路加福音 22
22
害死耶穌的陰謀
(太 26.1-5, 14-16；可 14.1-2, 10-11；約 11.45-53)
1除酵節，也叫做𨃟過節，啲欲到。 2祭司長及經學教師因為驚民眾，所以啲尋看有什麼法度通害死耶穌。
3撒旦入去彼個叫做以斯加略的猶大的心內；伊是十二使徒的一個。 4伊去及祭司長以及聖殿的守衛官參詳，看欲用什麼法度將耶穌出賣互𪜶。 5𪜶真歡喜，約欲互伊錢。 6猶大同意，就一直啲尋機會，通佇群眾無佇𪜶中間的時出賣耶穌。
準備𨃟過節的晚餐
(太 26.17-25；可 14.12-21；約 13.21-30)
7除酵節，就是著刣𨃟過節的羊羔彼日，到啦。 8耶穌差彼得及約翰，給𪜶講：「恁去準備𨃟過節的晚餐，咱通食。」
9𪜶給伊問：「你愛阮佇叨位準備？」
10耶穌給𪜶講：「恁入去城內，會抵著一個提水瓶的查甫人，恁隨伊去伊欲入去彼間厝， 11給彼家的主人講：『老師啲問，伊及伊的門徒欲食𨃟過節晚餐的客廳佇叨位？』 12彼個人會報恁看樓頂一間款好勢的大廳。恁就佇遐準備。」
13𪜶去，看著逐項及耶穌給𪜶講的攏像款；𪜶就佇遐準備𨃟過節的晚餐。
主的晚餐
(太 26.26-30；可 14.22-26；林前 11.23-25)
14晚餐的時間到，耶穌就坐桌；使徒及伊做夥坐。 15耶穌給𪜶講：「我受難以前真愛及恁食此個𨃟過節的晚餐。 16我給恁講，此個晚餐佇上帝國完全實現以前，我絕對𣍐閣食。」
17耶穌將杯接過來，感謝了後，講：「恁捧此個杯，分互大家飲。 18我給恁講，對現在起直到上帝國來臨，我絕對𣍐閣飲此個葡萄酒。」
19然後耶穌提餅，感謝了後擘開，提互𪜶，講：「此個是我的身軀，是為著恁獻的。恁著做此個來記念我。」 20食了後伊閣照按呢捧杯，講：「此個杯是新的約，用我為著恁流出的血設立的。
21「恁看！出賣我彼個人此陣及我做夥伸手佇桌頂。 22因為人子會照上帝的決定離開世間；毋拘出賣人子彼個人慘啊！」
23𪜶就問來問去，愛知𪜶中間什麼人會做此個代誌。
門徒爭論什麼人上大
24門徒中間有起爭論，看什麼人算上大。 25耶穌給𪜶講：「外邦人的君王作主管轄人民；統治者互人稱做恩主。 26總是恁毋是按呢。恁中間上大的顛倒著成做上細的；作領袖的著成做服事的。 27按呢，什麼人較大？是坐桌食飯的抑是服事的？豈毋是坐桌的？毋拘我佇恁中間是彼個服事的。
28「恁諸個人佇我的試煉中一直及我做夥。 29我的父將王的權柄賜互我，我嘛按呢將王的權柄賜互恁， 30互恁通佇我的國度及我坐桌，飲食，閣坐佇寶座審判以色列的十二支族。」
耶穌預言彼得毋認伊
(太 26.31-35；可 14.27-31；約 13.36-38)
31耶穌閣講：「西門，西門，撒旦已經對上帝要求欲親像簸麥仔按呢給恁簸。 32不過我有為著你祈禱，互你𣍐失去信心。你回頭轉來了後，著堅固你的兄弟的信心。」
33 彼得應伊講：「主啊，我已經準備便便欲及你坐監，及你做夥死！」
34耶穌給伊講：「彼得，我給你講，今仔日雞啼以前，你會三遍毋認我。」
錢袋、旅行袋，及刀
35耶穌閣給門徒講：「以前我差恁出去，叫恁錢袋、旅行袋，及鞋攏免帶，恁豈有欠什麼？」
𪜶應講：「攏無。」
36伊就給𪜶講：「毋拘現在，有錢袋的著帶咧；有旅行袋的嘛著帶咧；無刀的著賣家己的外袍去買。 37我給恁講，聖經記載『伊互人算做不法的人』此句話一定著佇我的身上應驗。聖經記載關係我的代誌已經啲應驗啦。」
38門徒講：「主啊，你看，遮有兩支刀。」
耶穌應講：「夠額啦！」
耶穌佇橄欖山祈禱
(太 26.36-46；可 14.32-42)
39耶穌出去，照常去橄欖山；門徒隨伊去。 40到彼個所在，伊給𪜶講：「著祈禱才𣍐陷落試探。」 41然後伊離開𪜶到㧒石頭會到赫遠的所在，跪落去祈禱， 42講：「父啊，你若肯，求你將此個杯給我提開！總是毋通照我的意思，著照你的旨意實現。」
43有一個天使對天出現，來贊伊的力。 44耶穌非常痛苦，愈熱切祈禱；伊的汗親像大點血滴落地。#22.44 有的抄本無 43, 44 節。
45祈禱煞，耶穌徛起來，倒去門徒遐，看著𪜶因為憂傷煞睏去。 46伊就給𪜶講：「恁哪啲睏？起來祈禱才𣍐陷落試探。」
耶穌受掠
(太 26.47-56；可 14.43-50；約 18.3-11)
47耶穌猶啲講的時，忽然有一陣人來；十二使徒的一個，叫做猶大的，做前導路。伊行倚耶穌，欲給伊唚。 48耶穌給伊講：「猶大，你用嘴唚來出賣人子噢？」
49耶穌身邊的門徒看著啲發生的代誌，就講：「主啊，阮用刀給𪜶刣好無？」 50其中有一個給大祭司的僕人刜落去，給伊正旁的耳仔削起來。
51耶穌講：「毋通閣動手！」耶穌摸彼個僕人的耳仔，給伊醫好。
52耶穌給許個來欲掠伊的祭司長、聖殿的守衛官，及長老講：「恁攑刀攑棍出來，是啲掠強盜是無？ 53我逐日及恁佇聖殿，恁無下手給我掠。毋拘，這是恁的時，烏暗啲掌權啦。」
彼得毋認耶穌
(太 26.57-58, 69-75；可 14.53-54, 66-72；約 18.12-18, 25-27)
54𪜶掠耶穌，押伊入去大祭司的公館。彼得離遠遠啲隨耶穌。 55𪜶佇埕的中央起火，圍佇火邊做夥啲坐；彼得嘛坐佇𪜶中間。 56有一個女婢看著彼得向火啲坐，金金給伊相，講：「此個嘛是耶穌𪜶彼陣的人。」
57 彼得毋認，講：「你此個查某人，我毋識伊。」
58過無偌久，另外一個人看著伊，講：「你嘛是𪜶彼陣的人。」
彼得講：「你此個人，我毋是！」
59差不多過一點鐘，閣有一個人堅持講：「此個人確實有啲及耶穌做夥，因為伊嘛是加利利人。」
60毋拘彼得講：「你此個人，我毋知你啲講什麼！」
伊猶啲講的時，雞隨時啼。 61彼時主越頭看彼得，彼得就想起主對伊講的話：「今仔日雞啼以前，你會三遍毋認我。」 62伊就出去外面大聲啼哭。
耶穌受戲弄鞭拍
(太 26.67-68；可 14.65)
63許個看守耶穌的人給伊戲弄，閣給伊拍。 64𪜶掩伊的目睭，問伊講：「先知，你給阮講，啥人給你拍？」 65𪜶閣講真多話給伊侮辱。
耶穌佇議會受審
(太 26.59-66；可 14.55-64；約 18.19-24)
66天光，猶太人的長老、祭司長，及經學教師聚集。𪜶給耶穌押去𪜶的議會， 67給伊講：「你若是基督，著給阮講。」
耶穌給𪜶講：「我若給恁講，恁嘛毋信。 68我問恁，恁嘛毋應。 69對現在起，人子會坐佇全能上帝的正旁。」
70眾人講：「按呢你就是上帝的子囉？」
耶穌應𪜶講：「我是，是恁講的。」
71𪜶就講：「咱猶需要什麼證據？咱已經有聽著伊親嘴講啦！」
انتخاب شده:
路加福音 22: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
