KISAH 12
12
Jemaah-jemaah Gutesiksa
1Ku mase ajeh, Raja Herodes Agripa Petame mula kisiksa engleg ju jemaah-jemaah. 2Kek kior rasul Yakobus tenek Yohanes biperdat ya pedang. 3Bile kineng mai Yahudi naikerakmik ha ibahneh ajeh, kek kicap Petrus juga. (Hal ajeh belaku ku mase Arik Raya Ruti Pek Beragi.)#12:3 Arik Raya Ruti Pek Beragi: Raya adeh bimula telas caknak Paskah kidij. Raya adeh kibelangsong selame tujoh arik. Ku mase raya adeh, mai Yahudi had naicak caknak de pek beragi. Neng Keluaran 12:15-20. 4Telas Petrus bicap, kek bipermuj nu kateh jel. Ku pajeh kek bijaga ya empat kumpulan aska. Ku jap kumpulan ajeh mong empat urag aska. Raja Herodes Agripa Petame kirancang kaha-peadel Petrus ku ngar mai jengoi telas Arik Raya Paskah#12:4 Arik Raya Paskah: Mai Yahudi nairaya arik adeh untok naiingat ha kejadian Jenang Kiterlas jenang rak enai de bipehambe ku lengrik Mesir entem. Neng Keluaran 12:1-14. ya dij. 5Kerana ajeh, Petrus biterhan ku jel tapi jemaah-jemaah besunggoh-sunggoh naibedoa nu Jenang ha Petrus.
Petrus Biterlas ju Jel
6Nuarik sebelom Raja Herodes Agripa Petame kipeadel Petrus, ku kelem ajeh Petrus kibukbet ku semakdek nar mom aska. Kek bibeg ya nar rantei. Mong aska-aska kilek juga de naijaga pintu jel ajeh. 7Aleh-aleh malikat TUHAN kijinjeg ku pajeh ru icahaya lau ku kateh bilek jel ajeh. Malikat ajeh kiberyol ru kior Petrus kos. Kiurok, “Kos deras!” Ku sarik jijeh juga yogloh rantei ju teg Petrus. 8Malikat ajeh kiurok, “Beg cengkot wog ru log kasot hek.” Petrus pen kibeh begei ajeh. Lalu malikat ajeh kiurok nij, “Log jubah hek ru joi eng.”
9Petrus kijoi malikat ajeh hol ju jel. Tapi Petrus pek kipanei ma de bibeh ya malikat ajeh mimang betol-betol tejadi nu kek. Kek kisangka dikdij ajeh had nanek nengneng taleh. 10Telas bailalu tempat jenaga de petame ru kedue, ipenyudah bailei nu pintu besi de kituju nu bandar. Pintu ajeh kitebuka ya ilei sendiri lalu baihol. Telas baicip memerip inyaknak ku nanek lurong, aleh-aleh malikat ajeh kidek Petrus.
11Baruloh Petrus kisedar ma de ya tejadi ku ilei. Kek kiurok, “Hunen ya ngpanei dikdij adeh betol-betol tejadi. TUHAN ya Kikirep Imalikat supaye Kiterlas eng ju kuasa Raja Herodes Agripa Petame ru ju dikdij ma de mai Yahudi naiharap tejadi nu eng.”
12Bile Petrus kisedar ha ikeadaan ajeh, kek kiet nu deg Maria amek Yohanes Markus. Jeoi sengoi naibekumpol ku pajeh ru tengah naibedoa. 13Bile Petrus kigadok pintu luar, mong numom hambe kerdor imuh Rode kihol kaha-buka pintu ajeh. 14Bile kikenal ha suara Petrus, kek ihad kikerakmik, jadi deras-deras kimuj nij nu kateh deg pek kibuka pintu. Kek kiurok ru suara de kuat, “Mong Petrus kijinjeg ku luar!” 15Enai naiurok, “Hek ya hagila!” Tapi Rode lekat kigaleh ru kiurok sengoi ajeh Petrus. Kerana ajeh naiurok, “Ajeh imalikat!”
16Petrus teros kigadok pintu. Bile naibuka pintu ajeh, enai ihad cengang empag enai naineng ha Petrus. 17Petrus kiog neuta ya iteg supaye naikerakdik sengek. Lalu kek kipasal begeiharok TUHAN Kiperhol kek ju jel. Kek pen kiurok, “Pasal hal adeh nu Yakobus#12:17 Yakobus: Adeh menang Yesus apeka rasul Yakobus de ya biperdat. Kek pemimpen jemaah ku kote Yerusalem. ru sesedara seiman de kilek.” Telas ajeh kek kidek ju tempat ajeh ru kiet nu tempat kilek.
18Ku ipegelap huper nij, belakuloh senibok ku engkap mai aska-aska. Naibetanya ratak liknai ma de ya tejadi ku Petrus. 19Raja Herodes Agripa Petame kior iaska naikek ha Petrus tapi pek naibakek kek. Raja Herodes Agripa Petame kiog perintah supaye aska-aska ajeh bisoal siasat lalu bihukom dat.
Telas ajeh kek kidek ju lengrik Yudea lalu kigei ku kote Kaisarea memerip iluniu.
Raja Herodes Agripa Petame Kidat
20Raja Herodes Agripa Petame ihad kiberiknos ha sengoi ku kote Tirus ru kote Sidon. Kerana ajeh, enai naibepakat naiha-terbuk nu ngar kek. Mula-mula naipujok ketue pegawei istane imuh Blastus lei kek kibepihak nu enai. Lalu enai pen naiterbuk nu raja ajeh ru naisemanj bedamei kerana naikep caknak ju lengrik kek.
21Ku arik de ya bipetetap, Raja Herodes Agripa Petame kilog penakei miwah lalu kigei ku itahte ru beucap nu irakyat. 22Mai jengoi de ceringai ha ibengwal ajeh naiurok ru suara kuat, “Ajeh dewe de belwal, apeka manusia!” 23Ku sarik jijeh, malikat TUHAN kihukom raja ajeh kerana kek pek kihormat ha Jenang. Kek kidat bicak ya caceg.
24Sementare ajeh, engrok Jenang ya gucep nu majeh-manen ru jeoi sengoi naipecaya nu Yesus.
25Bile tugas Barnabas ru Saulus ya selesei ku kote Yerusalem, ubai bailos nu kote Antiokhia ru baien Yohanes Markus besama ru ubai.
انتخاب شده:
KISAH 12: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
