Peragenebesi 7
7
Wene at Stefanus en oʼgo moʼgulentesi wene
1At Stefanus wene asogo ebam pegesema, at ap Allah eiye aʼge onue ʼgain ano en e,
“Wene ai demat ogwi a? Eniak esei ya,” oluk moʼgulesi. 2Moʼgulesimu, at Stefanus en e, disogo moʼgulentesi,
“Naiklak, nue, nari wa. Wene ik aʼge yu, henesaʼgo opsogo hwelit o. Nenaʼbu Abraham ano o Haran deksogo owan wom erlak, o Mesopotamia oruakma, Allah, erliktogwi aʼge ano orogolema inaga. 3Orogolema inagalat e,
O hat welegenma yema emin, hue hari enebe emin, ugonoboluk e, libemen o.
Liborogun holuk e, o an en moʼgulheikmu eba lu o, (Kejadian 12:1)
oluk moʼgulesi. 4Moʼgulesimu re, o aphwami Kasdim aʼge onowi pam ukpoluk, o Haran deksogo waga. Wagarik oruakma, aik waragama re, o eba ukpoluk Allah en o poluk hokhomsogo o his yogodak welegepma yema pou waga ai o. 5Asogo pou waga aʼgeat de, at en e,
O yema eiye harat o, oluk hwiagum erlagat. Ye, ʼgwiang weisogo logon hwiagum erlagat, welat e,
O yema pobuk hat eiye agalat, hat en dogoʼgwe aʼge eiye agalat, togup o,
oluk at omlogo dagom erlak oruakhweat wene wusogo obok moʼgulesi ai o. 6Obok asogo moʼgulesi aʼgeat de, disogo moʼgulesiat,
Hat en dogoʼgwe aʼge ai aphwami onowi pam loluk ap ʼbok ʼgelaʼge welema o.
Asogo oruakma aphwami eba aʼge en eneragam aʼge ʼgelaʼge tagonoboluk e,
o mo ligom ʼbugom osokhwe 400 tahun mep sisoluksogo tagonobogu lema o.
7Aʼge re, is aphwami onowirak aʼge en eneragam aʼge ʼgelaʼge onoboluk tenentarok welema aʼge ai,
an en wene enebam poluk wiagabenebaik o.
Wiagabenebaikmu re, hat en dogoʼgwe aʼge ai o eba en liplau wemarik e,
o yema welat, an erliknobogu lema o, (Kejadian 15:13-14)
oluk Allah enat moʼgulesi. 8Asogo moʼgulesirik e,
An wene wusogo wokhenebegis aʼge ai, enagat welemagoluk enagap eneʼgerlimu aʼge ʼbalonobogu lomup o, oluk moʼgulesi. Asogo moʼgulesimu, Abraham en omlogo Ishak deregeitik e, agauwa sabiren welagarik e, agauwa sirak aʼge pam agap eʼgerlimu aʼge ano asogoat ʼbalegei o. Ye, pobuk Ishak en omlogo Yakub dakhwerlesirik e, asogoat agap eʼgerlimu aʼge ʼbalegeiyat. Ye, Yakub en e, is nis neneʼbalak enebe 12 ebano dagonoboluk e, asogoat enagap eneʼgerlimu aʼge ʼbalonobogu legesa.
9Neneʼbalak ebano onot Yusuf pam ʼbou togu legesarik e, ebe o Mesir woluk legesarik eneragam aʼge welemagoluk, ap logon pam oʼgo wegesa. Aʼge re, aphwami logon en at ebe nin hwedik nan hwedik wiagap pouwogoluk togwiam e, Allah emin welat di wene yu wene ebam lau wagoam deliso modok welaga. 10Asogo deliselat oruakma, ap ʼgain Firaun o Mesir aʼge onue ʼgain onuk logo aʼge ano en e,
Ap yu ebabut op o. Ede modok ʼgagalak o, oluk ebe ebam liok egeitik e, disogo moʼgulesi,
O Mesir yema emin, an nowi emin, neiyagai emin, hat en tenentarok welat, an en aʼge di aʼge yu aʼge ʼberlegat hat heʼgik pam welemak o, oluk ebe gubernur welemagoluk edikpesi. 11Edikpesimu, oruakhwe re, o Mesir eba emin, o Kanaan yema emin, soʼboru obuk logat agama wiagat welegesa. Wiagat welat e, neneʼbalak ebano soʼboru ʼgeba heratu ʼgelaʼgeat, weat welegesa. 12Weat oruakma re, aphwami logon en,
O Mesir eba nak e, soʼboru gandum eʼgen oruak o, oluk ogwiam e, at Yakub esaʼgo hwelegeitik, at eiyagai nis neneʼbalak ebano en logon wouwagoluk peragenebesi. Naduk asogo peragenebesirik, 13pobuk peragenebesimu re, at Yusuf ano en e,
An ano nebe yuat o, oluk uelak ebano hwiagentesi. Hwiagentasuam Firaun ano en e,
Yusuf arilak enemin dogo aʼge yema hegi, oluk alugat aga. 14Asogo moʼgulentesirik, at Yusuf en e, aik Yakub emin, aphwami at eiyagai aʼge ʼberlek enebe 75 emin, enemin wemagoluk wene wusogo perakpou waga. 15Wene wusogo perakpou wagama re, is Yakub lak o poluk hokhomsogo o Mesir ʼbigisa. Eba ʼbigisarik welat e, at ebe emin, neneʼbalak emin, ebayat waretil legesa. 16Waretil legesema re, naduk at Abraham o Sikhem welat, owik aphwami Hemor aʼge enebam oʼgo ʼbalegeimu enebe werak aʼge togolik wogonoboluk wegesa. 17Pobuk e, Allah en pageat Abraham ebam wene obok moʼgulesi aʼge ano ebe om hegitsogo horogat agokhwe re, aphwami nis aʼge enebe o Mesir eba aʼbigat yarluk egesa. 18Asogo aʼbik yarluk egesema re, ap mesik mu aʼge en e, Yusuf ebe eperlakma re, o Mesir eba ʼgain agarik tenentarok welaga. 19Welat e, aphwami nis aʼge neneʼbalak ebano lalenebiselat, di obotut yu obotut tagenebasulat, taga laga. Asogo tagalat enemalik ʼget dogo aʼge enelaluk welemano oluk,
Waremagoluk parema lebigenebemit, oluk iak ningsogoat moʼgulentasu laga. 20Asogo tagenebasu laga eria hegit e, at Musa ebe malik op modok aʼge dagagama re, dugwi henagan aik owi pam tenakho welegesa. 21Tenak welegesarik, pobuk lebikpegesema, at ʼgain Piraun agalogo en ebe ano wesirik, at uʼgwarek emalik ʼgelaʼgeat yoʼgolegei. 22Yoʼgolegeimu re, is aphwami o Mesir aʼge di wene yu wene enaluk welegesa aʼge ebano, at en modogat moʼgulegei. Moʼgulegeitik, at en iak pam opsogo nak eselat, eʼgik pam di aʼge yu aʼge opsogo nak tiselat, tagalat e, ebe ʼgainat aga.
23ʼGainat agarik at Musa ebe umur mo ligom, ʼbugom osokhwe 40 tahun aga. Agama, at en e,
Aphwami Israel an ap ʼbelak aʼge ebano logon entai laik, oluk ede epesi. 24Ede epesirik eneʼbek laga ʼgal e, ap Mesir aʼge mesik en ap Israel aʼge mesik ʼgoʼbu werisokhwe il hesi. Il holuk e, at oruak oʼgwe ano akhit agarik erlele wokho, ap Mesir aʼge ano ebe ʼbeʼgi weregei. 25Weriselat ogola en e,
Is aphwami an ʼbelak aʼge onogola en e,
Allah en at yoʼgo pesimu, at en woknoboluk libema o, oluk pobi nobua o, oluk epesi aʼgeat de, is en asogo pobitu erlak welegesa. 26Pobitu erlak welat e, loruk oʼgwe ap enebe ʼbiren Israel aʼge eʼbirek yeik pogumu, il entesirik laʼbulik enebaigoluk, disogo moʼgulentesi,
Narilak. His e, hot eminat de, nopaget yeik pogu legep, oluk moʼgulentesi. 27Aʼge re, at ot ʼgoʼbu weriselat, at Musa ebe perlikho esaʼgo akhit pei lasulat e, disogo moʼgulesi,
Hat nis nonue ʼgain welat wene enebam pasulat, noʼgorliselat, taga lemagoluk,
sa en edikhebesimu.
28Sono ap Mesir aʼge werigen ai ʼgelaʼge an watnebigoluk taga legen a, (Keluaran 2:14)
oluk moʼgulesi. 29Asogo moʼgulese lagama, wene ai esaʼgo hwelegeitik e, hweiye libagarik e, o poluk hokhomsogo o Midian eba lagarik welaga. Welat e, eiyagai enebe ʼbiren dagenebegei.
30Eba modok welat, pobuk 40 tahun welaga. Oruakma re, malaikat Allah en yoʼgo ʼbelagonobou wago aʼge ebano mesik Musa en il houwagoluk, o leimu aphwami enebe erlakma dom Sinai edipmu eba ʼbu agarik e, e hourak aʼge pam en, odouk magale ʼgwialisoma orogolema inagama il hesi. 31Hesirik e, erliktagalat, il dokhumsogo ʼgwelakhaigoluk ebe horoksogo lasuam e, nenaik ʼgain Onuk Logo aʼge en e, disogo osoma esaʼgo hwelegei,
32Hat heʼbalak Abraham emin, Ishak emin, Yakub emin, enaik Allah anat o, (Keluaran 3:6)
oluk moʼgulesimu, at Musa en ebe il pobisogo hai lo ogorlok aga. 33Ogorlok agama, nenaik ʼgain Onuk Logo aʼge ano en e, mesik disogo moʼgulesi,
ʼGwiang hat hebe edik welegenma eria, an nuʼgwarek noʼgwiang o.
Holuk e, hoyuk sepatu ʼbuktak aʼge eba noʼgorlogo pemen o.
34An neiyagai aphwami o Mesir aʼge en di obotut yu obotut tagenebasukhwe nil entasulat,
enede oborlogouk ogukhwe nesaʼgo hweliselat,
tise legirik e, an en delenebigoluk nebe ʼbu egi o.
Holuk e, an en hat yogodak o Mesir perakhebaik en suk o, (Keluaran 3:5, 7-8, 10)
oluk moʼgulesi. 35Pageat is aphwami Israel aʼge en e,
Hat nis nonue ʼgain welat wene enebam pasulat, noʼgorliselat, taga lemagoluk,
sa en edikhebesimu.
Nenebit o, (Keluaran 2:14)
oluk wene yagegisa ano re, at Musa at o. Asogo wene yagegisa aʼgeat de, malaikat Allah en yoʼgo ʼbelagonobou wago aʼge ebano, at Musa il houwagoluk mesik ʼbelakpou wagama re, e hourakma en selakma agama il hesi aʼge anoat, onue ʼgain welat delonobuagoluk yoʼgo poluk perakpesi ai o. 36Yoʼgo poluk perakpesimu re, aphwami Israel aʼge enebe wogonoboluk liplau waga ai, at Musa enat o. Wogonoboluk liplau wagalat e, o Mesir eba emin, ik yeʼgelak aʼge onuk Laut Merah ai emin, o leimu aphwami erlakma eba, o mo ligom ʼbugom osokhwe 40 tahun welat emin, is aphwami en wene pobi tuagoluk mesik elalin tu puk aʼge til waga ai, at Musa enat o. 37Ye, aphwami Israel aʼge moʼgulentasulat e,
Allah en ap at iak moʼgulhentasu lemagoluk,
ap his aʼge mesik an ediknebesi ai ʼgelaʼge,
pobuk edikpouwa ani o, (Ulangan 18:15, 18)
oluk moʼgulentesi ai, at Musa enat o. 38Ye, neneʼbalak enemin o leimu aphwami erlakma eba odoktak oruakma, dom Sinai ai edipmu malaikat Allah en yoʼgo ʼbelagonobou wago aʼge ebano mesik eʼbek ʼbu agarik e, eʼbirek weneane egesa ai, at Musa at o. Neneʼbalak ebano eneminat oruakma, at Allah en, wene nenelaluk wolomul wene ai, nia moʼgulnontouwagoluk moʼgulesi ai, at Musa at o.
39Asogo moʼgulesi aʼgeat de, neneʼbalak ebano en, at iak hologo wolom e, enebit welegesa. Asogo welat e, ebe ukpegesarik,
O Mesir eba togolik lo aʼge, oluk enede lagama welegesa. 40Enede asogo lagama welat e, at Harun ano disogo moʼgulegisa,
At Musa o Mesir en woknonoboluk liplau waga ano, noʼgosogo agama hwe.
Nis neneperlak o, ai en,
nis togolik woknonoboluk o Mesir louwagoluk,
Allah ebe ʼgelaʼge ebalema dogwi asua mesik utnentemen o, (Keluaran 32:1)
oluk moʼgulegisa. 41Asogo moʼgulegisarik, o ai erlige wam sapi emalik aʼge ogut walsogo dogwi werigisa. Werik poluk e, ensapi wusogo poluk, is en e,
Neneʼgik pam werik pege yu op o, oluk, onogola enagai aʼbik hogu legesa. 42Asogo togu legesema re, at Allah en oʼborl wogentesirik,
ʼBogorl pam aʼge mo emin, dugwi emin, hwesagal aʼbik eba emin, erliktogu lemak o, oluk enebe ugenebesi. Asogo tegei ai, is ap Allah iak moʼgulontogu legesa aʼge en disogo egesa hegitsogoat tegei,
Allah en e,
His aphwami Israel aʼge yu logwe.
Mo ligom ʼbugom osokhwe, 40 tahun
o leimu aphwami erlakma eba welat e,
wam sapi worogulat, odouk narlugulat, togu legep ai re,
an nebaget pogulat, watnugulat, togu legep no? Erlak o.
43O sum owi ano, henaik Molokh owi emin,
hwesagal ʼgelaʼge ano,
henaik Refan ogosagal emin, da pil ya pil,
woluk denaga legep ai.
Asogo woluk denagalat, his at eragam ʼguogoluk ogut walsogo werigep ai en,
henebe o Babel abel akhit perakhenebaik o, (Amos 5:25-27)
oluk Allah en egeimu, pelal wokho pegesa ai ʼgelaʼge tegei o.
44At Allah en Musa moʼguleselat e,
An nebe nemin welege o, oluk nowi o sum aʼge disogo werip, oluk elit aʼge waltak pesimu, il hesirik e, o ebe asogoat weregei. Weregeimu neneʼbalak ebano o sum owi aʼge aiat tenak welat o leimu aphwami erlakma denagalat da wetil, ya wetil, wetil denaga legesa. 45Asogo wetil denaga legesarik, is en dogoʼgwe aʼge Yosua emin en o sum owi werik aʼge ano moluksogo woluk e, aphwami nis nonowi pam yema oruakma Allah en mukho lebigenebesimu onoʼgwiang sebelu ʼgu otluk, o sum owi ano wosu ʼgu egesa. Wosu ʼgu egesa ai erlige o sum owi aiat werik, welagarik e, hwerli Daud elaluk welaga ai hwerli werik welaga. 46Ye, Daud ebabut taga laga ai, Allah ebam lobuk egeimu, at en Allah disogo moʼgulesi,
Yakub aik Allah harat o. Howi mesik wusogo hebaik, oluk moʼgulesi. 47Asogo moʼgulesi aʼgeat de, Allah owi ebe omlogo Salomo en werik ebesi ai o.
48-50Asogo aʼgeat de, at ap Allah iak moʼgulentasu laga aʼge mesik en wene disogo egei,
Nenaik Allah ʼgain Onuk Logo aʼge en e,
ʼGain anat welat e, nebe naloʼgwe ʼbogorl pamat hweriogo welegi o,
Ye, noyuk lekho ʼgwiang pamat poluk welegi o.
Holuk e, his en o noʼgorak aʼge werik nobo yo.
An nebe set hwalogo re, o ʼgeba wolom epegep. Mia o.
Di aʼge yu aʼge ʼberlek eba, an enat walhegi erlak no? (Yesaya 66:1-2)
oluk Allah en egeimu, pelal wokho pesi ai en, at Allah modok ʼgain Onuk Logo aʼge ai, o aphwami eneʼgik en worogwi aʼge pam wolom e, mia o. 51His aphwami yema henebabut modok wiak henesaʼgo modok holu puk, henagap heneʼgerlimu aʼge ʼbelak welarat de, henede dagelak erlak welat henesaʼgo werak erlak togu legep yema re! Heneʼbalak en,
Allah Arogun iak ai nenebit, oluk ogu legesa hegitsogoat, his is enebabut wokho togu legep yema re! 52Is ap Allah iak moʼgulontogu legesa aʼge ebano, heneʼbalak en enebe wiagabonobu erlakma en mesik welegesa no? Wiagabonobogu legesa nak ebano re. Is Allah iak moʼgulontogu legesa aʼge en e,
Allah eragam aʼge ebabut hegitsogo tua aʼge ai pobuk wema o, oluk ebe owan wom erlak oruakhwe, obok naduk ogu legesa aʼge enebe heneʼbalak enat waronobogu legesa ai o. Pobuk, is en obok naduk egesa aʼge ai ebe wagama re, his enat at ebe woruagoluk yoʼgo lagalat, ebe worogulat, tigep ani o. 53Ye, is malaikat Allah en yoʼgo ʼbelagonobou wago aʼge ebano en wene Allah en nenesaʼgo weregei wene ai, hisat wokhentigisa aʼgeat de, henesaʼgo hologo tu henebirat welegep ai o,” oluk moʼgulentesi.
Stefanus at Saulus ilem helep pam werigisa wene
54At Stefanus en wene asogo moʼgulentasu lagama, is enesaʼgo hweligisarik e, onolot het otluk, eniak hedin hogulat ebe woruogoluk tigisa. 55Woruogoluk tugukhweat de, at Stefanus Allah Arogun ogola ʼbeterak welat, il ʼbogorl pam likhesi ʼgal e, at Yesus Allah ebe erliktogwi aʼge ano eʼbirek eʼgik ʼbekhit akhit eragam edik oruakma il ligentesi. 56Il ligontoluk, at en e,
“Yethemit! ʼBogorl hialegeimu re, at abat daklau waga aʼge ano, Allah eʼbirek eʼgik ʼbekhit akhit eragam edik oruakma nil yerentegis o,” oluk moʼgulentesi. 57Asogo moʼgulentesimu, is ebano eniak amitmit sup oluk, eneʼgik enesaʼgo dopnosogo, pungtak mesik erligeat eʼbek hopha ʼgwigisa. 58Eʼbek hopha ʼgoluk, o kota en leget oʼborloma haʼboksogo lebikpoluk e, helep en werigisa. Ebe woruogoluk e, is at iak osokhwe enesaʼgo hweligisarik, wene ebam poluk welegesa aʼge ebano onosum oʼborl oʼgwe aʼge noʼgorlogo re, ap souwe aʼge onuk Saulus eragam pegesa. 59Poluk e, ebe helep en worogukhwe, at Stefanus ano Yesus onuk ʼbaliselat e,
“Yesus nue. Narogun hat en woknebi suk o,” oluk egei. 60Asogo eselat, odogorlu pam yagutsogo huraga. Huragarik, iak loksogo re, disogo egei,
“Nue. Ap an wiagapnebigisa aʼge yema, wene enebam pagun o,” oluk moʼgulesirik ebe arat waraga.
اکنون انتخاب شده:
Peragenebesi 7: WUL
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
