KISAH 7
7
Bengwal Stefanus
1Telas ajeh Imam Agong agame Yahudi kitanya nu Stefanus, “Betolka dikdij tenudoh enai ajeh?”
2Stefanus kiberlag, “Sesedara mai Yahudi ru pemimpen-pemimpen de bihormat, cerngailoh ma de ngha-bual! Sebelom jenang rak hik Abraham kijeg nu pekan Haran, Jenang de mulie Kiperneng Idiri nu Abraham ku Mesopotamia. 3Jenang Kiurok nu kek, ‘Dekloh lengrik hek ru dekloh sedara-mara hek. Etloh nu lengrik de doh Ngternyol nu hek.’#Kej 12:1 4Abraham pen kidek ju lengrik mai Kasdim lalu kigei ku pekan Haran. Telas iapak ya dat, Jenang Kien Abraham ju kenjeh nu lengrik de higei hunen. 5Ku mase ajeh, Jenang pek Kiog gek pen tik nu Abraham sebegei hak kek. Tapi Jenang Kijanji Kaha-og tik ajeh nu Abraham untok kijadi hak kek ru ikekenon-cenok. Ku mase ajeh, Abraham pekseg kibekenon.#Kej 12:7; 13:15; 15:18; 17:8 6Tapi Jenang Kiurok nu kek, ‘Kenon-cenok hek doh naijadi mai aseg ku lengrik kilek. Enai doh naijadi hambe ku pajeh ru bianiaye selame 400 tahut. 7Tapi Eng doh Nghukom bangse de naipehambe ha enai. Kenon-cenok hek doh naihol ju lengrik ajeh ru naisembah Eng ku tempat adeh.’#Kej 15:13-14 8Jenang Kiog jenanji sunat nu Abraham ru Kior Abraham kisunat diri ilei sendiri sebegei tanda kek ya kiterima jenanji ajeh. Abraham juga kisunat Ishak bile umur ikenon ajeh lapan arik. Ishak juga kisunat Yakub ikenon ajeh. Yakub nij kisunat 12 urag ikenon keral de naijadi jenang rak bangse hik.” #Kej 17:10-14; 21:2-4; 25:26
9“Jenang rak bangse hik naidengki ha Yusuf ru naijual kek sebegei hambe nu lengrik Mesir. Tapi Jenang Kibeserta ru kek 10ru Kipeselamat kek ju dikdij isenusah. Jenang Kiog kek cerendeg ru Kibeh raja Mesir senang isengik nu Yusuf. Raja Mesir kilantek kek kijadi penguasa ku seluroh lengrik Mesir ru seluroh istane.”
11“Telas ajeh, ku seluroh lengrik Mesir ru tik Kanaan mong cengwag de kibeh dikdij mai naitesiksa. Jenang rak hik pek mong becaknak. 12Bile Yakub kicerngai mong gandom ku lengrik Mesir, kek kingeng ikekenon nu lengrik Mesir untok kali petame. 13Mase ceknip enai kali kedue, Yusuf kipasal nu itenek-menang ajeh, ‘Engloh Yusuf.’ Ju kenjehloh raja Mesir kipanei ha peringak Yusuf. 14Telas ajeh Yusuf kibesat nu iapak ru rimdij iperingak untok naijeg nu lengrik Mesir. Ijengoi peringak ajeh 75 urag. 15Jadi, Yakub ru iperingak pen naijeg nu lengrik Mesir. Ku pajehloh kek ru jenang rak hik naidat. 16Mayat enai bien nu pekan Sikhem ru bicop ku penep. Abraham kibayar duet perak untok kibeli tik penep ajeh ju kekenon Hamor ku Sikhem.”
17“Bile ya rek imase Jenang Kaha-pegenap Ijenanji nu Abraham, bangse hik ku lengrik Mesir ya kijadi ihad jeoi. 18Tapi mong numom raja pai de pek kikenal ha Yusuf mula kimemerintah lengrik Mesir. 19Raja ajeh kilenglod ha bangse hik ru kipesiksa jenang rak hik. Kek kipaksa naipej kekenon sanget enai de pai yos supaye naidat. 20Ku mase ajehloh, Nabi Musa kiyos. Kek numom sanget de ihad bor ku mat Jenang. Kek bibela ku deg iperingak lei iumur nik gencek. 21Bile kek bipej, kenon kerdor raja Mesir kikot ru kijaga kek sebegei kenon ilei sendiri. 22Nabi Musa biajar dikdij ilmu bangse Mesir lei mong kuasa ku ibengwal ru ibahneh.”
23“Bile iumur ya 40 tahut, isengik tegerak kaha-sueg ha isesedara mai Israel. 24Kek kineng numom ju mai Israel tengah bianiaye ya mai Mesir. Nabi Musa pen kitulog sengoi de bianiaye ajeh ru kiperdat mai Mesir ajeh. 25Nabi Musa kisangka bangse ilei sendiri naipaham tentang hal adeh: Jenang Kiguna kek Kaha-terlas enai ju mai Mesir. Tapi mai Israel pek naipaham tentang hal ajeh. 26Ku ihuper nij, kek kineng mong nar mom mai Israel tengah baibelawan ru kek kicuba kaha-beh ubai berbor. Kiurok, ‘Jerkek adeh besedara. Yama jerkebelawan?’ 27Tapi sengoi de kipet ikawat ajeh nek kitulak Nabi Musa nu tepi ru kiurok, ‘Bok de pejadi hek pemimpen ru hakem jar? 28Haha-perdat eng begei haperdat mai Mesir kelemnek?’ 29Bile Nabi Musa kicerngai ha engrok ajeh, kek kijar ju lengrik Mesir lalu kigei ku lengrik Midian sebegei mai aseg. Ku pajeh kek kikep nar mom kenon keral.”
30“Telas 40 tahut ju kenjeh, numom malikat kiperneng idiri nu Nabi Musa ku kateh semak bejerlak de der ya os ku padag guron beg Lod Sinai. 31Nabi Musa kihiran kineng hal ajeh lalu kiperek nu semak ajeh supaye buleh kineng lebeh bik nij. Tapi kek kicerngai suara TUHAN Kiurok, 32‘Engloh Jenang de bisembah ya jenang rak hek Abraham, Ishak, ru Yakub.’ Nabi Musa kerog iberog kerana kisengoh ru pek berani kaha-neng nu semak ajeh nij. 33Lalu TUHAN Kiurok nij, ‘Tegloh kasot hek kerana tik de hajinjeg ajeh suci. 34Eng ya Ngbakek sengoi-sengoi Eng ihad terok bisiksa ku lengrik Mesir. Eng ya Ngcerngai jengnam enai ru ya Ngceleh Ngha-terlas enai. Hunen, beiloh! Eng Ngha-ngeng hek nu lengrik Mesir.’
35Nabi Musa adehloh ilei de entemjeh pek biterima ya bangse Israel. Naiurok, ‘Bok de pejadi hek pemimpen ru hakem jik?’ Tapi kek ajehloh de bingeng ya Jenang supaye kijadi pemimpen ru peselamat. Melalui malikat de kiperneng ilei nu Nabi Musa ku semak jerlak de beros, Jenang Kingeng kek supaye kijadi pemimpen ru peselamat bangse Israel. 36Nabi Musa adehloh ilei de kipimpen bangse Israel hol ju lengrik Mesir ru kibeh jeoi hal-hal luar biasa ru tanda-tanda ajaib ku lengrik Mesir, ku Laot Renganj, ru ku padag guron selame 40 tahut. 37Nabi Musa adehloh ilei de kiurok nu mai Israel, ‘Jenang doh Kipileh numom Nabi begei ha eng ju engkap bangse liengkek sendiri ru doh Kingeng Kek nu engkek.’#Ul 18:15, 18 38Nabi Musa adehloh ilei de mong besama ru bangse Israel ku padag guron. Kek kibesama ru jenang rak hik, ru kibesama juga ru malikat de kibelwal nu kek ku Lod Sinai. Kek kiterima engrok de sui untok kiperlei nu hik.”
39“Tapi jenang rak hik nainyek pek naiha-taat nu kek. Naitulak kek ru naiha-los nij nu lengrik Mesir. 40Naiurok nu Harun, ‘Behloh ha jik patong behala de buleh kipimpen hik kerana pek hipanei ma de ya belaku ku Nabi Musa de kipimpen hik hol ju Mesir!’ 41Lalu naibeh patong kenon lembu ru naipesembah korban ha behala enai ajeh. Naibesuka ha bahneh ju teg liknai ajeh sendiri.#Kel 32:2-6 42Kerana ajeh, Jenang Kidek ru Kibiar enai naisembah ha mat arik, gecek, ru perloi-perloi ku langit. Hal ajeh kitejadi kena begei de bicot ku kateh kitab nabi-nabi,
‘Engkek mai Israel,
pek ha Eng engkeog korban ru pesembahan selame 40 tahut ku padag guron. 43Kemah ha behala Molokh#7:43 Molokh: Molokh ajeh dewe langit ru mat arik (planet Zuhrah) de bisembah ya mai Kanaan ru mai Fenisia. Enai naiog kenon liknai sebegei korban ha dewe ajeh. ajehloh de engkegandar.
Ru engkegandar juga behala patong perloi imuh Refan.#7:43 Refan: Refan ajeh planet Zuhal de bisembah sebegei dewe ya mai Mesir.
Ajehloh behala de engkebeh ru engkesembah.
Kerana ajeh, Eng doh Ngpej engkek nu tempat de lebeh nyak daripade lengrik Babel.’#Am 5:25-27
44Jenang rak hik mong Kemah Jenang ku padag guron. Kemah ajeh bibeh begei de ya bior ru icuntoh biternyol ya Jenang nu Nabi Musa. 45Telas naiterima kemah ajeh, jenang rak hik de bipimpen ya Yosua naien kemah ajeh mase naikot tik bangse-bangse kilek. Jenang Kihalau bangse-bangse ajeh ku ngar enai, ru kemah ajeh mong ku pajeh lei ku jaman Raja Daud. 46Raja Daud kipesenang sengik Jenang ru kisemanj kaha-beh nanek deg ha Jenang de bisembah ya Yakub.#2 Sam 7:1-16; 1 Taw 17:1-14 47Tapi Raja Salomoloh de bahbeh deg ajeh ha Jenang.”
48“Tapi Jenang de Paleng Tinggi Ikedudukan pek Kigei ku kateh deg de bibeh ya manusia. 49Begei de bicot ku kateh Alkitab,
‘Langit ajeh tahte Eng
ru bumi ajeh nelapek jog Eng.
Engkek manusia mimang pek dapat engkebeh deg de kena ha Eng.
Engkek pek dapat engkebeh tempat de bor ha Eng Nggei 50kerana LiEng Sendiriloh de bahbeh dikdij ma de mong ku langit ru bumi.’#Yes 66:1-2
51Dikdij liengkek ihad degel lei pek engketaat nu Jenang ru engkenyek cerngai ha Iengrok! Engkek begei jenang rak liengkek. Engkek selalo engkelawan Kelog Santen! 52Jenang rak engkek de beaniaye ha jap-jap nabi. Enai naiperdat sengoi-sengoi de naibenubuat tentang helnol Peselamat de bijanji ya Jenang. Hunen ya engkekianat ru engkeperdat Kek. 53Engkek ya engketerima Hukom Taurat de biperlei ya malikat-malikat tapi pek engkejoi ha hukom ajeh!”
Stefanus Bipej ya Batu Lei Kidat
54Bile dikdij anggote Mahkamah Agame Yahudi naicerngai ma de ya bibual ya Stefanus, enai ihad naiberiknos ha kek. 55Tapi Stefanus de bikuasa ya Kelog Santen kiceog nu langit ru kineng kemuliean Jenang ru kibakek Yesus Kijinjeg ku englag kentop Jenang. 56Stefanus kiurok, “Nengloh! Eng ngbakek serga ya kitebuka ru Kenon Manusia Kijinjeg ku englag kentop Jenang!”
57Lalu dikdij anggote Mahkamah Agame Yahudi ajeh naihai sambel naitutop entag enai ru naiserag Stefanus serentak. 58Naisaher kek nu luar kote ru naipej kek ya batu naiha-perdat kek. Sengoi-sengoi de naijadi saksi tentang hal ajeh naidek jubah enai beg jog numom keral nyengnyam imuh Saulus. 59Mase naipej Stefanus ya batu, Stefanus kibedoa, “Tuhan Yesus, terimaloh kelog eng!” 60Lalu kek kibelutot ru kicereg ru suara kuat, “Tuhan, amponloh dosa enai!” Telas kibual begei ajeh, kek pen kidat.
انتخاب شده:
KISAH 7: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
