Matta 23
23
Iysanıń diniy muǵallimler menen pariseylerdi ayıplawı
(Mrk 12:38-40; Luk 11:39-51; 13:34-35; 20:45-47)
1Sonda Iysa xalıqqa hám Óziniń shákirtlerine bılay dedi:
2– Muwsanıń orınlıǵına diniy muǵallimler menen pariseyler otırdı. 3Sonlıqtan olardıń sizlerge aytqanlarınıń hámmesin de orınlańlar. Biraq, olardıń islegenin islemeńler. Sebebi olar aytadı, biraq aytqanların ózleri islemeydi. 4Olar kóterip júriwge qıyın awır júklerdi baylap, adamlardıń iynine salıp, kótertedi. Al ózleri olardı barmaǵı menen de qozǵaǵısı kelmeydi. 5Olar barlıq islerin adamlardıń kózine túsiw ushın ǵana isleydi. Ishine Qudaydıń Sózi jazıp salınǵan qutılarınıń kólemin úlkeytip, mańlaylarına baylap, kiyimleriniń shashaqların uzın etip qoyadı. 6Olar zıyapatlarda tórde, májilisxanalarda sıylı orında otırǵandı jaqsı kóredi. 7Bazar maydanlarında ózlerine sıylap sálem bergendi hám ózlerin «ustaz» dep atawın unatadı. 8Al sizler ózlerińizdi «ustaz» dep atatpańlar, óytkeni sizlerdiń jalǵız-aq Ustazıńız bar. Sizlerdiń bárińiz bir-birińizge tuwısqansız. 9Jer júzinde hesh kimdi de «áke» dep atamańlar, óytkeni sizlerdiń jalǵız-aq Ákeńiz bar, Ol aspanda. 10Ózlerińizdi «jolbasshı» dep te atatpańlar, sebebi sizlerdiń jalǵız-aq jolbasshıńız bar, Ol – Masiyx. 11Arańızdaǵı eń ullıńız sizlerdiń xızmetshińiz bolsın. 12Óytkeni kim de kim ózin joqarı tutsa, ol pásletiledi, kim de kim ózin pás tutsa, ol mártebeli qılınadı.
13Hásiret shegesizler, diniy muǵallimler hám pariseyler, eki júzliler! Sebebi sizler adamlarǵa Aspan Patshalıǵınıń esigin jabasızlar. Ózlerińiz de kirmeysizler, kirgisi kelgenlerdi de kirgizbeysizler. [14#Mat 23:14 Bazı qoljazbalarda 14-ayat ta bar: «Hásiret shegesizler, diniy muǵallimler hám pariseyler, eki júzliler! Sebebi jesirlerdiń úylerin jalmap jutıp, kózge kóriniw ushın uzaq duwa etiwshi sizler bul ushın awır jaza alasızlar».]
15Hásiret shegesizler, diniy muǵallimler hám pariseyler, eki júzliler! Sizler óz dinińizge bir adamdı bolsa da kirgiziw ushın teńizdi de, qurǵaqlıqtı da aylanıp shıǵasızlar. Al kirgizgennen soń, onı ózlerińizden de eki ese jaman dozaqı qılasızlar.
16Hásiret shegesizler, soqır jetelewshiler! Sizler bılay deysizler: «Kim de kim Ibadatxana menen ant etse, ol antın orınlawǵa minnetli emes, al kim de kim Ibadatxanadaǵı altın menen ant etse, ol antın orınlawǵa minnetli». 17Háy, aqılsız soqırlar! Qaysısı ullıraq: altın ba yamasa altındı muxaddes qılatuǵın Ibadatxana ma? 18Jáne de: «Kim de kim qurbanlıq orın menen ant etse, ol antın orınlawǵa minnetli emes, al kim de kim onıń ústindegi qurbanlıq penen ant etse, ol antın orınlawǵa minnetli», – deysizler. 19Háy, soqırlar! Qaysısı ullıraq: qurbanlıq pa yamasa qurbanlıqtı muxaddes qılatuǵın qurbanlıq orın ba? 20Solay etip, qurbanlıq orın menen ant etiwshi adam orın menen de, orınnıń ústindegilerdiń hámmesi menen de ant etken boladı. 21Ibadatxana menen ant etiwshi adam Ibadatxana menen de, onda jasaytuǵın Quday menen de ant etken boladı. 22Aspan menen ant etiwshi adam Qudaydıń taxtı menen de, onıń ústinde otırǵan Quday menen de ant etken boladı.
23Hásiret shegesizler, diniy muǵallimler hám pariseyler, eki júzliler! Sizler jalbız, anis, zire sıyaqlı ósimliklerdiń onnan birin beresizler, biraq Muxaddes Nızamdaǵı eń baslılarına: ádillikke, miyrim-shápáátke hám sadıqlıqqa kewil bólmeysizler. Bunı da islep, onı da qaldırmawıńız kerek edi. 24Háy, shirkeydi súzip taslap, túyeni jutatuǵın soqır jetelewshiler!
25Hásiret shegesizler, diniy muǵallimler hám pariseyler, eki júzliler! Sizler tabaq-keseniń sırtın tazalaysızlar, biraq olardıń ishi nápsiqawlıq hám júwensizlikke tolǵan. 26Háy, soqır parisey! Sen dáslep tabaq-keseniń ishin tazala, sonda olardıń sırtı da taza boladı.
27Hásiret shegesizler, diniy muǵallimler hám pariseyler, eki júzliler! Sizler háklengen qábirlerge uqsaysızlar: olar sırtınan sulıw bolıp kórinse de, ishi óliklerdiń súyekleri menen pataslıqqa tolǵan. 28Sol sıyaqlı sizler de sırtıńızdan adamlarǵa ózlerińizdi haq adam etip kórsetesizler, biraq ishlerińiz eki júzlilik penen nızamsızlıqqa tolı.
Jazalarıńızdı tartasızlar!
29– Hásiret shegesizler, diniy muǵallimler hám pariseyler, eki júzliler! Sizler payǵambarlarǵa mazarlar ornatasızlar. Haq adamlardıń esteliklerin bezep: 30«Eger de ata-babalarımızdıń zamanında ómir súrgenimizde, payǵambarlardıń qanın tógiwde olarǵa sherik bolmas edik», – deysizler. 31Solay etip, ózlerińizdiń payǵambarlardı óltirgenlerdiń urpaǵı ekenligińizdi dálilleysizler. 32Ata-babalarıńızdıń islegen gúnalarınıń mólsherin tolıqtıra berińler! 33Jılanlar, uwlı jılanlardıń tuqımları! Sizler qalay etip dozaq jazasınan qashıp qutılmaqshısızlar? 34Sol sebepli Men sizlerge payǵambarlardı, danalardı, diniy muǵallimlerdi jiberemen. Sizler olardıń geybirewlerin óltiresizler, geybirewlerin atanaq aǵashqa shegeleysizler, basqaların májilisxanalarıńızda qamshılap, qaladan-qalaǵa quwdalaysızlar. 35Solay etip, haq Abıldıń#23:35 Jar 4:8. qanınan baslap, Ibadatxanadaǵı Muxaddesxana menen qurbanlıq orınnıń arasında sizler óltirgen Baraqiyanıń ulı Zexariyanıń#23:35 2Jln 24:20-22. qanına deyin, jer betinde tógilgen haq adamlardıń qanlarınıń bári de sizlerdiń moyınlarıńızǵa júklenedi. 36Sizlerge shının aytıp turman: bulardıń hámmesi ushın usı áwlad jazaǵa tartıladı.
Iysanıń Erusalim tuwralı qayǵırıwı
37– Oh, Erusalim, Erusalim! Payǵambarlardı óltiriwshi, Qudaydıń saǵan jibergenlerin tas boran qılıwshı qala! Óz shójelerin qanatınıń astına alǵan mákiyen sıyaqlı, Men de seniń balalarıńdı neshe ret jıynamaqshı boldım, biraq sizler qálemedińler. 38Mine, úyińizdi Quday taslap ketip, ol qańırap qaladı. 39Sizlerge aytatuǵınım: «Jaratqan Iyeniń atı menen keletuǵın jarılqansın!»#23:39 Zab 117:26. – dep aytqanlarıńızǵa deyin Meni qaytıp kórmeysizler.
اکنون انتخاب شده:
Matta 23: QrqMK22
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2022
