1Mos. 20
20
Abraham samba Abimelekh
1Lepa tuitui si Abraham barania ka Mamre ka isit kakaiaman polak Kanaan, samba kuddunia katalagat Kades samba Syur. Pasat pigangagogoi pa', kateteret aikuddu ka Gerar, 2#1Mos. 12:13, 26:7 kuanangan si Abraham, si Sara sinanalepnia iate baginia. Kalulu nenda rimata Abimelekh sibara ka Gerar masikoiniake pakoiniennia masiambit si Sara katubunia. 3Ka sara soibo patoilanangan tubunia Taikamanua katubut rimata nenda kabagat pangamutet, samba kuanangan, “Mamatei le ekeu, kalulut anualaan poi sinanalep nenda, aipoi aian simanteunia.”
4Tapoi si Abimelekh ta'pei airape si Sara, iageti kuanangan rimata nenda, “Tuhan, ta'masele aku! Tuhan numamateiake leu pa' aku samba bangsaku? 5Si Abrahan le amasikua, sinanalep nenda baginia, samba sinanalep nenda leu masikua kisedda leu et. Aku galaiake kele nenda kabagat linat paatuat, ota ta'masele aku.”
6Iageti aleginangan Taikamanua kabagat pangamutet nenda, “Kerenangan, Kuagai, nugalaiakenia ka paatuat simalina. Kalulut nenda te Akukekreake ekeu masigalai jo katubukKu, samba ta'Kuobaake nurape sinanalep nenda. 7Tapoi kineneiget, toiliakenia ka simanteunia. Simanteunia sara nabi, samba manindou te getinia bule bui numatei. Tapoi, ke'tanotoiliakenia, repdep, ekeu samba sangamberi taikauman metei le geti!”
8Mansep simansep sogainangan si Abimelekh sangamberi paguguletnia samba paagainangan katubutra sangamberi sipuaaili nenda. Bailiu malotorangan somakope. 9Lepa nenda si Abraham masisogai si Abimelekh samba kuanangan, “Apa anugalaiake katubumai? Apa selekku katubum, pat baraakenungan sibabara nene katubukku samba kapurimataatku? Bulat ta'mateu nugalaiake kele nenda katubukku. 10Angoi nugalaiake kasedda?”
11Aleginangan si Abraham, “Kupaatu le, sene ta'anai sirimanua simaloto ka Taikamanua, bailiu mateiakerangan geti aku sirimanua simakiddi ka baga ka sinanalepku. 12Sara pei nia bagiku. Kai sisara ukkui, tapoi ina ta'makere, lepa geti putalimoumaian. 13Kateteret aikoiniake aku Taikamanua masikaddiuake lalep ukkuiku samba mujaujau kalaggai sirimanua. Kuakungan ka sinanalepku, ‘Pakoinong nuntut bagam katubukku pasamba masikua kasenen sirimanua, aku nene kebbunu.’ ”
14Lepa nenda si Abimelekh toiliakenangan si Sara kai Abraham, samba kateteret nenda ikau leuet sapagugulet, biribiri samba jaui. 15Kuanangan rimata nenda kai Abraham, “Nene te sangamberi laggai kupkumenku, pukuddu kaipa siobat bagam.” 16Lepa kuanangan kai Sara, “Aku kauan ka kebbunu sangaribu bulagat perak sibailiu toggaiat kasangamberi sirimanua, ekeu bulatnia ta'masele.”
17Lepa panindounangan si Abraham ka Taikamanua, samba Taikamanua masialeake si Abimelekh samba sinanalepnia samba sapakoiniennia sinanalep, pat tu'tuakerangan matat togadra. 18Aipoi siboiki si Tuhan aigalaian sangamberi tainanalep ka purimataat Abimelekh ilatukngake le' sia, kalulut sipuaaili kai Sara, sinanalep Abraham nenda.
اکنون انتخاب شده:
1Mos. 20: MWV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید