Matayo 13
13
I cihwanicizo co mumiza mbeyu
(Mlk. 4:1-9; Lk. 8:4-8)
1Yesu yakawuka mu nyumba yiyo mwizuwa lilyo du, yakawa kubita ku nhumbi ye lilenga, yakekala hasi yakawa kwanza kuwejiza wanhu. 2Ne mapuga mawaha ge wanhu gakamupilima, sunga Yesu yakenjila mu ngalawa, yakekala mumo. Ne wanhu wakawa wemile ku mwejelele we lilenga, 3nayo Yesu yakawa kuwalonjela nghani nyinji mu vihwanicizo, yakutya, “Hulicizenyi ta! U mumiza mbeyu, yalawila ho yayimize i mbeyu yakwe. 4Na lono yamizaga, zinji zikalagala mu nzila, nazo zindeje zikaza zikazilya. 5Nazo zinji zikalagala hono hogali mabwe hono hasina muhangha mwinji. I zimbeyu zene zikota du kamonga, ninga vyono umuhangha wayo si wali wutelile muno hasi. 6Ilizuwa lyali lyeza kuwalika, zikawa kuwomba, na vyono i milela yayo yali si yitumbiye hasi muno muno, hobaho zikawa kunyala. 7Na zinji zikalagala mu mabici ge mamivya mugati, nago i mamivya gago, gakawiluka no kuzititiliza. 8Ninga zinji zikalagala hono howuli u muhangha u muswanu, nazo zikota, no kulela, zinji zikalela mhece igana limonga, zinji makumi mutandatu, na zinji nazo makumi madatu. 9Hulicizenyi ta, mono yena makutu go kuhulicila, ale yahulice!”
I soko yo kwijiziza mu vihwanicizo
(Mlk. 4:10-12; Lk. 8:9-10)
10I wejizwa wakwe wakamubitila wakamuwuza wakutya, “Alo so cici wukulongana ne wanhu mu vihwanicizo?” 11Nayo Yesu yakawapitula yakawatya, “Anye mwapegwa u wumanye wa zo Mulungu zono zihundicigwe, ninga wene awa si wapegwa yaye. 12Hambi muli wose mono yena naco nha kopegwa, no kuwa na vinji, ninga ayulya mono yasina cinji, kosolelwa sunga na cono yena naco. 13Holeka nghulonga nawo mu vihwanicizo, vyono wakulanga, ninga siwakuwona, kanyhi, wakuhuliciza, ninga hamba nha vivyo siwakuhulika yaye, hamba kwizuka bwete. 14Holeka kuli wene, zikuficilidla azilya zono zalongwa no muwizi Isaya zono yatya,
‘Kuwuhulice, mohulika, ninga hamba si mokwizuka yaye,
Nako ku wulanje molanga, ninga hamba si mowona ngʼo.
15Hambi i mahala ge wanhu wawa nha galelepe,
ne makutu gawo wagaziwaze,
ne meso gawo wafufunize.
Yali yiwe si nha vivyo, mhali wali wawone ne meso gawo,
kanyhi wali wahulice kwe makutu gawo,
no kuwa no wizuce mu mahala gawo
ho wamhitucile vyo yakutya u Muwaha,
Nane ho nali niwaponye.’
16“Holeka anye muli wamoti, vyono i meso genyu gakuwona, ne makutu genyu gakuhulika. 17Ane mbeka nghumulonjelenyi, vyono i wawizi, ne wanhu wenji i waswanu, wasulumilaga muno muno, ho waziwone zizo zono anye alu mukuziwona, ninga hamba si waziwona yaye, kanyhi wazihulice zizo zono anye mukuzihulika, ninga hamba si wazihulika ngʼo.
U wulolose we cihwanicizo co mumiza mbeyu
(Mlk. 4:13-20; Lk. 8:11-15)
18“Ale, alu muhulicize i nhunizo ye cihwanicizo ca yuyo u muhadika mbeyu. 19U munhu wo wose mono yakuyihulika inghani yo Wutemi, hamba kuyizuka yaye, yuyo yo yehwanile i zimbeyu zizilya zono zagwa mu nzila, nayo u Mubi kazaga no kuyisukula ayilya yono yali yakondya kuhadikwa mu nhumbula ya yuyo munhu. 20Nayo i mbeyu yono yahadikwa hono hogali i mabwe, yihwanile u munhu mono yakuyihulika nghani yiyo, na hobaho yakuyibocela, na nyemo mbaha. 21Ninga inghani yeneco si yikumwinjlia muno muno no kuwa ne milela muli mwene, holeka yakujendelela kuyikamisa inghani yiyo kwa cidaha cidodo vivi du, na kolo gakumuziza i magayo hamba wutamiswe ku soko ye nghani yiyo, u munhu yuyo hodu yakuyileka kamonga. 22I mbeyu ayilya nayo yono yagwila mu mabici ge mamivya, yihwanile u munhu mono yakuyihulika inghani, ninga i mahwele ga mononze yiyi hamonga ne masulumizi gayo ge zisawo, zikuyititiliza inghani yiyo, holeka u munhu yuyo si yakusuma kulela mikalo. 23Nayo i mbeyu yono yagwila mu muhangha u muswanu, yihwanile u munhu mono yakuyihulika inghani yiyo no kuyizuka, no munhu yuyo kalelaga i mikalo, ne mbeyu monga yilavyaga mhece igana limonga, na yinji yikulavya makumi mutandatu, na yinji makumi madatu.”
I cihwanicizo ce mabalwe
24Yesu yakawalonjela i wanhu cihwanicizo cinji yakatya, “U wutemi wa ku wulanga, wihwanile no munhu mono yahadika i mbeyu swanu mu mugunda wakwe. 25Ninga lono wanhu wali wagona, u mulugu wakwe yakawa kuza, yakawa kugahadika mabalwe muciligati yo wuhemba, yakawa kubita. 26Nazo zimbeyu zali zeza kucindika, no kusanula, hobaho nago i mabalwe gakawa kwijela. 27I wetumami wa munya u mugunda wakamubitila, wakamutya, Alu Muwaha, si kotya wahadika mbeyu swanu mu mugunda wako, alu mabalwe galawa hayi kanyhi? 28Nayo yakawapitula yakawatya, ‘U mulugu yo yanozize zizo.’ Nawo i wetumami wakwe wakamuwuza wakatya, ‘Alu wule, kokwenda cibite cikagakule?’ 29Nayo yakawapitula yakatya, ‘Aa, ngʼo, yilece kuwa na lunji mu wukule mabalwe, mukulilize kanyhi no wuhemba. 30Holeka hodu muvilekaje viwilukane hamonga du, sunga mwizuwa lye ndudula. Mwipango lilyo langa ho nowalonjela i waduduzi, ale, mwamule mugakunyanjile i mabalwe mugawope madulu madulu, ho gaticimizwe mu moto. Ninga wuhemba muwututicilaje mu madongha gangu.’ ”
I cihwanicizo ce mbeyu ya haladali
(Mlk. 4:30-32; Lk. 13:18-19)
31Yesu yakawalonjela i wanhu kanyhi cihwanicizo cinji yakutya, “U wutemi wa ku wulanga, wihwanile ne mbeyu ya haladali yono u munhu yayisola, yakayihadika mu mugunda wakwe. 32Ne mbeyu yeneco yiyo yo ndodo muno muno si nhe zimbeyu zose, ninga kolo yacindika, yiwilukaga si nhe vilimwa vyose, no kuwa mubici, wono sunga ne zindeje za mucanyha, zikusuma no kuzenga i manhuli gazo mu manhambi gayo.”
I cihwanicizo ce cisase
(Lk. 13:20-21)
33Yesu yakawalonjela kanyhi cihwanicizo cinji yakutya, “U wutemi wa ku wulanga, wihwanile ne cisase cono mucekulu yunji yacisola yakacihanza hanza no wusaje we debe limonga, nawo wose wukatumba.”
Kuwitumamile i vihwanicizo
(Mlk. 4:33-34)
34Nayo Yesu yawalonjela i wanhu zizo zose mu vihwanicizo. Hamba si yasuma kuwalonjela cinji co cose lono si yetumamiye vihwanicizo, 35ho yisume kuficilicila i nghani yono yalongwa no muwizi yono yatya,
“Nolonga nawo mu nzila ya vihwancizo
Nane nowaloloseza i zinghani zono zihundicigwe
ku wulawa mu wuwumbwe we yinze.”
Yesu yakulolosa ze cihwanicizo ce mabalwe
36Hanyuma Yesu yakawelaga i wanhu wawalya yakawa kwinjila mu nyumba. Nawo i wejizwa wakwe, wakamubitila, wakamutya, “Cikukulomba wuciloloseze ta ze cihwanicizo ce mabalwe ga ku mugunda.” 37Nayo Yesu yakawatya, “U muhadici wa azilya i zimbeyu ziswanu, yo yuyo u Mwana wo Munhu. 38Nawo u mugunda yo yinze. Nazo i zimbeyu zi zilya i ziswanu, wo wana wo wutemi. Ninga i mabalwe, wo wanhu wa ayulyo u Mubi. 39No mulugu mono yagahadika gagalya i mabalwe, yo Setani. Ne ndudula nayo, wo u mudumo we yinze, ne waduduzi nawo, wo Wamalayika. 40Nha vyono i mabalwe, wagakunyanjilaga wawa gaticimiza mu moto, ale nha vivyo vyo yolowa ha mudumo we vilo, 41U Mwana wo Munhu kolowatuma wa Malayika wakwe, ho wawakongholeze kulawa mu wutemi wakwe, wose wono wambuzaga wanhu wetume wubi, sunga na wose wono wetumaga zo wavu, 42no kuwalajila mwilamba lyo moto, na kuko wolowa kulila no kugwezula meno. 43Ninga awalya waswanu, wolongʼalala nhe zuwa mu Wutemi wo Sogo yawo. Holeka hono mwina i makutu go kuhulicila, ale, muhulice!
I cihwanicizo ce ciwutwa cono cihundikwe
44“U wutemi wa ku wulanga wihwanile ne ciwutwa cono cali cihundikwe mu mugunda. U munhu yunji yaza kuciwona, yakacihundika kanyhi. Nayo yasangalala muno, sunga yakawa kubita kuviguza i vinhu vyakwe vyose vyono yali yena navyo yakawa kuwugula u mugunda wuwulya.”
I cihwanicizo ce lulu
45“Kanyhi, u Wutemi wa ku wulanga, wihwanile no munhu yunji musuluza, mono yalondolaga yatuje lulu swanu. 46Nayo yaza kuwa yayituga lulu monga yo wuguzi wukamu, ale, yakabita yakaviguza vyose vyono yali yena navyo, yakabita yakayigula i lulu yiyilya.”
I cihwanicizo ce wanimula zisomba
47“Kanyhi U Wutemi wa ku wulanga wihwanile no lwavu lono lwagumilwa mwilenga, nalo lukebata somba nyinji ze mawala gose. 48Nalo lwaza kuwa lwamema, i wanhu wakalukwejela ha nhumbi ye lilenga, wakekala, wakawa kwamula kuzihagula i zisomba ziswanu wakazitajila mu zinhoto zawo, na azilya i zimbi wakazitaga. 49Nha vivyo vyo yolowa ha mudumo we vilo, i wamalayika wolokuza nawo wolowatemanula i wanhu wabi ne waswanu. 50Nokuwagumila i wabi mwilamba lyo moto. Na kuko wowa kulila no kugwezula meno.”
I ciwutwa i Cipya na ce katali
51Yesu yakawawuza yakawatya, “Alu wulenyi mwezuka zizi zose?” Nawo wakamutya, “Heya.” 52Nayo Yesu yakawatya, “Alu holeka u mwijizi wo wose wo Wulajilize mono yanozwa kuwa mwijizwa mu Wutemi wa ku wulanga, ale yuyo yehwanile u munhu munya kaya, mono kalavyaga mu viwutwa vyakwe i vinhu i vipya ne vihuma.”
Yesu yakulemwa ku Nazaleti
(Mlk. 6:1-6; Lk. 4:16-30)
53Yesu yali yeza kukondya kuyilonga i vihwanicizo vivyo, hodu yakawa kuwuka i hanhu baho, 54yakawa kubita ku yisi yakwe. Nako kuko yakawa yakuwejiza wanhu mu nhangʼanilo yawo yo wuhembelo, sunga ne wanhu wakezina muno muno, wakatya “Alu mwene nye, yuyu kagatuga hayi i mahala gaga, sunga ne mezino? 55Ati, wulenyi, yuyu si yo mwana wa ayulya u muselemala? No nyina si yakucemwa Malyamu, ne wanduguze si wa Yakobo, Yusufu, Simoni na Yuda? 56Ne walumbuze ma, si wose wali baha hono hetu? Alu kazisola hayi zizi zose?” 57Holeka wakawa na mahwele no mwene. Ninga u mwene Yesu yakawalonjela yakawatya, “U muwizi katugaga lilumbo hanhu ho hose, langa hono si mu yisi yakwe na mu mhuga yakwe du mo sikatugaga lilumbo!” 58Holeka ku soko yiyo, nayo Yesu si yasuma kwituma mapoto menji i hanhu baho, ku soko yo wula kwihuwila kwawo.
اکنون انتخاب شده:
Matayo 13: GOG91
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Cigogo New Testament © Bible Society of Tanzania, 1991.
