Yoane 21
21
Yeso a Fu a Ɨshe a Ɨshi Bɨyɛʼ ɨbyi ɛ
1Məzen a ghɨnə ntsá, Yeso a kwiʼ mbə fu a ɨshe a ɨshi bɨyɛʼ ɨbyi a ngə́rɨ́ Sagɨrə Tiberia ghe. A tsá lá ɨ nanə ghe: 2Samɔn Bita, Tɔməshi (bɨ kə́ ntɔ́ŋə́ ayi ngə́ Nɨfágɨ ə), Natania (wa a lónɨ́ a Kana a mu Galili), ɨbɔ bɨ Zebɨdi bə mbáŋnɨ́, abɔʼnɨ bɨyɛʼ bə mɔʼɔ bi bɨbá bɨ tsí táʼ adiʼ ə.
3Samɔn Bita a sóŋ a mbó bə mɔʼɔ ba ngə́, “Ma ghěn aghan achwiʼ ə.”
Bə mɔʼɔ ba sóŋ wəmbo ngə́, “Bɨgɨ mɨ zɔŋ agho.” Ma lan, bo fú abyɛn ngɛn nkon a mu abáŋ a nkyi ngɛn achwiʼ wa. Lá a mu ɨtfúʼ wa ɨtsum, bo sé ɨshwú zɨ tse koə. 4Mbáʼ nɨnyom a tíʼnə́ sáʼə, Yeso a tɛ́m a ngə́rɨ́ nkyi wa, lá bɨyɛʼ ba sé zhi ngə́ a bé Yeso ghe. 5Yeso a tíʼ mbítɨ́ awa ngə́, “Ɨbɔ ɨban, nɨ bvurɨ ɨshwú zɨ tse tɨ ko le?”
Bo chwɨ́gɨ́ ngə́, “kə́ kə́ tsɛʼ azúm zə tse ghe.”
6Wɛrə a sóŋ a mbó bo ngə́, “Tamnə nɨghoŋ ɨnən a bagɨ abó maʼə zə abáŋ a nkyi za, nɨ mɨ ko ɨshwú ə.” Ma lan, bo tám nɨghoŋ na ntiʼə ngúʼ ɨ bə shwuŋ ɨ bən nɨ nɛrə nɨ ndzum kɨ́káŋ mbɨ́ʼ ngə́ bo kó ɨshwú ɨ gháʼ ntsa mbó ə.
7Ngyɛʼ wa Yeso a kɔ́ŋnɨ́ lá a sóŋ a mbó Bita ngə́, “A nɨ Maʼmbyí ɛ!” Mbáʼ Bita a zúʼnɨ́ ngə́ a nɨ Maʼmbyí lá, a wə́gɨ́ ɨtsɛʼ ɨchi (mbɨ́ʼ ngə́ a kwɛ́ ntsɔ́ʼtɨ́ a tsɛrə) ntiʼ nkanɨ a mu sagɨrə wu ngwi wa. 8Bɨyɛʼ ba bə mɔʼɔ ghɛ́n a ngə́rɨ́ a mu abáŋ a nkyi za, ɨ shwǔŋ nɨghoŋ na ɨshwú ɨ lónɨ́ wə mu lá. Aghagɨ aza a sé sagɨ a nkuʼə a ngə́rɨ́ nkyi ɛ. Aghagɨ aza a bé tso bɨmita táʼ nkɨ ə. 9Bo ghɛnə nkuʼ a ngə́rɨ́ nkyi, ndzɛn ɨmugɨ wa bɨ nyɛ́tɨ́nɨ́ nɨ nkyé ɨ kɨənə ɨwu nɨ ɨshwú wu atú abɔʼnɨ abán ə. 10Yeso a tíʼ soŋ a mbó bo ngə́, “Yenə nɨ ɨshwú tsa tsə tse tsa nɨ lonɨ a nkó lá.”
11Samɔn Bita a kɔ́ʼ nkón a mu abáŋ a nkyi za, ɨ shwuŋ nɨghoŋ na na nɨ lónɨ́ nɨ ɨshwú tsɨ wi, tsɨ bé 153 a nchintə. Tsɨ báʼtɨ́ ngaʼ ghaʼnɨ tɨ́sə́n lá, nɨghoŋ na sé tɨ́nkə. 12Yeso a sóŋ a mbó bo ngə́, “Nɨ yen ndzɨə.” Ngyɛʼ wa wu tse a sé zhwəŋtɨ a mbítɨ́ wɛrə ngə́, “O nɨ ɨwa le?” mbɨ́ʼ ngə́ bo zhí ngə́ a bé Maʼmbyí ɛ. 13Ma lan, Yeso a ghɛ́n ndɔgɨ abán za nga a mbó bo; nkɨ ngɨ ndəŋndəŋ anu nɨ ɨshwú za.
14Məzen a tíʼ mbé nkfu tsi tárə́ mbáʼ Yeso a fúnɨ́ a ɨshe a ɨshi bɨyɛʼ ɨbyi mbáʼ bɨ zhwémnɨ́nɨ́ ayi a mbó nɨvwo ə.
Yeso bə Nchwem a Bita Alaŋ Zɨə
15Bo ghɨnə mɛ́tɨ́ a ndzɨ́ə, Yeso a bitɨ a Samɔn Bita ngə́, “Samɔn mɔn Yoane wu mbáŋnɨ́, o kɔŋ aghan ntsa adzaŋ za bə mɔʼɔ benə kɔŋnɨ le?” Samɔn Bita a chwɨ́gɨ́ ngə́,
“Eŋə a Maʼmbyí, o zhi ngə́ ma kɔŋ agho ə.”
Yeso a tíʼ sóŋ wəmbo ngə́, “Lətu nɨ ɨbɔ bɨ mbyindzɨ ɨban biŋ ə.” 16Ɨ bə kwiʼ zɔŋtɨ a nye nkfu tsi bá, Yeso a bítɨ́ ngə́, “Samɔn mɔn Yoane wu mbáŋnɨ́, o kɔŋ aghan le?” Samɔn Bita a chwɨ́gɨ́ ngə́,
“Eŋə a Maʼmbyí, o zhi ngə́ ma kɔŋ agho ə.”
Yeso a sóŋ wəmbo ngə́, “Lətu nɨ mbyindzɨ ɨtsan tsiŋ ə.” 17A nye nkfu tsa tsɨ kúʼnɨ́ tsi tárə́, Yeso a bítɨ́ ngə́, “Samɔn mɔn Yoane wu mbáŋnɨ́, o kɔŋ aghan le?”
Bita a tíʼ ntsí nɨ adzə́ŋnɨ mbɨ́ʼ ngə́ Yeso a bítɨ́ ayi a nye nkfu tsa tsɨ kúʼnɨ́ tsi tárə́ ngə́, “O kɔŋ aghan le?” Ma lan, a tíʼ nchwɨ́gɨ́ wəmbo ngə́, “Maʼmbyí, o zhi anu atsum ə; o zhi ngə́ ma kɔŋ agho ə!”
Yeso a sóŋ wəmbo ngə́, “Lətu a nye mbyindzɨ ɨtsə. 18Ma sǒŋ nkənu a mbó gho ghe; mbáʼ o bvúrɨ́nɨ́ ngwaʼ ngwasom, o kə́ ngwə́gɨ́ ɨtsɛʼ ɨtso ngěn agho adiʼ atsum za o kɔ́ŋnə́; lá mbáʼ o ghɨnɨ bé tankaŋ, o mɨ shiŋ mbó ɨmo, á ŋwɔn adaŋ a wəgɨ atsɛʼ azo ntiʼ ndɔgɨ agho ngɛn nɨ gho adiʼ wa ka o kɔŋ agho ngěn ghe.” 19(Yeso a kə́ soŋə a məzen lá, ndiʼə lá ndóm wa Bita a ghɨnɨ kfo ɨwu, ɨ tiʼ yen nɨ nɨfáŋ a mbó Ŋwi ə.) Yeso a tíʼ sóŋ wəmbo ngə́, “Zɔŋ aghə!”
Yeso bo Ngyɛʼ wu Mɔʼɔ wa
20Bita a bə́nkɨ́ ayi ndzɛn a ngyɛʼ wu mɔʼɔ wa a ndzum zɨ, wa Yeso a kɔ́ŋnɨ́ — wa a zə́ŋtɨ́nɨ́ ayi ɨ fátɨ́ a nye Yeso adiʼ a mɨdzɨ, mbitɨ ngə́, “Maʼmbyí, a mɨnaŋ atú ɨgho lá a ghɨ korɨ ɨwa le?” 21Mbáʼ Bita a zɛ́nɨ́ ayi lá, mbitɨ a Yeso ngə́, “Maʼmbyí, ake ghɨ fu nye a ŋwɔn wen le?”
22Yeso a chwɨ́gɨ́ wəmbo ngə́, “Be ma ndǒ ngə́ á tsi nkuʼnɨ nkfu za ma ghɨnɨ yen, azo ɨwu a be ake le? Zɔŋ aghə!”
23Nkərɨ tíʼ nkárɨ́ a tɨtərɨ ɨbɛn ba bɨ kɨ́nə́ ndzɔŋə a Yeso ngə́ ngyɛʼ məwen a ghɨ keʼ kfoə. Lá Yeso a sé sóŋ ngə́ a ghɨ keʼ kfoə; a sóŋ ngə́, “Be ma ndǒ ngə́ á tsi nkuʼnɨ nkfu za ma ghɨnɨ yen, azo ɨwu a be ake le?”
24Wɛrə nɨ ngyɛʼ wa a sóŋnɨ́ ɨnu tsiŋ ə, zɨ wa a kɨ́nɨ́ nkɨ́ ŋwáʼnɨ́ ɨnu tsiŋ ə; bɨgɨnə kɨ nji ngə́ za a sóŋnɨ́ a nɨ nkənu ə.
Ndwitɨ Nɨgham ə
25Ɨnu tsɨ ghaʼnɨ tsɨ mɔʼɔ tsi ɨwu tsa Yeso a ghɨ́nə́. A kwɛ be be ngə́ bɨ ŋwáʼnɨ́ a tsɛrə ɨtsum ɨ mɔ́ʼɔ́ mɔ́ʼɔ́, muŋ ma wiʼtɨ ngə́ mbyi tsum chi keʼ nɨ adiʼ a ndě ɨŋwaʼnɨ tsa bɨ ŋwaʼnɨnɨ a tsɛrə wə mu ə.
انتخاب شده:
Yoane 21: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
