Yoane 3
3
Yeso bo Nɨkorɨmbo ghe
1Ŋwɔn bə Farisao tse a tsí ɨwu ɨkum ɨyi be Nɨkorɨmbo, a bé ntsagɨnɨ bə Yuda ghe. 2Ŋwɔn məwen a ghɛ́n a mbó Yeso nɨ ɨtfúʼ tse ɨ soŋ wəmbo ngə́, “Rabai, bɨgɨ zhi ngə́ o nɨ ndiʼ aŋwaʼnɨ wa a lonɨ a mbó Ŋwi; mbɨ́ʼ ngə́ ŋwɔn tsɛrə a chi keʼ ghɨ ɨnu tsɨ yerɨnɨ-yerɨnɨ tsen tsa o ghɨnə, tɨgha Ŋwi a tsi bo zɨə.”
3Yeso a chwɨ́gɨ́ wəmbo ngə́, “Tsɛʼ a nkənu, tsɛʼ a nkənu, ma soŋ a mbó gho ghe, be bɨ tú a ŋwɔn bə kwiʼ jwi, a chi keʼ Nɨfɔ nɨ Ŋwi kuŋə.”
4Nɨkorɨmbo a bítɨ́ a Yeso ngə́, “Bɨ chi jwi a ŋwɔn mbáʼ a lvuŋnə lá ɨ nə́ le? A chi bə kwiʼ kon a mɨto nɨmi ɨyi á bɨ jwi ayi a nye nkfu tsa tsɨ kuʼnɨ tsi bá le?”
5Yeso a chwɨ́gɨ́ wəmbo ngə́, “Tsɛʼ a nkənu, tsɛʼ a nkənu, ma soŋ a mbó gho ghe, be bɨ tú a ŋwɔn bə jwi nɨ nkyi abɔʼnɨ Azhwi, a chi keʼ a mu nɨfɔ nɨ Ŋwi kuŋə. 6A jwíə ŋwɔn mɨsɔŋ a ntsu njwiə a ŋwɔn mɨsɔŋ a ntsu, lá a jwíə Azhwi njwiə azhwi ə. 7A keʼ agho kɨʼnɨ ngə́ ma soŋ a mbó gho ngə́ bɨ mɨ zagɨ kwiʼ jwi awən bɨtsum ə. 8Kɨfɛrɨ a tsǎ lá adiʼ za a lɔnə, o zuʼnə nkom ɨzhi, lá o koʼ zhi adiʼ za a lonɨ ɨwu kə adiʼ za a ghɛnə ɨwu ə. Nə nɨ adzaŋ za a benɨ nɨ ŋwɔn wa Azhwi a jwinɨ ayi ɛ.”
9Nɨkorɨmbo a bítɨ́ ayi ngə́, “Məzen a chi fu lá ɨ nə́ le?”
10Yeso a chwɨ́gɨ́ ayi ngə́, “Njingə o lá ndiʼ aŋwaʼnɨ a Izrai, lá nkoʼ ɨnu tsen zhi le? 11Tsɛʼ a nkənu, tsɛʼ a nkənu, ma soŋ a mbó gho ghe: bɨgɨ ghamə lá a za bɨgɨ zhinə, nkə́ sóŋə́ lá a za bɨgɨ tsinɨ ɨwu nkɨ ndzɛn; lá nɨ keʼ mbémə́ a za bɨgɨ sóŋnə́ a mbó bɨŋ ə. 12Be a be ngə́ ma fɨʼtɨnə ɨnu atuəshe a mbó bən, nɨ keʼ mɨntəm ɨmən ɨwu nɨŋ, nɨ ghɨ tíʼ tsa lá ɨ nə́ ɨ nɨŋ mɨntəm ɨmən ɨwu mbáʼ be ma fɨʼtɨ awən nɨ tsɨ fɔməbvurə le? 13#3:13 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ kwiʼtɨ ngə zɨ wa a tsinɨ a fɔməbvurə ghe. Ka ŋwɔn tse a kɔ́ʼnə ngɛn ayi a fɔməbvurə ntsatɨ a Mɔn Ŋwɔn wa a lónɨ́ ɨwu ɨ shiʼ ngyiŋə.”
14Tsɛʼ tso mbáʼ Mǒse a kɔ́ʼsɨ́nɨ́ ɨnyo za atɨ́ a mu mɨkɨghonɨ lá, ndəŋndəŋ bɨ mɨ kɨ zagɨ kɔʼsɨ a Mɔn Ŋwɔn atɨ́, 15taŋ ŋwɔn tsum wa a nɨŋnɨ ntəm ɨyi wə ɨnye a chi kwarɨ ntsi ntən nɨnkoŋ ə. 16Mbɨ́ʼ ngə́ Ŋwi a kɔ́ŋ atuəshe be tɨ́sə́n, wɛrə a tíʼ ngá a Mɔn ɨyi wu Mbáŋnɨ́ wa a núnɨ́ zɨzɨ, taŋ ŋwɔn tsum wa a nɨŋnɨ ntəm ɨyi a ɨnye zɨ, a mɨ keʼ kfo, lá ɨ tsi nɨ ntsi ntən nɨnkoŋ ə. 17Ŋwi a sé tsagɨ a Mɔn ɨyi wu Mbáŋnɨ́ atuəshe lá a sáʼ atuəshe; a báŋnɨ́ ntsagɨ be ngə́ á yen ndoŋ a zɛrə ghe.
18Ɨbɛn ba bɨ nɨŋnɨ mɨntəm ɨma wə ɨnye, bɨ mɨ keʼ soŋ ngə́ bo vwo ɨsáʼə; lá ba ka bɨ nɨŋ awa mɨntəm ɨma wə ɨnye bɨ binə soŋ ngə́ bo vwo ɨsáʼ, mbɨ́ʼ ngə́ ka bo nɨŋ awa mɨntəm ɨma a nye Mɔn Ŋwi wa a nunɨ zɨzɨ ə. 19Nə nɨ adzaŋ za Ŋwi a sáʼnɨ́ mbyi ɛ, lá be ngə́, nkaʼ ɨ yenə a mu mbyi, lá ɨbɛn kɔŋ ndzumnɨ ntsa nkaʼ, mbɨ́ʼ ngə́ ngɨnɨ mɨnu ɨma nɨ mə tɔmnɨnɨ ə. 20Ŋwɔn tsum wa a ghɨnɨ ɨnu tsɨ tɔmnɨnɨ a bə̂ nkaʼ, ɨ keʼ kɨ ngyen a mu nkaʼ, mbɨ́ʼ ngə́ ka bo ndǒ awa ngə́ á ɨnu tsɨ tɔmnɨnɨ nɔŋ asaŋəsaŋ ə. 21Lá ɨbɛn ba bɨ ghɨnɨ ɨnu nkənu yiŋə a mu nkaʼ, taŋ á nkaʼ diʼ ngə́ za bo ghɨ́nɨ́ lá, bo ghɨ́ a zɛrə a ndzúʼnɨ́ Ŋwi ə.
Yoane Ngaŋ Nga Nkyi a Gham mbɨ́ʼ a Yeso ghe
22Məzen a ghɨnə ntsá, Yeso bo bɨ bɨyɛʼ ɨbyi ghɛn a mu mbuʼ Yudiya; adiʼ wa wɛrə a tsínɨ́ ɨwu bo bo atú ndvuŋ nkfu tse ngǎ nkyi ɛ. 23Yoane a kɨ chí kə́ ngǎ nkyi a ntáʼmbagə Enɔn wa ɨ fátɨ́nɨ́ ntáʼmbagə Salim mbɨ́ʼ ngə́ nkyi ɨ gháʼtɨ́ adiʼ məwa ə. Ɨbɛn kə́ ngěn ɨwu wɛrə a ghanɨ nkyi a mbó bo ghe. 24(Məzen a kə́ ndɔgə adiʼ lá, mbáʼ bɨ bvúrɨ́ tɨ nɨŋ a Yoane atsáŋ ə.)
25Bɨyɛʼ bɨ Yoane bə tse bíʼnɨ́ nkwənkə bo bɨ ŋwɔn bə Yuda wu tse mbɨ́ʼ anu a sugɨ ɨnye ɨ fɛm a mu mbɔm ə. 26Ma lan, bo ghɛ́n a mbó Yoane ɨ soŋ wəmbo ngə́, “Ndiʼ Aŋwaʼnɨ, o wáʼtə́ a ŋwɔn wa bɨŋ zɨ tsínɨ́ a ndaŋ ndzɨŋə Yorɨdan lá, ŋwɔn wa o ghámnɨ́ mbɨ́ʼ ayi lá le? Zɛn lá, wɛrə a ghǎ nkyi, ŋwɔn tsum a ghěn wəmbo ə!”
27Yoane a chwɨ́gɨ́ ngə́, “Ka ŋwɔn tse a chi tsi ayi nɨ azúm zə tse tɨgha Ŋwi a gha a zɛrə wəmbo ə. 28Bɨŋ mboŋ nɨ nɨ bətɛmə-ndzě ɨban ngə́ ma sóŋ ngə́, ‹Ka ma be aghan Wa Bɨ Zɔ́ʼnɨ́ wa, lá bɨ tsagɨ aghan ngə́ á ma tsa mbyi ɨzhi ɛ.› 29A nɨ ndóm mɨngən wa a tsinɨ nɨ mɨngən ə; lá ɨson ndóm mɨngən, wa a tɛmnɨ a mbyɛn ndzuʼ nji ɨzhi, a dórə́ tsɛʼ nkan mbɨ́ʼ nji ndóm mɨngən ə. Nə nɨ adzaŋ za nɨdorɨ ɨnə tsanɨ ntiʼ nkɔʼ ndon tɨtsɔŋnɨ ə. 30Wɛrə a tsi nɨ ɨ zagɨ ɨ kwiə kɔ́ʼtɨ́nə, á ma zagɨ ɨ shíʼtə́ ghe.”
Zɨ wa a Lonɨ a Fɔməbvurə ghe
31Zɨ wa a lonɨ atɨ́ a tsi atú atsum ə. Zɨ wa a lonɨ atuəshe a tsi lá a mbó atuəshe, nkə́ ngǎm ɨnu atuəshe. Lá zɨ wa a lonɨ a fɔməbvurə a tsi atú atsum ə. 32A ghamə mbɨ́ʼ ɨnu tsa zɨə zɛnə nkɨ ndzuʼə, lá ŋwɔn tse a keʼ nkən wɛrə a mbémə́ ghe. 33Lá ŋwɔn wa a bemnɨ nkən ɨyi a bemtɨ lá a zɛnə ngə́ Ŋwi a nɨ nkənu ə. 34Ŋwɔn wa Ŋwi a tsagɨnɨ lá, a ghamə lá mɨgham mɨ Ŋwi ə; mbɨ́ʼ ngə́ Ŋwi a ghǎ Azhwi azhi wəmbo tɨ ɨfɨʼ ə. 35Tarɨ a kɔŋ a Mɔn ɨyi wu Mbáŋnɨ́, wɛrə a kɨnə nkɨ nɨŋ atsum wə mu mbó ə. 36Ŋwɔn tsum wa a nɨŋnɨ ntəm ɨyi a nye Mɔn Mbáŋnɨ́ wa, a tsi nɨ ntsi ntən nɨnkoŋ ə; ŋwɔn tsum wa a tənɨ atú a mbó Mɔn Mbáŋnɨ́ wa, a láʼ keʼ kon a mu ntsi ntən nɨnkoŋ, lá Ŋwi a mɨ ghěn nɨ mbyi a nɨ́ŋ ngɨ́ʼ wə ɨnye ə.
انتخاب شده:
Yoane 3: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
