Génesis 27
27
Isaaki, Jakobi ka Esauni úch'akuraspti
1Ma jurhiani enka Isaaki t'arhepepkia ka xurhanarhinia ka jamperi pátenharhini, Esauni uantap'aspti imani enka uáp'a urhetipka ka arhispti:
¡Jucheti uátsïti! Ka ima uantaspti: ¡Ixu jarhaska!
2Isaaki arhispti: Exe ji t'arhepeskia, jucheti uarhikua axuterkusï jamani jatia. 3Isï jimpo p'íku chéti pitoki jatakua, ka k'uaniratakua ka nirini mánakorherini ma atacheni, 4ka úmachentakarini ísï eskani na anhech'aka ka juacheakari, ka tátsekuakini úch'akuraaka jimpoka jucheti uarhikua axuterkusï jámani jatia.
5Enka Isaaki uantaxekuni jápka Esauni, Rebeka kurhaxapti, Esau niraspti juátarhu manakorherini ma táte jempani p'ikuni, 6Rebeka uáp'a jémpani Jakobini niraspti aiankuni ampe enka kurhaapka: Iásï sáni kurhaueraska ampe enka chéti táte arhini jápka chéti erachi Esauni, arhisti:
7Manakorherhini ma juácheaka ka úmachentakarini ka tátsekuarhukini úch'akuraaka ACHA japantiru, ka tátsekua uarhiakia. 8Jucheti uátsïti sési kurhaa ampe enkakini juramucheaka. 9Ni karichicha jatakuarhu, ka juácherini tsimani sési jarhati karichi sapirhatichani, ji úmakuntaaka chéti táteni ísï eska ima na anhech'a. 10Ka t'úri pakuaaka t'irekua chéti táteni ka chéti táte t'únkenikini úch'akuraati, jimpoka uarhikua niárakuxakaia.
11Jakobi nánte jémpani arhispti: Jucheti erachi kánekua tisïrhekorhesti, ka ji no tisïrhekorheska.
12Enkarini táte p'arheaka, ka p'iarantini eskani uékaxaka únharhitani, ka nórini úch'akuraati, jima ménterueni, ikimentini.
13Nánte jémpa arhispti:
Jucheti uátsïti, eska ima ikimekata jinteni niáracheaka, t'u ni ka juácherini karichi sapirhatichani enkakini kurhacheni jaka.
14Jakobi karichi sapirhatichani niraspti p'iuani ka nánte jempani pákuaspti, ka ima úmakuntaspti eska táte jempa na anhech'ka. 15Tátsekua Rebeka, Esauni enka uáp'a k'éripka xukuparhakua sési jásï p'ikukuspti, ka Jakobini enka uáp'epka sapichuepka imani jatsikuntaspti xukutantani. 16Karichiri xurhata jatsik'uspti ka jatsinchakuspti jima enka patsïparhapka, 17ka Jakobi uáp'ani t'irekua íntskuspti enka úmakuntapka ka echuskuta.
18Jakobi inchaspti jima enka táte jempa jápka ka arhispti:
¡Jucheti táte! Ka Isaaki kurhakuspti:
Ixu jarhaska ¿Néskiri, t'ueskiri jucheti uátsïti?
19Jakobi táte jempani arhispti: Jíska Esau, enkani urhetika úskia ísï enkari na arhipka, jauara ja ju manakorherini arhani enkakini atácheka ka úmachentaka ka tátsekuarini úch'akuraaka.
20Isaaki uáp'ani arhispti:
¿Nénari jámaski enkari xáni sóntu manakorherini exeka ka atani, jucheti uátsïti?
Ka ima arhispti: Jimpoka ACHA enka chéti Diosï, jarhoatasti.
21Isaaki, Jakobini arhispti:
Jucheti uátsïti antarherarini ka ísï míteaka eskari jucheti uátsïtiska ka eskari Esauiska o nóri jinteska.
22Jakobi táte jempani Isaakini antarheraspti, ka ima parhespti ka uantaspti: Jakobinkini kurhachakunsïnka, k'óruri Esauni tisïk'urhaska.
23No mítentaspti jimpoka tisïk'urhaspka eska Esau, tátsekua úch'akuraspti, 24ka ménteru kurhamarhespti: ¿Sési jimpori t'u Esauski jucheti uátsïti? Ka Jakobi uantaspti: Jo jinteska.
25Isaaki uantaspti: Antarherarini, ka íntskurini t'irekua ima manakorherini enkari ataka, ji t'ireaka ka tátsekuakini úch'akuraaka.
Jakobi antarheteraspti t'irekua ka kauikua, Isaaki t'irespti ka kauispti.
26Isaaki arhispti:
Antarherarini ka putinharhikurini.
27Jakobi antarheraspti ka putinharikuspti, imeri xukuparhakua sïpiruspti, ka ísï úch'ákuraspti:
Jucheti uáp'eri xukuparhakua,
¡Ísï p'untsumesti eska juátecha enka
ACHA úch'akuraaka!
28¡Eskakini Diósï auantarhu anapu xúmu íntskuaka!,
¡Eskakini tríju ka
kauikua kánekua íntskuaka!
29Eskaksïni iretecha marhuacheaka,
ka eskaksïni k'érati iretecha janhanharhiaka,
ka eskaksïni nánte chéti uáp'echa janhanharhiaka,
ka eskaksï ikimenhaaka imaksï enkaksïni ikimchak'a,
ka eskaksï úch'akurhanhaaka ima
enkaksïni úch'akuraaka.
30Enka Isaaki na k'amarapkia Jakobini úch'akurani, nótki iónixapti enka Jakobi jima enka táte jempa jápka uéntapka, enka Esauli enka erachi jempa niántapka juátarhu uératini manakorherini táte jempani jirinhakuni. 31Imat'u táte jempani úmakuntaspti ka pákuspti ka arhispti:
Jauara jucheti táte ka a manakorherini enka chéti uáp'a ataka, ka tátsekuarini úch'akuraaka.
32Táte jempa Isaaki arhispti:
¿Néskiri t'u?
Ka ima uantaspti: Jíska chéti uáp'a k'éri, Esauli.
33Isaaki kánekua uantanheaueraspti, ka uantaspti:
Jiák'ani, ¿Néski ima enkarini manakorherini juacheka úmantskata? Imani enkani ji úch'akuraka, ka enka úch'akukata pakarakia.
34Enka Esauli kurhaapka imani ampe enka táte jempani uantapka, uinhachaspti ka no sési p'íkuarherhaspti ka uantaspti:
¡Úch'akurarini jintentu, jucheti táte!
35Isaaki arhispti:
Chéti erachi jurhasti, ka tántoch'astirini ka imani enka t'u k'uaninchempka imani úch'akuraska.
36Esauli uantaspti: Jakankurhikua kánekua sési pakarakusïnti Jakobini, ¡Nóchkarini tsimani xanhari sïpacheski ima enka juchetipka!: Urhetikuarini sïpachesti, ka iásïrini úch'akukua sïpachesti. Ka útasï uantasti: ¿Nórini pakatachesti úch'akukua jínteni?
37Isaaki arhispti Esaúni:
Ji chéti juramuti úska imani, ka erachichani jempechani jántspiri úaaska, ka íntskuska tríju ka úbasï itsïrhuta, nóteru ampe ma úak'a t'unkeni jimpo, jucheti uátsïti.
38Esau táte jempani arhispti:
¿Nóteruri jatsiski ni ma úch'akukua?
¡Jucheti táte jintenturini úch'akura! Ka Esau uinhachaspti uerani.
39Isaaki táte jempa arhispti:
Chéti irekua ampakiti echerirhu jauati,
jima enka xumu jaka auantarhu anapu.
40Chéti atap'etarakua jimpori kuáp'ekorheaka, jimpokari uarhipekuarhu jámani jauaka,
ka chéti erachenti jántspekuaka. Ka enkari na sánteru
uinhapekua jatsiaka,
kuerantuakari ka nóteruri Jakobini jántspekuakia.
Jakobi sïpakorhekusïnti Esauni
41Esau kurhunhesïrempti kánekua Jakobini, úch'akurakua jimpo enka táte imani úchakurapka, ka kurhunheparini uantasïrempti: Niaraxati imani jurhiatekua enkachi juchari táteni míntakuaka enka ima uarhiaka, enka na míntakua k'amarhuakia, ji Jakobini uántikuaka.
42Enka Rebeka mítepka ampe enka Esau eratseni jápka, uáp'a enka urhetipka, Rebeka ióarhispti Jakobini enka uáp'a sapichuepka, ka arhispti: Chéti erachi Esau kánekuakini kurhunhexati, ka uántikutinkini sési p'ikuarherantaati.
43Ísï jimpo, jucheti uátsïti kurhach'arini, jauara ka jucheti erache Labanio ni sïpakorheni Jarani. 44Jimari pakaraaka máru jurhia irekani, enka jamperi chéti erachi tsirapenhentaaka. 45Enkakini chéti erachi tsirapenhechentaaka ka mirikurhini ampe enkari úkuka. Ji nemani axaaka eskakini uankuaka. ¿Antisïni jatsi tsimani uáp'echani tsïtaani ma jurhiakua jimpok'u?
46Rebeka, arhispti Isaakini:
Niáchaskia ísï irekani, nanaka Jitita anapuecha jimpo, enka Jakobi Jitita anapuni ma tempa úska, erakuska tempu úni, ji sánteru no sési irekaka, sánteru sésipirinti uarhini.
انتخاب شده:
Génesis 27: BI-PURHE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Biblia en P´urhépecha, Michoacán, México © Sociedad Bíblica de México, A.C.