Matta 22
22
Úyleniw toyı tuwralı tımsal
(Luk 14:15-24)
1Iysa olarǵa tımsallar menen sózin dawam etip, bılay dedi:
2– Aspan Patshalıǵı bir patshanıń óz balasınıń úyleniw toyın bergenine uqsaydı. 3Toyǵa mirát etilgenlerdi shaqırıp keliw ushın, patsha xızmetshilerin jiberipti. Biraq olardıń kelgisi kelmepti. 4Sonda ol jáne basqa xızmetshilerin jiberip: «Mirát etilgenlerge aytıńlar: mine, men zıyapatımdı tayarlap qoydım, ógizlerim de, semirtilgen mallarım da soyıldı, hámmesi de tayın. Toyǵa kelsin!» – dep aytıp qalıptı. 5Biraq, mirát etilgenler onıń sózine kewil awdarmaptı: kimisi egislik jerine, kimisi sawda-satıǵına ketipti. 6Al geybirewleri patshanıń xızmetshilerin uslap alıp, xorlap óltiripti. 7Bunı esitken patsha qáhárlenip, óziniń áskerlerin jiberipti. Sol jınayatshılardı óltirtip, olardıń qalaların órtetip jiberipti. 8Sonda ol óziniń xızmetshilerine: «Toydıń ası tayar, biraq mirát etilgenler ılayıqsız boldı. 9Sonlıqtan endi sizler jol dárbentlerine barıp, ushıratqanlarıńızdıń bárin toyǵa shaqırıp kelińler», – depti. 10Sonda xızmetshileri jollarǵa shıǵıp, ushıratqanlarınıń bárin de: jaqsısı bolsın, jamanı bolsın, shaqırıp jıynap kelipti. Toyxana qonaqlarǵa tolı bolıptı. 11Patsha qonaqlardı kóriwge kirgende, toy kiyimin kiymegen birewge kózi túsip, 12oǵan: «Háy, dostım, sen bul jerge toy kiyimisiz qalay kirgenseń?» – depti. Biraq ol úndemepti. 13Sonda patsha xızmetshilerine buyırıp, bılay depti: «Mınanıń ayaq-qolın baylap, sırtqa, qarańǵılıqqa taslańlar! Ol sol jerde jılap, pushayman jeydi».
14Óytkeni mirát etilgenler kóp, al tańlap alınǵanlar az.
Salıq tólew tuwralı
(Mrk 12:13-17; Luk 20:20-26)
15Sonda pariseyler sırtqa shıǵıp ketip, Iysanı qalay sózinen tutıw tuwralı oylasa basladı. 16Oǵan Hirodtıń tárepdarları menen birge ózleriniń shákirtlerin jiberip, bılay dep aytqızdı:
– Ustaz! Bizler Seniń durıs adam ekenińdi hám jaǵımpazlıq etpeytuǵınıńdı bilemiz. Óytkeni Sen adamlardıń bet-júzine qaramaysań. 17Solay etip, bizlerge aytshı, Sen mınaǵan qalay qaraysań: Rim imperatorına salıq tólew durıs pa yamasa nadurıs pa?
18Biraq Iysa olardıń haram niyetin bilip, olarǵa:
– Háy, eki júzliler! Sizler Meni nege sınap atırsızlar? 19Maǵan salıq teńgesin kórsetińler, – dedi.
Olar Oǵan bir dinar ákelip berdi. 20Ol:
– Bunda kimniń súwreti bar hám kimniń atı jazılǵan? – dep soradı.
21Olar:
– Rim imperatorınıń, – dep juwap berdi.
Sonda Iysa:
– Olay bolsa, imperatordıń haqın imperatorǵa, Qudaydıń haqın Qudayǵa berińler, – dedi.
22Olar bunı esitip, tań qalıstı hám Onıń janınan ketip qaldı.
Qayta tiriliw tuwralı soraw
(Mrk 12:18-27; Luk 20:27-40)
23Qayta tiriliw joq, dewshi saddukeyler sol kúni Iysaǵa kelip, bılay dep soraw qoydı:
24– Ustaz! Muwsa: «Birew balası bolmay ólse, izinde qalǵan jesirine inisi úylenip, aǵasınıń urpaǵın dawam ettirsin»,#22:24 Nzm 25:5-6. – degen-ǵo. 25Bizde aǵayinli jeti jigit bar edi. Olardıń birinshisi úylenip, qaytıs boldı, balası bolmaǵanlıqtan, hayalı inisine qaldı. 26Ekinshisine de, úshinshisine de, hátte, jetinshisine de solay boldı. 27Bárinen keyin hayaldıń ózi de qaytıs boldı. 28Al endi qayta tirilgende hayal jetewiniń qaysısınıń hayalı boladı? Ol olardıń hámmesine de hayal bolǵan edi-ǵo.
29Iysa olarǵa juwap qaytarıp bılay dedi:
– Sizler Muxaddes Jazıwlardı da, Qudaydıń qúdiretin de bilmegenlikten aljasıp tursızlar. 30Óytkeni adamlar qayta tiriliwde úylenbeydi de, turmısqa da shıqpaydı, al aspandaǵı perishteler sıyaqlı boladı. 31Ólgenlerdiń qayta tiriliwi tuwralı Qudaydıń sizlerge aytqanların oqımaǵansızlar ma? 32Quday: «Men Ibrayımnıń Qudayıman, Ísaqtıń Qudayıman, Yaqıptıń Qudayıman»#22:32 Shıǵ 3:6., – degen. Quday ólilerdiń emes, al tirilerdiń Qudayı.
33Bunı esitken xalıq Onıń tálimatına tań qaldı.
Eń baslı buyrıq
(Mrk 12:28-34; Luk 10:25-28)
34Iysanıń saddukeylerdi sóyletpey taslaǵanın esitken pariseyler bir jerge jıynaldı. 35Olardıń arasınan bir nızam muǵallimi Iysanı sınamaqshı bolıp, 36Onnan:
– Ustaz! Muxaddes Nızamdaǵı eń baslı buyrıq qaysı? – dep soradı.
37Iysa oǵan:
– «Qudayıń Jaratqan Iyeni shın júrekten, jan-tániń hám pútkil aqıl-oyıń menen súy»#22:37 Nzm 6:5.. 38Bul – birinshi hám eń baslı buyrıq. 39Ekinshisi de sol sıyaqlı: «Ózińdi súygeniń sıyaqlı, janıńdaǵı adamdı da súy»#22:39 Leb 19:18.. 40Pútkil Muxaddes Nızam da, payǵambarlardıń Jazıwları da usı eki buyrıqqa tiykarlanǵan, – dedi.
Masiyx kimniń Urpaǵı?
(Mrk 12:35-37; Luk 20:41-44)
41Pariseyler jıynalıp bolǵannan soń, Iysa olardan:
42– Masiyx haqqında ne oylaysızlar? Ol kimniń urpaǵı? – dep soradı.
– Ol Dawıttıń Urpaǵı, – dedi olar.
43Iysa olardan:
– Olay bolsa, Dawıt Muxaddes Ruwxtan ilhamlanıp, Masiyxtı qalayınsha «Iyem» dep ataǵan? Ol bılay degen-ǵo:
44«Jaratqan Iye Iyeme ayttı:
„Dushpanlarıńdı ayaǵıńnıń astına bastırmaǵanımsha,
Meniń oń jaǵımda otır“»#22:44 Zab 109:1..
45Solay etip, Dawıt Onı «Iyem» dep ataǵan bolsa, Ol qalayınsha onıń urpaǵı boladı? – dep soradı.
46Oǵan hesh kim de juwap bere almadı hám sol kúnnen baslap, Oǵan soraw beriwge hesh kimniń batılı barmadı.
اکنون انتخاب شده:
Matta 22: QrqMK22
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2022
