Yoane 4
4
Yeso bo Mangye Samaria ghe
1Bə Farisao zúʼ ngə́ Yeso a kə́ nchyɛ̌ nɨ bɨyɛʼ nkə́ ngǎ nkyi a mbó ɨbɛn ntsǎ a Yoane ghe. 2(Tsɛʼ a nkənu, Yeso zɨmboŋ a sé nkyi a mbó ŋwɔn tse gha; a bé bé bɨyɛʼ ɨbyi mbáʼ bɨ kɨ́nə́ ngǎ ghe.) 3Ma lan, mbáʼ Yeso a zúʼnɨ́ anu za bɨ kɨ́nə́ sóŋə́, wɛrə a nyɛ́ʼtɨ́ a Yudiya mbə ngɛn a Galili ə. 4Wɛrə a tɨnə tɨ ghěn, a ndómnji ntsa a mu Samaria ghe.
5A Samaria, wɛrə a yén nkón a ntáʼmbagə za bɨ kɨ́nə́ ntɔ́ŋə́ ngə́ Saika ghe. Saika wen a tsí ɨ fátɨ́ abɨŋ a ɨshe za Yakɔb a ghánɨ́ a mbó mɔn ɨyi wu mbáŋnɨ́ Yosɛb ə. 6Abɨ́ a nkyi a Yakɔb a tsí ɨwu ə. Mbɨ́ʼ ngə́ Yeso a kán mbɨ́ʼ nɨyen ɨni, a shíʼtɨ́ ntsí a mbyɛn abɨ́ a nkyi za. A bé tso ntənɨ nyom ə.
7Mangye Samaria tse a yén a ntúʼ nkyi a mu abɨ́ a nkyi za. Yeso a sóŋ a mbó mangye wa ngə́, “Gha nkyi á ma no.” 8(Bɨyɛʼ ɨbyi kwɛ́nə ngɛn a ntáʼmbagə a ndzúŋ mɨdzɨ ə.)
9Mangye wa a chwɨ́gɨ́ ngə́, “O nɨ ŋwɔn bə Yuda ma baŋnɨ mbe ŋwɔn bə Samaria ghe — a tsa lá ɨ nə́ o bitɨ nkyi wu nonɨ a mbó me le?” (Wɛrə a sóŋ a məzen lá mbɨ́ʼ ngə́ bə Yuda sé mbémnə́ bo bɨ bə Samaria ghe.)
10Yeso a chwɨ́gɨ́ ayi ngə́, “O lo bá be zhi azúm za Ŋwi a ghánə́ abɔʼnɨ ŋwɔn wa a bítɨ́nɨ́ nkyi wu nonɨ a mbó gho lá, muŋ o baŋnɨ mbitɨ ayi nɨ nkyi, a mɨ tiʼ gha nkyi a mbó gho, abə́ŋ a nkyi za a ghánɨ́ ntsi ntɨŋ ə.” 11Mangye wa a sóŋ ngə́, “Tə̧, o so nɨ alonga chyɛ, abɨ́ a nkyi zen a kɨ shwiɛ. O mɨ lɔgɨ nkyi wen wa ɨ ghánɨ́ ntsi ntən lá ɨ ghé le? 12A lá ta ɨwɨgɨnə wu kɔ́ʼɔ́nguʼ, Yakɔb, wa a ghánɨ́ abɨ́ a nkyi zen a mbó bɨgɨnə ghe; zɨ abɔʼnɨ ɨbɔ ɨbyi nɨ mɨnyam ɨmyi bɨtsum nó nkyi wa ɨ lónɨ́ a mu abɨ́ a nkyi ziŋ ə. Ma wiʼtɨ ngə́ ka o soŋə agho lá ngə́ o tsa a Yakɔb ə, kə ndé?”
13Yeso a chwɨ́gɨ́ ngə́, “Ŋwɔn tsum wa a nónɨ́ nkyi wen, nji nkyi mɨ kwiʼ zaŋ ayi ɛ, 14lá ŋwɔn tsum wa a mɨ no nkyi wa ma mɨ gha, a láʼ keʼ nji nkyi bə ndzáŋə́. Nkyi wa ma mɨ gha a mbó bo mɨ tiʼ bəŋ ɨ be tso náŋə́bə́rə a mu ɨnye bo wa ɨ mɨ gha nkyi wa ɨ ghánɨ́ ntsi ntən abɔʼnɨ ntsi ntən nɨnkoŋ a mbó bo ghe.”
15Mangye wa a sóŋ ngə́, “Tə̧, gha nkyi wa a mbó me ghe! Ma lan, ma mɨ kaʼ nji nkyi bə nkwiʼ ndzaŋ, ɨ kaʼ bə nkwiʼ ntsi nɨ ɨ yen tuʼ nkyi ɨghə.”
16Yeso a sóŋ wəmbo ngə́, “Ghɛn ntɔŋ a ndóm ɨgho á bɨŋ zɨ yiŋə.”
17Wɛrə a chwɨ́gɨ́ ngə́, “Ka ma tsi aghan nɨ ndóm ə.”
Yeso a chwɨ́gɨ́ ngə́, “O soŋ ɨ shiʼnɨ ngə́ ka o tsi agho nɨ ndóm ə. 18O zɔʼnə bɨlóm bi bɨtə̧̂ ghe. Ŋwɔn wa bɨŋ zɨ tsínə́ tɨtsɔŋnɨ lá ka a lanɨ mbe ayi ndóm ɨgho ghe. O soŋ nkənu a mbó me ghe.”
19Mangye wa a sóŋ ngə́, “Tə̧, ma zɛn ngə́ o nɨ ntom Ŋwi ə. 20Bɨta ɨban bə kɔ́ʼɔ́nguʼ bə Samaria bɨ ghúʼsɨ́ a Ŋwi atú mbám ziŋ ə, lá bɨŋ bə Yuda soŋ ngə́ adiʼ a ngúʼsɨ́ Ŋwi a nɨ be Yerosalɛm ə.”
21Yeso a sóŋ wəmbo ngə́, “Mangye, nɨŋ ntəm ɨgho a nye me ghe. Nkfu ghɨ yen za ɨbɛn ghɨ keʼ a Tarɨ bə ngúʼsɨ́ atú mbám zen kə a Yerosalɛm ə. 22Bɨŋ bə Samaria ka nɨ lanɨ nji awɨŋ a ŋwɔn wa nɨ ghúʼsɨ́nə́ ghe; lá bɨgɨ bə Yuda zhi a ŋwɔn wa bɨgɨ ghúʼsɨ́nə́ mbɨ́ʼ ngə́ ɨloŋ ɨ lǒ lá a mbó bə Yuda ghe. 23Lá nkfu ɨ yiŋə, ɨ kɨnə nkuʼə, mbáʼ a ntsǎ a ndzum mɨtən mɨ Azhwi a Ŋwi, ɨbɛn mɨ ghuʼsɨ a Tarɨ adzaŋ za wɛrə a lanɨnɨ mbe, ngǎ ngótɨ́ aghuʼsɨ wəmbo adzaŋ za a lɔnə ghe. 24Ŋwi a nɨ Azhwi ə. A mɨ be tsɛʼ a ntsǎ a ndzum mɨtən mɨ Azhwi azhi mbáʼ ɨbɛn mɨ ghuʼsɨ ayi adzaŋ za a lanɨnɨ mbe.”
25Mangye wa a sóŋ wəmbo ngə́, “Ma zhi ngə́ Wa bɨ Zɔ́ʼnɨ́ wa a ghɨ yiŋə. A nkfu za a yenɨ, wɛrə a mɨ soŋ ɨnu ɨtsum a mbó bɨgɨ ə.”
26Yeso a chwɨ́gɨ́ ngə́, “Ma lá wɛrə ghe, me wa ma ghamnə bɔgə lá.”
27A nyom məwa bɨyɛʼ bɨ Yeso bɨ́ŋə; anu zə wu a kɨ́ʼnɨ́ awa ngə́ bo zɛ́n ayi a ghamnɨnə bo mangye ə. Lá ŋwɔn nɨbo a sé bitɨ a mbó Yeso ngə́, “O lǒ ake?” kə ngə́, “O ghamə bɨŋ zɨ ngə́ ke le?”
28Mangye wa a tíʼ nyɛʼtɨ a sotɨ nkyi ɨyi, mbə́ mbən a ntáʼmbagə wa, ɨ soŋ a mbó ɨbɛn ɨwu ngə́, 29“Nɨ yen ndzɛn a ŋwɔn wa a soŋnɨ a mbó me ɨnu ɨtsum tsa ma láʼnə ngɨə. A nə a chi be Wa bɨ Zɔ́ʼnɨ́ wa le?” 30Bo tíʼ nyɛʼtɨ ntáʼmbagə wa ngɛn a mbó Yeso ghe.
31A kə́ mbé lá bɨyɛʼ bɨ Yeso lɛgɨnə ayi ɨ sóŋə́ ngə́, “Ndiʼ Aŋwaʼnɨ dzɨ a məzum ə!”
32Lá wɛrə a chwɨ́gɨ́ ngə́, “Ma tsi nɨ mɨdzɨ a ndzɨə ma ka nɨ zhi awɨŋ anu mbɨ́ʼ a mɛrə ghe.”
33Ma lan, bɨyɛʼ ɨbyi tíʼə mbítə́ a tɨtərɨ bo nɨbo ngə́, “Lá be ngə́ ŋwɔn tse a yen nɨ mɨdzɨ wəmbo le?”
34Yeso a sóŋ a mbó bo ngə́, “Mɨdzɨ ɨman a nɨ ngɨ anu za ŋwɔn wa a tságɨ́nɨ́ aghan a lɔnə abɔʼnɨ ɨ mɛtɨ afaʼ za a ghánɨ́ ngə́ á ma faʼə. 35Nɨ tsi nɨ nɨgham na nɨ sóŋnə́ ngə́, ‹A bvurɨ bɨsaŋ bi nɨkwa á bɨ fuʼ mɨdzɨ ə.› Lá ma sóŋə́ a mbó bɨŋ ə, nɨ liŋ mɨshwom ɨ shiʼnɨ ə; ɨdzúm tsa tsɨ kwínə́ ngǎ mɨdzɨ tənə ntiʼ adiʼ a fuʼə ghe! 36Ŋwɔn wa a fuʼnə mɨdzɨ men bɨ tfúə ayi, a ghǒtɨnə mɨntam mɨ ntsi ntən nɨnkoŋ; taŋ á mbimɨdzɨ bo ɨfuʼmɨdzɨ á bo zɨ ghɨ ndórɨ́kɨ́ bo bɨtsum ə. 37Nɨgham nen a nɨ nkənu ngə́, ‹Táʼ ŋwɔn a bi, wu mɔʼɔ a fuʼə.› 38Ma tsagɨ awən ngə́ á nɨ ghɛn ɨ fuʼ mɨdzɨ a mu ɨshwom wa nɨ sé líʼə. A líʼ ɨbɛn bə daŋ, nɨ tiʼ ndzɨ abi afaʼ aza ghe.”
39Bə Samaria bə ghaʼnɨ a mu ntáʼmbagə wa nɨ́ŋ mɨntəm ɨma a nye Yeso mbɨ́ʼ ngə́ mangye wa a sóŋ ngə́, “A sóŋ a mbó me ɨnu ɨtsum tsa ma kwɛ́nə ngɨə.” 40Ma lan, bə Samaria ghɨnə ngyén wəmbo lá, mbuʼ mbó ngə́ á tsi bo bo ghe. Yeso a tíʼ ntsí ɨwu atú njwi tsi bá ghe.
41Bə ghaʼnɨ kwíʼ nɨ́ŋ mɨntəm ɨma a nye Yeso mbɨ́ʼ nkən ɨyi, 42ntiʼ soŋ a mbó mangye wa ngə́, “Ka bɨgɨ nɨŋ awɨgɨ mɨntəm ɨmɨgɨ a nye Yeso tɨtsɔŋnɨ lá mbɨ́ʼ anu za o sóŋnɨ́ lá, a nɨ mbɨ́ʼ ngə́ bɨgɨ mboŋ bɨgɨ zuʼ wə ntsu nkɨ ntiʼ nji ngə́, tsɛʼ a nkənu, a lanɨ mbe ŋwɔn wa a loŋnə atuəshe.”
Yeso a Ghɨ Mɔn Mbáŋnɨ́ wu Ŋwɔn wu Ngwi a shwetə
43Yeso a ghɨnə ntsí bo bo atú njwi tsa tsi bá, ndo ngɛn a Galili ə. 44Mbɨ́ʼ ngə́ wɛrə zɨmboŋ a kwɛ́nə soŋ ngə́, “Ka bɨ ndiʼə ayi mbɔm zɨ shiʼnɨ a mbó ntom Ŋwi alaʼ bo ghe.” 45Mbáʼ a yénɨ́ nkón a Galili, ɨbɛn ɨwu kwárɨ́ a wɛrə mbɨ́ʼ ngə́ bo ghɛ́nə a Nɨdorɨ nɨ Tsa-yɛʼnɨ a Yerosalɛm ndzɛn ɨnu ɨtsum tsa a ghɨ́nɨ́ ɨwu a nkfu nɨdorɨ na.
46Ma lan, Yeso a bə́ ngɛn a Kana a mu Galili adiʼ wa a bə́ŋnɨ́ nkyi a nye mɨluʼ lá. Ŋwɔn afaʼ wu ngwi wu gobɨna a tsí ɨwu wa mɔn ɨyi wu mbáŋnɨ́ a kɨ́nə́ ngǒ a Kabɛrɨnaum ə. 47A ghɨnə ndzúʼ ngə́ Yeso a ló a Yudiya ngyen a Galili, a ghɛ́n mbuʼ mbó wəmbo ngə́ á wɛrə a ghɛn a Kabɛrɨnaum ntsuʼ a mɔn ɨyi, wa a tíʼnɨ́ a ntsu nɨvwo ə. 48Yeso a sóŋ wəmbo ngə́, “Ka ŋwɔn nɨbən wu tse a láʼ nɨŋ ayi ntəm ɨyi a nye me tɨkə a zɛn ɨnu tsɨ yerɨnɨ-yerɨnɨ abɔʼnɨ tsɨ tsanɨnɨ ə.”
49Ŋwɔn wu ngwi wa a chwɨ́gɨ́ ngə́, “Tə̧, yen á tɨ ghɛn bɔŋ á mɔn ɨghan a kfoə.”
50Yeso a sóŋ wəmbo ngə́, “Ghen, mɔn ɨgho a mɨ tsi ntɨŋə!”
Ŋwɔn wa a nɨ́ŋ ntəm ɨyi a nye nɨgham na Yeso a ghámnɨ́, ntiʼ ngen. 51A tɨnə tɨ kwě, ngaŋ afaʼ ɨchi bom ayi a ndómnji nɨ nkən ngə́, “Mɔn ɨgho wu mbáŋnɨ́ a mɨ tsi ntɨŋə!”
52A bítɨ́ awa nkfu za mɔn wa a bíʼnɨ́nɨ́ ɨ shwétə́ ghe. Bo chwɨ́gɨ́ ngə́, “A kɨ be nyom wi mɔ́ʼɔ́ ɨzo mbáʼ atú zə buʼnɨ za a kɨ nyɛʼtɨnɨ ayi ɛ.” 53Ta bɨ mɔn wa a tíʼ ngwáʼtɨ́ ngə́ a kɨ be nyom wa Yeso a kɨ soŋnɨ a mbó zɨ ngə́, “Mɔn ɨgho wu mbáŋnɨ́ a mɨ tsi ntɨŋə.” Ma lan, wɛrə bo ngwəgɨ ɨzhi tsum tíʼ nɨ́ŋ mɨntəm ɨma a nye Yeso ghe.
54Nə bé anu zə yerɨnɨ-yerɨnɨ za a kúʼnɨ́ ɨdiʼ tsi bá mbáʼ Yeso a lonə a Yudiya ngɛn a Galili ngɨə.
انتخاب شده:
Yoane 4: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
