創世記 3
3
人違背命令
1主上帝所造野地一切的動物，蛇上詭詰。蛇對婦仁人講：「上帝豈有影講，園內所有的果子恁攏𣍐用得食？」
2婦仁人對蛇講：「園內所有的果子阮攏通食， 3只有園中彼欉樹的果子，上帝曾講：『恁毋通食，嘛毋通摸；恁若毋聽，恁會死。』」
4蛇對婦仁人講：「恁無一定會死。 5上帝知，恁食的時，恁的目睭就會開，會親像上帝#3.5 「親像上帝」嘛通譯做「親像神明」。分別善惡。」
6婦仁人看彼欉樹的果子好食，合目，閣會互人有智慧，就真欣羨。伊就挽彼個果子來食，續互及伊做夥的丈夫食，伊的丈夫嘛食。 7𪜶兩個人的目睭就開，才知家己是赤身露體，就編無花果樹葉做裙縖啲。
8黃昏涼冷的時，彼個人及伊的婦仁人聽著主上帝佇園內啲行的聲，就匿佇園裡的樹仔內，閃避主上帝的面。 9主上帝叫彼個人，講：「你佇叨位？」
10彼個人就講：「我佇園內聽著你的聲就真驚，因為我赤身露體，就匿起來。」
11主上帝就問：「什麼人給你講你赤身露體？你是毋是食我吩咐你毋通食彼欉樹的果子？」
12彼個人講：「你互我及我做夥彼個查某人，伊提彼欉樹的果子互我，我就食。」
13主上帝對婦仁人講：「你哪會按呢做？」
婦仁人講：「蛇給我引誘，我就食。」
上帝判罪
14主上帝對蛇講：
「你既然做此個代誌，
佇一切的牲生及野地的走獸，
你特別著受咒詛；
你欲用腹肚行路，
一生食土粉。
15我欲互你及婦仁人結冤仇，
你的後代及伊的後代嘛結冤仇；
伊欲傷你的頭殼，
你欲傷伊的腳後蹬。」
16閣對婦仁人講：
「我欲大大加添你懷孕的痛苦；
你欲催陣痛苦才生子；
你欲戀慕你的丈夫，
伊欲管轄你。」
17主上帝嘛對亞當講：
「你既然聽趁你的某的話，
食我吩咐你毋通食彼欉樹的果子，
所以土地因為你的緣故受咒詛；
你著一世人勞苦，才會當對土地得著食物。
18土地欲因為你發莿及蒺藜；
你欲食野地的菜蔬。
19你著汗流滿面才有通食，
到你歸土，因為你是對土捏造的；
你本是土粉，嘛欲歸佇土粉。」
20彼個人給伊的某號名叫做夏娃#3.20 「夏娃」意思是「活命」。；因為伊是人類的老母。 21主上帝為著亞當#3.21 「亞當」意思是「人類」。及伊的某用皮做衫互𪜶穿。
受趕出伊甸園
22主上帝講：「今，此個人已經及咱像款，會分別善惡；伊若伸手去挽活命樹的果子來食，就會活到永遠。」 23主上帝就將伊趕出伊甸園，互伊去種作土地；伊是對土捏造出來的。 24主上帝將彼個人趕出去以後，佇伊甸園的東旁設四面轉踅發火焰的劍，派天使基路伯防守去活命樹的路。
اکنون انتخاب شده:
創世記 3: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021