Maku 12

Chishimu chawandimi

(Mat 21:33-46; Luk 20:9-19; Isa 5:1-7)

1Hakutachika kuhosha nawu nayishimu. Nindi, Muntu wumu wadimini itempa danyivinyu, hakukolekaku ikoli, hakupunda ibuku dakukamwina vinyu, hakutuŋa kaposhi, hakudishila akwakudima, hakuya kwituŋa dacheŋi.

2Hachilaaka chavinyu hakutemesha ŋamba kudi akwakudima kulonda atambuluku nyikabu yamwitempa danyivinyu.

3Wena hiyakumukwata, hiyakumweta, hiyakumufuntisha makasakasa.

4Hakuyitemeshela cheŋi ŋamba mukwawu, niyena amutapili kumutu, hiyakumukoŋa chatama.

5Hakutemesha mukwawu, hiyakumujaha. Niamakwawu amavulu, amakwawu ayeteli amakwawu ayijahili.

6Washeli nawumu hohu, yowu mwanindi akeŋayi; nkumininaku hakuyitemeshelayi nindi, Akamwakama mwanami.

7Ilaŋa owu akwakudima hiyakuhosha mukachi kawu nawu, Iwu diyi nswana, inzenu tumujahenu, kulonda wuswana wikali wetwetu.

8Hiyakumukwata, hiyakumujaha, amunatila nihanzi yetempa.

9Dichi owu mwanta wetempa danyivinyu wakela ŋahi? Wakenza nakujilumuna owu akwakudima; itempa danyivinyu wakayinka antu acheŋi.

10Munataŋi mazu amumukanda wajila nawu,

# Mas 118:22-23; Yil 4:11; 1 Pet 2:7 Ilola dalekeli antuŋi,

Dodinekali dasweja kwoloka nankashi dakwiwombu;

11Ichi chafumini kudi MWANTA,

Chakuhayama kumesu etu.

12Akeŋeli #11:18kumukwata, ilaŋa atiyili woma wezaza, muloŋa elukili nawu chishimu ichi natutili etu. Hiyakumushiya, hiyakudiyila kwawu.

Kusonka kudi Kesari

(Mat 22:15-22; Luk 20:20-26)

13Hiyakumutemeshela aFwarisewu amakwawu niakwaHerodi kulonda #Luk 11:54amuti namazu akuhoshayi.

14Chanashikuwu hiyakumwila nawu, Eyi Nkuluŋaŋa, etu tuneluki netu eyi wumuntu walala, hiwatiyaŋa muntu womaku, hiwakamaŋa mesu awantuku, ilaŋa chalala wataŋishaŋa antu njila yaNzambi. Kusonka kudi Kesari chaloŋa, tahindi nehi?

15Tusonkaŋa tahindi tuleki? Ilaŋa yena welukili wufwikiji wawu, hakuyila nindi, Mukuŋesekeladi? Nletelenu idali niditali.

16Hiyakudileta, hakuyila nindi, Ichi chifwikija chanyi, niniji nsona janyi? Wena hiyakumwakula nawu, JaKesari.

17Yesu hakuyila nindi, #Rom 13:7Yuma yaKesari inkenu Kesari; yuma yaNzambi inkenu Nzambi. Hiyakumuhayama nankashi.

Wulu chiwakekala hakusaŋuka

(Mat 22:23-33; Luk 20:27-38)

18Kudi yena hikukwinza aSadusi, elaŋa nawu afu hiyasaŋukaŋaku.

19Hiyakumwihula nawu, Eyi Nkuluŋaŋa, #Kuhit 25:5Mosi watusonekeleli nindi, Neyi manakwamuntu wukufwa, hakushiya mumbanda, kushiya mwana nehi, nindi manakwindi akatambuli owu iŋodindi, akamuvweli manakwindi anyana.

20Kwadiŋi amayala atanu nayedi ivumu dawu dimu; wakusambila wasumbwili iŋodindi, wafwili, kushiya mwana nehi.

21Wamuchiyedi hakumutambula, hakufwa, kushiya mwana nehi; niwamuchisatu chochimu;

22ejima atanu nayedi kushiya mwana nehi. Nkumininaku niyena mumbanda yofwa nikufwa.

23Hakusaŋuka afu wakekala iŋodawumwodihi? Muloŋa ejima atanu nayedi wadiŋi iŋodawu.

24Yesu hakuyila nindi, Chimwabulaŋa kwiluka nyikanda yajila, hela ŋovu yaNzambi, dihu hafumaŋa kuluwa kwenu.

25Hakasaŋuka antu mudi afu, hiyakasumbula hela kusumbukaku, akekala neyi chekalawu aŋelu amwiwulu.

26Kwinza nsaŋu yakusaŋuka afu, kanda muyitaŋaŋahu dehi kumukanda waMosuku? ohu hatenawu chiputa, hahosheliyi Nzambi nayena nindi,

# Kwi 3:6 Ami nidi Nzambi yaAbarahama, niNzambi yaIsaka, niNzambi yaYakoba.

27HiNzambi yawafuku, hiNzambi yawamomi; enu mwaluwaŋa nankashi.

Nshimbi yabadikamu

(Mat 22:34-40; Luk 10:25-28)

28Nsoneki wumu hakwinza, hakutiya chakudihujolawu, welukili nindi #Luk 20:39-40nayakuli chachiwahi, hakumwihula nindi, nshimbi yabadika nshimbi jejima nshimbinyi?

29Yesu hakwakula nindi, Yabadikahu yoyakwila nawu,

# Kuhit 6:4-5 Eyi Isarela, tiyaku; MWANTA Nzambi yetu,

MWANTA wudi wumu.

30Keŋaku MWANTA Nzambi yeyi namuchima weyi wejima,

Nawumi weyi wejima,

Namaaneyi ejima,

Naŋovu jeyi jejima.

31Yamuchiyedi yoyakwila nawu,

# Lev 19:18; Rom 13:9; Ŋal 5:14; Yak 2:8 Keŋaku mukwenu neyi chiwadikeŋa eyi aweni.

Kwosi nshimbi yakubadika ijuku.

32Owu nsoneki hakumwila nindi, Chalala eyi Nkuluŋaŋa; ochu chiwunahoshi neyi yena #Isa 45:21; Kuhit 4:35wudi wumu, kwosi wacheŋi chiŋa yena hohu, wunahoshi chachiwahi.

33Kumukeŋa namuchima wejima, nakashinshi kejima, naŋovu jejima, nakukeŋa mukwenu neyi chiwadikeŋa eyi aweni, #1 Sam 15:22; Hos 6:6; Mika 6:6-8; Mat 9:13; 12:7chabadika nyilambu yakushita yamukuma, niyimuna yakuketula yejima.

34Yesu chanamoniyi yena naakuli namaana, hakumwila nindi, Hiwudi kwakulehi nawanta waNzambuku. Kufuma henohu hikwadiŋi muntu wakwatili wulobu #Mat 22:46wakumwihula chumaku.

Kristu hiMwana kanyi?

(Mat 22:41-46; Luk 20:41-44)

35Yesu chadiŋi #Mat 26:55nakutaŋishayi muTembeli, hakwihula nindi, Ansoneki ahoshaŋa ŋahi nawu Kristu #Mat 9:27hiMwana kaDavidi?

36Yomweni Davidi welili mudi Spiritu Wajila nindi,

# Mas 110:1; Yil 2:34-35; Heb 1:13 MWANTA wamwilili Mwanta wami nindi,

Shakamaku kuchikasa chami chachidiilu,

Nichinamba kayila ayilumbu jeyi hiyadi itanda dakunyendu yeyi.

37Yomweni Davidi wamutenaŋa nindi, Mwanta; indi wukwikala mwanindi ŋahi? Antu amavulu chadiŋi nakumutiyawu hiyakutiya kuwaha.

38Chayitaŋishilaŋayi hakuyila nindi, #Mat 23:1-7; Luk 11:43-54; 20:45-47Babelenu ansoneki, afwila kwendujola namahina akuluka, nikuyimwosha kuwulandilu,

39nikushakama hamatanda alema mushikola, nihayididi yalema kumawija.

40Adyaŋa nimaheta awambanda amfwila, alombelaŋa kulombela kwakudimbana kwakwila lombelele-e; kutanya kwawu kwakabadika.

Mulambu wamfwila

(Luk 21:1-4; Yow 8:20)

41Hakushakama kwatalaŋana nachikasha chakusha mali; hakutala izaza chidikuumbila mali muchikasha, amavulu adiŋi aheta ombililumu mali amavulu.

42Kwenjili kazweŋi, mfwila wamumbanda, hakuumbilamu tumali twanyanya tuyedi, kuyibomba ashika mukadali kamu.

43Hakutambika atumbanji twindi, hakuyila nindi, Nukuyileja chalala nami, iwu mfwila kazweŋi nombilumu yakubadika ejima adi nakuumbila mali muchikasha;

44muloŋa wejima wawu anombilumu yakuyuma yawu yasweja kuvula; ilaŋa iwu mumbanda nombilumu yakuwuzweŋi windi yoyindi yejima yadiŋi yakudihandisha nachu.

اکنون انتخاب شده:

Maku 12: MWW04

های‌لایت

به اشتراک گذاشتن

کپی