Peragenebesi 6
6
Ap enebe sabiren Allah eiyagai logon lerontogu lemagoluk edigenebegesa wene
1Ai erlige re, aphwami Yesus iak wegesa aʼge enebe aʼbigat egesema re, is aphwami enebe Yahudi aʼgeat de, eniak e, Yunani aʼge en e, disogo egesa,
“Aphwami nin hwedik nan hwedigat di aʼge yu aʼge soʼburontogulat e, hwami sugwe nis en aʼge holuk hallorak onobogwi ai nopaget,” oluk, is Yahudi onowirak aʼge enemin wene sorok egesa. 2Wene asogo sorok egesema, is ap enebe 12 Yesus en yoʼgo onoboluk peragenebesi aʼge ebano en, aphwami Yesus iak wegesa aʼge enebe ʼberlegat odoktuagoluk worlentigisa. Worlontogwiam wegesema re, enebe mesikmu odoksogo welat, is en e, disogo moʼgulentigisa,
“Nis Allah iak moʼgulontogu lege ai, ukpoluk, di aʼge yu aʼge soʼburontogulom e, wiak o. 3Holuk e, his en e, ap logon Allah Arogun onogola ʼbeterak welat, enede modok ʼgagalak tugukhwe, enebabut enagat ontogu legep aʼge holuk, enebe sabiren heraenebip o. Heraonoboguptik e, is en di aʼge yu aʼge asogo soʼburontogu lemagoluk, nis en edigonobul o. 4Edigonoboma, is asogo tugukhwe, nis en e, seʼban ogulat, wene dem wene aiat moʼgulontogulat, togu lomul o,” oluk moʼgulentigisa.
5Wene asogo ogu legesema, is aphwami Allah eiyagai ebano enebe ʼberlek en e,
“Asogo egep ai op,” oluk egesarik enebe herasogo enebegesa. Asogo enebegesa ai mesik e, Stefanus, ede Allah ebam modok heʼberik oruakma Allah Arogun ogola ʼbetesogo ʼgoluk welaga aʼge emin, Filipus emin, Prokhorus emin, Nikanor emin, Timon emin, Parmenas emin, Nikolaus o Antiokhia ebe oʼborlma aʼge Allah iak wesirik, Yahudi aʼge ʼgelaʼge aga aʼge ai emin, 6enebe sabiren eria herasogo onoboluk e, is ap Yesus en yoʼgo onoboluk peragenebesi aʼge ebano eneʼbek onobou wegesa. Onobou wegesema, is en eneʼgik pam enaʼgul sebelogo seʼban egesa.
7Asogo togu legesema re, Allah iak lok agama welat, aphwami o Yerusalem aʼge Yesus iak wegesa aʼge enebe aʼbigat egesa. Asogo egesema, is ap Allah eiye aʼge ebano enebe esan lok mesik en, wene ai wegesarik enede Yesus ebam heʼberik pegesayat.
Wene Stefanus ebam pegesa wene
8At Allah ebabut op en wogentasu aʼge ano, Stefanus loksogo wogesimu anni modok aʼbik welaga. Welat e, aphwami en wene pobi tuagoluk elalin tu puk aʼge loksogo tagenebil denaga laga. 9Tagenebasu lagama re, is ap Yahudi aʼge o Kirene aʼge emin, Aleksandria aʼge emin, enebe aphwami logon eneragam aʼge welegesarik pobuk onomuat egesarik seʼban mesikmu ogu legesa aʼge emin, is aphwami Yahudi aʼge logon o propinsi Kilikia aʼge emin, Asia aʼge emin, enemin en, at Stefanus iak osoam, inegesarik e, emdema hin wok han wok wegesarik wene yagegisa. 10Asogo wene yagegisa aʼgeat de, at Stefanus Allah Arogun ogola ʼgwegeitik welat, wene hegirat ʼgagalogo osoam, is eniak oʼgo noʼgosogo moʼgulom ʼgelaʼgeat aga laga. 11Oʼgo noʼgosogo moʼgulom ʼgelaʼgeat aga lagama re, is en, ap mesik wene at ebam pouwagoluk onogola ʼgagaligisa. Asogo onogola ʼgagalugulat, disogo moʼgulentigisa,
“His en e, disogo ip. At yu en Musa obok wiaksogo ʼbaliselat, Allah obok wiaksogo ʼbaliselat, tisokhwe, nis nenesaʼgo hwelige, oluk ip o,” oluk enede ʼgagaligisa. 12Asogo enede ʼgagaligisema, is en aphwami pema enede edikpogulat, ap enarluedek ebano enede edikpogulat, ap Allah iak pelal wogo enaluk aʼge ebano enede edikpogulat, tigisema, is ʼberlek inegesarik e, at Stefanus ebe tenak poluk, is ap wene edip ʼbeloʼgogu legesa aʼge ebano eneʼbek woluk legesa. 13Woluk legesarik e, ap logon enepenenat wene Stefanus ebam pouwagoluk edigenebegesa. Edigenebegesema, is en ogulat e,
“Ap yu en Allah uʼgwarek owi werik yu obok wiak ʼbaliselat, wene Allah en nenesaʼgo weregei aʼge ano obok wiak ʼbaliselat, mo u erlakma en oso modok welago yo. 14Ye, at en oso aʼge mesik e, yu,
Yesus owi Nazaret aʼge ano en, Allah owi werik aʼge yu moluksogo poluk e, wene at Musa en neneʼbalak moʼgulentesimu, nis togu lege aʼge ano, pobuk muat tua o, oluk osoma nenesaʼgo hwelige o,” oluk egesa. 15Asogo ogu legesema, is ap wene edip ʼbeloʼgogu legesa aʼge ebano enebe ʼberlegat emin hweriogo welat e, enil at Stefanus ebam putsogo yethogwiam e, at orogole malaikat Allah en yoʼgo ʼbelagonobou ago aʼge ebano onorogole ʼgelaʼge takpesimu enil hegesa.
اکنون انتخاب شده:
Peragenebesi 6: WUL
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
