Yohanes 16
16
1At Yesus en wene asogo mo’gulentesirik e, pobuk mesik disogo mo’gulentesi,
“His henede ’buk otluk,
At nenebit, oluk, an nebe ’goboksogo uknebagupno oluk, wene ai ’berlegat mo’gulhentasu legi o. 2Aphwami o se’ban ogumu en his hene’gik lisogo lebikhonobouwa ani o. Ye, pobuk is aphwami his wathonobua a’ge enebe lo’bok onogola en e,
Allah paget obat warenebige, oluk, ua a’ge oruagat ani o. 3Is en asogo takhonobouwa ai re, an naik emin nenebe eneperlak ai enat takhonobouwa o. 4Asogo takhonobogwi holuk e, honogola en,
Wene yu, at en nadugat mo’gulnentesi ano, arat taknobogwi yu i o, oluk honogola oboruagoluk, wene ai ’berlegat mo’gulhentegis ani o,” oluk mo’gulentesi.
Yesus en e, “Allah Arogun en disogo takhenebasu lema ani o,” oluk mo’gulentesi wene
At Yesus en wene asogo mo’gulentesirik e, pobuk mesik disogo mo’gulentesi,
“An his henemin yema welege ai en e, wene yu ’berlegat his yo’go henebasulat mo’gulhonto erlakma en welegi a’geat de, 5pobuk, at an nebe peraknobou aga a’ge ano e’bek laik a’ge re, his mesik en e,
Nue. Hat o ’geba lagun, oluk nebam hin wokniogu legep modok erlak o. 6An en wene mo’gulhentegis ai en, his honogola modok wiak aga a’geat de, 7an en wene ebe ’baksogo mo’gulhentaik o. An legi ho puk holuk e, at his lethentasulom a’ge ai hene’bek welep erlak a’geat de, an laik ai en, at ai an en hene’bek perakpou weik o. Holuk e, an laik ai en, his henebaget op modok ema o, oluk demat mo’gulhentegis o. 8At ai ebe wotluk e, is aphwami ’gwiangma a’ge en togwi a’ge paget ’baksogo mo’gulentasulat,
His henede oborogu legep a’ge ai re, wiak togwi a’ge paget emin, ’bekhitsogo tugulom a’ge paget emin, Allah en wene enebam pasulat, no’gorliselat, tiso a’ge paget emin, henede wiak oborogu legep o, oluk wene ’baksogo mo’gulentauma o. 9At wotluk,
His en henede at Yesus ebam he’berik po erlak welegep ai dagan togu legep o, oluk ’baksogo mo’gulentauma. 10Ye, mesik e, an naik oruakma lasuam, his henil niagup modok erlak ai en e, at lethentasu lema a’ge ai wemarik e, wene hegitsogo tugulom a’ge paget ’baksogo mo’gulhentauma o. 11Ye, mesik e, Allah en aphwami ’gwiangma a’ge onue ’gain ano wene ebam poluk mabenap pesimu oruak ai en, at lethentasu lema a’ge ai wemarik e, Allah en wene enebam pasulat, no’gorliselat, tago ai paget ’baksogo mo’gulentau wemayat o. 12An en wene a’bigat mo’gulhonto a’geat de, his wo a’ge henebabut mia aga o. 13Asogo a’geat de, Allah Arogun, dem wene nak oso a’ge ai wemarik e, ebela eneperlakma enaluk a’ge yen mo’gulontogwi ai ’gela’ge, dem wene ’berlegat pobi togup en mo’gulhentasu lema o. Asogo mo’gulhentasu lema ai re, wene at ogola en ’gagalogo ese lema erlak o. We, at esa’go hweliso a’ge nak eselat e, pobuk ema a’ge mo’gulhentasu lema o. 14An niak mo’gulhentasu legi a’ge ai, at en wik-wok e, his mo’gulhentasu lema ai, an logo nebasu lema o. 15Di a’ge yu a’ge naik en a’ge ’berlegat e, an en a’ge ai en e, Allah Arogun ai an niak wik-wok, his mo’gulhentasu lema o, oluk mo’gulhentegis ai o,” oluk mo’gulentesi.
At Yesus en e, “Honogola wiak otlukmu en
pobuk honogola henagai hagup o,”
oluk mo’gulentesi wene
16At Yesus en wene asogo mo’gulentesirik e, mesik disogo mo’gulentesi,
“Agauwa weiyat weleiktik en, an nebe henil niagup erlak o. Asogo henil nio erlakma en agauwa weiyat logon weleiktik en, pobuk henil niagup ani o,” oluk mo’gulentesimu enesa’go hweligisarik e, 17at osi iak wogu legesa a’ge ebano pema akhit en, is-is nak en ogulat e, disogo egesa,
“At en e,
Agauwa weiyat weleiktik en, an nebe henil niagup erlak o. Asogo henil nio erlakma en, agauwa weiyat logon weleiktik en, pobuk henil niagup o, eselat,
An naik e’bek laik, eselat, egei ai, wene ebe nopaget egei epegep.
18An agauwa we, wei nak weleik, oluk egei ai, ebe nopaget en mo’gulnentesi epegep. Nis e, pobi tige modok erlak o,” oluk egesa. 19Asogo egesema, at Yesus en e,
“Is yu wene an nebam hin wokniouwogoluk ogwi hegi,” oluk enak a’ge pobirak enebesirik e, disogo mo’gulentesi,
“Narilak o. Agauwa wei nak wolomultik en e, an nebe henil nio erlakma en wolorogup ani o. Ye, agauwa weiyat logon woloroguptik en pobuk an nebe henil niagup ani o, oluk mo’gulhentegis ai paget his-his ogu legep a? 20Pobuk his honogola en ngi togwi nge togwi wolorogup a’geat de, is aphwami ’gwiangma a’ge onogola enagai houwa o. Asogo a’geat de, his honogola wiak wolorogup a’ge ai, pobuk op agoam honogola henagai a’bik hagup o, oluk demat mo’gulhentegis o. 21Hwe mesik emalik doru hegitsogo nonouk wiaksogo nonouk hegitsogoat tu nonouk a’bik tiso a’geat de, emalik ano arat dakhorloluk e,
Nemalik arat dakhwerlegi o, oluk ogola agai a’bik hasulat e, nonouk a’bik tiso a’ge ano meme oso yo. 22His asogoat. Yogodak honogola wiak welegep a’geat de, pobuk an nemin sarlok tul ai erlige, honogola henagai a’bik hagup ani o. Ye, his honogola henagai ai, is aphwami pema en erlagap pouwa modok erlak o. 23Hwerli ai hwerli arat lai lotluk e, his en wene mesik an nebam hin wokniagup modok erlak o. Holuk, an en wene mesik mo’gulhentaik o,
His en di a’ge yu a’ge an nonuk ’balogo naik ’gonu mo’gulorogup holuk e, at en wokhontouwayat o, oluk demat mo’gulhentegis. 24O naduk hwerli en yogodak hwerli, an nonuk ’balogo di a’ge yu a’ge logon ’gonu ogwi erlak welegepma o. Holuk e, honogola henagai a’bik hagup en e, at ’gonu mo’gulogu lemis o. Asogo mo’gulogulomma, wokhentasu lemayat o,” oluk mo’gulentesi.
At Yesus en e, “Aphwami ’gwiangma a’ge arat mabenabenebegi o,” oluk mo’gulentesi wene
25At Yesus en wene asogo mo’gulentesirik mesik disogo mo’gulentesi,
“Wene ’berlegat eba re, ebam elitsogo nak mo’gulhentasu legi a’geat de, pobuk naik obok eselat, ebam elitsogo mo’gulhentaik erlak o. We, ’baksogo nak mo’gulhentaik erlige oruagat o. 26-27His en e,
Yesus ebe Allah oruakma en waga a’ge, oluk, pobi nobugulat, henedeapnebigep ai re, naik en his ogo edeaphenebasuat o. His henebaget an en naik ’gonu mo’guleik oluk mo’gulhentasu legi erlak o. We, o ai erlige re, his honu’gwarek en an nonuk ’balogo naik ’gonu mo’gulorogup o. 28An nebe Allah oruakma en aphwami ’gwiangma a’ge ene’bek ’bu egi a’geat de, yogodak is ’gwiangma yema onoboluk togolik naik e’bek ligegeik o,” oluk mo’gulentesimu 29at Yesus osi iak wogu legesa a’ge ebano en e, disogo mo’gulegisa,
“Nue. Yogodak hat en wene ebam elitsogo mo’gulnonto erlak o. We, ’baksogo nak mo’gulnentigen o. 30Hat e, aphwami logon en wene mesik hin wokhio erlak holuk e, wene ebe heperlak puk o. Hat di wene yu wene ’berlek haluk nak hiege o. Hat hebe demat Allah en perakhobou wagama wegen o, oluk yogodak en pobi hebige o,” oluk mo’gulegisa. 31Asogo mo’gulegisema, at Yesus en e,
“Yogodak en de, arat pobi nebigep a?” oluk mo’gulentesi. 32Asogo mo’gulentesirik e, mesik disogo mo’gulentesi,
“His ’berlegat, ’bogulogo lebikhonoboma, an nematek nak uknoboluk honowi lo’gwe lo’bok ’bogologup ano owan welege a’geat de, yogodak arat lau waga o. His asogo ’bogologupmu, an naik e’birek wolomul ai paget e, nematek nak weleik erlak o, oluk demat mo’gulhentegis o,” oluk mo’gulentesirik e, 33mesik disogo mo’gulentesi,
“His an nemin hwedik welat, henede ha’buksogo welemagoluk, wene ai ’berlegat mo’gulhentegis o. His aphwami ’gwiangma a’ge di obotut yu obotut takhonobogu lema o. A’ge re, aphwami ’gwiangma a’ge arat mabenabenebegimu ai re, honogorlok erlaksogo welemis o,” oluk mo’gulentesi o.
اکنون انتخاب شده:
Yohanes 16: Wul
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
