Yohani 7

Ci Yis ato Salikaka Ningra

1Nanoya, mirakat ci Yis a mitaliyok to Kalili. Sapipatayan cingraan ko kakrikridan no Yutaya a tamdaw saka, caay ka sapirakatan ci Yis a mitaliyok to Yutaya. 2Mangatato ko pisalisinan no Yutaya a tamdaw to no Talo'an a Lisin. 3Saka, pasowal i ci Yisan ko salikaka Ningra, <<Piliyas kiso nanitini a tayra i Yutaya ta ma'araw no nisawawaan ko dmak iso. 4Ano mangalay ko tamdaw a patalahkal to nika tadamaan ningra i, caay pisimed cingra to dmak ningra. Tona midmak kiso to matiniay a dmak saka, o nipipatalahkal iso i 'alomanay to dmak iso ko nga'ay,>> han nangra. (5Halosalikaka ni Yis a caay paso'lin i cingraan saka, mahaen ko sowal nangra.)

6Pasowal sa ci Yis i cangraan, <<Caayho ka raod ko kanga'ayan Ako a midmak. Nikawrira, mararid ko kanga'ayan namo a mimaamaan. 7Caay ko mamaka'intel no tamdamdaw kamo. Nikawrira, maka'intel Kako. Nawhani o pasowalay Kako to tatiihay a dmak nangra. 8Katayra kamo i pisalisinan. Caay ko tatayra Kako imatini#7.8 Caay ko tatayra Kako imatini -- ira i roma a katlangay a cudad a matilid, Caay ka tayra Kako.. Nawhani caho ka raod ko romi'ad Ako,>> han Ningra. 9Saka, itira saho Cingra i Kalili.

O Pikapot ni Yis to Pisalisinan no Talo'an a Lisin

10Nanoya, i ikor no nika tayra no salikaka Ningra i pisalisinan i, dokdok sa ci Yis a tayra. Caay patalahkal Cingra to tireng. 11Itiya i, mikilim ko kakrikridan no Yutaya a tamdaw ci Yisan i pisalisinan. <<I cowa cingra hakiya?>> saan cangra.

12Malaliyaliyang ko finawlan a somowal to pakayniay ci Yisan. O sowal no roma a tamdaw i, <<O nga'ayay a tamdaw cingra,>> saan. O sowal no roma a tamdaw i, <<Caay, o pamoraraway cingra to finawlan,>> saan. 13Nikawrira, matalaw ko finawlan to kakrikridan no Yutaya a tamdaw saka, awaay ko patalahkalay a somowal to pakayniay i ci Yisan.

14Yo sasifo'anto no nipisalisinan i, itiya a macokacok ci Yis a tayra i Fangcalay Pita'ongan a pasifana'. 15Safahka' sa ko kakrikridan no Yutaya a tamdaw a mitngil to pipasifana' Ningra. Sowal sa, <<Caay ko nano mitiliday konini a tamdaw. Nawiro hatirato ko fana' ningra saw?>> saan cangra.

16Saka, pasowal sa ci Yis i cangraan, <<O sowal Ako a pasifana' i tamowanan i, caay ko no Mako, o no miocoray i Takowanan a Kawas. 17Ano mangalay ko tamdaw a mido^do to nafaloco'an no Kawas i, o mamafana' koya tamdaw to nika o nai Kawasay konini a pipasifana' Ako hakiya, ano ^ca i, o nano Mako a niharatengan hakiya? Mafana' koya tamdaw. 18Ano o no tireng a harateng ko nitooran no tamdaw a pasowal i, o milongocay cingra to sakatadamaan ningra. Nikawrira, o milongocay to sakatadamaan noya miocoray i Takowanan a Kawas i, o so'linay a tamdaw, o awaay ko mangah ningra. 19Mapaflito ni Mosi kamo to Rikec kyami? Nawiro sapipatayan kamo i Takowanan saw? Awaay ko ccaccay aca a ma'imeray namo to Rikec,>> han Ningra.

20Pasowal sa ko finawlan, <<O maaro'ay no palafoay kiso. Cima ko sapipatayananay tisowanan saw?>> han nangra.

21Paca'of sa ci Yis, <<Ccay aca ko nidmakan Ako i, fahka' kamo a ma^min. 22Papitooren ni Mosi kamo to no krit a lisin. (Nikawrira, caay ka ci Mosi ko misatapangay, o tato'asan namo ko misatapangay tonini a dmak.) Midmak kamo tonini a krit a lisin to Pasla'an a Romi'ad. 23Ano o saka^ca ka cicih no Rikec ni Mosi ko pidmak to krit a lisin i Pasla'an a Romi'ad i, nawiro makter kamo to nipiadah Ako to adadaay a tamdaw i Pasla'an a Romi'ad saw? 24Aka ka o papotal aca ko nengnengen namo a mihapinang to tamdaw. Ka o mo^celay ko dmak namo a mihapinang a misawkit to tamdaw,>> han Ningra.

Ci Kristo Cingra Hakiya?

25Orasaka, sowal sa ko papinapina no i Yirusalimay a tamdaw, <<Caay hakiya konini a tamdaw ko nisa'imeran no kakrikridan no niyaro' to sapipatayaw? 26Nengnengen, caay paskaska cingra a pasowal. Awaay ko milalangay to nika somowal ningra. Latek o nika fana' no kakrikridan to nika ci Kristo cingra haw? 27Nikawrira, ano taynito ci Kristo i, awaay ko mamafana' to nika nai cowaay a tamdaw cingra. Nikawrira, mafana' kita to nika o i cowaay a tamdaw konini a tamdaw,>> saan.

28Itiya yo pasifana' ci Yis i Fangcalay Pita'ongan i, satata'ang sa Cingra to ngiha' a somowal, <<Mafana' kamo i Takowanan saw? Mafana' kamo to nika o nai cowaay Kako saw? Caay ko no Mako a harateng ko sakatayni Ako. O niocoran no so'linay a Kawas Kako. Nikawrira, caay ka fana' kamo i Cingraan. 29Mafana' Kako i Cingraan. Nawhani o nanitiraay Kako, o niocoran Ningra Kako,>> saan.

30Saka, sapirpetan saan cangra ci Yisan. Nikawrira, awaay ko pakamayay i Cingraan. Nawhani caho ka raod ko romi'ad ni Yis. 31'Aloman ko paso'linay noya finawlan i ci Yisan. Sowal sa cangra, <<Ano tayni ci Kristo i, ikaka no nidmakan nonini a tamdaw ko nika adihay no nidmakan ningra a kafahka'an a dmak hakiya?>> saan.

O Pirpet no Midipangay a Tayring ci Yisan

32Matngil no Farisay a tamdaw ko nika laliyaliyang no finawlan to pakayniay i ci Yisan. Saka, ocoren nangra ato kakridan no citodongay to ta'ong ko midipangay a tayring a papirpet i ci Yisan. 33Pasowal sa ci Yis, <<Caayto ka hakowa ko romi'ad Ako a mikapot i tamowanan ta tayra Kako i miocoray i Takowanan. 34O mamikilim kamo i Takowanan, nikawrira, caay ko mamatama namo Kako. Nawhani caay ka nga'ay kamo a tayra i kaitiraan Ako,>> han Ningra.

35Sasowasowal sa ko kakrikridan no Yutaya a tamdaw, <<O tatalacowa konini a tamdaw iro caay ko mamatama namo kako, saan ko sowal ningra hakiya? O tatayra cingra i maliwasakay a finawlan ita i niyaro' no Krisiya a pasifana' to Krisiya a tamdaw hakiya? 36O maan ko tatodong noya <O mamikilim kamo i takowanan. Nikawrira, caay ko mamatama namo kako,> ato <Caay ka nga'ay kamo a tayra i kaitiraan ako,> yasanay a sowal Ningra hakiya?>> saan.

O Mafowakay a Sakaci'orip a Nanom

37I saikoray a romi'ad no pisalisinan, o satadamaanay a romi'ad i, tireng sa ci Yis a milkal a pasowal, <<Ano cima ko maso'away a tamdaw i, katayni i Takowanan a minanom. 38O paso'linay a miti'er i Takowanan a tamdaw i, mato sowal i Fangcalay Cudad ko nika matiya o nemnem a mafowak ko sakaci'orip a nanom nai faloco' noya tamdaw#7.38 Ano cima ko maso'away a tamdaw i ... sakaci'orip a nanom nai faloco' noya tamdaw -- ano ^ca i, Ano cima ko maso'away a tamdaw i, aka ^ca katayni i Takowanan. 38 Ano paso'lin ko cima i Takowanan i, aka ^ca katayni a minanom. O sowal i Fangcalay Cudad, <<O mamafowak nai faloco' ningra a masadak ko ma'oripay a nanom>>.,>> saan. 39Onini a sowal i, o pipali'ayaw ni Yis a pasowal to pakayniay i Fangcalay 'Adingo, o lalayapen no paso'linay ci Yisan a tamdaw. Itiya i, caho ka ocoren no Kawas ko Fangcalay 'Adingo. Nawhani caho ka cakat ci Yis a ci'dil.

O Rawraw no Finawlan to Pakayniay i ci Yisan

40Matngil no romaroma a finawlan konini a sowal i, sowal sa, <<So'linay onini koya pali'ayaway to sowal no Kawas,>> saan.

41O sowal no roma a tamdaw i, <<Ci Kristo Cingra,>> saan.

O sowal no roma a tamdaw i, <<Masadak a mimaan i Kalili ci Kristo. 42O sowal no Fangcalay Cudad i, o tloc ni Tafiti ci Kristo. O hahofocen cingra i Piclihim i niyaro' ni Tafiti saan kyami,>> saan. 43Saka, latosa sato ko finawlan to pakayniay i ci Yisan. 44Sapirpetan ci Yisan ko romaroma nangra. Nikawrira, awaay ko pakamayay i ci Yisan.

Caay Paso'lin ci Yisan ko Kakrikridan no Yutaya a Tamdaw

45Patiko sato koya midipadipangay a tayring a tayra i kakridan no citodongay to ta'ong ato Farisay a tamdaw. Sowal sa cangra toya midipangay a tayring, <<Nawiro caay kriden namo a patayni koya tamdaw saw?>> han nangra.

46Paca'of sa koya midipadipangay a tayring, <<Awaayho ko pasowalay to matiyaay o sowal noya tamdaw,>> han nangra.

47Pasowal sa ko Farisay a tamdaw i cangraan, <<Halo amo a masafana' ningra saw? 48Iraay saw ko cima no kakrikridan no niyaro' ato Farisay a tamdaw to paso'linay ci Yisan? Awaay. 49O matiniay a mafokilay to Rikec ni Mosi a finawlan i, o mama'kak no Kawas!>> han nangra.

50Ira itira ko ccay a kakridan no Yutaya ci Nikotimus hananay. Nao tayraay cingra i 'ayaw i ci Yisan. Sowal sa cingra, 51<<O Rikec no mita i, i 'ayawenho ko pitngil ko pipalita to nano dmak noya tamdaw ta pasteken i raraw, caay ka saan saw?>> han ningra.

52Paca'of sa cangra a pasowal, <<Halo iso a o Kalili a tamdaw saw? Kadkaden ko Fangcalay Cudad. Ta mafana' kiso to nika caay ko mamasadak i Kalili ko pali'ayaway to sowal a tamdaw,>> han nangra.

اکنون انتخاب شده:

Yohani 7: AMIS2019

های‌لایت

به اشتراک گذاشتن

کپی