Matta 21
21
Iysanıń Erusalimge saltanatlı túrde kiriwi
(Mrk 11:1-11; Luk 19:28-40; Yuxn 12:12-19)
1Olar Erusalimge jaqınlap, Záytún tawınıń etegindegi Betfage degen awılǵa kelgende, Iysa eki shákirtin jumsap, 2olarǵa bılay dedi:
– Qarsı aldıńızdaǵı awılǵa barıńlar. Oǵan kiriwden-aq, baylawlı turǵan eshek penen gúrreni tabasızlar. Olardı sheship alıp, Maǵan ákelińler. 3Eger birew sizlerge bir nárse dese, sizler: «Olar Iyemizge kerek», – dep aytıńlar, ol olardı sol waqıtta-aq jiberedi.
4Bul payǵambar arqalı aytılǵan mına sózlerdiń orınlanıwı ushın boldı:
5«Qız Sionǵa#21:5 Qız Sion – Erusalim. aytıńlar:
Mine, seniń Patshań eshekke, jas eshekke,
Gúrrege minip kishipeyillik penen saǵan kiyatır!»#21:5 Zxr 9:9.
6Shákirtleri barıp, Iysanıń buyırǵanın isledi. 7Olar eshekti gúrresi menen alıp kelip, shapanların ústine japtı, Iysa gúrrege minip aldı. 8Xalıqtıń kópshiligi óz shapanların jolǵa tósep, basqaları tereklerden shaqa kesip alıp jolǵa jaydı. 9Aldı-artında erip kiyatırǵan xalıq quwanısıp:
– Dawıttıń Urpaǵına hosanna!#21:9 Hosanna! – «Qutqara gór!» degen mániste. Qudaydı alǵıslaǵanda aytıladı.
Jaratqan Iyeniń atı menen keletuǵın jarılqansın!
Eń joqarıda hosanna!#21:9 Zab 117:25-26. – dep baqırıstı.
10Iysa Erusalimge kirip kelgende, pútkil qala janlanıp:
– Bul kim? – dep soradı.
11Xalıq:
– Bul – Iysa, Galiladaǵı Nasıradan shıqqan payǵambar, – dedi.
Iysanıń Ibadatxanadan satıwshılardı quwıwı
(Mrk 11:15-19; Luk 19:45-48; Yuxn 2:13-22)
12Iysa Ibadatxanaǵa kirip, ol jerden satıwshılar menen alıwshılardıń hámmesin quwıp shıǵardı da, aqsha almastırıwshılardıń stolların, kepter satıwshılardıń otırǵıshların awdarıp taslap, 13olarǵa:
– «Meniń Úyim duwa etetuǵın úy dep ataladı»#21:13 Iysh 56:7., – dep Muxaddes Jazıwda jazılǵan, al sizler onı qaraqshılardıń uyasına aylandırdıńlar!#21:13 Erm 7:11. – dedi.
14Ibadatxanada Iysanıń qasına soqırlar hám aqsaqlar kelgende, Ol olarǵa shıpa berdi. 15Bas ruwxaniyler hám diniy muǵallimler Ol islegen káramatlardı hám Ibadatxanada: «Dawıttıń Urpaǵına hosanna!» – dep baqırısqan balalardı kórip, ashıwlanıp qaldı da, 16Oǵan:
– Olardıń ne dep atırǵanın esitip tursań ba? – dedi.
Iysa olarǵa:
– Awa! Sizler: «Náresteler hám emiziwli balalardıń awzınan, Ózińe maqtawlar aytqızdıń»#21:16 Zab 8:3., – dep Muxaddes Jazıwda aytılǵandı hesh oqımaǵansızlar ma? – dedi.
17Sonnan soń, Iysa olardı qaldırıp, qaladan shıǵıp ketti hám Betaniyaǵa barıp, sol jerde túnedi.
Quwrap qalǵan ánjir aǵashı
(Mrk 11:12-14, 20-24)
18Erte azanda Iysa qalaǵa qaytıp kiyatırǵanda, ash boldı. 19Jol boyında bir ánjir aǵashın kórip, onıń qasına bardı. Biraq onnan japıraqlarınan basqa hesh nárse tappaǵannan soń, aǵashqa:
– Bunnan bılay, sende máńgige hesh jemis óspesin, – dedi.
Ánjir aǵashı sol waqıtta-aq quwrap qaldı. 20Shákirtleri bunı kórgende tań qalısıp:
– Bul ánjir aǵashı qalayınsha dárriw quwrap qaldı? – dep soradı.
21Iysa olarǵa juwap berip:
– Sizlerge shının aytıp turman: eger gúmansız isenseńler, tek ánjir aǵashına islegenimdey ǵana emes, hátte mına tawǵa: «Ornıńnan kóterilip, teńizge qula!» – deseńiz, aytqanıńız boladı. 22Eger isenim menen duwa etseńler, ne sorasańlar da, hámmesin alasızlar, – dedi.
Iysanıń biyligi haqqında soraw
(Mrk 11:27-33; Luk 20:1-8)
23Iysa Ibadatxanaǵa kirip, tálim berip otırǵanda, Oǵan bas ruwxaniyler menen xalıq aqsaqalları kelip:
– Bul islerdi qanday biylik penen islep júrseń hám bunday biylikti Saǵan kim berdi? – dep soradı.
24Iysa juwap qaytarıp:
– Men de sizlerge bir soraw bereyin. Eger onıń juwabın berseńler, Men de sizlerge bul islerdi qanday biylik penen isleytuǵınımdı aytaman. 25Yaqıya adamlardı shomıldırıw ushın qayaqtan biylik aldı? Aspannan ba yamasa adamlardan ba? – dedi.
Olar óz ara oylasıp: «Eger „aspannan“ desek, Ol bizlerge: „Sonda nege oǵan isenbedińler“, – deydi. 26Al eger „adamlardan“ desek xalıqtan qorqamız: hámmesi de Yaqıyanı payǵambar dep esaplaydı!» – desti.
27Sonlıqtan olar Iysaǵa:
– Bilmeymiz, – dep juwap berdi.
Ol:
– Onday bolsa, Men de sizlerge bul islerdi qanday biylik penen isleytuǵınımdı aytpayman, – dedi.
Eki ul tuwralı tımsal
28– Sizler qalay oylaysızlar: bir adamnıń eki ulı bolıptı. Ol birinshisine barıp: «Balam, sen búgin júzim baǵına barıp, jumıs isle», – depti. 29Ol: «Barmayman», – dep juwap beripti. Biraq sońınan ókinip, barıptı. 30Soń ákesi ekinshi ulına barıp, oǵan da solay depti. Ol: «Yaqshı, aǵa, baraman», – dep juwap beripti, biraq barmaptı.
31Usı ekewiniń qaysısı ákesiniń tilegin orınlaǵan boladı? – dep soradı Iysa.
– Birinshisi, – dep juwap qaytardı olar.
Iysa olarǵa bılay dedi:
– Sizlerge shının aytıp turman: salıqshılar hám buzıq hayallar Qudaydıń Patshalıǵına sizlerden burın kiredi. 32Óytkeni Yaqıya sizlerge haq joldı kórsetiw ushın kelgen edi, biraq sizler oǵan isenbedińler. Al salıqshılar menen buzıq hayallar oǵan isendi, biraq sizler bunı kórgennen keyin de táwbe etpedińler hám isenbedińler.
Jawız diyxanlar haqqında tımsal
(Mrk 12:1-12; Luk 20:9-19)
33– Endi basqa bir tımsaldı tıńlańlar: bir úy iyesi bolıptı. Ol júzim baǵın otırǵızıp, onı diywal menen qorshaptı, sharap iskenjesin qazıp, gúzet minarasın ornatıptı. Sońınan baǵın diyxanlarǵa ijaraǵa berip, ózi uzaq jerge ketip qalıptı. 34Zúráát jıynaytuǵın máwsim jaqınlaǵanda, ol ózine tiyisli úlesin alıw ushın, diyxanlarǵa xızmetshilerin jiberipti. 35Diyxanlar onıń xızmetshilerin uslap alıp, olardıń birewin sabap, ekinshisin óltirip, al jáne birewin tas boran qılıptı. 36Sońınan baǵdıń iyesi burınǵıdan da kóp basqa xızmetshilerin jibergende, olarǵa da solay islepti. 37Eń aqırında ol: «Ulımdı húrmet eter» dep, olarǵa óz ulın jiberipti. 38Biraq diyxanlar onıń ulın kórip, bir-birine: «Bul – miyrasxor-ǵo. Júrińler, onı óltirip, miyras múlkine iye bolayıq», – desipti. 39Olar onı uslap alıp, júzim baǵınan sırtqa shıǵarıp óltiripti.
40Endi júzim baǵınıń iyesi kelgende, sol diyxanlarǵa ne qıladı?
41Olar Iysaǵa:
– Ol bul jawızlardı rehimsizlik penen óltiredi de, júzim baǵın waqtında jemisin berip turatuǵın basqa diyxanlarǵa ijaraǵa beredi, – dedi.
42Iysa olarǵa bılay dedi:
– Sizler Muxaddes Jazıwlarda mına sózlerdi oqımaǵansızlar ma?
«Qurılısshılardıń kereksiz dep taslaǵan tası,
Úydiń múyeshiniń tiykarǵı tası boldı.
Jaratqan Iye qılǵan bul is,
Kózimizge ájayıp kórindi!»#21:42 Zab 117:22-23.
43Sonlıqtan Meniń sizlerge aytatuǵınım: Quday Óz Patshalıǵın sizlerden tartıp aladı da, onı jemisin berip turatuǵın xalıqqa beredi. 44Sol tasqa túsken adamnıń shıl-párshesi shıǵadı. Tas kimniń ústine tússe, sonı jenship taslaydı.
45Bas ruwxaniyler menen pariseyler Iysanıń aytqan tımsalların esitkennen soń, Onıń ózleri haqqında aytqanın túsinip, 46Onı qolǵa alıwǵa tırıstı. Biraq xalıqtan qorqtı, sebebi xalıq Onı payǵambar dep sanaytuǵın edi.
اکنون انتخاب شده:
Matta 21: QrqMK22
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2022
