路加福音 21
21
寡婦的奉獻
(可 12.41-44)
1耶穌攑頭看著好額人將𪜶的獻金獻落去奉獻櫃。 2伊閣看著一個散赤的寡婦獻兩個銅錢仔落去。 3耶穌講：「我實在給恁講，此個散赤的寡婦獻入去的比眾人獻的閣較多。 4因為𪜶攏是獻𪜶用賰的，毋拘此個寡婦雖然真散赤，猶久提所有的生活費攏獻落去。」
耶穌預言聖殿受毀壞
(太 24.1-2；可 13.1-2)
5有人啲談論聖殿是用好石及奉獻的物來裝飾的。耶穌講： 6「日子啲欲到，恁啲看的諸個一切攏會受拆毀，拆甲無兩塊石相疊。」
災難及迫害
(太 24.3-14；可 13.3-13)
7門徒問耶穌：「老師，此個代誌什麼時會發生？此個代誌欲發生的時有什麼兆頭？」
8耶穌講：「著謹慎，毋通受迷惑。因為有真多人會利用我的名來，講『我就是基督』，閣講『時機啲欲到啦』。恁毋通隨𪜶去。 9恁聽著戰爭及暴亂的消息，毋免驚惶。諸個代誌一定會代先發生，毋拘終局𣍐隨時到。」
10耶穌繼續給𪜶講：「民族會起來攻擊民族，國家攻擊國家。 11有大地動，真多所在有飢荒及瘟疫，閣有通驚的景象及大奇蹟對天頂出現。 12諸個代誌發生以前，人會掠恁，迫害恁，給恁交互會堂及監獄。恁會為著我的緣故互人掠去君王及總督的面前。 13此個是恁做見證的機會。 14所以，恁的心著掠互定，毋免先想欲按怎辯明。 15因為我欲賜恁口才及智慧，互恁的對敵無一個會當對抗抑是反駁。 16連恁的父母、兄弟、親族，及朋友嘛會給恁出賣；恁中間有人會互𪜶害死。 17恁會因為我的名互眾人怨恨。 18不過恁連一支頭毛都𣍐失落。 19著忍耐才會得著性命。」
預言耶路撒冷的滅亡
(太 24.15-21；可 13.14-19)
20「恁看著耶路撒冷互軍隊包圍的時，就知此個城啲欲毀滅啦。 21彼時，佇猶太的人著逃走去山內；佇城內的著離開；佇庄腳的毋通入城。 22因為這是報應的日子，是欲應驗聖經所記載的一切。 23佇許個日子，有身孕的及互嬰仔食奶的婦仁人非常不幸！因為大災禍啲欲臨到此個地；上帝的大受氣啲欲臨到此個人民。 24𪜶會互刀劍刣死，嘛會互人掠去逐國。耶路撒冷會互外邦人踐踏，直到外邦人的期限滿。」
人子的來臨
(太 24.29-31；可 13.24-27)
25「彼時，日、月、星攏會顯出兆頭。地上萬民會因為海湧嘩嘩哮驚惶不安。 26人會因為此世界啲欲發生的代誌驚甲暈去，因為天頂的光體攏會搖泏。 27彼時，人會看見人子充滿權能及大榮光坐雲來臨。 28諸個代誌啲欲發生的時，恁著攑頭挺身，因為恁的拯救啲欲到啦。」
對無花果樹學習
(太 24.32-35；可 13.28-31)
29耶穌閣用譬喻給𪜶講：「恁看無花果樹及一切的樹。 30恁看著諸個樹茁芛的時就知熱天啲欲到。 31親像按呢，恁看著諸個代誌發生的時就知上帝的主權啲欲實現。 32我實在給恁講，此世代猶未過去，諸個代誌攏會發生。 33天及地會消失，毋拘我的話絕對𣍐消失。」
著謹慎
34-35「恁家己著謹慎，才免因為貪食，酒醉，及生活的掛慮互恁的心麻痺，致到彼日親像羅網忽然臨到恁，因為彼日會臨到住佇全世界逐所在的人。 36著不時警醒，祈禱，互恁有氣力通逃避一切啲欲發生的代誌，通徛佇人子的面前。」
37此幾日，耶穌日時攏佇聖殿教示人，暝時出城去橄欖山過暝。 38眾人攏透早就去聖殿聽耶穌講道理。
انتخاب شده:
路加福音 21: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
