Matyo 17
17
Nkyerɨ Yeso ɨ Kwébtə́
(Mar 9:2-13; Alu 9:28-36)
1Njwi ghɨnə ntsa tsi ntugə, Yeso a lɔgɨ a Bita, Jemsɨ bo mɨma ɨyi Yoane, ntsa mbyi ɨza bo bo kɔʼ ngɛn atú mbám ntsi ɨwu tsɛʼ bo bo ghe. 2Adzaŋ za bɨyɛʼ ɨbyi məben kɨ́nə́ ndyiŋə, bɨ bə́nkɨ́ a Yeso a ɨshi bo, ɨshi ɨyi tíʼə ntá tso nɨnyom, ɨtsɛʼ ɨchi tíʼə fúgə́ tso nkaʼ ə. 3Ze azo, Alaja bo Mǒse fú a ɨshe; ntíʼə ngámnə́ bo bɨ Yeso ghe. 4Ma lan, Bita a sóŋ a mbó Yeso ngə́, “Maʼmbyí, a bɔŋ ngə́ á bɨgɨnə tsi ɨghə! Be o kɔŋ, ma vwu bɨkfúʼə bi bɨtárə́, táʼ a mbó gho, táʼ a mbó Mǒse nɨ wu mɔʼɔ a mbó Alaja ghe.”
5A kə́ mbvúrə́ ngámə́ mbáʼ mbaʼ zɨ ŋwenɨnɨ zɨ tse ɨ shíʼnɨ́ mbɔ́m awa, nji zɨ tse fu wə mu ɨ soŋ ngə́, “Nə nɨ Mɔn ɨghə wen wa ma kɔŋnɨ, ɨnye zə kə́ mbɔ́ŋə́ wə ɨnye; nɨ zuʼ wəmbo ə!”
6Mbáʼ bɨyɛʼ ɨbyi məben zúʼnɨ́ nji zen lá, abɔgɨtɨ a lwɨ́gɨ́ mɨntəm ɨma, bo shiʼ ngvo nkúbɨ́nɨ́ mɨshi ɨma a tɨshe ə. 7Yeso a yén mɔmtɨ awa, ɨ soŋ ngə́, “Nɨ lo atɨ́ nkeʼ kɨ mbɔgə!” 8Ma lan, bo bíʼtɨ́ ɨmɨgɨ ɨma atɨ́, nkeʼ a ŋwɔn adaŋ bə ndzɛn ntsatɨ a Yeso ghe.
9Bo ghɨnə tɨ shǐʼ atú mbám za, Yeso a gha ntɨgə a mbó bo ngə́, “A nɨ keʼ ndzɛm nəzhwɨgɨnɨ zen fɨʼtɨ a mbó ŋwɔn tsɛrə ɨ kuʼ njwi za Mɔn Ŋwɔn a ghɨnɨ zhwémnɨ́ a mbó nɨvwo ə.”
10Bɨyɛʼ ba tíʼ mbítɨ́ a Yeso ngə́, “A ghɨ ake bɨdiʼ bɨ Nyɔngɔŋ soŋnə ngə́ Alaja a mɨ zagɨ yen a mbyi lá le?”
11Yeso a chwɨ́gɨ́ ngə́, “Tsɛʼ a nkənu, Alaja a mɨ tsa mbyi ɨ yen taŋ ɨ kyaŋtɨ ɨnu ɨtsum ə. 12Lá ma soŋ a mbó bən ngə́ Alaja a kwɛnə ngyen lá bɨ keʼ ayi zhi, lá ngɨ be anu atsum za bo kɔŋnɨ wə ɨnye. Ndəŋndəŋ Mɔn Ŋwɔn a ghɨ kɨ́ zé ngɨ́ʼ a mu mbó bo ghe.”
13Bɨyɛʼ ɨbyi məben tíʼ ndzúʼ nkɨ njí ngə́ a kə́ ngamə a mbó bo lá mbɨ́ʼ a Yoane Ngaŋ Nga Nkyi ɛ.
Yeso a Tsuʼ a Mɔn Mbáŋnɨ́ tse wa a Tsínɨ́ nɨ Dzɨŋ ə
(Mar 9:14-29; Alu 9:37-43a)
14Bo ghɨnə ngyén fú a nye ɨnɔ ɨbɛn wa, ŋwɔn tse a yen nkwem mɨkwiʼtɨ ɨmyi a ɨshi Yeso ɨ soŋ ngə́, 15“Tə̧, ko a mɨlɨŋnɨ mɔn ɨghan wu mbáŋnɨ́ ə! A vwǒ akəbvurə, a diʼnɨ ngɨ́ʼ wəmbo tɨ́sə́n a nye ndóm wa nɨ nkfu nɨ nkfu, a vwǒ a mu ɨmugɨ kə a mu nkyi ɛ. 16Ma yén nɨ zɨ a mbó bɨyɛʼ ɨbo, lá bo kɨ chi keʼ ayi tsuʼə.”
17Yeso a chwɨ́gɨ́ ngə́, “Wei nɨwə nə tɨ abeməntəm bo nə ngaŋ ngɨ mɨbvu! Ma ghɨ tsí bɨgɨnə ɨ kɔʼ kuʼ lá nkfu ake le? Ma ghɨ chigɨ ntəm bɨgɨnə ɨ kɔʼ kuʼ lá nkfu ake le? Nɨ yen nɨ mɔn mbáŋnɨ́ wa ɨghan a mbó me ghe!” 18Yeso a ghá ntɨgə a mbó dzɨŋ wa, dzɨŋ wa a nyɛʼtɨ a mɔn mbáŋnɨ́ wa. Mɔn mbáŋnɨ́ wa byí shwétɨ́ tsɛʼ a nyom məwa.
19Bɨyɛʼ bɨ Yeso tíʼ ngyen wəmbo ndzum ndzum, mbitɨ ayi ngə́, “Bɨgɨ kɨ chi keʼ a dzɨŋ wa kɨŋ lá ngə́ ke le?”
20Yeso a chwɨ́gɨ́ ngə́, “Mbɨ́ʼ azhwebtɨ abeməntəm azɨŋ ə. Mbɨ́ʼ ngə́ tsɛʼ a nkənu, ma sóŋə́ a mbó bɨŋ ə, be nɨ tsi nɨ abeməntəm tsɛʼ tso ndzaŋ ɨsa, o chi soŋ a mbó mbám zen ngə́, ‹Tsɔʼnɨ adiʼ wen ngɛn ntɛm ɨ ghɨrɨ ə!› ɨ mɨ kɨ ghen. O chi ghɨ anu atsum za o kɔŋnə!” 21#17:21 Ɨŋwaʼnɨ tsɨ lvuŋ tsɨ mɔʼɔ kwiʼtɨ nkaŋ 21 ngə́, Lá adzaŋ məzen ka a ndáʼə fuə ayi tɨ atsaʼtɨ a Ŋwi kə nchigɨ nji tsə ntsaʼtɨ Ŋwi ə
Yeso a Kwiʼ Ngam mbɨ́ʼ Nɨvwo ɨni ɛ
(Mar 9:30-32; Alu 9:43b-45)
22Mbáʼ bɨyɛʼ ba ghótɨ́nɨ́ bɨtsum táʼ adiʼ a Galili lá, Yeso a sóŋ a mbó bo ngə́, “A bvurɨ mɨnya á bɨ gha a Mɔn Ŋwɔn a mu mbó ɨbɛn, 23á bo zhwitɨ ayi; lá a ndzum njwi tsi tárə́, á bɨ bə nzhwemnɨ ayi ɛ.”
Bɨyɛʼ ba tíʼ ndánɨ́ ndzə́ŋnɨ́ be tɨsɨŋə.
Ntfu Ashɛbɨ a Ndáŋwi zɨ Ngwi ə
24Yeso bo bɨ bɨyɛʼ ɨbyi ghɨnə ngyén nkón a Kabɛrɨnaum, ngaŋ nkwárɨ́ ashɛbɨ a ndáŋwi zɨ ngwi, yen a mbó Bita mbitɨ ayi ngə́, “Ndiʼ aŋwaʼnɨ ɨwən wen a mɛrə ntfǔ ashɛbɨ zə ndáŋwi zɨ ngwi le?”
25Bita a chwɨ́gɨ́ ngə́, “E, tsɛʼ a nkənu ə.”
Bita a ghɨnə nkón ngɛ́n a mu ndá, Yeso a gham wəmbo a ntsambyi, ngə́, “O wiʼtɨ ngə́ ke, a Samɔn? Bɨfɔ bɨ atuəshe wiŋ kwárɨ́ ashɛbɨ lá a mbó bɨwa le? A mbó ngaŋ alaʼ kə a mbó bɨngyen-yenɨ le?”
26Bita a chwɨ́gɨ́ ngə́, “A mbó bɨngyen-yenɨ ə.”
Yeso a tíʼ sóŋ wəmbo ngə́, “Lá be ngə́ ka ngaŋ alaʼ tsi awa nɨ ntfu azúm zə tse ghe. 27Lá ka tɨ ndǒ a ghɔgə a ngɨə á mɨntɔŋ mɨ ɨbɛn biŋ lwinə. Ma lan, ghɛn a mu sagɨrə, ɨ maʼ ɨsáʼ ɨwu ə. Ntsambyi ɨshwú za o konɨ, shwuŋ a zɛrə ɨ fɨgɨ a ntáʼə, o mɨ tiʼ zɛn nkáb atɨŋə wə mu ntsu za ɨ kuʼnɨnɨ a ntfú ashɛbɨ zə ndáŋwi zɨ ngwi azɔgə ghe. Fɨgɨ a zɛrə ngɛn ntfú ashɛbɨ azɔgə ɨwu ə.”
انتخاب شده:
Matyo 17: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
