Mateo 19
19
Jesús rseed'de kieke bënni tusanlaadxi lza'a'ke
(Mr 10:1-12; Lc 16:18)
1Buudx be'e diidza ni, Jesús buze'e Galilea len bdxiine gia'a yeego ki Judea le de tzala'a yeego Jordán. 2Bunach zian zjak'leene Le', len ni' buune bënni we'.
3La'ke bënni fariseo gulabiige'e ga ze' Jesús len tzal gunn lazi'be'e Le', gulunaab'de Le':
—¿Ba de lsenz ki tue' bënni ksanlaadxe'nu nguul kie' nia'a ki bi'ti'teez le?
4Jesús bubi'e diidza:
—¿Naru ti rul'i'li lu Diidza La'ay ga rna' ki nu ben leke zia'at, “tue' bënni len tuunu nguul beene”? 5Ati gne': “Lena'a bënni uka'ane xuuz'xhne'e naar sua'leene'nu nguul kie' ati grop'te'ke lake ka tuuz bunach.” 6Ati tir nak'ke chope', tuuz bunach lake. Lena'a le Dios nuune tuuz, bënni ti rala ule'e.
7Leke gulunaab'de Le':
—¿Ati bixhkia', Moisés gnabe'e ki bënni ksanlaadxe'nu nguul kie' rala gnëëdzje kieenu gich ki chi nusanlaadxe'nu, len ka' use'e'nu?
8Jesús bubi'e diidza:
—Lena'a'kza le nak'li bënni xhziid, Moisés benne lsenz ksanlaadxi'li'nu nguul kieeli; san kati zia'a gu'ta'grë'z yëdz'lyu ni ti guk ka'. 9Neda rea' lbi'ili ki xhki tuunu nguul ti yajtzu'u'leen'nu'ne bënni yubl, ati bënni kieenu rsanlaadxe'nu len rzua'leene'nu nguul yubl, rgitzje' xhba ki utzag'na'.
10Na' bënni useed kie' gle'ke Le':
—Xhki ka nak kieke bënni tutzag'naa'ke, wak'l kieke dxia'a ti lutzag'naa'ke.
11Jesús bubi'e diidza:
—Keg yugute'ke gunn layajni'i'de le ni, leez'ke bënni'a Dios nunne kieke tzajni'i'kde ley. 12Ki'ki le gunn gzaaga le' bënni ki ti ktzag'ne'e: la'ke ka taalj'ze ti nak'ke bach lutzag'naa'ke, ye la'ke, bënni bunach tuune ga leke ti lak'ke bach lutzag'naa'ke, ati ye la'ke larakz leke tuune kuin'ke bach ti nak'ke lutzag'naa'ke ni'a ki yëla rnabe' ki yewayuba. Bënni gunn tzajni'i'de le ni, tzajni'i'de.
Jesús run'la'aye'bi bi'dau'
(Mr 10:13-16; Lc 18:15-17)
13Yajua'ke'bi bi'dau' lau'e Jesús naar kxua'naa'ke'bi len gui'leene diidza Dios ni'a kiek'bi; san bënni useed kie' gulazulau'e tadil'leene bënni'a nuche'ke'bi. 14Na' Jesús gudxe leke:
—Gulgui'bi latj bi'dau' ni dujak'bi ga zua' len ti gzaagak'li'bi, koma yëla rnabe' ki yewayuba nak kieke bënni nak'ke ka nak'kbi bi'dau' ni.
15Na' Jesús pxua'naa'ke'bi bi'dau' ni, ati zuwëëje.
Tuubi bi'i kuidi de'tzka xhdumi'bi rui'leemi'ne diidza Jesús
(Mr 10:17-31; Lc 18:18-30)
16Tuubi bi'i kuidi yajyu'bi'ne Jesús len bnaabi'bi'ne:
—Bënni useed, ¿Bixh'le le tzawi rala guuna naar si'a yëla naban tzalzu?
17Jesús bubi'e diidza:
—¿Bixhkia' rnaab'du neda ki le nak tzawi? Tuuze nake tzawi. San xhki re'en'du tzaaziu lu yëla rnabe' ki yewayuba, bzeenag xhba kie' Dios.
18—¿Bixh'le? —Bnaab'bi bi'i kuidi'a.
Ati Jesús gudxe'bi:
—“Ti gdëëd'du bunach, ti kitzju' xhba ki utzag'na', ti kuaanu, ti kiilju xhtiidze'e bënni bë'chi' lzo'u, 19be'ke bala'an xuuz xhno'u len bdxi'i'de bënni bë'chi' lzo'u ka nadxi'i'du kuinu.”
20—Bi kuidi'a bubi'i'bi diidza —Yugute' le ni chi beena—. ¿Bixh ryaadzji kia'?
21Jesús bubi'e diidza:
—Xhki re'en'du gaku li, gyaj len beti'i yugute' le de kiu' len bnëëdzj kieke bënni yechi. Ka' gunn uzi'u xhbei yewayuba. Chi nak ka' giidu len sa'leenu neda.
22Kati bi'i kuidi'a byëëni'bi lea gne'a, bayechi'da zuwaj'bi, koma de'tzka bi de kieebi.
23Na' Jesús gudxe bënni useed kie':
—Blikz'da rea' lbi'ili, nak'tzka baniig ki tue' bënni de'tzka bi de kie' tzaazie lu yëla rnabe' ki yewayuba. 24Yubl rea' lbi'ili, udëëdr'ba weez tuuba kameyo lu naagi yëtzi, ka tue' bënni de'tzka bi de kie' tzaazie lu yëla rnabe' kie' Dios.
25Kati bënni useed kie' gulayëën'de le ni, gulubaanr'de, ati tanáke:
—Ati, ¿Nuxh bënni gunn yule'?
26Jesús byue' leke ati bubi'e diidza:
—Kieke bunach nak'tzka baniig, san gat'ga de le ku saki'de Dios guune.
27Na' Pedro gudxe Le':
—Netu pka'an'tu yugute' le de kietu len za'leen'tu Li'. ¿Bixh uzi'tu xhbei?
28Jesús bubi'e diidza:
—Blikz'da rea' lbi'ili, ki kati gdxin dza'a kati yugute' le ni lu'ueak dxia'a, kati Le' Xi'ine Bënni kë'e lu xhlatje xhën'te, lbi'ili bënni gza'leen'li neda lekz'ka' tu tuuli kë'li xhlatj'li blou naar kchuug'be'li ki chin'nu kë'ke xi'in'xhzue' Israel. 29Len yugute'ke bënni'a ni'a kia' guluka'ane liidx'ke, bënni bë'chi'ke, nguul zan'ke, xuuz'xhna'ke, bi'i kieke u layeel kieke, ulazi'ke tu gayua' kë' ka' ka lea gulukane'a, ati ulazi'ke lekz'ka' yëla naban tzalzu. 30Ati zian'ke bënni'a na'a nak'ke bënni zia'al ulak'ke bënni zelau, len zian'ke bënni'a na'a nak'ke bënni zelau ulak'ke bënni zia'al.
اکنون انتخاب شده:
Mateo 19: PZD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedad Biblica de México AC
