約翰福音 5
5
耶穌醫好破病三十八年的人
1諸個代誌以後，有一個猶太人的節期，耶穌上去耶路撒冷。
2佇耶路撒冷，近羊門的所在有一個水池，希伯來話叫做畢士大，水池邊有五個走廊。 3佇走廊有真多病人倒佇遐；有失明的、腳跛的，及半身不遂的。#5.3 有的抄本有「啲等水振動；4 有時主的天使會落來池裡給水拍振動；水振動了後，頭一個落去的人，無論什麼病，攏會好。」 5佇遐有一個破病三十八年久的人。 6耶穌看著伊佇遐，知影伊已經佇遐倒真久，就給伊講：「你愛好起來無？」
7彼個病人應講：「先生，水振動的時無人給我抱落去水池，我想欲落去的時，別人比我先落去啦。」
8耶穌給伊講：「起來，夯你的床舖起來行。」
9彼個人隨時好起來，就夯伊的床舖起來行。
彼日是安歇日， 10所以猶太人對彼個互耶穌醫好的人講：「今仔日是安歇日，你夯床舖無合法。」
11伊應講：「醫好我彼個人給我講：『夯你的床舖起來行。』」
12𪜶就問伊：「叫你夯床舖起來行彼個是啥人？」
13伊毋知彼個給伊醫好的是啥人，因為有真多人佇遐，閣耶穌亦已經恬恬仔離開。
14後來，耶穌佇聖殿抵著伊，給伊講：「你已經好啦，毋通閣犯罪，才𣍐抵著閣較慘的代誌。」
15彼個人離開了後對猶太人講，給伊醫好的是耶穌。 16因為按呢，𪜶開始迫害耶穌，因為伊佇安歇日給人醫病。 17耶穌對𪜶講：「我的父到現在一直啲工作，我嘛啲工作。」
18為著按呢，猶太教當局閣較想欲害死耶穌；因為耶穌毋若違犯安歇日的規定，閣稱上帝做伊家己的父，看家己及上帝平等。
上帝的子的權柄
19耶穌對𪜶講：「我實實在在給恁講，子𣍐當照家己的意思做代誌，只有看父做什麼，伊才照按呢做。父所做的，子嘛照按呢做。 20因為父疼子，將家己所啲做的一切攏指示子，嘛會將比諸個較大的事指示伊，欲互恁感覺奇怪。 21父按怎互死人閣活，賜𪜶活命，親像按呢，子嘛欲將活命賜互家己所愛的人。 22父攏無給人審判。伊已經將審判的權柄攏交互子， 23是欲互眾人尊敬子，親像尊敬父。無尊敬子就是無尊敬差伊來的父。
24「我實實在在給恁講，聽我的話閣信差我彼位的人有永遠的活命；伊已經出死入活，毋免受審判。 25我實實在在給恁講，時啲欲到，現在就是，死人會聽見上帝的子的聲，聽見的人會活起來。 26因為父本身是活命的根源，伊嘛按呢互子成做活命的根源。 27伊已經將審判的權柄賜互子，因為子是人子。 28此個事恁毋通感覺奇怪，因為時啲欲到，所有死去的人攏會聽見子的聲， 29𪜶會對墓裡出來：作好的閣活，得著活命；作歹的閣活，受定罪。」
為著耶穌作證
30「我𣍐當照家己的意思做什麼；我只有照所聽著的來審判。我的審判公正，因為我毋是趁家己的意思，是照差我來彼位的旨意。
31「我若為著家己作證，我的見證就無真實。 32有另外一個人啲為著我作證，我知伊為著我所做的見證是真實。 33恁曾派人去見約翰，伊有為著真理作證。 34毋是講我需要人為著我作證；其實我講諸個事是欲互恁得著救。 35約翰是啲𤏸啲照光的燈，恁歡喜暫時享受伊的光。 36不過我有比約翰較有力的見證。父交代我完成的工作，就是我現在啲做的工作，會當為著我作證，表示父有差我。 37閣差我的父已經親身為著我作證。恁猶毋曾聽著伊的聲，嘛毋曾看著伊的形狀。 38恁無將伊的話囥佇心內，因為恁毋信伊所差彼位。 39恁研究聖經，因為恁想，佇彼內面會尋著永遠的活命。其實，就是聖經啲為著我作證。 40按呢，恁猶久毋肯來我遮得著活命。
41「我無接受人的稱讚。 42毋拘我真正了解恁，佇恁內面無疼上帝的心。 43我奉我的父的名來，恁無接納我；若有別人奉家己的名來，恁顛倒給伊接納。 44恁互相稱讚，總是無追求對唯一的上帝來的稱讚，按呢恁哪會當信我？ 45毋通想講我會佇父的面前控告恁。啲控告恁的是恁一直啲仰望的摩西。 46恁若真正有信摩西，嘛會信我；因為伊有寫我的代誌。 47伊寫的冊恁都毋信，哪會信我講的話？」
اکنون انتخاب شده:
約翰福音 5: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
