Luk 19
19
Jisɔs na Sakiɔs ɔtama bagbuga-retu
1Jisɔs ɔra ociŋɛ rika Jɛriko. 2Orumanɛ ŋɔnɛ ɔra kafa ŋɔ oyinɛ Sakiɔs, ɔra oni retu batama bagbuga-retu, mɨnɛ ɔfɔnɔ ogbuga. 3Ɔra oduga kɔfɛ ɛdɔ oni ŋɔ Jisɔs ɔra, nsu ndi ɔkpɨlɛkpɨlɛ okiyɛ ɔfɛ mɔ ndi bani bajabi baci. 4Ɔbɨrɛ oruŋɛ ɛyɛrɔsɔ ɔkabiri keti sikamɔ na esikafa ɔyɛ ɔfɛ Jisɔs ndi na ndu Jisɔs okoci.
5Ndi Jisɔs ɔjaga na kwa kancɛ, ɔrɔ birebirɛ ɔkanɛ Sakiɔs ya, “Sakiɔs, riɛ wadwad. Nriɛnɛ na ɛtɔ ɛyɛ ɛrɛn.” 6Sakiɔs oriɛ fɨrifɨri mɨnɛ ɔtama Jisɔs na ɔkɨmkɨm kɔrɔmetima.
7Ndi bani mbɛ bara kafa bafɛ mbu bɔjaga babɨnɛ kɔmɨmini, “Oni ŋɔ ɔta ɔkariɛnɛ na ɛtɔ osiŋɛ-bobi.”
8Sakiɔs ɔgbɛ ɔbara ɔkanɛ Ɔkɔ-rokuku ya, “Fugɛ, Ita! Nfa, mɨnɛ kunku, nkɔjɛ baram kɛbɛm birɛ mbi nfɔnɔ, mɨnɛ ara ta mmuɛ oni, kunfɛlɛ begbu bɛnaa mbu mmuɛ.”
9Jisɔs ɔkanɛ mɔ ya, “Rɛnyaŋɛ rewu na ɛtɔ nji ɛrɛn, ndi orumanɛ ŋɔ mɨnɛ wɔ Abraham. 10Wɔ Oni owu kogumɛ mɨnɛ kɔnyaŋɛ bani mbɛ babɔyɨm.”
Rekana bari jubi
(Mt 25:14-30)
11Ndi bani bara bayumɛ ratu na mbu ɔkanɛ bɛ, otuba rɛkana ɔjɛ bɛ, ndi okunɛ Jɛrusalɛm bani mbɛ banyɛgɛ mɔ barɔŋɛ ya rɔrɛ-rɛkɨm Ɛbrɔkpabi kurɔmɨlɛnɛ ɔmɛ. 12Jisɔs ɔkanɛ bɛ ya, “Kegbu cinɛ ɛfɔnɔ oni ŋɔ osi na kɛtɨbi rɛkɨm ŋɔ orua rɔcɛ kɛgbanta ɛyɔ na rɔrɛ rojuju bakajɛ mɔ rɛkɨm, ɔŋbɨnɛnɛ ɔgba owu tumɛ ɔkɨm. 13Nabɔ orua, ojia bari bamɔ iti jubi ɔjɛ oni naŋɔnɛ ogbuga gol ŋɔnɛ ɔkanɛ bɛ ya, ‘Bɛ nu ogbuga ŋɔ cɛ rɛfɨn ta ŋbɨnɛnɛ.’
14Okiraga bani bamɔ. Ndi owuta, batigɛ bani bajuju mbɛ banyɛgɛ mɔ bakakanɛ ya, ‘Rekiduga oni ŋɔ otumɛ ɔkɨm oyua.’
15“Babɨma mɔ rɛkɨm ɔgbaŋɛ. Otigɛ yɛ bari mbɛ ɔjɛ bagbuga na oruŋɛ rɔcɛ, kɔgbɨri nsɔl ŋɔ bawusi.
16Kɛbɛrɔsɔ ori owu kanɛ ya, ‘Ita, na ogbuga gol ŋɔ ajɛ mi ndi nsɔl ogbuga gol jubi.’
17Ɔkɨm ŋɔ ɔkanɛ mɔ ya, ‘Asi oyiyi, brika ori omia! Ndi awusi oyiyi na egbigbɨra ogbuga ŋɔ njɛ wu, nkɔjɛ wu rirɛ jubi ndi rikotumɛ irɨma ntunɛ iyɛ.’
18Ɔnyakanɛ ori owu kanɛ mɔ ya, ‘Ita, ogbuga gol ŋɔ ajɛ mi ndi nsɔl ogbuga batan.’
19Ɔkɨm ya, ‘Akotumɛ oni retu rirɛ ritan.’ 20Mɨnɛ ori ojuju owu kanɛ mɔ ya, ‘Ita, ka ogbuga gol ɔyɛ ŋɔ ajɛ mi; nfua mɔ na kɛkpa ɛfɔ nkaŋɨbi.
21Nfɔnɔ bofu na awu, ndi ara oni ŋɔ ɔjɔŋɛjɔŋɛ. Abɛŋɛ mbu bɔbɔ bɔyɛnɛ mɨnɛ afɨlɛ mbu abɔ akikpa.’ 22Mintɛ-ɛtɔ ɔmɔ ɔkanɛ mɔ ya, ‘Ntiba wu na ramu kama rayɛ, kekukubi ori! Akanɛ ya agbɨragbɨra ya nra oni ŋɔ njɔŋɛjɔŋɛ, mɨnɛ mbɛŋɛ mbu bɔbɔ bomia nɛ mɨnɛ nfɨlɛ na kwa mbɔ nkikpa. 23Bu na akirɔbɔ bagbuga bamia na ɛtɔ bagbuga? Na esikafa ara ŋbɨnɛnɛ, ntama bagbuga bamia na nsɔl.’
24Ɔkanɛ yɛ bani mbɛ babari kafa ya, ‘Tama ogbuga gol ŋɔ ɔra na mɔ jɛ ori ŋɔ ɔfɔnɔ ogbuga gol jubi.’
25Nsu bakanɛ mɔ ya, ‘Ita, ɔfɔnkpa ogbuga gol jubi!’
26Ɔfɛlɛ bɛ ramu ya, ‘‘Nkanɛ nu mɔ bani mbɛ bafɔnɔ gba, kubakuɛ bɛ. Nsu mbɛ babɔ bakifɔnɔ tumgba, tum egbigbɨra nji bafɔnɔ kubatama bɛ abu. 27Nsu bani ɛban bamia mbɛ babɔ bakiduga ya ntumɛ ɔkɨm ɔbɛ, bɛ bɛ ŋuɛ nfa wu ŋu bɛ na rɔsɔ romia.”
Jisɔs ɔnɔ Jɛrusalɛm aya ɔkɨm
(Mt 21:1-11; Mk 11:1-11; Jn 12:12-19)
28Ndi Jisɔs ɔyɛ na rɛkana ndi, ɔcɛŋɛ banyɛgɛ mɔ ɛyɛrɔsɔ baruŋɛ ndu Jɛrusalɛm. 29Ndi okunɛ Bɛdfɛga na Bɛtani na rokuku olif, otigɛ banyɛgɛ mɔ bafa, ɔkanɛ bɛ ya, 30“Taŋɛ nu na rorirɛ ndu rɔra nu ɛyɛrɔsɔ, mɨnɛ aya minɔŋɛ du, kuminfɛ wɔ eti nji ɛsɔgɛ rasua, nji bajiŋɛ ya dɔnki, kɨnɛkɨnɛ na rɔkɔri, nji oni ɔbɔ okiginɔŋɔ riganɛ. Ŋaɛ ji bɛ ŋuɛ nfa. 31Ara oni naŋɔnɛ ɔsɨn nu ya, ‘Bu na miŋaɛ ji?’ Kanɛ mɔ nu ya, ‘Ɔkɔ-Rokuku oduga ji.’ ”
32Bani mbɛ otigɛ baruŋɛ bakafɛ gbanambunɛ cɛrɛrɛ kɛmanci Jisɔs ɔkanɛ bɛ. 33Aya baŋaɛ ji, bakikɔ basɨna bɛ, “Bu na miŋaɛ ji?”
34Bafɛlɛ bɛ ramu ya, “Ɔkɔ-rokuku oduga ji.”
35Mɨnɛ babɛ ji bawu jɛ Jisɔs. Babɛ yɛ bɔfɔ bɔbɛ bajirɛ na irɨma eti nji bajɨba Jisɔs origanɛ birebirɛ. 36Aya oruŋɛ, bani bajirɛ bɔfɔ bɔbɛ na ɛyɔ.
37Ndi owu kunɛ Jɛrusalɛm, na kwancɛ ɛyɔ erua ntunɛ rokuku Olif, ɛbɨn banyɛgɛ mɔ bara na kɔrɔmetima mɨnɛ babɨnɛ kɔsamɛ Ɛbrɔkpabi mɨnɛ baka ji na ramu rarɛnɛ na birɛ kɔba-ɛkpaju mbi bawu fɛ. 38Mɨnɛ bakanɛ ya, “Reŋunɛ retumɛ na Ɔkɨm ŋɔ owu na rirɨna Ɛbrɔkpabi!” “Reŋunɛ rɔrɛ Ɛbrɔkpabi mɨnɛ na boyi Ɛbrɔkpabi!”
39Bafarisi bajuju na rɛkaba bakanɛ Jisɔs ya, “Ɔkpɛbɛ, tunɛ banyɛgɛ wu batumɛ ŋbam!”
40Jisɔs ɔfɛlɛ bɛ ramu ya, “Nkanɛ nu, ara bakika mi, rata kuraka mi.”
41Ndi Jisɔs okunɛ Jɛrusalɛm mɨnɛ ɔfɛ du, obi ɔjɛ du, 42mɨnɛ ɔkanɛ ya, ɛra kekukubi gba ya ɛrɛn bani banua bakigbɨra mbu bokowu bɛ na reŋunɛ! Nsu kunku minyɛŋɛ kɔfɛ bu. 43Kegbu kukewu nci bani ɛban banua bakɔfɛrɛ nu koju na anu, bakɨlɛ nu, na ɛyɔ nanjinɛ. 44Kubakubɛ nu mɨnɛ baŋua bani banua. Rɛta tumdinɛ birebirɛ ɔcɛmɛ resuŋɛ, ndi minkicɛ kegbunci Ɛbrɔkpabi ewu kɔnyaŋɛ nu.”
Jisɔs okpu bacɛŋɛ rɛfɨn na Ɛtɔ-Ɛbrɔkpabi
(Mt 21:12-17; Mk 11:15-19; Jn 2:13-22)
45Ndi Jisɔs ɔnɔ rika Ɛtɔ-Ɛbrɔkpabi, ɔbɨnɛ kokpu bani mbɛ bacɛŋɛ rɛfɨn rika. 46Mɨnɛ ɔkanɛ bɛ ya, “Barɛ ya, Ɛtɔ-Ɛbrɔkpabi kuetumɛ ɛtɔ njɔm.’ Nsu mincimɛ ji ɛra kwa baji baŋuɛ babubɛ.”
47Mɨnɛ reyi nandinɛ Jisɔs ɔkpɛbɛ na Ɛtɔ-Ɛbrɔkpabi. Nsu bani retu bajɔmɔ-kɔya, bakpɛbɛ Ibina Mosis, mɨnɛ na bani retu bani Jus baduga koŋu mɔ.
48Nsu bakiyɛ bafɛ kɛfɔŋ kosi mbu batimanɛ, ndi bani bayumɛ ratu na ramu ramɔ sɛnsɛn kegbu.
اکنون انتخاب شده:
Luk 19: Olulumo-Ikom
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
