Génesis 28
28
1Isaaki, Jakobini uantap'asti ka úch'akuraspti ka arisï juramukuspti: Ásï jáma Kanaani anapu uátsïni ma témpa úni. 2Jauara ka ni kókuani Paddani Arami ireta ka Betuelio niára, chéti nánteo chéti tatiteri k'umanchekuarhu ka jima eraku uátsïni enka chéti uarhitiuaka, Labani uáp'ani ma, chéti nánteri erachi uáp'ani. 3Eskakini Diósï iámu uinhapiti úch'akuraaka, ka eskari uánekua sapichani kaauaka ka kánerani sïrukua, ka eskari uánekua iretechani uaxastauaka. 4Eskakini úch'akuraka ísï eska Abrahamini na úch'akuraka, t'únheni ka chéti sïrukuani, ka t'úri p'iuaka jima enkari irekani jaka enka Diósï, Abrahamini íntskupka.
5Isaaki ísï axaspti Jakobini, ka ima Paddani Arami ireta niraspti, Labanio k'umanchekuarhu, enka Betueli aramero uáp'epka ka enka Rebekeri mími jémpepka, Jakobiri ka Esauliri nánte jémpa.
Esau tempuchaspti
6Esau exespti eska Isaaki, Jakobini úch'akuraspka, ka eska Paddani Arami ireta axaspka tempuchani, ka kurhaueraspti enka úch'akurani jápka eska juramukuska eska no jámapirinka Kanaa anapu ma témpa úni, 7ka Esau exespti eska Jakobi kurhantirakuspka táte ka nánte jempani ka Paddani Arami ireta niraspti. 8Esau janhaskaspti eska Isaaki enka táte jémpepka no jaiapanhentasïrempti Kanaani anapu uáchechani. 9Jimposï Esau nípti jima enka Ismaeli irekapka Abrahami uáp'a uátsïni ma jinkuni témpuchani, nák'iruki máteru témpechani t'úini káauempkia, ka jima Majalatini témpa úspti Nebaiotiri pirempani.
Esau tempuchaspti
10Jakobi, Berseba uéraspti ka Jarani niraspti. 11Ka jimesï xanhari jimpo chúrenchaspti jurhiata inchats'ïkusptia. Tsakapu ma iách'aspti ka jima k'uíspti. 12Ka tsánharhispti eska jima k'ékua ma jarhaspka enka jima anhantetini jápka ka auantarhu jamperi pínchesïrempti ka eskaksï Diósïri ánjelicha jimesï karharani ka kétsesïrempka. 13Ka tsánharhikuarhu ACHA iótakuarhu jarhaspti ka arhispti: Ji ACHAeska chéti táte Abrahamiri Diósï, Isaakiri Diósï. I echeri enkari apontetini jaka t'únkini ka chéti sïrukuani íntskuaka.
14Chéti sïrukua xáni káneati eska t'upuri, ka jurhiata antarakuarhu ka jurhiata inchats'ïkuarhu ísï jamperits'ï niuaka irekani, jurhiata antarakuarhu t'irek'antani ka uikixkantani jamperi. Ka úch'akuranhaakari ka t'únkini jimpo chéti sïrukua úch'akuranhaati. 15Ji t'únkini jinkuni jarhaska ka mía eskakini ji kuách'akuaka nani uék'iri nirani, ka ménterukini juánkuaka ixu íni echerirhu. Nókini méni jurak'uaka, k'amarhukuaka imani enkakini aiacheka. 16Enka Jakobi tsínharhipka uantaspti: ¡Sési jimpo ACHA ixu irekasti, ka ji no mítespka! 17Ka chérakorhetini uantaspti: ¡Ixu pímpinhantuesti! ¡Ichkasï Diósïri k'umanchekueti ka auantarhu inchakua!
18Pauantekuarhu Jakobi k'éri xarheni jauaraspti, ka tsakapuni enka iách'apka anhantskaraspti ka anhamerhekueni péraspti ka tamakua atarhespti mínta jatsikuni eska jima pímpinhantuespka. 19Ka jima Beteli jakankurhitaspti, ima ireta urheta Lusi jakankurhispti.
20Jakobi jima aiántspekorhespti, uantaparini: Enkarini Diósï ísï pámpetani jaka ka kuách'akuni jaka íni xanhari jimpo enkani nirani jaka, ka enkarini t'irerani ka xukuparhatani jaka, 21ka enkani ji sési k'uanhatsentaska jucheti táteo, ACHA jucheti Diósïuati. 22I tsakapu enkani anhamarhekua úntaka Diósïri k'umanchekueuati, enka xáni intsïnhaaka tempeni xanhari arhutaaka ka ma arhutakata t'únkini míntantaaka.
انتخاب شده:
Génesis 28: BI-PURHE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Biblia en P´urhépecha, Michoacán, México © Sociedad Bíblica de México, A.C.