Yoane 17
17
Yeso a Tsaʼtɨ a Ŋwi a mbó Bɨyɛʼ ɨbyi ɛ
1Yeso a ghɨnə mɛ́tɨ́ a sóŋ ɨnu tsiŋ ɨtsum, ndyiŋ fɔməbvurə ɨ soŋ ngə́, “Tarɨ, nyom a kuʼnə ghe. Gha nɨfáŋ a mbó Mɔn ɨgho wu mbáŋnɨ́, taŋ á Mɔn ɨgho wu mbáŋnɨ́ a chi gha nɨfáŋ a mbó gho ghe. 2Mbɨ́ʼ ngə́ o ghá mɨtən a mbó zɨ atú ŋwɔn mɨsɔŋ a ntsu tsum, taŋ á chi gha ntsi ntən nɨnkoŋ a mbó ŋwɔn tsum wa o ghánɨ́ wəmbo ə. 3Ɨ tiʼ tsi ntən nɨnkoŋ ɨ nɨ ngə́ á bo zhi agho, Ŋwi ɨ nu zɨzɨ tɨ wə daŋ, abɔʼnɨ nji Yeso Kristo wa o tságɨ́nə́. 4Ma diʼnə nɨfáŋ ɨno atuəshe; ma mɛtɨnə ɨfaʼ wa o ghánɨ́ ngə́ á ma faʼə. 5Tarɨ! Gha nɨfáŋ a mbó me a ɨshi ɨmɨgɨ gho tɨtsɔŋnɨ, ndəŋndəŋ nɨfáŋ na ma tsínɨ́ nɨ nɛrə bɔgə bɔŋ á bɨ nyɛtɨ mbyi lá.
6Ma ghɨnə ŋwɔn tsum wa o ghánɨ́ a mbó me atuəshe a zhi agho ə. Bo bé ɨbo, o tiʼ nga awa a mbó me ghe. Bo zuʼnɨnə nɨgham ɨno, 7tɨtsɔŋnɨ bo zhi ngə́ azúm atsum za o ghánɨ́ a mbó me a lo a mbó gho ghe. 8Ma ghá nkən wa o ghánɨ́ a mbó me a mbó bo, bo kɨ nkwarɨ a wɛrə; bo zhi ngə́ a nɨ nkənu ngə́ ma ló lá a mbó gho, bo kɨ nɨŋ mɨntəm ɨma ɨwu ngə́ o tságɨ́ aghə.
9Ma tsaʼtə a Ŋwi a mbó bo ghe. Ka ma ntsaʼtə aghə a Ŋwi a mbó atuəshe, a nɨ be a mbó bo ba o ghánɨ́ a mbó me, mbɨ́ʼ ngə́ bo nɨ ɨbɛn ɨbo ə. 10Bo bɨtsum ba ma tsinɨ nɨ bɛrə a nɨ ɨbo, bo bɨtsum ba o tsinɨ nɨ bɛrə a kɨ mbe ɨbə; bɨ tiʼə ntsǎ lá a ndzum bɛrə ndzě nɨfáŋ ɨnə. 11Tɨtsɔŋnɨ ma yiŋə a nkwátɨ́ gho; ma mɨ kaʼ ɨghan atuəshe bə ntsi, lá bo bvurɨ ɨwu ə. Tarɨ wu Fɛmnɨ! Yemnkɨ awa ntsa a ndzum adaʼ za a tsinɨ a nye ɨkum ɨgho, ɨkum wa o ghánɨ́ a mbó me, taŋ á bo tsi ntsu mɔ́ʼɔ́ tsɛʼ adzaŋ za gho nɨ me tsinɨ ntsu mɔ́ʼɔ́ lá. 12Nkfu za ma tsínɨ́ bɨgɨ bo, ma yémnkɨ́ awa bo tsi ɨ shiʼnɨ nɨ adaʼ za a tsinɨ a nye ɨkum ɨgho, ɨkum wa o ghánɨ́ a mbó me lá. Ma yémnkɨ́ awa, kə́ tsɛʼ táʼ a keʼ byé, ntsatɨ a wa a tsínɨ́ ɨ láʼ byé — taŋ á kɔʼ mbomnkɨ bo za aŋwaʼnɨ a Ŋwi a kwɛ́nə soŋə. 13Tɨtsɔŋnɨ ma yiŋə a mbó gho, lá ɨ soŋ ɨnu tsenə a mbó bə atuəshe lá taŋ á bo chi tsi nɨ nɨdorɨ ɨnan a mu mɨntəm ɨma a nɨ́lónɨ́ ə. 14Ma ghá nkən ɨgho a mbó bo, ɨbɛn bɨ atuəshe tiʼ mban awa, mbɨ́ʼ ngə́ bo se bə atuəshe be, ndəŋndəŋ adzaŋ za ma sa wu atuəshe be lá. 15Ma sa sóŋə́ lá ngə́ o fɨgɨ awa a mu mbyi ɛ; ma sóŋə́ lá ngə́ o yemnkɨ awa, á bo keʼ kon a mu mbó Wu Ntɔmnɨnɨ wa. 16Ndəŋndəŋ mbáʼ ka ma be aghan wu atuəshe lá, bo se bə atuəshe kɨ mbe. 17Ghɨ awa á bo fɛm ntiʼ ɨbo ntsa a ndzum nkənu; nɨgham ɨno nɨ nkənu ə. 18Ma tságɨ́ awa a mu mbyi tsɛʼ adzaŋ za o tságɨ́nɨ́ aghan a mu mbyi lá. 19A nkfu bo ma gha atuəmbəm azan a faʼə a mbó gho, taŋ á bo chi kɨ tiʼ gha ɨtumbəm ɨtsa ɨtsum ɨtsum a faʼə a mbó gho ghe.
20Ka ma ntsaʼtə aghan a Ŋwi lá tsɛʼ a mbó bo ghe, ma kə́ ntsáʼtə́ a Ŋwi a mbó ba bɨ nɨŋnɨ mɨntəm ɨma a nye me ntsa a ndzum nkən wa bɨyɛʼ ɨbə sóŋnɨ́ a mbó bo ghe. 21Ma tsaʼtə a Ŋwi ngə́ á bo tsi a mbúm ə. Tarɨ! Ma tsaʼtə a Ŋwi ngə́ á bo tsi a mbúm bɔgə, tsɛʼ tso mbáʼ tɨ tsinɨ a mbúm lá. Ma tsaʼtə Ŋwi ngə́ á bo tsi a mbúm, taŋ á atuəshe a nɨŋ ntəm ɨyi ɨwu ngə́ o tságɨ́ aghə. 22Ma ghá ndəŋndəŋ nɨfáŋ a mbó bo na o ghánɨ́ a mbó me, taŋ á bo be táʼ azúm, tsɛʼ tso mbáʼ tɨ benɨ táʼ azúm lá: 23á ma tsi a mbúm bɨgɨ bo, o kɨ ntsi a mbúm bɔgə, taŋ á bo be táʼ azúm ɨ ghɛn mɛtɨ, taŋ á atuəshe a chi zhi ngə́ o tságɨ́ aghan, nkɨ nkɔŋ awa adzaŋ za o kɔŋnɨ aghan lá.
24Tarɨ! O ghanə awa a mbó me, ma kə ntiʼə ndǒ ngə́ á bo tsi adiʼ atsum za ma tsinɨ ɨwu, taŋ á bo chi ze nɨfáŋ ɨnan, nɨfáŋ na o ghánɨ́; mbɨ́ʼ ngə́ o kɔ́ŋ aghan bɔŋ ɨ káʼ atuəshe. 25Tarɨ wu nchinɨnɨ! Ka atuəshe a zhi ayi agho, lá ma zhi agho, bɨyɛʼ benə kɨ nji ngə́ o tságɨ́ aghə. 26Ma ghɨ́ bo zhi agho, ma mɨ ghɛn nɨ mbyi a ngɨə ma lan, taŋ á akɔŋnɨ za o tsinɨ nɨ zɛrə a nye me, a chi tsi a mu ɨnye bo, taŋ á ma chi kɨ tsi a mu ɨnye bo ghe.”
انتخاب شده:
Yoane 17: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
