Yoane 5
5
Yeso a Tsuʼ a Ŋwɔn a Mbyɛn Atsum ə
1Məzen a tsanə, Yeso a lo ɨwu nkɔʼ ngɛn a Yerosalɛm a nɨdorɨ nɨ bə Yuda ghe. 2Ɨ gha a Yerosalɛm, atsum a tsí ɨ fatɨ Ntsu Abuʼ Mbyindzɨ, ntsi nɨ mɨntaŋ mə tɛʼnɨ mi mɨntə̧̂ ghe. A nye nɨgham nɨ bə Ɛbal bɨ tɔŋə a zɛrə ngə́ Bɛtɨzata#5:2 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ tɔŋ a zɛrə be ngə́ Bɛtɛsda, bə mɔʼɔ tɔŋ a zɛrə be ngə́ Bɛtɨsaida ghe. ghe. 3Ɨnɔ ngaŋ mɨghɔ wu wi ɨ nɔ́ŋ a mu mɨntaŋ mə tɛʼnɨ ma; bɨfɨgɨ, bɨtə́ngórə́kuʼ abɔʼnɨ bɨchɛbɨŋ ə. 4#5:4 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ kwiʼtɨ mɨnkaŋ 3b-4 ngə́, “Bo kə́ njwíʼtə́ ngə́ á nkyi wa ɨ chiʼnɨ, mbɨ́ʼ ngə́ nɨ nkfu nɨ nkfu ntsendá Ŋwi zɨ Maʼmbyi kə́ shíʼə.” 5Ŋwɔn tse a tsí ɨwu adiʼ məwa, wa a ghɔ́nə atú ɨlom mɨghúm mɨntárə́ nɨ ntsɔb nɨfə̧ ghe. 6Yeso a zɛ́n ayi a nɔŋ ɨwu, nji ngə́ a ghɔ́nə a nye aghagɨ zə sa; ntiʼ mbitɨ ayi ngə́, “O lǒ ɨ shwetə le?”
7Ŋwɔn nɨghɔ wa a chwɨ́gɨ́ ngə́, “Tə̧, ka ma tsi aghan nɨ ŋwɔn wa a mɨ nɨŋ aghan a mu atsum zen mbáʼ bɨ chiʼnɨ nkyi ɛ; ma tɨ nyuʼnə a nkúŋə́ lá, ŋwɔn adaŋ a wasɨ aghan nkon a ntsambyi ɛ.”
8Yeso a sóŋ wəmbo ngə́, “Lo atɨ́, mbyɛn abaʼ azo, a ntɛmə ngěn ghe.” 9Ŋwɔn wa a byí shwétɨ́; mbyɛn a abaʼ azhi, mbiʼnɨ ntɛ́mə́ ngěn ghe.
Anu məzen a fú lá a nye Njwi Alaʼ Ŋwi, 10bɨsáʼ bɨ ɨlaʼ bɨ bə Yuda sóŋ a mbó ŋwɔn wa bɨ tsúʼnɨ́ ayi lá ngə́, “Sɨŋə nɨ Njwi Alaʼ Ŋwi ə, o fasɨ a Nyɔngɔŋ ɨwɨgɨnə a mbyɛʼ abaʼ azo ə.”
11A chwɨ́gɨ́ a mbó bo ngə́, “Ŋwɔn wa a lonɨ ntsuʼ aghan, a lo soŋ a mbó me ngə́ á ma byɛn abaʼ azan ntɛ́mə́ ngěn aghə.”
12Bo bítɨ́ ayi ngə́, “Mba wa a lonɨ soŋ a məzen a mbó gho a lá ɨwa le?”
13Lá ŋwɔn wa bɨ tsúʼnɨ́ ayi lá a sé a Yeso zhi, mbɨ́ʼ ngə́ ɨbɛn a ɨnɔ tsí adiʼ wa, Yeso a kɨ ndzɔŋ nchwu ndo ayi ɛ.
14A nkfu ndzum, Yeso a zɛ́n ayi a mu Ndáŋwi zɨ Ngwi, ɨ soŋ wəmbo ngə́, “Ze azo, tɨtsɔŋnɨ o shwetɨnə ghe; o tiʼ nkyɛntɨ ɨ kwiʼ ghɨ ɨbvu muŋ zə tɨbɔŋ a mɨ bə tiʼ zɛn agho.”
15Ŋwɔn wa a tíʼ ndo ngɛn soŋ a mbó bɨsáʼ bɨ ɨlaʼ bɨ bə Yuda ngə́ ayi lá a kɨ tsuʼ Yeso ghe. 16Ma lan, bo tíʼ mbiʼnɨ a ndɨ́gɨ́ Yeso mbɨ́ʼ ngə́ a tsúʼ a ŋwɔn a Njwi Alaʼ Ŋwi ə. 17Yeso a chwɨ́gɨ́ awa ngə́, “Ta ɨghan a faʼə tsɛʼ nkfu tsum ə, ma tsi nɨ ɨ zagɨ ɨ kə́ faʼnə ghe.”
18Nɨgham mənen ghɨ́ bɨsáʼ bɨ ɨlaʼ bɨ bə Yuda tiʼə ndǒ mɨndóm a njwítɨ́ zɨ; mbɨ́ʼ ngə́ a sé tsɛʼ a nyɔngɔŋ Njwi Alaʼ Ŋwi fasɨ, a sóŋ ngə́ Ŋwi a nɨ Ta ɨyi, ndiʼ lá ngə́ wɛrə a ghɨ́ atuəmbəm azhi a be ndəŋndəŋ bo Ŋwi ə.
Mɨtən mɨ Mɔn Mbáŋnɨ́ wu Ŋwɔn ə
19Yeso a chwɨ́gɨ́ a mbó bo ngə́, “Ma soŋ nkənu a mbó bɨŋ ə; Mɔn Mbáŋnɨ́ a chi keʼ anu zə tse nɨ atú azhi ghɨə; a ghɨə tsɛʼ anu za a zɛ́nə́ Ta ɨyi a ghɨnə ghe. Anu za Tarɨ a ghɨnə, Mɔn Mbáŋnɨ́ a kə́ ngɨə ghe. 20Mbɨ́ʼ ngə́ Tarɨ a kɔŋ a Mɔn Mbáŋnɨ́ ɨyi, ndiʼə anu atsum za zɨə ghɨnə wəmbo ə. A mɨ kwiʼ diʼ wəmbo ɨnu a ngɨə tsa tsɨ ghɛnɨ nɨ mbyi ntsa a zen, á kɨʼnɨ awɨŋ ə. 21Tso mbáʼ Tarɨ a zhwémnɨ́nə́ ɨbɛn ba bɨ kfokɨnɨ, ngǎ ntsi ntən a mbó bo lá, ndəŋndəŋ Mɔn Mbáŋnɨ́ a ghǎ ntsi ntən a mbó ɨbɛn ba zɨə lɔnɨ ngǎ a mbó bo ghe. 22Ka Tarɨ a sáʼə ayi a ŋwɔn tsɛrə ghe, lá a ghanə mɨtən mɨtsum a mbó Mɔn Mbáŋnɨ́ ɨyi a sáʼə, 23taŋ á ŋwɔn tsum a ghɨ́ nkɔ́ʼsɨ́ a Mɔn Mbáŋnɨ́ atɨ́ a nye ndəŋndəŋ ndóm wa bɨ kɔ́ʼsɨ́nə́ a Tarɨ atɨ́ ə. Ŋwɔn wa a se a Mɔn Mbáŋnɨ́ atɨ́ kɔʼsɨ, ka a kɨ nkɔʼsɨ ayi atɨ́ a Tarɨ, zɨ wa a tsagɨnɨ ayi ɛ.
24Tsɛʼ a nkənu, tsɛʼ a nkənu, ma soŋ a mbó bɨŋ ə, ŋwɔn wa a zúʼnə́ nɨgham ɨnan, ntiʼ nkɨ nɨŋ ntəm ɨyi a nye zɨ wa a tságɨ́nɨ́ aghan a tsi nɨ ntsi ntən nɨnkoŋ ə; bɨ mɨ keʼ ayi bə sáʼə; a binə ntsa a ntsu nɨvwo, nkon a mu ntsi ntɨŋ ə. 25Tsɛʼ a nkənu, tsɛʼ a nkənu, ma soŋə a mbó bɨŋ ə, nkfu ghɨ kuʼ, a kɨ mbe zɛrə tɨtsɔŋnɨ, mbáʼ ɨkfú ɨbɛn ghɨnɨ zuʼ nji Mɔn Ŋwi wu Mbáŋnɨ́, á ba bɨ zuʼnɨ bə ntsi ntɨŋ ə. 26Tsɛʼ tso mbáʼ ntsi ntən ɨ lonə a mbó Tarɨ lá, ndəŋndəŋ a kɨ ngɨ ngə́ á ntsi ntən ndǒ a mbó Mɔn Mbáŋnɨ́ ɨyi ɛ. 27Wɛrə a kɨnə nga mɨtən a mbó Mɔn Mbáŋnɨ́ ngə́ á sáʼ, mbɨ́ʼ ngə́ wɛrə a nɨ Mɔn Ŋwɔn ə. 28A keʼ awən kɨʼnə; nkfu yiŋə mbáʼ bɨkfú bɨtsum ghɨnɨ zuʼ nji ɨzhi 29ɨ fu a mu mɨshe ɨma: ɨbɛn ba bɨ ghɨnɨ ɨbɔŋ, bɨ ghɨ zhwémnɨ́ awa á bo tsi ntən, á ba bɨ ghɨnɨ ɨbvu á bɨ zhwemnɨ, á bɨ chɛrɨ ɨsáʼ ɨwa ngə́ bo vwo ɨsáʼ ə.”
Ɨbɛn Soŋ Nkənu mbɨ́ʼ a Yeso ghe
30“Ma chi kaʼ ghɨ anu zə tse be nɨ mɨtən ɨmə; ma sáʼə tsɛʼ adzaŋ za Ŋwi a soŋnɨ a mbó me, ma lan, nɨsáʼ ɨnan nɨ tɛmnɨ, mbɨ́ʼ ngə́ ka ma njwə́ŋtə́ aghan be a ngɨ za ma lɔnə, lá ma ghɨə tsɛʼ za zɨ wa a tságɨ́nɨ́ aghan a lɔnə ghe.
31Be ma be atɛmə-ndzě a mbó atuəmbəm azan, muŋ za ma sóŋnə́ a se nkənu be. 32Lá ŋwɔn adaŋ a tsi ɨwu wa a nɨ atɛmə-ndzě a nkfu me ghe, ma lan, ma zhi ngə́ anu za a sóŋnə́ mbɨ́ʼ aghan lá a nɨ nkənu ə. 33Nɨ tságɨ́ ntóm ɨtsən lá a mbó Yoane ghe, wɛrə a kɨ́ ngam lá a ɨkum nkənu ə. 34Ka a be ayi be ngə́ ma tsi nɨ ɨ zagɨ tsi nɨ atɛmə-ndzě wa a nɨ ŋwɔn mɨsɔŋ a ntsu ə; ma soŋə a zen lá taŋ á nɨ chi kwarɨ ɨloŋ ə. 35Yoane a bé lá tso nkaʼ, nkɨ́ə nkə́ mbáŋə́ ghe. A nye məkum a nkfu, nɨ kə́ ndǒ ndorɨkə a mu nkaʼ ɨyi ɛ. 36Lá ma tsi nɨ atɛmə-ndzě a nkfu me wa a ghɛnɨ nɨ mbyi ntsa nkənu za Yoane a zhínɨ́ ɨ soŋə: ɨnu tsa ma ghɨnə, ɨ kɨ ghɨ a tsɛrə ɨ ghɛn mɛtɨ, lá be ngə́, ɨnu tsa Ta ɨghan a ghánɨ́ a mbó me a ngɨə, mətsen tsɨ ghamə a nkfu me, ndiʼə ngə́ Tarɨ a tságɨ́ aghə. 37Tarɨ, zɨ wa a tságɨ́nɨ́ aghan, a nɨ atɛmə-ndzě a nkfu me ghe. Nɨ láʼnə mbvurɨ nji ɨzhi tɨ zuʼ kə ndzɛn ɨshi ɨyi, 38nɨ se nkən ɨyi a mu mɨntəm ɨmən lɛn, mbɨ́ʼ ngə́ ka nɨ nɨŋ awən mɨntəm ɨmən a nye zɨ wa wɛrə a tságɨ́nə́. 39Nɨ yɛ̌ʼ Aŋwaʼnɨ a Ŋwi, mbɨ́ʼ ngə́ nɨ wiʼtɨ ngə́ ɨ wə mu nɨ mɨ zɛn ntsi ntən nɨnkoŋ ə. Aŋwaʼnɨ a Ŋwi məzen, a ghamə mbɨ́ʼ aghə! 40Lá ka nɨ kɔŋ awən a ngyiŋə a mbó me, taŋ ɨ yen kwarɨ ntsi ntɨŋ ə.
41Ka ma ndǒ aghə mbontə za ɨ lonɨ a mbó ŋwɔn mɨsɔŋ ə. 42Lá ma zhi ɨbə́ŋ ɨbɛn tsa nɨ nɨ bɛrə, nkɨ nji ngə́ ka nɨ tsi awən nɨ akɔŋnɨ a nye Ŋwi a mu mɨntəm ɨmɨŋ ə. 43Ma yen nɨ mɨtən mɨ Ta ɨghə, lá nɨ keʼ aghan kwarə; lá ŋwɔn tse a be yen nɨ ɨmyi mɨtən muŋ nɨ mɨ kwarɨ ayi ɛ. 44Nɨ kɔŋ mbontɨ ɨtumbəm ɨtsən nɨ bən nɨ bɨŋ ə, lá nɨ se kɔŋ ngɨə ngə́ á ŋwɔn wa a nunɨ zɨzɨ, mbe Ŋwi a bontɨ awɨŋ ə; nɨ chi tiʼ nɨŋ mɨntəm ɨmən a nye me lá ɨ nə́ le? 45Lá, á nɨ keʼ wiʼtɨ ngə́ a lá me wa ma ghɨnɨ kaŋ awən a ɨshi Ta ɨghə. Mǒse, zɨ wa nɨ nɨŋnɨ ntsiŋə nɨ ntəm tsum ɨzən wə ɨnye, a nɨ tsɛʼ zɨ wa a ghɨnɨ kaŋ awɨŋ ə. 46Nɨ bé lánɨ́ nɨ́ŋ mɨntəm ɨmən a nye Mǒse muŋ nɨ nɨŋ mɨntəm ɨmən a nye me, mbɨ́ʼ ngə́ Mǒse a ŋwáʼnɨ́ mbɨ́ʼ aghə. 47Lá, tso mbáʼ ka nɨ nɨŋ awən mɨntəm ɨmən a nye ɨnu tsa wɛrə a ŋwáʼnɨ́nɨ́ lá, nɨ chi tiʼ nɨŋ mɨntəm ɨmən a nye ɨnu tsa ma sóŋnə́ lá ɨ nə́ le?”
انتخاب شده:
Yoane 5: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
