Yohani 10

O Tinako to Pasirian

1<<So'linen Ako a somowal kamo, o caay paka'adawang no pasirian a micomod, oya lakoit sanay to 'adipel a tamdaw a micomod i, o mitakaway, o mari'angay cingra. 2O pakayraay i 'adawang a micomod i, o pakaenay to siri a tamdaw. 3Mifawah ko misimaway to 'adawang a pacomod cingraan. Mafana' a mitngil ko siri to ngiha' ningra. Tahidangen ningra ko ngangan no siri ningra a mikrid a pasadak. 4Ano mapasadakto ningra a ma^min ko siri ningra i, malasa'ayawayto cingra a romakat, ta tooren no siri cingra. Nawhani mafana' ko siri to ngiha' ningra. 5Caay pitoor ko siri to caay ko kafana'an ningra a tamdaw. Laliwen no siri cingra. Nawhani mafokil ko siri to ngiha' ningra,>> han Ningra.

6Patinakoen ni Yis cangra tonini i, caay ka fana' cangra to tatodong nonini a sowal Ningra.

O Nga'ayay a Pakaenay to Siri ci Yis

7Orasaka, miliyaw haca ci Yis a pasowal i cangraan, <<So'linen Ako a somowal kamo, o 'adawang no pasirian Kako. 8O i 'ayaway Ako a tayni a tamdaw a ma^min i, o mitakaway o mari'angay. Caay pitngil ko siri to sowal nangra. 9O 'adawang Kako. Ano pakayni i Takowanan ko tamdaw a micomod i, o mamapa'orip cingra, manga'ay cingra a micomod a masadak. Pakatama cingra to cirngosay a pipakaenan. 10O sakatayni no mitakaway i, deng o mamitakaw, o mamipatay to siri. Nikawrira, o sakatayni Ako i, o sakaci'orip no siri ato sakalmed no 'orip nangra.

11<<O nga'ayay a pakaenay to siri Kako. Kinafalah sa to 'orip no tireng ko nga'ayay a pakaenay to siri to saki siri Ningra. 12-13O milifonay o caay ko so'linay a pakaenay to siri i, ano paka'araw to nika ira no oles i, siday han ningra ko siri ningra a milaliw, ta lpel hanto no oles ko siri a paliwasak. Caay ko ningra a siri ko nipakaenan ningra. Saka, milaliw cingra. O milifonay aca cingra. Caay ka limla cingra to siri. 14O nga'ayay a pakaenay to siri Kako. Mafana' Kako to no Mako a siri. Mafana' ko siri Ako i Takowanan. 15Malcad tonini, mafana' ko Wama i Takowanan. Mafana' Kako to Wama Ako. Saka, kinafalah sa Kako to 'orip to saki siri Ako. 16Ira ko roma a siri Ako to caay ko nonini a pasirian a siri. Caay ka ^ca o kakriden Ako cangra. O mamitngil cangra to ngiha' Ako. Ta malaccay ko kasaflaw no siri. Ccayto ko pakaenay cangraan.

17<<Caay ka limla Kako to 'orip Ako. Kinafalah sa Kako to 'orip Ako to sakalahci no nafaloco'an no Kawas. Saka, maolah ko Wama i Takowanan. 18Awaay ko mipatayay i Takowanan. Kako ko lonok sanay a kinafalah to 'orip no tireng. Ma^deng Kako a kinafalah tonini. Ma^deng Kako a mipalolol tonini. O nano limo'ot no Wama i Takowanan konini,>> han ni Yis.

19Mitngil ko Yutaya a tamdaw tonini a sowal i, laliyaliyang sato cangra a malatosa. 20Sowal sa ko 'alomanay, <<O maaro'ay no palafoay, o maapaay cingra. Mimaan a mitngil kamo to sowal ningra saw?>> saan.

21Sowal sa ko roma a tamdaw, <<Caay ko sowal no maaro'ay no palafoay konini. Pakaadah ko palafoay to mata no mapohaway a tamdaw saw?>> saan.

Ma'osi ko Yutaya a Tamdaw ci Yisan

22Itiya i, maraodto ko Pikoracan to Pita'ongan a Lisin i Yirusalim. O kasi^nawan itiya. 23Yo romakat ci Yis i Pangpangan ni Solomon hananay i Fangcalay Pita'ongan i, 24likoten no Yutaya a tamdaw ci Yis a somowal i Cingraan, <<Tahacowaen Iso kami a pakahalamham to sapasowalaw Iso to pakayniay i tireng Iso saw? Ano o Kristo Kiso i, pahapinangen kami a pasowal,>> han nangra.

25Paca'of sa ci Yis i cangraan, <<Mapasowalto Ako kamo. Nikawrira, caay paso'lin kamo. Oya nidmakan Ako a ma^min pakayni i 'icel no Wama Ako i, o pawacayay to pakayniay i Takowanan. 26Nikawrira, caay paso'lin kamo. Nawhani caay ko no Mako a siri kamo. 27Mafana' ko siri Ako a mitngil to ngiha' Ako, mafana' Kako i cangraan, mitoor cangra i Takowanan. 28Paflien Ako cangra to mida'ocay a 'orip. Caay ko mamapatay cangra a tahada'oc. Awaay ko mami'afas i cangraan a paliyas nai Takowanan. 29Oya pafliay i Takowanan i cangraan a Wama i, ikaka no kalomaamaan a ma^min ko nika tadamaan Ningra#10.29 Oya pafliay i Takowanan i cangraan a Wama i, ikaka no kalomaamaan a ma^min ko nika tadamaan Ningra -- ira i roma a katlangay a cudad a matilid, O nipaflian no Wama Ako i Takowanan i, ikaka no kalomaamaan ko nika tadamaan., awaay ko paka'afasay cangraan a paliyas nai Wama Ako. 30Nawhani malaccayay Kako ato Wama,>> han ni Yis.

31Sapitkolan haca ko kakrikridan no Yutaya a tamdaw i ci Yisan saka, mitatoy cangra to fokloh. 32Pasowal sa ci Yis i cangraan, <<Adihayto ko nipatiri'an Ako i tamowanan to nipakatayalan no Wama Ako i Takowanan a nga'ayay a dmak. I cowaay nonini a dmak Ako ko tatiihay iro sapitkolan kamo i Takowanan saw?>> han Ningra.

33Paca'of sa koya kakrikridan no Yutaya a tamdaw, <<Caay ko nga'ayay a dmak iso ko sapitkolaw niyam to fokloh i tisowanan. O nipi^pec iso to Kawas ko sakamatini no dmak niyam. Nawhani o tamdaw kiso i, o Kawas kako sa kiso to tireng iso,>> han nangra.

34Pasowal sa ci Yis, <<O sowal no Kawas a matilid i Rikec namo i, <O kawakawas kamo,> saan. 35Caay ko mamalasawad ko Fangcalay Cudad saan ko nika fana' ita. Saka, ano o kawas han no Kawas ko nipatorodan Ningra to sowal Ningra a tamdaw i, 36mangalef Kako o nipili'an no Wama a miocor a patayni i hkal. O Wawa no Kawas Kako han Ako kamo i, nawiro o mi^pecay to Kawas saan kamo Takowanan saw? 37Ano caay pidmak Kako to tayal no Wama Ako i, aka paso'lin i Takowanan. 38Nikawrira, ano o midmakay Kako to tayal no Wama, ano caacaay paso'lin kamo i Takowanan i, paso'linen ko dmak Ako. Ta mafana'to kamo to nika o malaccayayto Kako ato Wama,>> han Ningra.

39Saka, sapirpetan haca cangra ci Yisan. Nikawrira, laliw han ni Yis cangra.

40Ta milacal ci Yis to Yortan a 'alo a tayra i pipaino'an ni Yohani i 'ayaw. Itira sato Cingra a milafin. 41Tayra i ci Yisan ko 'alomanay a tamdaw. Sowal sa cangra, <<Talacowa awaay ko nidmakan ni Yohani to ccaccay aca a kafahka'an, nikawrira, so'linay ko sowal ni Yohani a ma^min to pakayniay tonini a tamdaw,>> saan cangra. 42Saka, sa'aloman sato itira ko paso'linay i ci Yisan.

انتخاب شده:

Yohani 10: AMIS2019

های‌لایت

به اشتراک گذاشتن

کپی