Matayo 12
12
Muli ze Sabato
(Mlk. 2:23-28; Lk. 6:1-5)
1Mu madaha gago, Yesu yakolaga mu migunda yo wuhemba mwizuwa lye Sabato. Nawo i wejizwa wakwe wakawa wadabuka, hodu, wakawa kwanza kubena i maso go wuhemba, no kulya. 2Nawo Wafalisayo waza kuziwona zizo, hodu wakawa kumulonjela Yesu wakutya, “Lanje ta i wejizwa wako wakwituma i nghani yono yili mwiko ku witume mwizuwa lye Sabato.” 3Nayo Yesu yakawapitula yakawatya, “Wulenyi mukali si nasoma vyono yavinozanoza Dawudi, hamonga na wono yali yali hamonga nawo, mu cipango lono wali wadabuka? 4U mwene Dawudi, yenjila mu Nyumba yo Mulungu hamonga ne wayagwe, wakawa kulya i mikate yiyilya yono yali yiwicigwe hali Mulungu. U mwene, hamba wawo i wayagwe, si wali wakomboywe kuyilya i mikate yiyo, langa i wakohani du wali wene. 5Hamba wulenyi, mukali si munasoma mu Wulajilize vyono mu mazuwa gose ge Sabato, i wakohani wakuwa kuwubena u Wulajilize mu Nyumba yo Mulungu ninga hamba nha vivyo, si wakuwa kwihwesezwa vyono wena wusutye? 6Holeka nghumulonjelenyi vyono, bahano hoyuli u muwaha muno, mono yayicizize sunga ne Nyumba yo Mulungu. 7Mwali muwe mumanyile du, yinhunizo ye zinghani zizi zono zikutya, ‘Nghusaka lusungu, hamba si yikumbiko,’ si mwali muwahose i wanhu wono wasina masutya. 8Hambi u Mwana wo Munhu, nha yo Muwaha we Sabato.”
U munhu wo muwoko wono wudejepe
(Mlk. 3:1-6; Lk. 6:6-11)
9Yesu yakawuka baho, yakabita mu nhangʼanilo yawo yo wuhembelo. 10Na mumo mwali na munhu yunji mono yali yena muwoko wono wudejepe. Baho i wanhu wakamuwuza Yesu wakutya “Ati, yikomboligwe kumuponya munhu mwizuwa lye Sabato?” Nawo wamuwuzaga nha vivyo, ho watuje i soko yo kumusitacila.
11Nayo Yesu yakawatya, “Alu citye nhavi, lunji yunji muli nyenye yawe yena ngholo yakwe yono yowa yigwiliye mwikombo, alu sikosuma kuyilavyaniza mumo mwikombo mwizuwa lye Sabato? 12Ninga alu, munhu yayicizize ngholo! Holeka si yilemezwe kwituma nghani swanu mwizuwa lye Sabato.” 13Hobaho yakawa kumulonjela u munhu yuyulya wo muwoko wono wudejepe, yakamutya, “Wugolole u muwoko wako.” Nayo yakawugolola, nawo wukawa wawa muswanu telele nha vyono winha u muwoko muyagwe. 14Hodu i Wafalisayo wakawa kulawila kunze, wakawa kulongana vyono wosuma kumongomeza Yesu.
U mwitumami u muhagulwa wo Mulungu
15Ninga Yesu yaza yeza yayimanya i nghani yiyo, yakawuka i hanhu baho. Ne wanhu wenji wakamutyatya, nayo yakawaponya i watamwa wose. 16Yakawalajiliza vyono walece kuwalonjela i wanhu i zinghani zakwe, 17ho zifisilizwe zono yazilonga u muwizi Isaya, zono yatya,
18“Langa ta, ayu yo mwitumami wangu mono nimuhaguye,
u mwendece wangu, mono yakunyendeza mu nhumbula yangu.
Nane nowuwika u Muhe wangu muli mwene,
Nayo koganula ze ningʼaniza yangu kuli wanhu wose.
19Si kowanga, hamba kuzoza,
hamba i lizi lyakwe, si lyohulikwa mu zinzila.
20Ilidete lyono libinuce, si kolibena yaye,
hamba si kowuzimya u wutambi wono wukulawa lyosi,
sunga kolo yakondya kuyitemya i ningʼaniza ye lingʼani.
21Ne makungugo gowa no witumbilo
ku soko ye litagwa lyakwe.”
Yesu na Belizebuli
(Mlk. 3:20-30; Lk. 11:14-23)
22Baho i wanhu wakamuletela u munhu yunji mono yali yali cibofu kanyhi yali cibwibwi, ku soko vyono yali yebatwe ne licisi. Yesu yakawa kumuponya, nayo yakasuma kulonga no kuwona kanyhi. 23Ilipuga lyose lye wanhu, likezina muno muno, no kutya, “Ati, Wulenyi, alu yuyu mbeka yadahile kuwa Mwana wa Dawudi?” 24Ninga i Wafalisayo waza kuzihulika zizo wakatya, “U munhu yuyu, kagalavizyaga macisi mu vilungo vya Belizebuli u muwaha we macisi.” 25Ninga Yesu vyono yali yagamanyile i mahweso gawo, baho yakawatya, “U wutemi wo wose wono witemanuce weneco wose vipuga vipuga vyono si vikwilumvya vyeneco vyose, u wutemi wuwo si wosuma kujendelela hamba hadodo, ne likaya lyo lyose hamba mhuga yo yose yono yatemanuce vipuga vipuga vyono vitemanuye yiyo yogwa. 26Holeka hono Setani yakumuwinga Setani, ale yakwitemanula mweneco. Alu u wutemi wakwe ho wokwima nhawule? 27Nha vyono anye mukutya, ati ane nghugawinjila macisi mu vilungo vya Belizebuli, alu ma i wana wenyu wakugawinjila mu vilungo vya nani? Holeka ku soko yiyo, wawo wo womulingʼanizenyi nyenye. 28Ninga hono ane niwe nghugawinjila macisi mu vilungo vyo Muhe wo Mulungu, ale, mumanye vyono u Wutemi wo Mulungu wakondya kumuficilenyi nyenye.
29“Hamba u munhu kosuma nhawule kwinjila kwa vilungo mu nyumba ya mono yali vilungo, ho yasume kumuboka i viya vyakwe, lono si yamuye kumuwopa yuyo u munhu we vilungo? Langa baho ho kosuma kumuboka i viya vyakwe. 30U munhu wo wose mono si yakwilunza nane, yuyo yali suta nane, yuyo keyagazaga. 31Holeka nghumulonjelenyi, nghutya nhavi, i wanhu wosuma kunenelwa u wubi wawo, hamonga no wutovule wawo wose, ninga si wosuma kunenelwa hamba hadodo u wubi wo kumutovulo u Muhe Mono Yelile. 32Kanyhi sunga na mono kolonga i nghani yo kumutovulo Mwana wo Munhu, yuyo nayo konenelwa, ninga langa mono kolonga i nghani ya kumutovulo Muhe Mono Yelile, yuyo langa si konenelwa hamba hadodo ku wulawa lulu sunga cibililila.
U mubici ne mikalo yayo
(Lk. 6:43-45)
33“U mubici hono wuwe muswanu, ale sunga ne mikalo yayo nayo yowa miswanu, na hono wuwe mubi, ne mikalo yayo yowa mibi. No mubici nawo wumanyicilaga mu mikalo gayo. 34Nye mo lulelo lwe zinzoka! Alu mosuma nhawule kuzilonga i ziswanu, na kumbe nyenye mo weneco muli wabi?” Ku soko u munhu nha kalongaga zono zimumemile mu nhumbula yakwe. 35U munhu muswanu nha kalavyaga i zinghani ziswanu mu ciwutwa cakwe ciswanu, no munhu mubi nayo, nha kalavyaga izinghani zimbi mu ciwutwa cakwe i cibi.
36“Holeka ane nghumulonjelenyi, nghutya, Mwizuwa lyo wulingʼanizwe i wanhu si wololeka kupitula muli ze zinghani zose zono si zinojeye zono wakuzilonga. 37Holeka mu wulawilila mu zinghani zako lunji kovumilwa vyono wuli muswanu, hamba lunji kolingʼanizwa nha wuli muhodanji.”
U wusaka vitanjilo
(Mlk. 8:11-12; Lk. 11:29-32)
38Hanyuma yayo, wanji wa mu wejizi wo Wulajilize hamonga ne Wafalisayo, wakamulonjela Yesu wakutya, “Ase cikusaka ciwone citanjilo kuwulawa kwako.” 39Nayo Yesu yakawapitula yakawatya, “Ululelo lubi kanyhi lono si lumogopilo Mulungu! Mukusaka citanjilo, si mopegwa i citanjilo co cose, langa citanjilo ca Yona u muwizi. 40Nha vyono Yona yakekala munda ye lisomba liwaha vilo vidatu cilo na misi, ale nha vivyo u Mwana wo Munhu nayo, si koleka kwikala vilo vidatu cilo na misi mugati ye yisi. 41Ne wanhu wa Ninawi, wolokuza he zuwa lyo wulingʼanizwe nawo walaluhosa u lulelo lulu nha vyono lusutizye. Hambi Waninawi nha wanena, so wuganule wa Yona. Na kumbe yali baha mono yamucizize Yona! 42U mutemi we cicekulu wa kutakama kolokuza mu cipango lono u lulelo lulu lweza kulingʼanizwa, nayo kololuhosa nha vyono lwina masutya. Hambi u mwene nha yajenda muhinzo mutali, kulawa kutali, yakaza kuzihuliciza zinghani ze mahala no wizuce wa Solomona, na kumbe, ahano hoyuli u muwaha mono yamucizize Solomona.
U wuwuyajile we licisi lyavu
(Lk. 11:24-26)
43“I licisi lyavu, kolo likuwingwa no kulawila muli munhu, likuwa kujenda jenda mu nyika likulondola i hanhu ho kuceha, hamba kutuga.” 44Hanyuma likutya, “Nowuya ku wikalo wangu wono nekalaga. Nalyo kolo likuwuya no kuwagana u wikalo wuwo wusina yunji kanyhi wuhambigwe, 45hobaho likubita kugasola macisi ganji mupunghati, gono mabi muno muno kuciza lyeneco, nago gose gakwinjila muli munhu yuyo. Alu nhondo i mikalile yo munhu yuyo, yikuwa mibi muno muno si nha ya halulongozi. Na nhavivyo vyo yowa kuli wanhu wawa i wabi.”
I wanduguze weneco du wa Yesu
(Mlk. 3:31-35; Lk. 8:19-21)
46Nayo Yesu lono yali yakali yakulonga ne mapuga ge wanhu, u nyina, hamonga ne wanduguze wakawa waza, no kwima hanze, wakuhila kulongana nayo. 47Holeka munhu yunji yakabita yakamulonjela Yesu yakutya, “U nyina yako hamonga ne wanduguzo, wali aho hanze, wakusaka kulongana nagwe.” 48Nayo Yesu yakamutya yuyo munhu mono yamulonjela nhavivyo, yakatya, “Alu yaya yo nani? Hamba i wandugu zangu wo wa nani?” 49Hanyuma yakawa kwinula muwoko wakwe yakawa kuwasonhelela i wejizwa wakwe akuno yakutya, “Awa wo wa yaya, ne wandugu zangu! 50Vyono u munhu wo wose mono yakwituma nha vyono yakuhila Baba mono yali ku wulanga, ale, yuyo yo muwaha wangu, yo lumbu lyangu, kanyhi yo nyina yangu.”
اکنون انتخاب شده:
Matayo 12: GOG91
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Cigogo New Testament © Bible Society of Tanzania, 1991.
