KISAH 10
10
Petrus ru Kornelius
1Ku kote Kaisarea mong numom keral imuh Kornelius. Kek ajeh numom raknak ku batalion Itali aska Rom. 2Kornelius ru iperingak ajeh alim, naisengoh, ru naihormat ha Jenang. Kek selalo kitulog ha mai hajap ru kek sentiase kibedoa nu Jenang. 3Ku nanek arik, kira-kira pukol tige dui, ku kateh inengneng kek kibakek bik malikat Jenang kiderleh nu ilei ru kiurok, “Kornelius!”
4Kornelius kineng nu malikat ajeh ru isengngoh lalu kitanya, “Ma, jen?”
Malikat ajeh kiberlag, “Jenang ya Kipekenan ru Kiterima ha doa ru menenghar sengik hek nu mai hajap. 5Hunen orloh memerip urag et nu kote Yope ru ceregloh sengoi de imuh Simon Petrus. 6Kek kigei besama ru numom sengoi de kibeh getek binatag. Sengoi ajeh imuh Simon ru ideg ku beg laot.” 7Telas malikat ajeh kidek kek, Kornelius kicereg nar mom ihambe ru numom aska alim de bekerjak ha kek. 8Kek kipasal nu enai ma de ya belaku lalu kior naiet nu kote Yope.
9Ku ihuper, mase enai lekat ku kateh ceknip enai ru ya kaha-merek nu kote Yope kira-kira ku tengah arik, Petrus kihuj nu kemil pelog kaha-bedoa. 10Mase Petrus kibedoa, kek kirasa kicuag ru kaha-cakcak. Sementare kipoj caknak bisedia, kek kikep nanek nengneng. 11Kek kineng langit kitebuka ru nuhenglei begei abat libar bicerleh nu bumi. Abat ajeh bigantong ku iempat-empat penjuru. 12Ku kateh abat ajeh mong dikdij jenis binatag de berjog empat, mong binatag begei ha tijik ru gerig, ru mong cep-cep de ces. 13Lalu mong suara de Kiurok nu kek, “Kosloh, Petrus! Goj binatag ajeh ru cakloh!”
14Petrus kiberlag, “Eng pek buleh, jen! Eng pek pernah ngcak ma-ma pen caknak haram de biget ya Hukom Taurat.”
15Tapi suara ajeh Kiurok nij, “Ma-ma de bipejadi halal ya Jenang, hek pek buleh haanggap ajeh haram.” 16Hal ajeh kibeulag lei nik kali lalu abat ajeh pen teangket nij nu langit.
17Petrus kibingung kipiker ma maksod inengneng ajeh. Sementare ajeh, sengoi-sengoi de bingeng ya Kornelius naibetanya nu mai ru ya naibakek deg Simon, ru enai pen naijinjeg ku ngar pintu deg ajeh. 18Naicereg ru naitanya, “Mongka tengloh imuh Simon Petrus kigei ku padeh?”
19Sementare Petrus lekat kibepiker kaha-panei maksod inengneng ajeh, Kelog Santen Kiurok nu kek, “Petrus, mong nik mom tengah naikek ha hek. 20Kosloh ru celehloh nu kerop ru agok piker jeoi. Joi enai ajeh kerana Engloh de eror naihol nu madeh.” 21Petrus pen kiceleh nu kerop ru kiurok nu enai, “Engloh isengoi de engkekek. Yama engkehol nu madeh?”
22Naiberlag, “Numom raknak aska imuh Kornelius kior jiet nu madeh. Kek ajeh sengoi de benar. Kek kisengoh ru kihormat ha Jenang. Kek ihad bihormat ya dikdij mai Yahudi. Malikat Jenang kior kek kinyong ha jen nu imadeg supaye kek buleh kicerngai ma de jenbual nu kek.” 23Lalu Petrus kipelawe naibet ku pajeh.
Ku ihuper, Petrus kikos ru kiet besama ru enai ajeh. Memerip urag mai de pecaya nu Yesus ju kote Yope pen naijoi enai. 24Ku ihuper nij, nailei nu kote Kaisarea. Ku pajeh enai ya bipoj ya Kornelius, isedara-mara, ru ikekawat de ya kijempot. 25Bile Petrus kilei nu majeh, Kornelius kisamut ru kisujod ku ngar kek. 26Tapi Petrus kiberkos Kornelius ru kiurok, “Kosloh, eng pen manusia juga.”
27Sementare kibelwal ru Kornelius, Petrus pen kimuj nu kateh deg. Kek kineng ya mong jeoi sengoi naibekumpol ku pajeh. 28Petrus kiurok nu enai, “Engkek ya engkepanei tentang hal adeh: Mai Yahudi biget ya agame liknai becampor atao naisueg ha mai pek Yahudi. Tapi Jenang ya Kiternyol hal adeh nu eng: Eng pek buleh nganggap bok-bok pen haram ru ngnyek becampor ru enai. 29Kerana ajehloh, eng pek ngnyaknyek bile eng bijempot hol nu madeh. Hunen eng ngha-panei yama engkeor eng hol nu madeh?”
30Kornelius kiberlag, “Nik arik canukjeh, kira-kira pukol tige dui eng ngbedoa ku padeg. Aleh-aleh mong numom keral de ileknog becahaya kijinjeg ku ngar eng. 31Kek kiurok, ‘Kornelius! Jenang ya Kicerngai doa hek ru ya Kiingat ha menenghar sengik hek nu mai hajap. 32Jadi, orloh memerip urag et nu kote Yope ru ceregloh sengoi de imuh Simon Petrus. Kek kigei ku deg Simon de kibeh getek binatag ru ideg ku beg laot.’ 33Kerana ajehloh, eng deras ngor memerip urag mai naicereg jen nu madeh. Ihad bor sengik jen kerana jenhol nu madeh. Hunen jibekumpol ku ngar Jenang jiha-cerngai ma-ma taleh de TUHAN Kior jenpasal nu jik.”
Bengwal Petrus
34Lalu Petrus kiurok, “Hunen ya ngpanei Jenang betol-betol pek Kipileh kaseh. 35Kek Kiterima bok-bok taleh de behormat ha Kek ru de bahbeh Iheknod, pek kira ju ma-ma taleh ibangse pen. 36Engkek ya engkepanei tentang gah de Jenang Kiperlei nu bangse Israel. Gah Bor ajeh kipasal hal adeh: Hik dapat hibedamei ru Jenang melalui Yesus Kristus. Yesus ajehloh Tuhan nu dikdij manusia. 37Engkek ya engkepanei hal de bibeh ya Yesus ku dikdij lengrik Yudea. Kek Kimula Ipelayanan ku lengrik Galilea telas Yohanes Pembaptis kiajar ru kibaptis mai Yahudi. 38Engkek ya engkepanei tentang hal adeh: Jenang ya Kipileh Yesus Mai Nazaret ajeh ru Kiog kuasa ru Kelog Santen nu Kek. Yesus Kiet nu jap-jap tempat Kibeh hal-hal bor ru Kiperbor mai de bikuasa ya Ibles kerana Jenang mong besama ru Kek.
39Jikloh Isaksi tentang dikdij hal de ya Kibeh ku lengrik Yudea ru kote Yerusalem. Mai Yahudi naisaleb ru naiperdat Kek. 40-41Tapi ku inik arik, Jenang Kiberkos Kek ju Idanan. Jenang pek Kiperneng Kek nu dikdij mai tapi had nu jik taleh de ya Kipileh sebegei Isaksi. Jikloh de cakcak ru ngekngut besama ru Kek telas Kikos ju Idanan. 42Jenang Kior jiajar ru jibesaksi nu dikdij manusia tentang hal adeh: Yesusloh de bipileh ya Jenang sebegei hakem ha mai de lekat sui ru mai de ya dat. 43Dikdij nabi ya naibesaksi tentang Yesus bagei adeh: Bok taleh de pecaya nu Kek, idosa doh biampon kerana hal de ya Kibeh.”
Mai Pek Yahudi Naiterima Kelog Santen
44Mase Petrus lekat kibelwal, Kelog Santen Kiceleh nu dikdij sengoi de ceringai ha ineajar ajeh. 45Mai Yahudi de pecaya nu Yesus de naijoi Petrus ju kote Yope ihad cengang empag enai naineng Jenang Kiog Kelog Santen nu mai pek Yahudi juga. 46Enai naicerngai mai pek Yahudi ajeh naibelwal ku kateh bebegei bahase ru naipateh ha Jenang. Lalu Petrus kiurok, 47“Nengloh, dikdij sengoi adeh ya naiterima Kelog Santen begei lihik. Jadi, pek mong numom pen de buleh kiget sengoi-sengoi adeh bibaptis ya teu.” 48Kerana ajeh, Petrus kior enai bibaptis ku kateh muh Yesus Kristus. Telas ajeh naisemanj Petrus kigei memerip arik nij besama ru liknai.
انتخاب شده:
KISAH 10: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
