Luk 18
18
Rɛkana ɔwanɛ ekud na ɔyɛrɛ ratiba
1Jisɔs otuba yɛ rɛkana ɔjɛ banyɛgɛ mɔ, Kɔkpɛbɛ bɛ ya barɔbɔ njɔm sɛnsɛn kegbu esikafa botima bɔbɛ bɔkatɔrɛ. 2Ɔkanɛ bɛ ya, “Na rɔrɛ dunɛ ɛfɔnɔ ɔyɛrɛ ratiba ŋɔ ɔbɔ okifɔnɔ bofu Ɛbrɔkpabi mɨnɛ okifɔnɔ rejubi na bani. 3Mɨnɛ ɛfɔnɔ ɔwanɛ ekud na rɔrɛ kandu ŋɔ osusu oŋuɛ ɛyɛ ɛmɔ ɔkpɔlɛ mɔ ya, ‘Yɛrɛ itiba jɛ mi.’
4Na kɛgbanta kegbu ɔyɛrɛ ratiba ŋɔ ɔkɨna. Nsu na kekurɛ kɛtɨbi ɔkanɛnɛ ya, ‘Tum ndi mbɔ nkifɔnɔ bofu Ɛbrɔkpabi mɨnɛ nkifɔnɔ rejubi na bani, 5ndi ɔwanɛ ekud ŋɔ ɔbɔ onyiɛ mi ŋɔ mani nyɔgɛ ekunɛ na rɔcɛ, kunsi gbanambunɛ mbu bɔyɔmɛ bɔjɛ ya nsi nyɛrɛ itiba iyiba mɔ na esikafa okogowu ɔjɛŋɛ mi kebura retu.”
6Mɨnɛ Ɔkɔ-Rokuku ya, “Fugɛ mbu kekukubi ɔyɛrɛ ratiba ŋɔ ɔtanɛ. 7Minɛ Ɛbrɔkpabi ɛyɛrɛ itiba iyiba bani bamɔ mbɛ barɔbɔ njɔm bajɛŋɛ ji jaga na jɔ-ɛ? Aji kuekubɛ kegbu kɔnyaŋɛ bɛ-ɛ? 8Nkanɛ nu, aji kuɛyɛrɛ itiba iyiba bɛ mɨnɛ fɨrifɨri. Nsu Wɔ Oni kuɔfɛ renyiɛ-etima na rokuku ara owu-ɛ?”
Rekana orumanɛ Farisi na ɔtama bagbuga-retu
9Jisɔs otuba rɛkana ndi ɔjɛ bani mbɛ bafɛnɛ ɛkpaju mɨnɛ barɔŋɛ bani bajuju kpaab. 10“Barumanɛ bafa barua na Ɛtɔ-Ɛbrɔkpabi kɔrɔbi njɔm, ŋɔnɛ Farisi ŋɔka ɔtama bagbuga-retu. 11Orumanɛ Farisi ɔbara nyaŋɛnyaŋɛ na ɛkpaju ɛmɔ ɔrɔbɔ njɔm ɔmɔ ya, ‘Ɛbrɔkpabi, nsamɛ wu ndi nkitumɛ aya bani bajuju, nkifɔnɔ ewud, nrakɔŋ na resi remia, nyɔmɛ na babanɛ bani aya bani bajuju. Nsamɛ wu ndi nkitumɛ aya ɔtama bagbuga-retu ŋɔ faka. 12Nkarɛnɛ ŋbɔ rayi rafa na rɛfɨn mɨnɛ njɛŋɛ wu rɛjɛ remia na gbanambunɛ mbu nfɔnɔ na ogbuga naŋɔnɛ ŋɔ nfɔnɔ kɛmanci ɛyɔmɛ ɛjɛ.’
13Nsu ɔtama bagbuga-retu ɔbari ɛmɔ ka kɛgbanta ɛyɔ, okifɛ ya amɔ ofu ŋɔ obirɛ rɔsɔ ɔrɔ kaju, nsu ɔlɨba kɔbɔ na bikɨm ya, ‘Ɛbrɔkpabi, fɔnɔ erun na ami osi-bobi!’
14Jisɔs ya, ‘Nkanɛ nu,’ Ɔtama bagbuga-retu mɔ ɔra na ɛkɨmaŋba na Ɛbrɔkpabi ndi ɔgba, orumanɛ Farisi nɛ. Bani mbɛ babirɛnɛ bɔkpaju bɔbɛ kubatuɛ bɛ, mɨnɛ mbɛ batuɛnɛ bɔkpaju kubabirɛ bɛ.”
Jisɔs oŋunɛ bimbɔ
(Mt 19:13-15; Mk 10:13-16)
15Bani bajuju baŋuɛ na bɔ babɛ ya Jisɔs origɛ bɛ ibɔ oŋunɛ bɛ. Nsu ndi banyɛgɛ mɔ bafɛ mbu basiŋɛ, batunɛ bɛ ya bakogowu na bɔ babɛ. 16Nsu Jisɔs ojia bɔ kambɛ ɔrɔbɔnɛ na ɛkpaju mɨnɛ ɔkanɛ ya, “Sugɛ bimbɔ bawu ɛyɛ emia, katunɛ bɛ, fɛŋɛ rɔrɛ-rɛkɨm Ɛbrɔkpabi rɔyɔmɛ rɔjɛ bani aya mbɛ. 17Nkanɛ nu kpikpɛ, oni naŋɔnɛ ŋɔ ɔbɔ okitama rɔrɛ-rɛkɨm Ɛbrɔkpabi aya winwɔ ɔnɔŋɛ du.”
Ɔfɔnɔ bagbuga na rɔrɛ-rɛkɨm Ɛbrɔkpabi
(Mt 19:16-30; Mk 10:17-31)
18Ɔkɨmkɨm oni Jus ɔsɨna Jisɔs ya, “Brika ɔkpɛbɛ, nkɔkosi nyan nfɔnɔ rokpin ndu najunaju?”
19Jisɔs ɔsɨna mɔ ya, “Bu na ajia mi ya brika oni?” “Oni ɔra ŋɔ oyibayiba ekicia Ɛbrɔkpabi igbɛ. 20Agbɨri Ibina Ɛbrɔkpabi: ‘Kayɔmɛ na ɔwa oni; kaŋua oni; kaji kaji; katanɛ bawu abaŋa bani; jigɛ mintɛ na minka ɔyɛ.’ ”
21Orumanɛ kaŋɔ ɔkanɛ Jisɔs ya, Nyɔgɛ Ibina nji fɛb bɨnɛ ndi nra winwɔ.”
22Ndi Jisɔs ofugɛ mbu, ɔkanɛ mɔ ya, “Esu gbabunɛ mbu bɔyɔmɛ bɔjɛ ya asi. Kwɛ gbanambunɛ mbu afɔnɔ ajɛ baram bagbuga kambɛ, kuafɔnɔ nsɔl na rɔrɛ Ɛbrɔkpabi; Wu yɛ nyɛgɛ mi.”
23Nsu ndi oni ŋɔ ofugɛ mbu, ɛkpaju ɛyɛ mɔ ndi ɔfɔnɔ birɛ jɔgjɔg. 24Jisɔs ɔrɔ mɔ sii ɔfɛ ya etima ekirɔmɔ mɔ mɨnɛ ɔkanɛ ya, “Ɛra gba kejijɔ na bani mbɛ bafɔnɔ ogbuga kɔnɔ na rɔrɛ-rɛkɨm Ɛbrɔkpabi! 25Ɛra gba ŋɔrɔŋɔrɔ na eti nji ɛsɔgɛ rasua koci na rɛma aga ecia oni ŋɔ ɔfɔnɔ ogbuga kɔnɔ na rɔrɛ-rɛkɨm Ɛbrɔkpabi.”
26Bani mbɛ bafugɛ kɔtanɛ nku basɨna, “Yɛnɛ yɛ mɔ ɔkɔsɔri?”
27Jisɔs ɔfɛlɛ bɛ ramu ya, “Mbu oni ɔbɔ ɔyɛŋɛ kosi Ɛbrɔkpabi esiŋɛsiŋɛ.”
28Pita ɔkanɛ mɔ ya, “Resugɛ gbanambunɛ rɛfɔnɔ kɔnyɛgɛ wu!”
29Jisɔs ɔkanɛ bɛ ya, “Mɨnɛ nkanɛ nu kpikpɛ, oni ɔra ŋɔ osugɛ ɛtɔ ɛmɔ, ɔwa, bama barumanɛ, bama babanɛ, britɛ na brika, bɔ, kotugi Ɛbrɔkpabi na rɔrɛ-rɛkɨm Ɛbrɔkpabi 30Kunku na rokuku ndu, Ɛbrɔkpabi kuɛjɛ bani mbɛ birɛ ecii becia mbi basugɛ ɛyɛbirɨma. Mɨnɛ na kɛsɛ nci kekowu, kubakpina najunaju na Ɛbrɔkpabi.”
Jisɔs ɔtanɛ ɔbaŋa rɔbɔ rɔmɔ okwɛ
(Mt 20:17-19; Mk 10:32-34)
31Jisɔs ɔbɛ banyɛgɛ mɔ iti jubi na ifa oruŋɛ na kɔba mɨnɛ ɔkanɛ bɛ ya, “Fugɛ nu! Rekoru Jɛrusalɛm, kwa gbanambunɛ mbu bakanɛ-rotuma Ɛbrɔkpabi barɛ babaŋa Wɔ Oni bɔkɔjagi kɛmanci barɛ. 32Kubasɛ mɔ ibɔ bajɛ bani Jɛntail, mbɛ bakɔsɔŋ mɔ, basɛgɛlɛ mɔ mɨnɛ batu mɔ rarɔn. 33Kubadu mɔ mɨnɛ baŋua mɔ. Ara ɔyɔmɛ rayi rataa na kɔba kuofiɛ na rɔbɔ.”
34Nsu banyɛgɛ mɔ bakijɔɛ mbu Jisɔs ɔra ɔtanɛ. Retu kɔtanɛ rɛra ŋɨbaŋɨba, mɨnɛ bakigbɨra mbu Jisɔs ɔtanɛ ɔbaŋa.
Jisɔs ɔgbana ɔjagajɛnɛ ŋɔ ɔrɛŋɛ rɛrɛ
(Mt 20:29-34; Mk 10:46-52)
35Ndi Jisɔs okokunɛ Jɛriko, ɔjaga-jɛnɛ otum na kɔba ɛyɔ ɔrɛŋɛ rɛrɛ. 36Ndi ofugɛ bani ecii baciŋɛ, ɔsɨna, “Bu bɔjaga?” 37Bakanɛ mɔ ya, “Jisɔs ŋɔ osi Nasarɛd mɔ ociŋɛ.”
38Ɔjaga-jɛnɛ ŋɔ ɔsɛ okuga, “Jisɔs! Wɔ Debid, fɔnɔ erun na ami!”
39Bani mbɛ bacɛŋɛ ɛyɛrɔsɔ Jisɔs bakanɛ mɔ ya otumɛ ŋbam. Nsu ɔsɛ otibɛ na remu rɛrɛnɛ, “Wɔ Debid, fɔnɔ erun na ami!”
40Jisɔs ɔbara, ya, bajɛ mɔ ɔjaga-jɛnɛ kaŋɔ. Ndi ɔjaga jɛnɛ kaŋɔ owu kunɛ, Jisɔs ɔsɨna mɔ ya, 41“Aduga ya nsi bu njɛ wu?” Ɔjaga-jɛnɛ kaŋɔ ɔkanɛ mɔ ya, “Ita, nduga mɔ ŋbɨnɛnɛ nfɛ ɛyɔ.”
42Jisɔs ɔkanɛ mɔ ya, “Fɛ yɛ! Renyiɛ-etima rɛyɛ rɛgban wu.” 43Ɔmɛ kandi ɔfɛ ɛyɔ, mɨnɛ ɔnyɛgɛ Jisɔs, ɔsamɛ Ɛbrɔkpabi. Ndi bani mbɛ banyɛgɛ Jisɔs bafɛ mbu bɔjaga, abɛ fɛb baka Ɛbrɔkpabi.
اکنون انتخاب شده:
Luk 18: Olulumo-Ikom
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
