1Mos. 21
21
Pututukat matat Ishak
1Si Tuhan mesipanukani si Sara, kele sipinalelekNia. 2Kateteret siteuakenen Taikamanua, kele aimabaja si Abraham, pusuruketnangan si Sara lepa tutuakenangan matat sara toga simanteu. 3Ioniake toga nenda si Abraham iate Ishak, 4#1Mos. 17:12; Pugap. 7:8 samba kateteret rurat Ishak balu ngagogoi, sunatnangannia si Abraham, siripokat parentat Taikamanua. 5Keteteret ai pututumatat Ishak si Abraham ainia sangotu ngarura. 6Kuanangan si Sara, “Aigalaian aku Taikamanua muga'ga' kalulut angkat baga. Senen sirimanua sipasiaarep pagalaiat nene muga'ga' te geti sia pasamba aku.” 7Lepa kuanangan minca, “Kasei pa' siboiki momoi masikua ka simanteuku, kutu'tu'tuake matat tatoga geti? Aku leuet akutu'tuakean matat tatoga kenanen simanteuku amabajaannia.”
Abraham masikekle si Hagar samba si Ismael
8Toga nenda ituppai le ipuurau, samba ka gogoi tusaraakenia mutottot, baraakenangan si Abraham punen sabeu.
9Ka sara gogoi si Ismael, togat Abraham samba Hagar, sinanalep tai Misir, ainia paguile pasamba si Ishak, togat Sara. 10Itconangan si Sara pagalaiat nenda lepa kuanangan kai Abraham, “Tuituiake pagugulet sinanalep nenda pasamba togania. Togat sinanalep nenda tamomoi isilo rubeiat ka pukaiyoatnu ikepakenen togakku si Ishak.” 11Pagalaiat nenda mabesi ipaatu si Abraham, kalulut si Ismael togania leuet. 12Tapoi kuanangan Taikamanua kai Abraham, “Bui' imakarat bagam pagalaiat paguguletnu si Hagar samba togania nenda. Tut le siobat bagat Sara, kelulut kai Ishak te ibabara geti sapunuteteunu sipalelekKu nenda. 13Kisedda leuet katogat Hagar Kukakau te geti sapunuteteu simigi bule sia ibailiu sara bangsa. Aipoinia togam leu et.”
14Mansep simansep, kaunangan si Abraham kai Hagar kan samba lo panarengannia ka enungan. Galakngakenangan toga nenda kateitei Hagar, samba koiniakenangan sinanalep nenda ituitui. Lepa tuitui si Hagar samba mujaujau ka simatangeu Bersyeba. 15Kateteret aisapru panarengannia oinan, galakngakenangan togania si Hagar katei se'se', 16lepa ei nia mukudda kele reunan tupanaake silogui reunannia ka kudduat nenda. Kuanangan kapaatuatnia, “Tamaron aku masiitco imatei toga nenda.” Lepa pusounangan. 17Iarep le Taikamanua ngangan Ismael, lepa panibonangan Malaikat Taikamanua barania ka manua ka Hagar, kuanangan, “Apa imabesi tubum, Hagar? Bui numaloto, aipoi aiarepingan Taikamanua sou Togam. 18Kenan katubut togam, angkatakenia samba mengmengakenia. Kubabailiuake te geti sapunuteteunia sara bangsa sabeu.” 19Lepa bukaakenangan Taikamanua matat Hagar, bailiu itconangan sara uggungan. Iageti einia masiaisu oinan kaunangan kabagat lalaisunia, lepa geti kaunangan lot togania nenda. 20Ipaalei le Taikamanua toga nenda. Toga nenda memei muuraunia. Mariuriu le ikuddu ka simatangeu Paran samba bailiunia sara sipangungukru. 21Talimouakenangannia inania pasamba sara sinanalep tai Misir.
Palelengan Abraham samba Abimelekh
22Kateteret nenda rimata Abimelekh samba Pikhol, Panglima saladdunia, masikua kai Abraham, “Iropmake le ekeu Taikamanua kabagat sangamberi galaiakenennu. 23Lulut nenda, pusuppa le sene ka matat Taikamanua, katubukku ta'an nugagalaiake patajuat, ka tatatogakku ele ka sapunuteteuku. Kele erut patuat sigalaiku katubum, galaiake leuet katubukku samba katubut kupkumen laggai kuddujietnu nene.”
24Kuanangan si Abraham, “Musuppa le aku.”
25Lepa geti pungunyunangan si Abraham kai Abimelekh pagalaiat uggungan sirauraura sapagugulet Abimelekh. 26Aleginangan si Abimelekh, “Ta'kuagai, kasei amasigalaiake nenda. Ta'pei anupaagai katubukku, samba pagalaiat nene iapei akuarepnia.” 27Lepa geti kaunangan si Abraham pigangamuneng pa' biribiri samba jaui katubut Abimelekh, samba karuadda baraakerangan palelengan. 28Tapoi ipasaraake le si Abraham pitu togat biribiri kamungkuat biribirinia, 29samba panounounangan si Abimelekh katubunia, “Angoi nugalaiake kele nenda?”
30Aleginangan si Abraham, “Silo le sipitu togat biribiri nene sibailiu toggaiat sisilonu, aku te amasigaigai uggungan nene.” 31Kise te aituoniake kudduat nenda Bersyeba, kalulut sedda poi aragalai suppadra ruadda.
32Lepat aragalai palelengan ka Bersyeba, toili si Abimelekh samba Pikhol ka kupkumen laggaira tai Filistin. 33Lepa urepnangan si Abraham sangaloina tamariska ka Barsyeba samba, iageti panindoginangan Tuhan, Taikamanua sitaimasususu'. 34Samba si Abraham mauju peilenia mukuddu ka kupkumen laggai Filistin.
اکنون انتخاب شده:
1Mos. 21: MWV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید