikerekwat naikek care naiha-cap Yesus tapi naisengoh ha mai jengoi. Jadi, naidek Kek ru naiet ju kenjeh.
Tenanya tentang Benayar Cukei
(Mat 22:15-22; Luk 20:20-26)
13Lalu naingeng memerip urag mai Farisi ru mai de naisukong ha Raja Herodes Antipas supaye naiperangkap Yesus. 14Lalu enai ajeh naihol nu Yesus ru naitanya nu Kek, “Guru, jipanei Jen mai de benar. Enjen pek bipengaroh ya mai kilek kerana pek Jenpeduli ha pangkat mai. Tapi Jenajar heknod Jenang ru benar. Jadi, jiha-tanya, amen hijoi Hukom Taurat, bulehka tok hibayar cukei nu raja kerajaan Rom?”#12:14 Raja kerajaan Rom: Atao Kaisar.
15Tapi Yesus Kipanei sengik niknej enai ajeh lalu Kek Kiberlag, “Engkek cuba engkeha-perangkap ha Eng! Pernengloh nukepeg duet perak nu Eng.”
16Lalu naiog nukepeg duet perak nu Yesus. Yesus Kitanya nu enai, “Wog ru muh bok adeh?”
Naiberlag, “Raja kerajaan Rom.”
17Lalu Yesus Kiurok, “Amen begei ajeh, ogloh nu raja kerajaan Rom ma de patot engkeog nu raja kerajaan Rom, ru ogloh nu Jenang ma de patot engkeog nu Jenang.”
Cengang empag enai naicerngai ha berenglag Yesus ajeh.
Tenanya tentang Arik Kisnos Mai Dat
(Mat 22:23-33; Luk 20:27-40)
18Telas ajeh memerip urag mai Saduki naihol nu Yesus. Enai pek naipecaya mai de ya dat doh naikos nij. 19Naiurok nu Yesus, “Guru, entemjeh Nabi Musa kicot hukom adeh: ‘Amen numom keral kidat pek kibekenon, imenang hodloh kijeg balu itenek ajeh supaye itenek de ya dat ajeh kikep kenon-cenok.’#Ul 25:5 20Entemjeh mong tujoh urag tenek-menang. Ilei de sulog kijeg numom kerdor tapi kidat pek baibekenon. 21Lalu imenang de kedue kijeg balu itenek ajeh tapi kek pen kidat pek baibekenon juga. Hal de sama belaku juga nu imenang de ketige lei nu de ketujoh. 22Tujoh urag tenek-menang ajeh naijeg kerdor de sama tapi naidat pek naibekenon. Ipenyudah kerdor ajeh pen kidat. 23Ku arik kisnos mai dat, kerdor ajeh doh kijadi kenah bok? Kerana, rimdij tujoh urag tenek-menang ajeh pernah naijadi gengsir kerdor de sama!”
24Yesus Kiberlag, “Peniker engkek ajeh sek kerana pek engkereti Alkitab ru kuasa Jenang. 25Bile mai dat biberkos nij, enai pek naibekenah-gengsir. Enai doh naisui begei ha malikat-malikat ku serga de pek naijekjeg. 26Tentang hal kisnos mai dat, tentu ya engkebaca ku kateh kitab Nabi Musa de kicerite tentang semak bejerlak de der ya os. Ku pajeh mong bicot Jenang Kibelwal nu Nabi Musa, ‘Engloh Jenang de bisembah ya Abraham, Ishak, ru Yakub.’#Kel 3:6 27Ju bengwal ajeh hipanei tentang hal adeh: Nik urag de ya dat ajeh sebenarnye lekat sui ru lekat naisembah ha Jenang. Jenang ajeh apeka Jenang nu mai dat tapi nu mai sui. Jadi, ma de engkepiker ajeh sek!”
Ernor de Paleng Penteng
(Mat 22:34-40; Luk 10:25-28)
28Lalu holloh numom guru Hukom Taurat. Kek kicerngai ha bengwal Yesus ru mai Saduki. Kek kineng Yesus panei Kiberlag tenanya mai Saduki. Kerana ajeh, guru Hukom Taurat ajeh kitanya nu Yesus, “Ernor belokka de paleng penteng ju dikdij ernor de biog ya Jenang?”
29Yesus Kiberlag, “Adehloh ernor de paleng penteng: ‘Cerngailoh abor, bangse Israel! TUHAN ajeh Jenang hik. Kek ajeh TUHAN de nek nanek. 30Hokloh TUHAN Jenang hek ru segenap sengik hek, ru segenap sengrog hek, ru dikdij peniker hek, ru dikdij kengwat hek.’#Ul 6:4-5 31Adehloh ernor kedue de penteng: ‘Hokloh ratak liengkek begei hahok diri lihek sendiri.’ Pek mong perintah kilek de lebeh penteng daripade rimnar perintah ajeh.”#Im 19:18
32Guru Hukom Taurat ajeh kiurok nu Yesus, “Guru, bor berenglag Jen! Mimang betol ma de Jenurok. Jenang ajeh nek nanek ru pek mong de kilek.#Ul 4:35 33Hik hodloh hihok Jenang ru segenap sengik hik, dikdij peniker hik, ru dikdij kengwat lihik. Hik juga hodloh hihok ratak manusia begei hihok ha diri lihik sendiri. Lebeh penteng hitaat nu rimnar ernor ajeh daripade hiog pesembahan teknod ru pesembahan-pesembahan kilek.”#Hos 6:6
34Yesus Kineng guru Hukom Taurat ajeh ihad panei kiberlag. Lalu Yesus Kiurok nu kek, “Hek ya merek hajadi sengoi de biperintah ya Jenang sebegei Raja.”
Telas ajeh pek mong numom pen de berani naiha-betanya nu Yesus nij.
Tenanya tentang Peselamat de Bijanji ya Jenang
(Mat 22:41-46; Luk 20:41-44)
35Mase Yesus Kibeajar ku laman Deg Jenang, Kek Kitanya, “Yama guru-guru Hukom Taurat naiurok, ‘Peselamat de bijanji ya Jenang ajeh kenon-cenok Raja Daud’? 36Mase Raja Daud bipimpen ya Kelog Santen, kek kiurok begei adeh:
‘TUHAN ya Kiurok nu Tuhan eng:
Geiloh ku kedudukan de tehormat ku englag kentop Eng
lei betol-betol Ngpealah musoh-musoh Hek.’#Mzm 110:1
37Jadi, amen Raja Daud kicereg Peselamat ajeh ‘Tuhan,’ Peselamat ajeh mesti enyuk pek kenon-cenok Raja Daud.”
Mai jengoi ku Deg Jenang ihad gemar naicerngai ha neajar Yesus.
Yesus Kiog Amaran tentang Guru-guru Hukom Taurat
(Mat 23:1-36; Luk 20:45-47)
38Mase Yesus Kiajar enai, Kek Kiurok juga, “Bejaga-jagaloh nu guru-guru Hukom Taurat. Naigemar naicekcip nailog jubah cereg de bor. Enai juga naigemar amen sengoi-sengoi ku tempat kengnem naihormat ha enai. 39Bile naihol nu deg sembahyang atao ku tempat kenurik, naigemar gigei ku tempat ginei ha mai tehormat. 40Nailenglod balu-balu naiha-kot deg enai. Ku ngar mai jengoi, naibedoa cereg supaye enai bisangka alim. Enai doh naikep nehukom de paleng nyeh!”
Pesembahan Numom Balu de Hajap
(Luk 21:1-4)
41Yesus Kigei Kingar nu peti duet pesembahan ku laman Deg Jenang ru Kineng mai naipermuj duet nu kateh peti ajeh. Jeoi mai kaya naipermuj jeoi duet. 42Lalu mong numom balu de hajap kihol ru kipermuj nar kepeg duet tembage de ihad macot inilei. 43Yesus Kicereg Ipengikot-pengikot lalu Kiurok nu enai, “Cerngailoh abor, balu de hajap ajeh kiog pesembahan de lebeh entoi inilei daripade dikdij mai kilek. 44Dikdij mai kilek ajeh naiog pesembahan ju kenaya enai tapi balu ajeh hamapen ihad kihajap, kiog dikdij inafkah.”
انتخاب شده:
MARKUS 12: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
