約翰福音 4
4
耶穌及撒馬利亞的婦仁人
1法利賽派的人有聽著耶穌比約翰招較多門徒，閣給較多人洗禮。 2其實耶穌毋曾給人洗禮，是伊的門徒給人洗禮。 3耶穌聽著此個代誌就離開猶太，轉去加利利； 4伊著經過撒馬利亞。 5耶穌來到撒馬利亞的一個城，叫做敘加，此個城倚近雅各互伊的子約瑟彼塊地。 6雅各井佇遐。耶穌因為行路真倦就坐佇井邊。彼時差不多是中晝。
7有一個撒馬利亞的婦仁人來汲水。耶穌對伊講：「請一屑仔水互我飲。」 8彼時伊的門徒已經入去城內買食物。
9 撒馬利亞的婦仁人應耶穌講：「你是猶太人，哪會對我此個撒馬利亞的查某人討水飲？」原來猶太人及撒馬利亞人無來往。
10耶穌應講：「你若了解上帝互人的恩賜，閣有對你講『請一屑仔水互我飲』彼個是什麼人，你早就會給伊求，伊早就會將活水互你。」
11婦仁人講：「先生，你無汲水的器具，井閣深，你欲按怎得著活水？ 12阮的祖先雅各留此個井互阮，伊家己、伊的子孫，及伊的牲生，攏飲此個井水，你豈會比伊較𠢕？」
13耶穌應講：「飲此個井水的人攏會閣嘴焦； 14不過飲我所欲互伊的水的𣍐閣嘴焦。因為我欲互伊的水佇伊的內面會成做水泉，一直淐出活水，互伊得著永遠的活命。」
15婦仁人講：「先生，請互我此個水，我才𣍐閣嘴焦，嘛免閣來遮汲水。」
16耶穌給伊講：「你去叫你的丈夫，導伊來遮。」
17婦仁人應講：「我無丈夫。」
耶穌給伊講：「你講『我無丈夫』有影。 18你曾有五個丈夫，現在此個毋是你的丈夫，你講的是事實。」
19婦仁人講：「先生，我看你是先知。 20阮撒馬利亞人的祖先佇此個山頂敬拜上帝；恁猶太人講耶路撒冷才是敬拜上帝的所在。」
21耶穌對伊講：「婦仁人，著信我。時啲欲到，彼時恁𣍐佇此個山頂，嘛𣍐佇耶路撒冷敬拜父。 22恁撒馬利亞人敬拜恁所毋識的；阮猶太人敬拜阮所識的；因為拯救對猶太人出來。 23不過，時啲欲到，現在就是，真正敬拜父的人會用心靈及真誠敬拜。因為父愛此款的人敬拜伊。 24上帝是神，敬拜伊的人著用心靈及真誠敬拜。」
25婦仁人對伊講：「我知彼位稱做基督的彌賽亞啲欲來，伊來的時會將一切的代誌給阮講。」
26耶穌給伊講：「我，此個啲及你講話的就是。」
27抵此個時，耶穌的門徒轉來。𪜶看著耶穌及婦仁人啲講話，感覺真奇怪，不過無人問婦仁人「你欲創什麼」，抑是問耶穌「你哪啲及婦仁人講話」。
28婦仁人就將水瓶放下啲，轉去城內，對人講： 29「來去看，此個人將我過去所做的一切攏給我講出來。伊敢是基督乎？」 30大家就出城去看耶穌。
31彼時門徒給耶穌講：「拉比，請來食。」
32耶穌給𪜶講：「我有恁毋知的食物。」
33門徒就問來問去講：「豈有人提物件互伊食？」
34耶穌給𪜶講：「我的食物就是實行差我彼位的旨意，閣完成伊的工作。 35恁豈無按呢講『閣四個月就有通收成』？我給恁講，目睭擘互金，看四面的田園；五穀已經熟，通收成啦。 36現在收割的人已經啲領工錢，閣啲收成互人得著永遠活命的五穀，互撒種的及收割的做夥歡喜。 37因為俗語講『一個撒種，一個收割』，講了真著。 38恁無辛苦耕作的，我差恁去收成；別人辛苦，恁享受𪜶辛苦的成果。」
39彼個城有真多撒馬利亞人信耶穌，因為彼個婦仁人作證講：「伊將我過去所做的一切攏給我講出來。」 40所以許個撒馬利亞人來見耶穌，求伊住𪜶遐，伊就佇遐住兩日。
41因為耶穌所講的話，有閣較多人來信。 42許個人給彼個婦仁人講：「現在阮信，毋是因為你所講的話，是因為阮有親耳聽著耶穌的話，知影伊真正是世間的救主。」
耶穌醫好官員的子
(太 8.5-13；路 7.1-10)
43兩日後，耶穌離開遐去加利利。 44因為耶穌家己曾講：「先知佇家己的故鄉𣍐受尊重。」 45耶穌到加利利的時，加利利人有給伊歡迎，因為𪜶去耶路撒冷過𨃟過節的時，有看著伊佇節期中所做一切的代誌。
46耶穌閣轉去加利利的迦拿，就是伊曾用水變做酒的所在。佇遐有一個迦百農的官員，伊的子破病。 47伊聽著耶穌對猶太來到加利利，就去求耶穌落去迦百農醫治伊的子，因為伊的子啲欲死啦。 48耶穌給伊講：「恁若無看見神跡奇事，一定𣍐信。」
49彼個官員應講：「先生，請你佇我的細子猶未死以前落來去。」
50耶穌對伊講：「轉去，你的子𣍐死。」
彼個人信耶穌給伊講的話，就轉去。 51佇路中，伊的僕人抵著，給伊講伊的細子活起來啦。
52伊就問𪜶伊的子什麼時好起來。𪜶應講：「昨昏下晡一點熱就退去。」 53老父知影，抵抵彼個時耶穌給伊講「你的子𣍐死」。伊家己信，全家的人嘛攏信。
54這是耶穌對猶太來加利利以後所行的第二個神跡。
انتخاب شده:
約翰福音 4: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
