Yohanes 8
8
Aphwami en, hwe mesik ’babi tagokhwe hegesarik, Yesus e’bek woluk wegesa wene
1Is aphwami ebano lagaihwe re, at Yesus ano dom Zaitun pam ligaga. 2Ligagarik, hubet o’gwe siaksogo ’bu agarik e, Allah owi werikmu waga. Wagarik ’gwegeimu re, aphwami a’bigat at e’bek wegesema, at ebe huragarik e, wene mo’gulentesi. 3Wene mo’gulentasu oruakma, is ap Allah iak eiye a’ge emin, ap Farisi a’ge emin en e, hwe mesik ’babi tagokhwe enil hegesarik, Yesus e’bek woluk wegesarik e, hwe ano ebe ’burl edikpegesarik e, 4Yesus disogo mo’gulegisa,
“Nue. Hwe yu re, ’babi tagokhwe tenak pegerik en he’bek woluk wege o. 5#Ima. 20:10; Ula. 22:22-24At Musa en wene Allah en nenesa’go weregei wene ano pam, pelal wasulat e, is hwami en, at yu tegei ai ’gela’ge togwi holuk e, helep pam enebe modok waronobu o, oluk mo’gulnentesimu wene ’belak oruak ebano re, hat en no’gosogo mo’gulnentagun,” oluk mo’gulegisa. 6Wene asogo mo’gulegisa ai re, Yesus emde pam wene o’go osoma e’gerli wusogo wene ebam dung houwogoluk egesa a’geat de, at odogun ’gonutak welat e’gik dum pam en ’gwiang pam pelal wasulat mo egei. 7Asogo hallorak poluk oruakhwe, is en e,
“Mo’gulnentemen da,” oluk mo’gulogwi modok oruak en e, at a’gul lekholuk, disogo mo’gulentesi,
“His welegep yema a’ge, ap mesik wiak tago erlak welago a’ge holuk, at en naduk hwe yu helep pam dungsogo woruak o,” oluk, 8mo’gulentesirik e, pobuk togolik odogun ’gonu oluk e’gik dum pam en ’gwiang pam pelal wasu laga. 9Asogo wasukhwe, is ebano wene mo’gulentesi a’ge ano enesa’go hweligisarik e, is enarluedek naduk libegesema re, pobuk enebe ’berlegat ling-long mesik ’ge’gik, mesik ’ge’gik ’bogoligisema, at Yesus hwe ano e’birek enematek nak welat e, 10at Yesus ano a’gul lekhesirik, at hwe ano disogo mo’gulesi,
“Hwe yu nerei yo. Ap ebano re? Is en wene hebam pegesa a’ge ano, ap mesik en wathebegei ya? Erlak a,” oluk mo’gulese lagama, 11at en e,
“Nue. Modok erlak o,” oluk mo’gulesimu, at Yesus en e, disogo mo’gulesi,
“An en ogo re, wene hebam poluk wathebik erlagat o. Hebe howi pam lak o. Laguntik holuk e, hwerli yogodak ya en pobuk wiak logon togun no yo,” oluk mo’gulesirik e, owi pam perakpesi.]
At Yesus en, “Aphwami o dakharak enebasu legi a’ge anat o,” oluk mo’gulentesi wene
12 #
Mat. 5:14; Yoh. 9:5 Pobuk e, at Yesus en is aphwami ebano wene mesik disogo mo’gulentesi,
“Aphwami o dakharak enebasu legi a’ge ai, anat o. Sa en an ne’berlik denaga lema holuk e, an nebe o dakharak welat enelalugabenebise legi a’ge anoat woknobua ai en e, at ai o hiktakma denaga lema erlak o,” oluk ese lagama, 13#Yoh. 5:31is ap Farisi a’ge ebano en e,
“Hat e, hobok enaluk emagoluk, hu’gwarek enat mo’gulentasu legen ai re, hiak esei enat ese legen o,” oluk mo’gulegisema, 14at Yesus en e, disogo mo’gulentesi,
“An wegi a’ge emin, laik a’ge emin, his heneperlak a’geat de, an nu’gwarek nak e, nebe o eba en wegi, ye, pobuk o ebayat laik, oluk naluk ai en e, an nobok enaluk emagoluk nu’gwarek enat mo’gulentasu legi ai re, wene ai demat mo’gulentasu legi o. 15His en wene nebam pogu legep eba re, his aphwami-aphwami nak wene enebam pogulat, no’gorlogulat, togu legep ’gela’geat nebam pogu legep a’geat de, an nak e, aphwami wene enebam pasu legi modok erlak o. 16A’ge re, an en wene enebam pelema re, ai an nomu nak puk. Naik peraknobou waga a’ge ano eminat welat eselegi ai en e, wene hegitsogoat aphwami enebam pele o. 17#Ula. 17:6; 19:15Wene, Allah en nenesa’go weregei wene ai pam disogo egei,
Aphwami wene enebam pogulom holuk e, ap wene edip tigisa enaluk a’ge enebe ’biren en eniak e’birek hegit nak ogwi holuk e, wene ai demat u o,
oluk egeimu pelal wogo pegesa. 18Ai ’gela’ge re, an nobok, nu’gwarek en eselat, naik peraknobou waga a’ge en eselat, mo’gulhontogu lege ai yo,” oluk ese lagama, 19is en e,
“Hat haik ai ’geba oruak,” oluk mo’gulegisema, at Yesus en e,
“An nebe yu emin, naik emin, heneperlagat o. An nebe henaluk wellepma re, naik ai ogo henalugat wellep o,” oluk mo’gulentesi. 20Wene asogo mo’gulentesi ai re, at ebe Allah owi werikmu peti uang Allah paget pogumu eba eragam welat egei. Asogo osoam, at ebe tenak po erlige owan lau wom erlak oruakhwe no oluk e, is aphwami ebano pema en tenak po erlakma en mo egesa.
At Yesus en, “O an laikmu eba, his lo mia o,”
oluk mo’gulentesi wene
21Asogo mo egesema re, at Yesus wene pobuk mesik is ebano disogo mo’gulentesi,
“An nebe pobuk laigat o. Loluk eba oruakhwe, his an heranobogup a’geat de, o an laikmu eba his lo mia ai en e, his wiak togu legep a’ge wene henebam oruakhweat de, henebe warorogup o,” oluk mo’gulentesimu, 22is ap ’gaindek Yahudi a’ge en e, disogo egesa,
“Ap yu en mo’gulnentasulat e,
O an laikmu eba his lo mia o, oluk mo’gulnentesi ai re, at u’gwarek en wathwerlaigoluk oso hwi a,” oluk egesema, 23at Yesus en e, disogo mo’gulentesi,
“An nebe re, ’bogorl abel likho a’geat wegirik welegi o. A’ge re, his nak e, abel opma yema a’geat o. Honowi edip ’gwiangma yemayat o. A’ge re, an nowi edip ’gwiangma yema erlak o. 24Ai en e, an en wene naduk mo’gulhentasulat e,
Wiak togu legep a’ge wene henebam oruakhwe warorogup o, oluk mo’gulhentegis ano re, disogo oluk egi. His en an nebaget e,
At ebe otok modok welago a’geat o, oluk henede nebam he’berik pagup erlak holuk e, wene henebam oruakhweat warorogup ai en egi o,” oluk mo’gulentesi. 25Asogo mo’gulentesimu, is en e,
“Hat hebe re, sa no,” oluk ebam hin wokhegesema, at en e, disogo mo’gulentesi,
“’Burlat pobuk ai re, nopaget en mo’gulhentaik no. 26An en di wene yu wene a’bigat mo’gulhentasulat, wene henebam pasulat, no’gorliselat, tu elirat a’geat de, at peraknobou waga a’ge ano iak demat nak oso ai en, at en osokhwe nesa’go hwelise legi a’ge aiat his ’gwiangma a’ge yema mo’gulhentasu legi o,” oluk mo’gulentesi. 27Asogo mo’gulentesi a’geat de, is en e,
“At aik Allah paget obok mo’gulnentasu,” oluk wene ai pobitu erlakma en welegesa. 28Asogo pobirak erlak oruakhwe, at en e, disogo mo’gulentesi,
“An abat daklau wegi ano, his en an nebe e pam ediknebagup ai erlige, his en e,
Otok modok welago a’ge ano ebe yuat o. At en wene mo’gulnentasulat e, ogola en ’gagalogo u erlakma en, we, at aik en mo’guloso a’ge nak mo’gulnentasu lagama, oluk, henaluk emayat ani o. 29At peraknobou waga a’ge ano, ebam liok oso a’ge nak taga legi ai en e, at en an nebe ’gobologo uknobo erlakma en ne’birek hwedik modok welagai o,” oluk mo’gulentesi. 30At Yesus en wene asogo mo’gulentasu lagama, aphwami enebe esanat enede at ebam he’berik pegesa.
At Yesus en, “Dem wene pam henebe herle
hebilogo henematekma henebaik o,”
oluk mo’gulentesi wene
31Enede asogo he’berik pegesema, at Yesus en e, is ap Yahudi a’ge enede at ebam he’berik pegesa a’ge disogo mo’gulentesi,
“His en, an niak hologo togu lorogup holuk e, henebe an nosi demat a’ge neragam welat e, 32wene dem wene henaluk ema o. Henaluk emma, wene dem wene ai pamat henebe herle hebilogo henematekma henebaik o,” oluk mo’gulentasu lagama, 33#Mat. 3:9; Luk. 3:8is en e, disogo mo’gulegisa,
“Nis e, ap Abraham en dogo’gwe a’ge oluk e, nenebe aphwami logon eneragam a’ge om erlak a’ge nak welege o. A’geat de, hat en eselat e,
Henebe herle hebilogo honomuat henebaik o, oluk e’gen ai re, hede ’gesogo epegentik en egen,” oluk mo’gulegisema, 34at en e, disogo mo’gulentesi,
“Aphwami wiak togwi a’ge ai enebe lo’bok e, wiak togwi a’ge ai eragam a’geat, oluk demat mo’gulhentegis o. 35Ye, is eneragam a’ge ai re, onuelak enemin modogat welagai erlak a’geat de, eneiyagai demat a’ge nak e, enemin modogat welagai o. 36Ai ’gela’ge re, an Allah ebe omlogo en, his herle hebilogo honomuat henebaik holuk e, demat herle hebelik honomuat wolorogup o,” oluk mo’gulentesi.
“Henaik Iblis at o,” oluk mo’gulentesi wene
37Asogo mo’gulentesirik, mesik disogo mo’gulentesi,
“A’ge re, his e, ap Abraham en dogo’gwe a’ge welegep, eba re, an nalugat o. A’geat de, his honogola en e, an niak wo henebit ai en e, his enat an nebe watnobuogoluk nuwa’gun ’gabolugu legep ai o. 38An e, naik emin welat nil hasu legi a’geat mo’gulhentasukhweat de, his nak e, henaik ano en oso a’ge iak hologo togu legep o,” oluk mo’gulentesi. 39Asogo mo’gulentasu lagama, is en e,
“A! Nis nenaik Abraham at o,” oluk egesema, at en e, disogo mo’gulentesi,
“His henebe demat Abraham en dogo’gwe a’ge wellepma re, Abraham taga lagasogoat tugullep o. 40A’ge re, an wene dem wene Allah en osokhwe nesa’go hwelegis a’geat mo’gulhentasu legi a’geat de, his en an nebe watnobuogoluk nuwa’gun ’gabolugu legep ai ’gela’ge, at Abraham en asogo taga laga erlak a’geat togu legep o. 41His e, henaik ano en tiso a’ge togu legep o,” oluk mo’gulentasu lagama, is en e, disogo mo’gulegisa,
“A! Nis ’babi ’gwelogo daknenebigisa a’ge puk. Nis nenaik Allah emategat o,” oluk mo’gulegisema, 42at en e, disogo mo’gulentesi,
“His e, demat henaik Allah wellepma re, an nomu nede opoluk wegi puk. We, nebe edip Allah a’ge oluk e, at en peraknobou wagama wegirik welegi ai en e, an nebe henedesogo wellep o. 43Asogo wegirik, wene mo’gulhentasu legi a’ge his pobirak erlak welegep ai nopaget. Asogo welegep ai re, an niak hwelak wolom henebit ai enat o. 44Asogo henebit ai re, his henaik Iblis atma, his en at agai epasu a’ge aiat henagai en togu legep ai o. Ye, at Iblis ai edipmu enat aphwami warenebiso a’geat o. At wene dem wene ogola erlak ai en e, wene dem wene ogukhwe eniak ago hasu erlak o. Iblis iak esei oso ai re, at ebabut otogatma at iak eseiyat oso yo. Eniak esei ogwi ai re, edip e, arat o. 45A’geat de, an en wene dem wene mo’gulhentasu legi ai re, his en e,
Demat, oluk pobi togu legep erlak o. 46An en wiak tagoma, his logon en henil niegep a’ge holuk e, mo’gulnemis da. Erlak o. An en wene dem weneat mo’gulhentasukhwe, pobi togu legep erlak ai nopaget. 47Ap sa en ebe Allah a’ge holuk, Allah iak ai esa’go hweliso a’geat de, his e, henebe Allah en a’ge puk. Mu a’ge no oluk e, at iak henesa’go holu henebit ai o,” oluk mo’gulentesi.
“At Abraham owan dagom erlak oruakhwe,
an notok modok welago a’ge,”
oluk mo’gulentesi wene
48At Yesus en wene asogo mo’gulentesimu, is ap Yahudi a’ge ebano en e, disogo mo’gulegisa,
“Hat hebe ap Samaria a’ge yu re, logwe! Mu’gat ebabut wiak a’ge hogola ’gwegeitik oruak o, oluk mo’gulhogu lege ano demat mo’gulhogu lege hegi,” oluk mo’gulogu legesema re, 49at en e, disogo mo’gulentesi,
“An mu’gat ebabut wiak a’ge nogola ’gwilo erlak o. An en naik erliktisokhweat de, his en an nonuk wiagap pogu legep o. 50A’ge re, an nu’gwarek nebaget erliknobuagoluk taga legi puk. Erlak o. At e, an erliknobuagoluk, at ap mesik en wene enebam pasulat, no’gorliselat, tua a’ge oruak o. 51Ye, ap sa en an niak hologo taga lema holuk e, warom erlakma en elaluk modok welema o, oluk demat mo’gulhentegis,” oluk, mo’gulentasu lagama, 52is ap Yahudi a’ge ebano en e, disogo mo’gulegisa,
“Ap Abraham emin, ap Allah iak mo’gulontogu legesa a’ge ebano emin, arat waretil legesa a’geat de, hat en eselat,
Ap sa en an niak hologo taga lema holuk, warom erlakma en elaluk modok welema o, oluk e’gen ai en e, mu’gat ebabut wiak a’ge demat hogola ’gwegeitik oruak, oluk, pobi hebige o. 53Nis nene’ba Abraham ebe waraga a’ge ai, ebe malik wei a’ge ’gela’ge. A’ge re, hat nak e, hebe ’gain a? Is ap Allah iak mo’gulontogu legesa a’ge ebano waretil legesa a’geat de, hat hebe sa ’gela’ge en ese legen no,” oluk mo’gulegisema, 54-55at en e, disogo mo’gulentesi,
“An nu’gwarek en erliktagallema re, we ’burlat erliktagalle o. An naik ebe naluk a’ge ai, his en, at ebe pobirak erlak welat,
Nis nenaik Allah, oluk ogu legep ano, at ebe enat, erliknebiso yo. An e,
At ebe neperlak, oluk elimu re, his heniak esei ogu legep ’gela’geat eli o. A’ge re, at ebe nalukmu no oluk e, at iak hologo taga legi o. 56Ye, his hene’ba Abraham ano en e, an weik a’ge paget eselat e,
At wagoam nil haik, oluk an nalik werise lagama no oluk e, il arat niesirik ogola agai hesi,” oluk mo’gulentasu lagama, 57is ap Yahudi a’ge ebano en e, disogo mo’gulegisa,
“Hat hebe dagegen pam en 50 tahun owan lailo erlak oruakhweat de, Abraham elirat hil hegentik en ese legen a? Mia o,” oluk mo’gulegisema, 58at en e, disogo mo’gulentesi,
“An niak demat mo’gulhentaik o. At Abraham ai ebe owan dagom erlakhwe, an notok modogat welago yo,” oluk mo’gulentesi. 59Asogo mo’gulentasu lagama, is ap ebano en e, at Yesus ebe woruogoluk helep ene’gikmu wegesa a’geat de, Yesus ebe hisak agarik en, o Allah owi werikmu ukpoluk momu laga.
اکنون انتخاب شده:
Yohanes 8: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
