創世記 2
2
1天地及萬象已經創造完成。 2佇第七日，上帝完成伊的工作，就佇彼日歇睏。 3上帝賜福第七日，定此日做聖日；因為佇此日，上帝停伊一切創造的工#2.3 「因為佇此日，上帝停伊一切創造的工」嘛通譯做「佇彼日以前，上帝完成伊創造的工」。，就安歇。 4這就是天及地創造的過程。
創造的另外一個記載
主上帝造天及地的時， 5大地猶未有草木，田野猶未生菜蔬；因為主上帝無落雨，嘛猶未有人通種作。 6總是有水對地淐出來，潤澤地面。
7主上帝用地上的土粉捏造人，對伊的鼻孔歕性命的氣；人就成做有性命的人#2.7 佇希伯來文，「人」及「地」的字根像款。。
8主上帝佇東方的伊甸開墾一個園，將所造的人下佇彼內面。 9主上帝互地發逐種好看的樹仔，及好食的果子；佇園的中間嘛有活命樹，及會互人分別善惡#2.9 「會互人分別善惡」嘛通譯做「會互人得著一切知識」。的樹。
10有一條河對伊甸流出來，灌沃彼個園；對遐分做四條。 11頭一條叫做比遜河，踅哈腓拉全地；遐出產金， 12是上好的金；閣出產珍貴的芳料及紅瑪瑙。 13第二條叫做基訓河，踅古實#2.13 「古實」嘛通譯做「蘇丹」。全地。 14第三條叫做底格里斯河，流對亞述的東旁。第四條就是幼發拉底河。
15主上帝將彼個人安頓佇伊甸園，互伊種作，顧守彼個園。 16主上帝吩咐彼個人講：「園內逐種樹的果子，你攏通食。 17毋拘彼欉會互人分別善惡的樹，伊的果子你𣍐用得食；你若食，彼日你一定會死。」
18主上帝講：「彼個人家己一個住毋好；我欲給伊造一個幫贊者來匹配伊。」 19主上帝用土做野地逐款的走獸，以及空中逐款的飛鳥。主上帝給許個動物導來彼個人的面前，互伊給𪜶號名；彼個人給逐款動物號的名，就成做彼個動物的名。 20彼個人就給所有的牲生、空中的飛鳥，及野地一切的走獸號名，毋拘尋無一個通做伊的幫贊者來匹配伊。
21主上帝互彼個人睏重眠，伊就睏。主上帝對彼個人提一支脇骨，閣互彼位的肉合起來。 22主上帝就用彼支脇骨造一個查某人，導伊來到彼個人遐。 23彼個人講：
「此個才是我骨內的骨，
肉內的肉；
通稱伊做查某人，
因為伊是對查甫人#2.23 佇希伯來文，「查某人」及「查甫人」的字根像款。提出的。」
24按呢，人欲離開伊的父母，及伊的某結連，兩人成做一體。
25翁某兩人赤身露體，無感覺見笑。
اکنون انتخاب شده:
創世記 2: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021