Matyo 18
18
A nɨ Ɨwa wa a nɨ Akɔ́ʼɔ́ntsɨrə ghe?
(Mar 9:33-37; Alu 9:46-48)
1A nkfu məwa bɨyɛʼ ba yén a mbó Yeso mbitɨ ngə́, “Akɔ́ʼɔ́ntsɨrə a mu Nɨfɔ nɨ fɔməbvurə a nɨ ɨwa le?”
2Ma lan, Yeso a sóŋ mɔn wu nkɨʼnɨ a yen a mbó zɨ; a tiʼ ntɛgɨ ayi a ɨshi bo, 3ɨ soŋ a mbó bo ngə́, “Tsɛʼ a nkənu, ma sóŋə́ a mbó bɨŋ ə, be nɨ tú bənkɨ ɨ tiʼ tso ɨbɔ bə kɨʼnɨ, nɨ láʼ keʼ kon a mu Nɨfɔ nɨ fɔməbvurə ghe. 4Ŋwɔn tsum wa a shiʼtɨnɨ nɨ atuəmbəm azhi a ɨshe tso mɔn wen, a nɨ akɔ́ʼɔ́ntsɨrə a mu Nɨfɔ nɨ fɔməbvurə ghe. 5Ŋwɔn tsum wa a kwarɨnɨ a mɔn tso məwen a ɨkum me, a kwarɨ lá aghə.”
Ɨkwaʼnɨ tsa tsɨ Tíntɨ́nɨ́ Ɨbɛn Ntságə́ a Ngɨ Ɨbvu ə
(Mar 9:42-48; Alu 17:1-2)
6“Be ŋwɔn tse a ghɨ ngə́ á mɔn wen wu tse a keʼ nɨ abeməntəm a nye me tsi, a kwɛ mbɔŋ ngə́ á bɨ korɨ a təkɨŋ ngɔʼ nghɔʼ abán wə ntɔŋ ɨ maʼ a mu sagɨrə wu ngwi á shwimkɨ a mbyi sagɨrə wu ngwi ə. 7Wei, ngɨ́ʼ zɨ ngwi a mbó mbyi mbɨ́ʼ ɨkwaʼnɨ tsa tsɨ tíntɨ́nɨ́ ɨbɛn ntságə́ a ngɨ ɨbvu ə! Ɨbə́ŋ ɨnu mətsiŋ mɨ funə tsɛʼ nkfu tsum, lá ngɨ́ʼ zɨ ngwi ɨ tsi a mbó ŋwɔn wa a ghɨnə ngə́ á tsɨ fúə ghe!
8Be abó azo kə aku azo a ghɨ ngə́ o ghɨ ɨbvu, sobɨ a zɛrə ɨ nyɛʼə! A bɔŋ a mbó gho a nkúŋə́ a mu ntsi ntən nɨnkoŋ nɨ táʼ abó kə nɨ táʼ aku ntsa a nchyɛ́ nɨ mbó mɨmbá kə nɨ mɨku mɨmbá á bɨ waŋ agho a mu ɨmugɨ nɨnkoŋ wa. 9A nkwiʼtə, be nɨdɨgɨ ɨno mɨ tyiŋ agho a ngɨ ɨbvu, twɛʼ a nɛrə ɨ nyɛʼə! A bɔŋ a mbó gho a nkúŋə́ a mu ntsi ntən nɨnkoŋ nɨ táʼ nɨdɨgɨ ntsa ngə́ á bɨ waŋ agho a mu ɨmugɨ nɨnkoŋ nɨ ɨmɨgɨ mɨmbá ghe.”
Nɨgham nə Nanɨ mbɨ́ʼ Mbyindzɨ za ɨ Byenə
(Alu 15:3-7)
10“Zɛnə ngə́ nɨ se a mɔn wen wu tse wagɨnə. Ma sóŋə́ awɨŋ ə, a fɔməbvurə bɨtsen bɨ ndá bɨ Ŋwi ba gháʼə nchyɛ̌ bo bɨ Ta ɨghə. 11#18:11 11 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ kwiʼtɨ nkaŋ 11 ngə́, “Mbɨ́ʼ ngə́ Mɔn Ŋwɔn a yén lá a ndoŋ ba bɨ byenə.”
12Nɨ kwaʼtɨ ngə́ ke? Be ŋwɔn a tsi nɨ mbyindzɨ táʼ nkɨ, táʼ a byé wə mu, a sě nyɛ́ʼtə́ a tsa mɨghúm mi nɨbvuʼə nɨ ntsɔb nɨbvuʼə á tsɨ ndzɨ́ə a mbəm ntáʼ ngěn ndǒ a táʼ wa a byenɨ lá le? 13Be a zɛn a zɛrə, tsɛʼ a nkənu, ma sóŋə́ awɨŋ ə, a dórə́ mbɨ́ʼ a táʼ məwen ntsa a tsa mɨghúm mi nɨbvuʼə nɨ ntsɔb nɨbvuʼə tsa tsɨ lónɨ́ nkeʼ byé lá. 14Ndəŋndəŋ, ka Ta ɨghan a fɔməbvurə a ndǒ ayi ngə́ á táʼ mɔn wen wu tse a byé.”
Mɨma ɨgho wa a Ghɨnɨ Ɨbvu a nye gho ghe
15“Be mɨma ɨgho wu mbáŋnɨ́ a fan anu a nye gho, ghɛn ɨ fɨʼtɨ afənu azhi wəmbo, mbáʼ a tsinɨ tsɛʼ bɨŋ zɨ bɨbá ghe. Be a be ngə́ a zuʼtɨ nji ntsu ɨzo, lá be ngə́ o səŋ, mbɨ́ʼ ngə́ o bə ntsi nɨ mɨma ɨgho wu mbáŋnɨ́ wa wədiʼ ə. 16Lá be a tú nji ntsu ɨzo zuʼtɨ, lɔgɨ a táʼ ŋwɔn kə ɨbɛn bi bɨbá á bɨŋ bo ghɛn nkwatɨ ayi, taŋ á ɨbɛn bi bɨbá kə bi bɨtárə́ chi shiʼtɨ tsi tso bətɛmə-ndzě a nye anu atsum za nɨ ghamnə ghe. 17Be a kɨ mbvurɨ nton ayi a ndzúʼtɨ́ nji ntsu ɨza, fɨʼtɨ a mbó ndáŋwi ə; be a kɨ mbvurɨ nton ayi a ndzúʼtə́ a mbó ndáŋwi, lɔgɨ ayi tso tɨbeməŋwi kə ngaŋ nkwarɨ ashɛbɨ ə.”
Anu za bɨ Tónə́ nɨ Anu za bɨ Bémnə́ ghe
18“Tsɛʼ a nkənu, ma sóŋə́ awɨŋ ə, anu atsum za nɨ tonɨ atuəshe, bɨ mɨ kɨ ton a zɛrə a fɔməbvurə, anu atsum za nɨ bemnɨ atuəshe, á bɨ kɨ mbem a zɛrə a fɔməbvurə ghe.
19Ma kwiʼə sóŋə́ a mbó bən ngə́: be bən bi bɨbá bemnɨ ndɔntɨ anu zə tsɛrə a mu atsaʼtɨ, Ta ɨghan a fɔməbvurə a mɨ ghɨ a zɛrə a mbó bɨŋ ə. 20Mbɨ́ʼ ngə́ be ɨbɛn bi bɨbá kə bi bɨtárə́ ghotɨ táʼ adiʼ nɨ ɨkum ɨghan, ma mɨ tsi a tɨtərɨ bo ghe.”
Nɨgham nə Nanɨ Mbɨ́ʼ Ngaŋ Afaʼ za ɨ se Ndɨ́gɨ́nɨ́ Mɨbvu ə
21Bita a tíʼ ngɛn ɨ fátɨ́ a Yeso mbitɨ ayi ngə́, “Maʼmbyí, a mɨ ghaʼtɨ ɨ be tso nkfu tsi sɛʼ mbáʼ be mɨma ɨghan a fan anu a nye me ma lɨgɨnɨ ɨbvu ɨyi le? Ɨ ghaʼtɨ ɨ kuʼ nkfu tsi samba le?”
22Yeso a sóŋ wəmbo ngə́, “Ma mɨ kaʼ soŋ a mbó gho ngə́ nkfu samba ghe, a nɨ nkfu mɨghúm mi samba nkfu samba ghe. 23Mbɨ́ʼ ngə́ Nɨfɔ nɨ fɔməbvurə be lá tso ɨ lə. Ɨfɔ wu tse wa a kə́ ndǒ ɨ shaŋ nkáb bo bɨ ngaŋ afaʼ ɨchi ɛ. 24A biʼnɨnə a ngɨə ma lan, bɨ yen nɨ táʼ ŋwɔn wəmbo wa a chwánɨ́ ayi nɨ nkáb nkám mɨghúm mɨmbá ghe. 25Ngaŋ afaʼ za sé tsi nɨ nkáb za ɨ kúʼnɨ́ a ntfú nɨká ɨni ɛ, ma lan, ɨfɔ wa a ghá ntɨgə ngə́ á bɨ fen ayi tso abuʼ ndzɔŋ nkwiʼtɨ a ngwe ɨyi bo bɨ ɨbɔ ɨbyi nɨ ɨdzúm ɨchi ɨtsum taŋ ɨ tfu nɨká ɨni na ɨwu ə. 26Ngaŋ afaʼ za ɨ vwó nkwem mɨkwiʼtɨ ɨmyi a ɨshi ɨfɔ wa, mbuʼ mbó wəmbo ɨ soŋ ngə́, ‹Bɔrɨsɨ ntəm ɨgho a nye me ghe, ma mɨ tfu azúm atsum ə.› 27A mu akômɨlɨŋnɨ, ɨfɔ wa a nyɛ́ʼtɨ́ ayi nkɨ ndɨ́gɨ́nɨ́ nɨká ɨni na.
28Lá tsɛʼ ŋwɔn afaʼ məwa, mbáʼ a fúnɨ́ abyɛn, a bóm a ŋwɔn afaʼ wa wu mɔʼɔ wa bo zɨ kɨ́nə́ faʼə, wa a chwánɨ́ nɨká ɨni, nɨ be ɨban nkáb tsi bá; ɨ faŋnɨ ayi a fúʼntɔŋ ɨ soŋ ngə́, ‹Tfu nɨká ɨnə.› 29Ŋwɔn nɨká ɨyi wa bo zɨ kɨ́nə́ faʼə lá a vwó wə mɨku, mbuʼ mbó wəmbo ngə́, ‹Bɔrɨsɨ ntəm ɨgho a nye me ghe, ma mɨ tfu azúm atsum ə!› 30Lá a túŋə́, ngɛn fárɨ́ a ŋwɔn nɨká ɨyi wa atsáŋ nkuʼnɨ nkfu za a mɨ tfu nɨká ɨni ɛ. 31Mbáʼ ngaŋ afaʼ tsa bo bo kɨ́nə́ faʼə zɛ́nɨ́ anu za a fúnɨ́, bɨ lánɨ́ ndzə́ŋnɨ́ tsɛʼ nkan, ngɛn fɨʼtɨ a mbó ɨfɔ wa anu atsum za a fúnə́. 32Ɨfɔ wa a bə́ ntíʼ ntɔ́ŋ ayi ɨ soŋ wəmbo ngə́, ‹Gho a bɨ́gɨ́ a mɨkyiʼ ŋwɔn afaʼ! Ma lo ndɨgɨnɨ nɨká ɨno na nɨtsum mbɨ́ʼ ngə́ o lo mbuʼtɨ mbó a mbó me ghe. 33O lo nchi koʼ kɨ nko a mɨlɨŋnɨ a nye ŋwɔn afaʼ wen wa bɨŋ zɨ faʼnə, tsɛʼ tso mbáʼ ma lonɨ nko a mɨlɨŋnɨ a nye gho lá le?› 34A mu alwɛntɔ́ŋ, ɨfɔ wa a bə́ŋ ayi nga a mbó bɨntsiŋ bɨ atsáŋ ngə́ á bɨ ləŋ ayi nɨ ngwan ɨ kuʼnɨ nkfu za a tfunɨ nɨká ɨni nɨtsum ə.”
35Yeso a tíʼ ndwɨgɨnɨ ɨ soŋ ngə́, “Nə nɨ ndəŋndəŋ anu za Ta ɨghan a fɔməbvurə a ghɨnɨ kɨ́ ghɨ a nye ŋwɔn nɨ bɨŋ tsum mbáʼ be o tú lɨgɨnɨ ɨbvu mɨma ɨgho nɨ ntəm ɨgho ɨtsum ə.”
انتخاب شده:
Matyo 18: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
