KISAH 8
8
Saulus Kisiksa Jemaah-jemaah ku Kote Yerusalem
1Saulus kibesetuju Stefanus biperdat.
Ku arik ajeh juga, jemaah-jemaah ku kote Yerusalem bianiaye ru ihad kejam. Kecuali rasul-rasul, dikdij pengikot Yesus tepaksa naiceraklah nu dikdij lengrik Yudea ru Samaria. 2Memerip urag mai de taat nu Jenang naicop Stefanus. Naijap ha kek ru ihad sedeh. 3Tapi Saulus kikerekwat kaha-pebinasa ha jemaah-jemaah. Kek kiet nu jap-jap deg ru kisaher pengikot-pengikot Yesus nu luar, pek kikira keralka kerdor lalu kipermuj enai nu kateh jel.#Kis 22:4-5; 26:9-11
Gah Bor Biperlei ku Lengrik Samaria
4Jemaah-jemaah de ya ceraklah ajeh naiperlei Gah Bor nu dikdij tempat. 5Filipus kiet nu nanek kote ku lengrik Samaria ru kipasal nu sengoi-sengoi ku pajeh tentang Peselamat de bijanji ya Jenang. 6Mase mai jengoi ku pajeh naicerngai Filipus kibelwal ru naineng kek kibeh tanda-tanda ajaib, naiperatik betol-betol ma de kiurok. 7Nyanik-nyanik naiwig ru naihol ju jeoi sengoi de bisangrog. Jeoi mai lumpoh ru mai capek biperbor. 8Kerana ajeh, sengoi ku kote ajeh ihad naikerakmik.
9Ku kote ajeh mong numom keral imuh Simon de ya liu kibeh ilmu siher ru kibeh mai Samaria naikagom ha kek. Kek kipemegah idiri sebegei sengoi de luar biasa. 10Dikdij sengoi ju de nyengnyam leiloh nu de engrak naiperatik ha ibengwal ru naiurok, “Adehloh isengoi de mong kuasa de entoi ju Jenang.” 11Mai jengoi naijoi ha kek kerana ya liu kipekagom enai ya iilmu siher. 12Tapi mase Filipus kiperlei Gah Bor tentang begeiharok Jenang Kimemerintah sebegei Raja ru tentang muh Yesus Kristus, enai naijadi pecaya ru bibaptis pek kira keralka kerdor. 13Simon juga kipecaya ha Gah Bor de biperlei ya Filipus. Telas kek bibaptis, kek kijoi Filipus. Simon kikagom bile kineng ha tanda-tanda ajaib ru hal-hal de luar biasa de bibeh ya Filipus.
14Mase rasul-rasul ku kote Yerusalem naicerngai gah tentang mai Samaria ya naiterima ha engrok Jenang, enai naingeng Petrus ru Yohanes et nu majeh. 15Bile bailei nu majeh, baibedoa ha mai Samaria de pecaya nu Yesus supaye naiterima Kelog Santen 16kerana pek mong numom pen ju mai Samaria ajeh de ya kiterima Kelog Santen. Enai had bibaptis ku kateh muh Tuhan Yesus. 17Lalu Petrus ru Yohanes baidek teg liubai ku kui enai ru enai pen naiterima Kelog Santen.
18Bile rimnar rasul ajeh baidek teg ubai ku kui mai, Simon kineng mong Kelog Santen biog nu sengoi-sengoi ajeh. Kerana ajeh, kek kitawar duet nu Petrus ru Yohanes 19lalu kiurok, “Ogloh kuasa ajeh nu eng supaye amen ngdek teg eng ku bok-bok taleh, sengoi ajeh kiterima Kelog Santen.”
20Tapi Petrus kiberlag, “Celakaloh hek ru duet hek kerana hapiker kurnie Jenang dapat bibeli ya duet! 21Hek pek berhak hajoi ku kateh pelayanan jik kerana sengik hek pek iklas ku mat Jenang. 22Betobatloh ju heknod hek de jehat ru bedoaloh. Enggamak doh Tuhan Kiampon hek ju peniker hek de niknej ajeh. 23Ngpanei hek ihad hairi ha mai kilek ru hek bipehambe ya dosa.”
24Lalu Simon kiurok nu Petrus ru Yohanes, “Bedoaloh nu Tuhan ha eng supaye pek tejadi hal-hal de jerkebual ajeh nek.”
25Telas Petrus ru Yohanes baiog kesaksian tentang Yesus ru baiperlei engrok Tuhan, bailos nij nu kote Yerusalem. Ku kateh ceknip ubai ajeh, baiperlei Gah Bor nu kampug-kampug de ku lengrik Samaria.
Filipus ru Pegawei Entoi ju Lengrik Etiopia
26Malikat TUHAN Kiurok nu Filipus, “Kosloh ru ciploh nu selatan, nu nong antare kote Yerusalem ru kote Gaza.” (Nong ajeh kilalu padag guron.) 27-28Filipus pen kicip lalu kiburuk numom sida-sida.#8:27-28 Sida-sida: Imaksod, keral de ya bikasi iselnel ya ituan supaye pek birisau kek doh kibesama ru kerdor-kerdor de mong ku deg ituan. Sida-sida ajeh pegawei entoi ju lengrik Etiopia. Kek kijaga ha kenaya Kandake ratu lengrik ajeh. Pegawei ajeh ya kisembah Jenang ku kote Yerusalem ru hunen kek ku kateh iceknip kaha-jog. Kek kigei ku kateh kerite kuda sambel kibaca kitab Nabi Yesaya. 29Kelog Santen Kiurok nu Filipus, “Perekloh nu kerite kuda ajeh.” 30Jadi, Filipus pen kiperek nu kerite kuda ajeh lalu kicerngai pegawei entoi ajeh kibaca kitab Nabi Yesaya. Filipus kitanya nu kek, “Jenpahamka ma de jenbaca ajeh?”
31Kek kiberlag, “Eng pek ngpaham kerana bokhentok de pejelas hal ajeh nu eng.” Kek pen kipakat Filipus tebot besama ru kek. 32Adehloh ayat de kibaca nek:
“Kek begei ha dombe de bien baha-goj
ru begei ha dombe de pek kibeengrok ku mase isentol biloj.
Begei ajehloh Kek pek Kibual ma-ma pen.
33Kek bihina ru bihukom secare pek adel.
Kek pek mong Ikenon-cenok
kerana Kek biperdat ru ya pek mong ku dunia adeh.”#Yes 53:7-8
34Sida-sida ajeh kitanya nu Filipus, “Pasalloh, tentang bokka nabi ajeh kiurok? Tentang diri ilei sendiri atao tentang mai kilek?” 35Jadi, Filipus pen mula kipasal maksod ayat ajeh nu kek ru kiperlei Gah Bor tentang Yesus nu kek.
36Mase ubai ku kateh ceknip, bailei nu nanek tempat de mong teu. Sida-sida ajeh kiurok, “Nengloh, ku pajeh mong teu! Pek mong isebab eng bihalang dari bibaptis!” [37Filipus kiurok, “Amen jenpecaya nu Yesus ru segenap sengik, jen buleh bibaptis.” Sida-sida ajeh kiberlag, “Eng ngpecaya Yesus Kristus ajeh Kenon Jenang.”]#8:37 Ayat adeh pek mong ku kateh memerip salinan Alkitab manah.
38Lalu kek kior kerite kuda ajeh bibehenti. Telas ajeh baiceleh nu mateu, ru Filipus pen kibaptis kek. 39Telas baihol ju teu, Kelog TUHAN Kinyong Filipus ju kenjeh. Sida-sida ajeh pek kibakek Filipus nij lalu kipeteros iceknip ru sengik de suka. 40Aleh-aleh, Filipus kisedar kek ya mong ku kote Asdod. Kek kipeteros iceknip sambel kiperlei Gah Bor nu dikdij kote lei kek kilei nu kote Kaisarea.
انتخاب شده:
KISAH 8: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
