Yohani 8

O Ma'odangay a Fafahiyan

[7.53 Itiyasato paytmek sato cangra a minokay i loma' no tireng. 1Tayra sato ci Yis i Olif a lotok. 2Yo dafak sato i, maratar ci Yis a miliyaw a tayra i Fangcalay Pita'ongan. Miraod i Cingraan ko finawlan a ma^min. Saka, aro' sa ci Yis a pasifana' i cangraan. 3Itiya i, kriden no pasifana'ay to Rikec ato Farisay a tamdaw ko ccay a fafahiyan to nirpetan i nika 'odang ningra. Patirengen nangra cingra i sifo' nangra. 4Pasowal sa cangra i ci Yisan, <<Singsiaw, o nirpetan i nika 'odang ningra konini a fafahiyan. 5O sowal ni Mosi i Rikec a palimo'ot i titaanan i, <O tatkolen to fokloh a mipatay ko matiniay,> saan. Ano hatira i, maan saan ko harateng iso,>> han nangra. 6O sakasaan nangra i, o sapikilimaw nangra to patlac no sowal ni Yis. Ta ira ko malosapakokot nangra to dmak ni Yis. Nikawrira, roho sa ci Yis. O tarodo' Ningra ko sapitilid Ningra i sra.

7Nikawrira, caay pitolas cangra a milicay i ci Yisan. Saka, lowad sato ci Yis a pasowal i cangraan, <<Ano cima namo ko awaay ko raraw i, kaoya a tamdaw ko sa'ayaway a mitkol to fokloh tonini a fafahiyan,>> han Ningra. 8Ta miliyaw haca ci Yis a romoho a mitilid i sra. 9Mitngil cangra tonini a sowal i, mahkimato'asay sato a mahkaccaccay a milaliw. I ikor to i, dengto ci Yis atoya fafahiyan ko 'osaw a tomirengayho itira. 10Lowad sato ci Yis a pasowal toya fafahiyan, <<Talacowaay koya tamdamdaw? Awaay ko pastekay i raraw tisowanan haw?>> han Ningra.

11Pasowal sa koya fafahiyan, <<Singsiaw, awaay,>> han ningra.

Saka, sowal sa ci Yis, <<Halo Ako a caay pastek i raraw tisowanan. Olili. Akato piliyaw a ciraraw,>> han Ningra.]#8.11 I sa'ayaway a katlangay a cudad i, awaay kona 7.53 ato 8.1-11 a tosir i salaloma' nonini a [ ]. Nikawrira, i roma a katlangay a cudad i, matli kona tosir i kaikor no Yohani 21.25. O roma haca a katlangay a cudad i, matli kona tosir i kaikor no Luka 21.38. O roma a katlangay a cudad i, matli kona tosir i kaikor no Yohani 7.36.

O Likat no Hkal ci Yis

12Pasowal haca ci Yis i cangraan, <<O likat no hkal Kako. O mitooray i Takowanan a tamdaw i, caayto ko raromakat i to'manay. O mamapatdi no likat ko 'orip ningra,>> han Ningra.

13Pasowal sa ko Farisay a tamdaw, <<Kiso ko pawacayay to pakayniay i tisowanan saka, awaay ko ^poc nora pipawacay iso,>> han nangra.

14Paca'of sa ci Yis a pasowal i cangraan, <<Ano Kakokako ko mipawacayay to pakayniay i Takowananto i, so'linay kora sowal Ako. Nawhani mafana' Kako to nika o nai cowaay Kako ato nika o tatalacowa Kako. Mafokil kamo to nika o nai cowaay Kako ato nika o tatalacowa Kako. 15Pakaynien namo i no tamdawan a misawkit to tamdaw. Caayay pisawkit Kako i cimacimaan. 16Nikawrira, ano o mamisawkit Kako i, mo^celay ko pisawkit Ako. Nawhani caay ka ccay Kako. Tatosa Kami ato miocoray i Takowanan a Wama a misawkit. 17O sowal a matilid i Rikec namo i, ano tatosa ko pawacayay i, so'linay koya wacay saan. 18O pawacayay Kako to pakayniay i Takowanan. Halomiocoray i Takowanan a Wama a mipawacay to pakayniay i Takowanan,>> han Ningra.

19Saka, licay sa cangra ci Yisan, <<I cowa ko mama iso?>> han nangra.

Paca'of sa ci Yis, <<Caay ka fana' kamo i Takowanan. Caay ka fana' kamo to Wama Ako. Ano mafana'ay kamo i Takowanan i, kona mafana' kamo to Wama Ako,>> han Ningra.

20Onini a sowal ni Yis i, o nisowalan Ningra i tatihi no pakingkingan a hako yo pasifana' i Fangcalay Pita'ongan. Nikawrira, itiya i, awaay ko mirpetay i Cingraan, nawhani caho ka raod ko romi'ad Ningra.

Caay ka Nga'ay Kamo a Tayra i Katayraan Ako

21Pasowal haca ci Yis i cangraan, <<O mamiliyas Kako i tamowanan. Itiya i, o mamikilim kamo i Takowanan, nikawrira, o mamapatay kamo to nika ciraraw namo. Caay ka nga'ay kamo a tayra i katayraan Ako,>> han Ningra.

22Pasowal sa ko kakrikridan no Yutaya a tamdaw, << <Caay ka nga'ay kamo a tayra i katayraan ako,> yasanay a sowal ningra i, o sakakinapatayaw ningra hakiya?>> saan.

23Pasowal ci Yis i cangraan, <<O no i la^noay kamo, o no i faeday Kako. O no hkalan kamo. O caay ko no hkalan Kako. 24Orasaka, o mamapatay kamo i nika cirarawho namo, saan ko sowal Ako i tamowanan. Ano caay paso'lin kamo to nika <O misatapangay o milahciay a Kawas> Kako i, so'linay o mamapatay kamo to nika ciraraw namo,>> han Ningra.

25Licayen nangra ci Yis, <<O maan kiso?>> han nangra.

Pasowal sa ci Yis, <<Mahrekto Kako a pasowal i tamowanan i 'ayaw.#8.25 Mahrekto Kako a pasowal i tamowanan i 'ayaw -- ano ^ca i, mimaan haca Kako a pasowal i tamowanan. Orira Kako. 26Adihayho ko sasowalen Ako ato tatoro'en Ako i tamowanan. Nikawrira, deng o nisowalan no miocoray i Takowanan ko sasowalen Ako i tamdamdaw. Nawhani so'linay koya miocoray i Takowanan,>> han Ningra.

27Caay ka fana' cangra to nika o Wama ko nisowalan ni Yis. 28Saka, pasowal sa ci Yis i cangraan, <<Ano maca'itto namo ko Wawa no Tamdaw i, itiyato a mafana' kamo to nika <O misatapangay o milahciay a Kawas> Kako. Itiya a mafana' kamo to nika awaay ko ccaccay aca a nidmakan Ako to nano Mako a harateng ato nika deng o nipasifana'an no Wama i Takowanan ko sasowalen Ako. 29Mikapot i Takowanan ko miocoray i Takowanan. Caay laliwen Ningra Kako a pakaccay. Nawhani sahto o kalipahakan Ningra ko dmak Ako,>> han Ningra.

30Yo pasowal ci Yis tonini i, 'aloman ko paso'linay i Cingraan.

O Mapakoniraay ato Malakoliay

31Saka, pasowal sa ci Yis toya paso'linay i Cingraan a Yutaya a tamdaw, <<Ano mararid kamo a ma'imer to sowal Ako i, o so'linay a nisawawaan Ako kamo. 32Ta mafana' kamo to so'linay a sowal no Kawas. Onini a sowal no Kawas ko mamitdal tamowanan a pakonira,>> han Ningra.

33Pasowal sa cangra, <<O tloc ni Apraham kami. Caayho ka lakoli no nimanima kami. Nawiro, <O mamatdal kamo,> saan ko sowal iso, o maan ko tatodong nonini a sowal saw?>> han nangra.

34Paca'of sa ci Yis i cangraan, <<So'linen Ako a somowal kamo, o koli no raraw ko mararaway a tamdaw a ma^min. 35Tinako sa, caay ka cipinang ko nika halafin no koli a tamdaw a maro' i loma'. O wawa a ccay ko mida'ocay a maro' i loma'. 36Orasaka, ano matdal no Wawa no Kawas kamo a mapakonira i, o so'linayto a mapakoniraay kamo. 37Mafana' Kako to nika o tloc ni Apraham kamo. 'Arawhani, sapipatayan kamo i Takowanan. Nawhani caay pakifaloco'en namo ko sowal Ako. 38O nipahapinangan no Wama Ako i Takowanan ko nisowalan Ako tamowanan. Kamo sa i, o nisowalan no mama namo i tamowanan ko nidmakan namo,>> han Ningra.

39Paca'of sa cangra ci Yisan, <<Ci Apraham ko mama niyam,>> han nangra.

Pasowal sa ci Yis i cangraan, <<Ano o wawa ni Apraham kamo i, kona haenen namo o ni Apraham ko dmak namo. 40O paratohay Kako i tamowanan to nano sowal no Kawas i Takowanan a so'linay a sowal. 'Arawhani, sapipatayan kamo i Takowanan. Caay ka matira ko ni Apraham a dmak. 41O mido^doay kamo to dmak no mama namo,>> han Ningra.

<<Dengan o Kawas a ccay ko Wama niyam. Caay ko focod kami,>> han nangra.

42Pasowal sa ci Yis i cangraan, <<Ano so'linay o Wama namo ko Kawas i, kona maolah kamo i Takowanan. Nawhani o nai Kawasay Kako a masadak a tayni. Caay ko no Mako a harateng ko sakatayni Ako, o niocoran no Kawas Kako. 43Nawiro mafokil kamo to sowal Ako saw? O nika ^ca ka olah namo a mitngil to sowal Ako. 44O Palafoay ko mama namo. Sapido^doan kamo to 'anof no mama namo. O mipatayay to tamdaw ciira nai satapangan, o miliyangay ciira to so'linay a sowal nawhani awaay i ciiraan ko so'linay a dmak. O pinangan nira ko nipisamangah a somowal. Nawhani o misamangahay ciira, o tatapangan no mangah ciira. 45Nikawrira, o nika somowal Ako to so'linay a sowal ko saka^ca pipaso'lin namo i Takowanan. 46Cima namo ko iraay ko wacay to nika ciraraw Ako saw? Ano o so'linay ko sowal Ako i, nawiro caay paso'lin kamo Takowanan saw? 47Mitngil to sowal no Kawas ko no Kawas a tamdaw. Caay ko no Kawas kamo saka, caay pitngil kamo,>> han Ningra.

Ci Yis aci Apraham

48Paca'of sa ko kakrikridan no Yutaya a tamdaw a pasowal ci Yisan, <<Caay ka tama ko sowal niyam toya o Samariya a tamdaw kiso. O maaro'ay no palafoay kiso yasanay a sowal saw?>> han nangra.

49Pasowal sa ci Yis, <<Caay ko maaro'ay no palafoay Kako. Mangodoay Kako to Wama Ako. Nikawrira, misamsam kamo Takowanan. 50Caay pilongoc Kako to sakatadamaan Ako, nika ira ko ccay a patadoay i Takowanan a milongoc ta padamaen Ningra Kako a pa'ading. 51So'linen Ako a somowal kamo. Ano cima ko ma'imeray to sowal Ako i, tahada'oc a caay ka patay koya tamdaw,>> han Ningra.

52Pasowal sa cangra i Cingraan, <<Mahapinangto niyam i matini ko nika o maaro'ay no palafoay kiso. Mapatayto ci Apraham. Mapatayayto ko pali'ayaway to sowal no Kawas. Nikawrira, o sowal iso i, <Ano cima ko ma'imeray to sowal ako i, tahada'oc a caay ka patay koya tamdaw,> saan. 53Mapatayto ko mama ita ci Apraham. Mapatayto ko pali'ayaway to sowal no Kawas. Ikakaay ni Apraham ko nika tadamaan iso saw? O maan kako sa kiso to tireng iso saw?>> han nangra.

54Paca'of sa ci Yis, <<Ano Kako ko palatadamaanay to tireng Ako i, awaay ko ^poc no nika tadamaan Ako. O Wama Ako ko palatadamaanay Takowanan. Cingra koya Kawas niyam hananay namo. 55Nikawrira, caay ka fana' kamo i Cingraan. Mafana'ay Kako i Cingraan. Caay ka fana' Kako i Cingraan ano han Ako kamo i, o misamangahay Kako a matiya o amo. Nikawrira, o mafana'ay Kako i Cingraan. O ma'imeray Kako to sowal Ningra. 56Wata: ko halamham no tato'asan namo ci Apraham to katalahkalan Ako a romi'ad. Ma'araw ningra konini i, salipahak sa cingra,>> han ni Yis.

57Pasowal sa koya kakrikridan no Yutaya a tamdaw i ci Yisan, <<Caho ka lima a polo' ko mihcaan iso i, ma'arawto iso ci Apraham saw?>> han nangra.

58Paca'of sa ci Yis, <<So'linen Ako a somowal kamo, i 'ayaw no nika hofoc ci Aprahaman i, <O iraayto Kako,> >> han Ningra.

59Ala sato cangra to fokloh to sapitkolaw i ci Yisan. Nikawrira, limek sato ci Yis ta masadak nai Fangcalay Pita'ongan.

انتخاب شده:

Yohani 8: AMIS2019

های‌لایت

به اشتراک گذاشتن

کپی