Yohanes 7
7
At Yesus o Yerusalem seni sorugumu
mo egeitik en ’begei wene
1Wene asogo arat mo’gulontoluk e, is ap ’gaindek Yahudi a’ge en, Yesus ebe woruogoluk obok ’balogu legesa ai en e, at ebe o Yudea ’boluk nosolom ebit en e, o Galilea do’go eba nese laga. 2#Ima. 23:34; Ula. 16:13Asogo nese laga eria hegit e, is aphwami Yahudi a’ge o pageat orabo werik poluk welegesa a’ge enede ebesogo welat, ebaget seni sakho no a’ge arat horok lau waga. 3-5Asogo horok lau wagama welat, at Yesus u’gwarek arilak a’ge ogo re, enede at ebam he’berik po erlak welegesa ai en e, disogo mo’gulegisa,
“Hat hosi hiak wogwi a’ge ebano en, hat taga legen a’ge tisokhwe enil hiouwagoluk, o yema ukpoluk o Yudea ’bin o. Ap ’gain omogoluk holuk e, hisakho togwi erlak o. Holuk e, hat taga legen ai, aphwami ’gwiangma a’ge enebe ’berlegat enaluk emagoluk selakmayat se’bin o,” oluk mo’gulegisa. 6Asogo mo’gulegisema, at Yesus en e, disogo mo’gulentesi,
“O nin erlige nan erlige his en tu re, elit oruak a’geat de, an en tu a’ge agauwa owan lau wom erlak o. 7Is aphwami ’gwiangma a’ge en his holuk nak e, enebiraphonobogwi modok erlak a’geat de, an e,
Is togwi ai wiak modok, oluk oso ai en e, anat enebirapnobogwi o,” oluk mo’gulentesirik e, 8mesik disogo mo’gulentesi,
“An tu a’ge owan oruak ai en e, seni sorua a’ge ai sorugumu yogodak ya ’bik erlak o. We, his nak ’bi lit o,” 9oluk mo’gulentesirik, at o Galilea eba mo egei.
Orabo werik poluk seni sorugumu Yesus
’begeitik tegei wene
10Asogo mo egeimu, at arilak ebano nak seni ano sorugumu arat ’bigisarikmu re, at Yesus pobuk aphwami eneperlak oruakhwe hisakho ’begei. 11Eba ’begeitik oruakhwe, is ap ’gaindek Yahudi a’ge seni sorugumu welat Yesus ebe heratuogoluk hin wogulat e,
“At ebe ’geba oruak,” oluk egesema, 12is aphwami a’bik ebano enesa’go hweligisarik e, eniak ling-long ogulat, is nin pema akhit en e,
“At e, op,” ogwiam e, is nin pema en e,
“Erlak o. At e, wiak. Aphwami lalenebiso,” oluk egesa. 13Asogo egesa a’geat de, is ap ’gaindek Yahudi a’ge onogorlok en e, eniak ’baksogo Yesus obok u erlak. We ling-long nak egesa o.
14Seni ano nil lagaihwe agauwa ’burl heisogo Yesus Allah owi werikmu ’goluk, wene mo’gulentasu laga. 15Mo’gulentasukhwe, is ap ’gaindek Yahudi a’ge en e, disogo egesa,
“Eige! Nonogorlok o. Ap yu sekolah tu erlak a’geat de, di wene yu wene yema no’gosogo aluk aga epegep,” oluk egesema, 16at Yesus en e, disogo mo’gulentesi,
“An en wene mo’gulhentasu legi ai, an nogola ’gagalogo mo’gulhentasu legi erlak a’geat de, at an peraknobou waga a’ge ano en mo’gulnosokhwe mo’gulhentasu legi o. 17Ye, ap sa en Allah ogola epasu a’ge hegitsogo tu agai holuk e, an en wene mo’gulentasu legi a’ge ai,
Allah en mo’gulosokhwe oso ai o, eselat,
U’gwarek ogola en ’gagalogo oso, eselat, enak a’ge holuk e, aluk emayat o. 18Holuk e, sa en wene u’gwarek ogola en ’gagalogo oso a’ge ai, aphwami en erliktuagoluk oso yo. A’geat de, sa en, at perakpou waga a’ge erliktuagoluk oso holuk e, modok iak esei oso erlak o. We, demat oso yo. 19Ye, wene Allah en nenesa’go weregei wene ai, Musa en pelal wokho wokhentesi erlak no? At enat wokhentesi ani o. A’geat de, ap his a’ge mesik en, wene ai hegitsogo tago erlak welat an watnobuagoluk nobok ’balogu legep ai nopaget,” oluk mo’gulentesimu, 20is aphwami a’bik ebano en e, disogo mo’gulegisa,
“A! Mu’gat ebabut wiak a’ge hogola ’gwegeitik hede ’balagama ese legen a? Sa en wathebigoluk oso en ese legen,” oluk mo’gulegisema, 21at Yesus en e, disogo mo’gulentesi,
“An en e, agauwa sabit a’ge pam Allah paget weat welat elalinat mesik erlige tegis a’ge re, his ’berlek en e,
Eige! oluk honogorlok aga ai o. 22#Kej. 17:10; Ima. 12:3 A’ge re, his henemalik enagap ene’gerlimu a’ge ’balogu legep ai re, edip at Musa puk. Erlak o. Edip Musa ebe owan dagom erlak oruakhwe nene’balak en ’balonobogu legesa a’geat o. Ai en, Musa en asogo ’balenebip oluk mo’gulhentesimu, agauwa sabit a’ge pam Allah paget weat welat ’balonobogu legep ai o. 23#Yoh. 5:9Ye, wene Allah en nenesa’go weregei wene at Musa en mo’gulhentesi a’ge ai sagalugumu no oluk, agauwa sabit a’ge pam Allah paget weat welat enagap ene’gerlimu a’ge ’balogu legep a’geat de, an en agauwa sabit a’ge pam Allah paget weat welat, ap mesik ebe modok obaptegis a’geat de, his en nopaget wene yaknogu legep. 24Wene ebe dokhumsogo heneperlak a’geat de, we wene selakma a’ge nak henaluk welat, aphwami logon wene enebam pagup no yo. Wene dokhumsogo henaluk otluk en, wiak togwi hegitsogoat wene enebam pogu lomup o,” oluk mo’gulentesi.
“At Yesus ebe ap edip ’geba a’ge waga,”
oluk egesa wene
25At Yesus en wene asogo mo’gulentasu oruakma, is aphwami o Yerusalem a’ge enebe ado logon en disogo ogu legesa,
“Ap woruogoluk obok ’balogwi ano, ebe ai erlak no? Ebe aiat o. 26A’geat de, ebe yethemit! Nogorlok e. Ogorlok erlaksogoat welat, wene mo’gulnentasukhwe, is en wene o’go mo’gulom erlakma en mo ogwi yu. Is ap nonuelak ’gaindek yema onogola en e,
Ap yu nis aphwami delnonobuagoluk Allah en perakpou weik, oluk egei a’ge ano ebe aiat, oluk onogola epegesarik en ogwi hwi a. 27Asogo a’geat de, nis aphwami delnonobuagoluk Allah en perakpou weik egei a’ge ano ebe wago holuk, edip ’geba en waga hwe, aphwami ’berlegat eneperlak welema a’geat de, ap yu nak e,
Ebe ap edip eba a’ge, oluk nenalugat o,” oluk ogu legesa.
28Asogo ogu legesema, at Yesus Allah owi werikmu oruakma re, iak loksogo disogo mo’gulentesi,
“An nebe emin, nebe o eba en wegi emin, his henaluk no? An wegi ai re, an nomu nede opoluk wegi erlak o. We, at iak demat nak oso a’ge ano enat peraknobou waga a’geat de, at ebe his heneperlak o. 29Asogo a’geat de, an nak e, at enat peraknobou wagama, o at oruakma eba enat wegerikmu re, an at ebe naluk o,” oluk mo’gulentasu lagama, 30is en Yesus ebe tenak pouwogoluk tigisa a’geat de, at ebe tenak po hegit lau wom erlak ai en e, ebe tenak po erlakma en mo egesa. 31Is pema en tenak pouwogoluk ogu legesa a’geat de, is aphwami a’bik ebano enebe pema logolagat enede Yesus ebam he’berik pegesarik disogo egesa,
“Ap ai elalin a’ge tegei ye, mia epegep? Ye, aphwami delnonobuagoluk Allah en perakpou weik egei ano wemarik e, ebe pobi tuagoluk elalin a’ge logat tua no? Erlak o,” oluk egesa.
Yesus ebe tenak pou wagoluk tigisa wene
32Asogo ogulat, is aphwami a’bik ebano eniak ling-long Yesus obok ogumu, is ap Farisi a’ge enesa’go hweligisarik e, is ap Allah eiye a’ge onuelak ’gaindek enemin en ap Allah owi werik ’gwelakharok welagai a’ge pema en Yesus ebe tenak pou wagoluk wene weragenebegesa. 33Asogo ogukhweat, at Yesus en disogo mo’gulentesi,
“An we, lodu nak agauwa wei nak henemin wolomultik e, at peraknobou waga a’ge ano e’bek togolik arat laik o. 34An o eba loluk oruakma, his en an heranebil no’gu lorogup a’geat de, his o an weleikmu eba lo modok mia ai en, an nemin sarlok tul erlak o,” oluk, mo’gulentasu lagama, 35is ap Yahudi onuelak ’gaindek ebano en, is-is nak ogulat e, disogo egesa,
“At yu o ’geba loluk oruakma, nis at heratil lultik emin sarlok tul erlak ai en mo’gulnentesi epegep. Ap nis a’ge o ’bulogo aphwami Yunani a’ge ene’bek legesarik oruakma ene’bek loluk, aphwami Yunani a’ge wene mo’gulentasu leigoluk egei epegep a? 36At en mo’gulnentasulat,
His an nebe heranebil no’gu lorogup a’geat de, an nemin sarlok tul erlak o. Ye, his o an weleikmu eba lo modok mia o, oluk mo’gulnentesi ai re, at ede no’gosogo epesirik en mo’gulnentesi epegep,” oluk ogu legesa.
At Yesus en aphwami enelalugabenebiso a’ge paget mo’gulentesi wene
37 #
Ima. 23:36
Wene asogo egesarikmu en, seni ano ologun ’goboksogo no’gumu, Yesus ebe inagarik e, iak loksogoat disogo mo’gulentesi,
“Sa en ik nele takhebasu holuk, an ne’bek nauwom o. 38#Yeh. 47:1; Zak. 14:8Ye, sa en ede an nebam he’berik pasu holuk e, ik enelalugabenebiso a’ge ano at ap ano ogola en ik elaruk porlolu taga lema, oluk Allah iak pelal wogo a’ge pam egesa hegitsogoat ema o,” oluk, 39wene asogo mo’gulentesi ai re, aphwami enede at ebam he’berik pogwi a’ge enebe lo’bok Allah Arogun wogontouwa, oluk obok mo’gulentesi a’geat de, eria hegit, at Yesus ebe erliktugukhwe ligaga ano owan ligom erlakma no oluk e, Allah Arogun owan ’belakpou wom erlak oruakhwe egei.
40Wene asogo mo’gulentasuam, is aphwami a’bik ebano enesa’go hweligisarik e, is logon en e, disogo egesa,
“Ap yu re, ap mesik Allah iak mo’gulnentau wema egeimu, yetharok welege a’ge anoat o,” oluk ogwiam e, 41is nin pema en e,
“Erlak o. Aphwami delnonobuagoluk Allah en perakpou weik egei a’ge anoat o,” oluk egesa a’geat de, is nin pema en e, disogo egesa,
“Aphwami delnonobuagoluk Allah en perakpou weik egei a’ge ano, o Galilea en elit wom no? Mia o. 42#2Sam. 7:12; Mik. 5:2Aphwami delnonobua a’ge Allah en perakpou weik egei a’ge ai re, ap Daud en dogo’gwe a’ge, at Daud u’gwarek owi edip ebe welagama, o Betlehem eba dagema, oluk Allah iak pam pelal wokho pegesema oruak erlak no? 43Oluk asogo il laga legesarik, ologun pam e, aphwami a’bik ebano Yesus ebaget eniak sagalogo enebe me’gerigisa. 44Asogo me’gerigisarik, is pema en Yesus ebe tenak pouwogoluk tigisa a’geat de, tenak po erlakma en mo egesa.
Ap Yahudi a’ge onuelak ’gaindek enede Yesus ebam he’berik po erlakma en tigisa wene
45Asogo mo egesarik oruakhwe, is ap Allah owi werik ’gwelakharok welegesa a’ge en Yesus ebe tenak pouwogoluk wene weragenebegesa a’ge ebano togolik is ap Allah eiye a’ge onuelak ’gaindek emin, is ap Farisi a’ge emin, ene’bek wegesema re, disogo mo’gulentigisa,
“Ap ano ebe tenak poluk nene’bek woluk wegep erlak ai, nopaget en mo egep,” oluk mo’gulentigisema, 46is en e, disogo mo’gulentigisa,
“Eige! Wene at en oso ai ’gela’ge re, is ap pema en wene asogo ogukhwe ontogu lege modok erlak a’geat de, at en wene muat oso ai en e, ebe ukpege o,” oluk, mo’gulentigisema re, 47is ap Farisi a’ge ebano en e, disogo mo’gulentigisa,
“His ogo re, at en lalhenebegeimu de, ogu legep hwi a? 48Nis ap Yahudi a’ge honuelak ’gaindek logon en enede at ebam he’berik pogulat, nis ap Farisi a’ge logon en enede at ebam he’berik pogulat, tugumu logon ontogu legep a? Modok erlak o. 49Modok erlak a’geat de, is aphwami a’bik yema wene Allah en nenesa’go weregei wene ano eneperlak welat ogwi ai, Allah en heman enebesimu oruak o,” oluk mo’gulentigisa. 50#Yoh. 3:1,2Asogo mo’gulentigisema, ap is a’ge mesik onuk e, Nikodemus, nadugat o huba’go Yesus e’bek waga a’ge ano en, is disogo mo’gulentesi,
51“Ap yu logwe. Wene Allah en nenesa’go weregei a’ge ano pam e, ap mesik iak enesa’go holu erlagat, ye, at tegei a’ge wene edip pobisogo eneperlak welat e, wene naduk ’bekhit ebam po yo, oluk egei no? Erlak o,” oluk mo’gulentesimu, 52is en e, at disogo mo’gulegisa,
“Hat ogo re, howi o Galilea a’ge no? Ap Allah iak mo’gulontogwi a’ge mesik o Galilea en wema oluk Allah iak pam pelal wogo a’ge mesik oruakma hil hagun modok erlakma re, hil opsogo ’gwelakhasu lomup o,” oluk mo’gulegisa. [ 53Asogo mo’gulogu legesarik e, aphwami ebano onowi lo’gwe lo’bok ’bogulogo legesa.
اکنون انتخاب شده:
Yohanes 7: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
